1 Korinit 4:17 - Tataroha Diana

¹⁷ Aena leune mone no ko uusungeꞌinie wau a Timoti i seemiu. Ingeie domana oto a kaleku toꞌohuu na ko esu diana nana Aalaha paine ikie. Ingeie ke si haꞌananauꞌomu loꞌu aana mo haꞌatolanga nge nou lae peꞌi laeliwala aani i sulie mo soihaadaꞌinge aana taꞌena nga leu no ko lae-lae aana.

1 Korinit 4:17 ပူးပေါင်းရင်းမြစ်များ

Matiu 24:45

Oto a Jisas ko heꞌi unue loꞌu uuri, “?Aana a tei kaꞌu e saenanau na e neꞌi koni-konihe diana? Ingeie oto iini nge aalaha ingeie e neꞌie hunie ke lio i sulie ngaeta mwala auꞌesu aana maholo ko lae, na hunie ke nii-niie waaitada hunire i suli maholo.

Matiu 25:21

“Oto aalaha ingeie ko aalamie uuri, ‘O tohungei deu diana, na iꞌoe oto mwane auꞌesu diana, iini ni nou-norue. O lio i suli diana aana mo ola kaꞌa hunge, oto ne kei neꞌiꞌo o ke lio i sulie loꞌu mo ola hunge. Lae mai na o ke ilenimwaꞌe peꞌieu.’

Matiu 25:23

“Oto aalaha ingeie ko aalamie uuri, ‘O tohungei deu diana, na iꞌoe oto mwane auꞌesu diana, iini ni nou-norue. O lio i suli diana aana mo ola kaꞌa hunge, ne kei neꞌiꞌo o ke lio i sulie loꞌu mo ola hunge. Lae mai na o ke ilenimwaꞌe peꞌieu.’

Palonga 16:1

Kira Pol kire lai hule wau aana huilume i Debe, oto purihaꞌana kire si lae loꞌu hunie huilume i Listra nge kire oodoie ngaeta pwaarongoisuli a Jisas, satana a Timoti. Aamana mwane aana mo Aapoloa Aaopa, taꞌe nikana keni ni Jiu nge ko lulu i sulie a Jisas.

1 Korinit 11:16

Taꞌe mala uri nga mo iini hikemiu ko sare ere haitelili haahie leune, nga taa nou sai unue huniꞌomu mola uuri, iꞌemeelu mo hurulaꞌaa na mo soihaadaꞌinge a God aana mo huilume hai aaopaꞌi melu kaꞌa toꞌo aana ike loꞌu nga tala aaopa huni lae i sulie aani palonga.

1 Korinit 11:2

Na no ko laheꞌomu aena omu ko aama-aamasitoꞌo aaku taraureꞌi taane, na omu ko lae-lae i sulie mo haꞌa-uusulinge nge nou niiꞌi huniꞌomu.

1 Korinit 11:34

Na mala uri nga iini ko hiolo, nge ke holaꞌi ngeu oto wau i nume ingeie, mwaanie a God e leiꞌomu haahie tolahai ngeunge aaela ngeena aana maholo omu ko meni ngeu tararuru. Na ne ke si haꞌa-oodohie ngaeta mo ola loꞌu aana maholo ne kei lae wau i seemiu.

1 Korinit 14:33

Aena aana a God e kaꞌa saetoꞌo aana ike uri kie ke talei deu taꞌewau mola aana mo ola aana soihaadaꞌinge, taꞌe e saetoꞌo aana uri kie ke mani iiꞌo hata-hata mola ni henuelama. Oto mala i sulie tolahana ahutana mo soihaadaꞌinge,

1 Korinit 16:1

Oto no ko sare haꞌarongoꞌomu mola aana niinge huni peꞌie mwala a God aana poꞌo ni henue i Jiudia. Omu ke asuie oto mola mala nou hatongaꞌinie hunie mo soihaadaꞌinge aana poꞌo ni henue i Kalesia.

