1 John 5:4 - Ömie: God-are Jögoru Iꞌoho

⁴ God-are aboji harihu'e aho'obëhe sa'are mu sisëho biririvoromo ruahö'öjarueje. Ruahö'ö'iröhe hesi öroho no Iesu mae uehorovaruohuro ëhuro ruahö'öjarueje.

1 John 5:4 ပူးပေါင်းရင်းမြစ်များ

John 1:13

God-are aboji harihu'e raejëvade hesi öroho bogo aehu nimoromo baejëvamu i'oroho rahëvo'i a'i God-ro baejëvë'ëro ëhuro hesi aboji harihu'e jëvadeje.

John 16:33

Ëjöho na majëhijajëjo ëhuro jemë heromo nasi ae gemuohuro jëvë'ëro juhuonoho bogojëvo'i huë mae jëvo'iröhego. Sa'are jiaje mu sisëro jië'ëro ëhuro sa'are raromoromo huë vavaene bae'a'arujëjo. Ëhi höjo röhu naro mu sisëho ruahö'öjë'e jevaje ëhuni biririvorëjo.

John 3:3

Bogo eni javuo'ibejajamu Iesuro uavadeje: Ave jöho na jö mae ua'ië'ajëjo. Ae mami'e rahadoho röhu maho bogo raho'amë'oho God-hu muebejaje öri ari'o garuomoröhoho bogo eni jioruomo'ajëjo.

1 Corinthians 15:57

Iae ëhi jie röhu God-are örire mabëhe ua'ejo. Huro nosi Bada Iesu Keriso uavë'ëro huro vuovavuaje örohu'o mu sisë ioro'iorohu'o ruahö'ö'amajeje ëhuro no mae javuoröhego.

1 John 2:29

Jemëro garomo uvarujeje: Keriso iae a mae höjo. Ëhuni uvo'a'aruje: Ae rahu mu mae vaejë'oho God-are aboji harihu'e javuajëjo.

1 John 3:9

Ae rahu God-are aboji harihu'e jëvë'oho Vavu örëro jëvë'ëro ëhu'ëro jabumë bogo mu sisëmuoho vaejarueje. God-are aboji harihu'ëro jëvë'ëro mu sisëmu vae'iröhoho jabumë bogo eni jëve.

1 John 4:4

Hesi sareri sareri'e muoho vaeromo Keriso-are jöho sisë'i majëhijarueje. Iae ëhi ë'arueje röhu nasi aboji harihu'e jemë God-are ariböviëro jëvë'ëro Keriso-are jö sisë'i majëhijarue aribövi jabesi muoho ruahö'öjë'e jëve. Ëhesi bëhoho jemëro God-are Aru'ahoho bae'i sa'a hesi mu sisë uehorovarue ariböviohuro Satan-are darugoho baeruomë'eje. Röhu God-are Aru'aho hesi daruge jemesirire jiajohuro Satan-are daruge jabesirire jiajoho iosiramijë'eje. Ëhu'ëro jië'ëro jemëro Keriso-are jö sisë'i majëhijarue aribövi jabesi muoho ruahö'öjë'e jëve.

1 John 5:1

Ae rahu mae uehorovoromo uvë'oho: Iesu hu böröme namiromo ajamuaje ae hö uvë'oho ëhi jië'e aribövioho God-are aboji harihu'e jioruome. Ae rahu vavu dë vövöbajo'ere uehorovë'oho ë vavu hesi aboji harihu'ohu'o dë vövöbajo'ere uehorovëvo'anue.

1 John 5:18

No garomo uvarueje: Ae rahu God-are aboji harihu'e javuë'oho mu sisëho bogo vaemu vaejarue höjo. God-are Harihohuro tugohahuego A Sisëho nosi öriroho bogo ijumavuajeje.

1 John 5:5

Diehi jië'e ariböviohuro sa'are mu sisëho ruahö'öjarueje. Ae rahu uvë'oho: Iesu hu God-are Harihe hö uvë'ohuro ëhi jië'e ariböviohuremu sa'are mu sisëho ruahö'öjarueje.

Revelation 12:11

Nosi Christian ö mueno'ohuro uvare höjo: God-are Sheep Harihoho köe rueromo guomë'ëro mae javuajë uvoromo hesi jöho ae sama'e majëhiromo ëhuro sisëho ruahö'öruomade höjo. Jabesi sinoho bogo uehorovo'i uvare höjo: No Keriso-are jöëni vuovë'oho iae hesi höjo.

