Taitus 1:2 - Aria New Testament

² Ngaboko ma ngalua aitno lisak ila dagar ma aitno lisak mter ke urok mosongon ka dong vala dong alo ka itodong kap Ida Tapolngon. Oglou oglou ari alo ka Ida Tapolngon dau tapol wan gesa kovok iye wai dagar ma iye kar mosongon tonari ke ite. E iteile iye yakyak kovok.

Taitus 1:2 ပူးပေါင်းရင်းမြစ်များ

Matyu 25:34

Deka ma gute ka vri mgo ke omur are wai ke osep ka tidong ke galna odung langane. ‘Umu osep ka Livou due aitno lumu itau itau umomo e umodue omur ka Ida Tapolngon rere ke umu alo ka iye tapol wan ka pula keniye.

Matyu 25:46

E Yesus babrum ila pelengon langane. “Osep tonari ma tidue ulesngen ka dong vala dong. E osep ka tidong itau e osuk ma tidue urok mosongon ka dong vala dong.”

Mak 10:17

Alo ka Yesus nogrum la ke ila langan gute gesa suong me polou ke iye e grum kamla ke bitna deka wai langane. “Wom gute parerengen ina ka itau ma ngadue sua deka ngadue mosongon ka dong vala dong?”

Mak 10:30

Osep ka tisongon urok wan bitna bitna langane ma Ida Tapolngon lua isak ma tidue wan pula pula langka tisongone alo ka isak dau tidong ke taklak ane. Mase ma Ida Tapolngon kar urok ninu e osep langka inarak titovro e inarak saiver e sulutorok e titnarak e titorok e inarak taklak ke isak. E ma osep tidue agegeng ke isak blang. E mase ma tidong ke mosongon itau lokono ka dong vala dong.

Jon 10:28

E ngakar isak mosongon ka dong vala dong e ma timete kovok e gute kene karanga pi isak ke lungu kovok.

Jon 17:2

Kesua amkar arit ke ngong ma ngaplau osep ka pula keniye ma ngakaranga ngakar mosongon ka dong vala dong ke osep ka amkar isak ke ngong.

Jon 17:24

“Livou ngawaiki osep ka amkar isak ke ngong ma tidong kap ngong ke omur ka ngadong ine. Ma tivati lou elio itau lokono e lou arit ka omba ka amkare ke ngong. Kesua wom lana wom ke ngong mgo ke alo ka amtapol wan ka pula keniye ke taklak.

Jon 5:39

Umanana dagar ke Ida Tapolngon ila pelengon kesua aitno lumu mter ila pelengon karanga nis umu ke ekreng ka kar lumu mosongon ka dong vala dong ke umu. E aurou. Pelengon tonari palongo lumu ke ngong.

Jon 6:54

Gute sei ka ngen pampamu lungong e inim ngau marau io mosongon ka dong vala dong ma dong ke iye e ma ngadue tito e dong blang ke oklou ka Ida Tapolngon wade osep ka pula keniye urok elio ine.

Jon 6:68

E Saimon Pita koli wai langane. “Ipem Puda ma imala imedidi gute sei silang? Kesua wom vala gute ka amwai pelengon ka due osep tidue mosongon ka dong vala dong.

Aposel 15:18

Ida Puda wai pelengon tonari kodong e due osep tile ine oglou lila me kodong.’”

Pas ka Pol sogoe uti la ke osep Rom ina 1:2

Oglou kodong Ida Tapolngon wai promis ma ila omon tonari polou lokono. Oglou iye due osep napaprangan ina aitno lisak deka tisogo ine ke buk gesa ke Ida Tapolngon ila pelengon ka itau lokono.

Pas ka Pol sogoe uti la ke osep Rom ina 16:25

Ma itakakai Ida Tapolngon angaine tito la egim. Kesua iye tona karanga due aitno lite ila dagar kis dagar ke Ida Tapolngon ila omon itau ka la ke Yesus Krais ka nganapapra ine. Oglou ari osep tile omur ke Ida Tapolngon ila omon itau kovok. E eknikane iteile ine kesua Ida Tapolngon lua ite ine.

Pas ka Pol sogoe uti la ke osep Rom ina 2:7

E osep ka tidong dagar ke elio itau tiwaiki ma Ida Tapolngon kar isak urok mosongon ka itau lokono ka dong vala dong. Tiwaiki ma tidong kap iye e ma iye kakai angainsak. E ma Ida Tapolngon due osep urok mosongon itau lokono dong vala dong.

Pas ka Pol sogoe uti la ke osep Rom ina 5:2

Iye lua ite e Ida Tapolngon ila makaingan kading ite batne ke Yesus ka aitno lite dagar ine kodong. Deka aitno lite neser ke iye kesua iteile omur ma Ida Tapolngon kakai ite kap Yesus.

Pas ka Pol sogoe uti la ke osep Rom ina 5:21

Oglou elio epmes ina kading itosep e itosep keniye itemete ine. E eknikane Ida Tapolngon ila makaingan due ite e kading ite. E Ida Tapolngon due ite itopolou itau e osuk ke bitna. Deka udo mosongon ka itau lokono ina yagosngon kovok batne ke Ida Puda Yesus Krais dong.

Pas ka Pol sogoe uti la ke osep Rom ina 5:4

Aitno lite tipolou dagar lokono ke Ida Tapolngon deka ma aitno itau ke ite. Deka ite ka Ida Tapolngon aitno itau ke ite ma aitno lite tipolou dagar lokono ke iye e ma itapara ke alo ka itodong kap iye.