1 Korinit 16:10

Mala uri a Timoti ko hule i seemiu, omu ke lio i suli diana aana, aena aana ingeie ko esu noꞌone nana Aalaha ikie mala ineu.

1 Korinit 4:14

Nou kaꞌa unue ike mo ola ienini huni haꞌamasaꞌomu, taꞌe huni haꞌananauꞌomu mala mo mwela maaꞌi ineu.

1 Korinit 4:15

Maꞌalana uri omu ke toꞌo aana loꞌu nga mo iini hunge huni haꞌa-uusuliꞌomu aana tolahana a Kraes, taꞌe omu ke suꞌuri pulongosie uri ineu oto taꞌa-taꞌa aamamiu. Aana ineu oto nou tooleꞌomu mei i saana a Kraes maholo nou laeliwala aana tataroha diana namiu.

1 Korinit 4:2

Na omu saie taane e taꞌa-taꞌa mei ola mola ni e roroꞌa oto liutaa. E roroꞌa mola hunie mo koni-konihe kire ke asu toꞌohuu nana mo poro paine ikire.

1 Korinit 7:17

Oto ahutaka, kie ke mani saie uri mei meuringe nge nga iini e toꞌo aana maholo a God e soie mai i saana, mei niinge a Aalaha ni ngeena. Oto aena urine omu ke suꞌuri sare toliꞌaasie loꞌu, taꞌe omu ke ilenimwaꞌe mola haahie. Na haꞌatolanga nge no ko lae peꞌi haꞌarongoa ahutana mo soihaadaꞌinge aana ni otona.

1 Korinit 7:25

Hoe. Omu dolosi noꞌone i sulie mo mwane na mo keni nge kire iiꞌo pupupu. A Aalaha e kaꞌa niie ike nga mei haꞌatolanga i sulire, taꞌe ne kei unue mola neꞌisaenga ineu maraaku. Na aena aana a Aalaha e aamasieu na e manata diana hunieu, oto e neꞌieu hunie nga iini nge omu sai norutoꞌo aana.

2 Korinit 8:18

Na melu ko uusungeꞌinie ngaeta aasikaelu loꞌu oto noꞌone hao peꞌie a Taetas. Ahutana mwala aana ahutana mo soihaadaꞌinge hailiu kire haꞌamaꞌu aana aasikaelu ienini haahie asunge ingeie aani tarohaꞌinilana Tataroha Diana.

Epesas 6:21

No ko uusungeꞌinie wau a Tikikas i seemiu hunie ke haꞌarongoꞌomu aana mo ola i suliꞌemeelu. Ingeie tohungei malahukaelu toꞌohuu, aana ingeie ngaeta mwane auꞌesu diana aana asunge a Aalaha ni ngeena. Oto a Tikikas nge ke si haꞌarongoꞌomu aana mo tataroha i sulieu na ke haꞌadodoa saemiu aana walana.

Pilipae 2:19

Nou norutoꞌo uri e saꞌa tewa ike taane i naꞌona Aalaha ikie a Jisas kei haꞌamwadaꞌue hunieu, huni uusungeꞌinie wau a Timoti i seemiu. Hunie ineu noꞌone ne ke hii kohi aani rongolana nga mo tataroha mwaaniꞌomu.

Pilipae 2:22

Taꞌe omu lio saie oto asunge diana a Timoti, aana ko peꞌi diana aaku aani laeliwalanga aana Tataroha Diana, mala e ro heꞌi-aamana ko esuie taꞌa-taꞌa mei esunge.

Kolosi 1:7

Omu rongoa walu ola ngeena mwaanie a Epapras, iini melu tohungei manata diana hunie mala ngaeta koni-konihe a Kraes peꞌiꞌemeelu. Ingeie ngaeta mwane ni nou-norue na ko esu loko-loko peꞌiꞌemeelu tarau huniꞌomu.

Kolosi 4:9

Malahukaelu diana a Onesimas ko lae noꞌone wau peꞌie, na ingeie omu sai diana aana oto, aana ingeie ngaeta iini oto noꞌone aamiu. Oto kirerue ke si haꞌarongoꞌomu aana nga moi taa ko reu-reu mei i leu.