Revelation 15:2

Ëhi jio'i röhu gavodeje jovo e'u deri va'ëne börömo böröme jiamu. Ëe'u va'ënire vënëro ravanovoromo kavuohijo. O ë e'u va'ëne hesi riröre ae riravohijo. Urimoho ë ariböviohuro biririvoromo mi sisëhu'o hesi nu ano'o va'ëne inömohu'o ëho jabesi muoho jöho bogo ejëhoromo mi sisë hesi ihoho sinoroho bogo bae'i ruahö'öjareje. Ëariböviohuro God-hu i'imëmade gitaho ujuohë'e e'u va'ëne ë hesi riröre riravohijo.

Revelation 2:11

Ae rahu ja God-are jö hejanue ae javë'oho nasi Aru'ahehu ekaresia majëhibe rovaje jöho heromo avoho uehorovonëjo. Ae rahu biririvoromo mu sisë ruahö'öjë'oho sinoho guomavo'iramu ijonöho aru'ahoho bogo guomavoromo sisëroho va'i maro hi'a'anuëjo. Ahia mino'ëjo.

Revelation 2:17

Ae rahu ja God-are jö hejanue ae javë'oho nasi Aru'ahehu ekaresia majëhibe rovaje jöho heromo avoho uehorovonëjo. Ae rahu biririvoromo mu sisë ruahö'öjamu gavë'oho naro suvuore bojami'ejöjo. Suvuoro hesi bëhoho urimë'i God-are ariböviehu a rumo'e sa'are jijihamu God-hu muebejëvoromo ö'idöre jiaje i i'imëmijadëhi naro ja ëhi muebejavoromo gurihijë'e ö'idöre jiaje ioho i'imami'ejöjo i'iranego. Ö'idöre jiaje ioho i'imamiromo ajivë'e munëho bojami'ejöjo. Ëmunë hesi döre iho i'e jajivë'e jio'a'ajëjo. Ëihoho jasi sivue ga'a'anuëjo. A göho bogajo. Ahia mino'ëjo.

Revelation 2:26

Ae rahu mu sisë ruahö'öromo biririvoromo nasi mu ma'enobe va'ojuvo jasi maja barëjë'oho naro ja daruge bojami'iramu sa'ae aho'o muebejëvo'anuëjo.

Revelation 2:7

Ae rahu ja God-are jö hejanue ae javë'oho nasi Aru'ahehu ekaresia majëhibe rovaje jöho heromo avoho uehorovonëjo. Ae rahu biririvoromo mu sisë ruahö'öjamu gavë'oho Iesu naro ja ua'ejöjo a i'ovëvo'iröhe ije God-are mure namijaje hesi bajoho i'iranego. Ahia mino'ëjo.

Revelation 3:12

Ae rahu biririvoromo mu sisë ruahö'öjë'oho naro baejavoromo nasi A Böröme God-are osare bamavo'iramu bönunö'e bibivoromo namijanovo'anuëjo bogo ijoho rori'o va'iranëro. O nasi A Böröme God-are ihoho jasi sinore jajivaho'ejöjo ja hesiremu javoröhego. O nasi A Böröme God-are amo hesi ihoho sinore jajivaho'ejöjo. ËJerusalem amo i'oho nasi A Böröme God-hu hijajire ö'idöre jioromo ruvebi'iröhoho ë amo hesi ihoho uavajëjo. O nasi iho i'ohu'o jasi sinore jajivaho'ejöjo.

Revelation 3:21

Ae rahu biririvoromo mu sisë ruahö'öjë'oho urimo naehu biririvoromo sisë ruahö'öromo ajiomoromo nasi Vavu hesi röho mare hu'o gemu mae hijë'ëro bövi bise'o muebejëvajëhi naro ëhi ja ua'iramu nasi röho mare ö'oromo na'o gemu mae hiromo na ajemiromo bövioho bise'oho muebe'amo'anuëjo.

Revelation 3:5

Ae rahu biririvoromo mu sisë ruahö'öjë'oho ajivë'e niögoho ëhi ba'amo'anuëjo. O jasi ihoho mae raromemu raromo'iröhe aribövi jabesi surire jajivodoho na bogo mu'uvaho'ejöjo. Bogo mu'uvaho'i a'i naro nasi Vavu hesi nunire o anera jabesi nunire namiromo jasi ihoho ma-samae majëhiromo uë'ejöjo: Ave aho nasi a maho höjo.