1 Timoti 1:18

E kaleku Timoti, mo wala nge no ko uusuꞌi weu huniꞌo ie kire kaꞌa ere aaopa ike mwaanie walana a God nge mo propet aana soihaadaꞌinge kire unu-unuꞌi keꞌu oalamu. No ko unue huniꞌo urine hunie o ke lulu i suliꞌi na hunie o ke ooho aꞌailaꞌa mala ngaeta ramo diana a Jisas.

1 Timoti 1:2

No ko uusue oto ie huniꞌo kaleku Timoti, aana iꞌoe oto mwela maaꞌi ineu aani hiiwalaimolinge. No ko eitanaie a God Aamaka na Aalaha ikie a Kraes Jisas, uri hahuꞌana manata-diananga, na aamasinge, na hanuelamanga ingeie ke iiꞌo peꞌiꞌo.

2 Timoti 1:2

Na no ko uusu-uusu oto ie huniꞌo kaleku Timoti, aana iꞌoe oto mwela maaꞌi ineu. No ko eitanaie a God Aamaka na a Kraes Jisas Aalaha ikie uri hahuꞌana manata-diananga, na aamasinge, na hanuelamanga ingeie ke iiꞌo peꞌiꞌo.

2 Timoti 2:2

O rorongoa oto mo haꞌa-uusulinge ineu hunie mwala. Oto saeku uri taꞌa-taꞌa taungei olana loꞌu mola nge iꞌoe noꞌone o ke haꞌa-uusulie mwala aani. Na oto liutaa, o ke haꞌa-uusuli aana mo ola ngeena hunie mo mwane ni nou-norue nge o saie uri ikire noꞌone kire sai haꞌa-uusulie ngaeta mwala loꞌu eeni.

2 Timoti 3:10

Taꞌe iꞌoe, kaleku, o saie oto mo haꞌa-uusulinge ineu na iiꞌolaku e uri taa, na nga moi taa no ko sare asuiꞌi. O lio saie kaꞌu oto hiiwalaimolinge ineu, na toli-rakonga ineu, na manata-diananga ineu hunie ahutana mwala, na toli-susuleꞌinge ineu aana maholo e aasa oto hiitoꞌo.

Taetas 1:5

Iau, kaleku, nou haꞌa-ooreꞌo kaꞌu mola wau i Krit hunie o ke haꞌamangoa mo esunge nge kure kaꞌa haꞌamangoꞌi ue, na hunie o ke lio hilisie nga mo mwane hunie kire ke neꞌi naꞌohai mwane huni lio i sulie mo soihaadaꞌinge i laona mo huilume wau i leune. O ke asuie walu ola ngeena mala nou unuꞌi oto huniꞌo.

Haataꞌinge 2:10

Mwaanie omu meꞌu-meꞌuteꞌinie nga mei ola aana walu ola nge karaꞌinie oto kire kei reu eemiu ngeena. !Omu ke rongo kaꞌu! A Pwelu Eero-eero kei malaahongamiu na kei aasie ngaeta mo iini eemiu i laona nume ni hoꞌo, na taungeꞌinilemiu kei lae mola i sulie aawalai hei dinge haahuu. Omu ke hele susuleꞌi mola aaku lai hule aana maenga, oto ne kei niie huniꞌomu rorodara ni meurihe.

Haataꞌinge 2:13

“Nou saie taane uri omu iiꞌo aana leu nge naunekume a Pwelu Eero-eero e iiꞌo aana, taꞌe maꞌalana e urine omu hele paipesi toꞌohuu aana sataku. I Pegamam nge leu kire horo maesie a Antipas aana, iini e tohungei sai houleꞌinieu. Taꞌe maꞌalana aana maholo aaela urine, na omu kaꞌa toliꞌaasie ike hiiwalaimolinge iꞌomu eeku i matolana mwala aana hanue a Pwelu Eero-eero ngeena.