Pas ka Pol sogoe uti la ke osep Rom ina 6:23

E osep ka tidue elio epmes ina bitna bitna ma timete ine. Kesua elio epmes ina ina klingen metengen. E ite ka Ida Tapolngon klok udo elio epmes ina kodong iye kar ite mosongon ka itau ka dong vala dong. Iye lua ite batne ke Ida Puda Yesus Krais dong e itokoli batne la ine kovok.

Kolosi 1:27

Ida Tapolngon didi aitno e nis ila osep ke pelengon ka oglou dong kukwop ma tile omur ine. Pelengon tonari itau lokono e karanga lua osep ka pula keniye. Pelengon ka kukwop langane. Krais dong kap umu e ma umapara ke iye ma iye me kum umu e umala umodong kap iye ma umodue wan ka pula keniye ka omur heven ina.

1 Tesalonaika 2:15

Oglou osep Yuda ina timluk osep napaprangan ina ma timete kodong e silang blang timluk Ida Puda Yesus ma iye mete kodong blang. E tisapir imi ke omur tonari. E aling aling aitno lisak engil ke osep deka Ida Tapolngon aitno soulu lokono ke isak.

1 Tesalonaika 5:8

E itodong ke oklou deka ma iteile ite itau. Eriar langka gute ola ina kis ila osua dagar ma osua kading iye itau deka umekis dagar ke aitno lumu ila dagar e ke elio ka umu lana umu ke osep. E elio ka itapara ma Ida Tapolngon lua ite iye langka hat kapa ka kading gute ola ina otuk ine.

1 Timoti 6:12

Gute ka aitno dagar ke Krais iye langka gute ka due resis. Deka omsuong engil ma ommole resis e omdue lem mosongon ka dong vala dong. Omdue mosongon tonari kodong alo ka emvri e ampalongo ke osep pula amtarsak langane. “Aitno lungong dagar ke Krais.”

1 Timoti 6:19

Langka tidue langane mase Ida Tapolngon ma kar isak wan ka lua isak e ma tidue urok mosongon ka mosongon itau lokono.

2 Timoti 1:1

Ngong Pol ngong Krais Yesus ila aposel gesa. Ida Tapolngon didi aitno e rere ngong ila aposel. Ma ngawai ke osep ke mosongon oku ina ka dong vala dong. Ida Tapolngon wai promis ma iye kar mosongon oku ina tonari ke osep ka aitno lisak dagar ke Krais Yesus.

2 Timoti 1:9

Ida Tapolngon lua ite ke udo elio epmes ina kodong e rere ite itodong ila osep ka itau lokono. Iye due langane batne ke elio gesa ka itakaranga itodue kovok. Aurou. Oglou alo ka iye dau tapol wan gesa kovok iye didi aitno e didi ila makaingan e rere ite ma aitno lite la dagar ke Krais Yesus.

2 Timoti 2:10

Osep tidue agegeng ke ngong e dau ngadong dagar ine kesua ngawaiki ngalua osep ka Ida Tapolngon rere isak ila osep. Ma Krais Yesus lua isak ke urok elio epmes ina e tidue mosongon ka dong vala dong kap iye.

2 Timoti 2:13

Langka itawai ma itedidi Krais e mase itabauluk aitno lite e itedidi udo pelengon tonari kovok iye dau didi ila pelengon. Kesua iye karanga bauluk e dar ila pelengon kovok.

2 Timoti 2:15

Omboko dagar ma Ida Tapolngon aitno itau ke lem bokongon. Ma amkaranga amwai osuk ke Ida Tapolngon ila pelengon ka lokono. E ma wom mnak wom ke lem bokongon kovok.

Taitus 2:13

E aitno lite dagar ke Ida Tapolngon e itapara ke oklou ka ite ma itavati iye e itapara ke Ida Luangan Krais Yesus ka iye itau lokono. Ma iye polou malak lokono deka itavati iye kap ila bublongon e ila arit.

Taitus 2:7

Deka Taitus ke wan ka pula keniye ka omdue ma omdue elio itau ine vala ma osep tivati lem elio isuk isuk itau e tikanae. Alo ka amparere osep amwai osuk vala e omdue anit ke Ida Tapolngon ila pelengon.

Taitus 3:7

Ida Tapolngon makai ite e due ite itopolou itau lokono ke bitna. Ke elio langane iye rere ite ma itodong ke udo mosongon ka oku ina aling aling. E itodong itapara ke udo mosongon ka dong vala dong.

1 Jon 2:25

E Krais wai promis kodong ma iye kar mosongon ka dong vala dong ke ite.

1 Jon 5:20

Iteile Ida Tapolngon Otno Arang duru me ke taklak e kar ilengen ke ite ma itakaranga iteile Ida Tapolngon ka lokono. E itodong kap iye ka lokono e itodong kap Otno Arang Yesus Krais. Ida Tapolngon iye tona Tapolngon ka lokono e itodue mosongon ka dong vala dong batne ke iye.

Pas ka Jut sogoe 1:21

Ida Tapolngon lana iye ke umu e ngawaiki aling aling aitno lumu mter ine. E umapara ke alo ka Ida Puda Yesus Krais aitno due umu e kar lumu mosongon ka dong vala dong ke umu.

Pelengon kukwopngon 13:8

Osep ka pula keniye ka tidong ke taklak tilotuim ongwa kevena tonari. E oglou oglou ari alo ka Ida Tapolngon dau due taklak kovok iye sogo osep angainsak ke Sipsip Otno ka timter iye ma iye mete ila buk ka mosongon ina. E osep ka tilotuim ongwa kevena angainsak tidong ke buk tonari kovok.

Pelengon kukwopngon 17:8

Ongwa kevena ka amvati iye dong ke oglou e eknikane dong kovok e isuk boto ma iye tito ke ovuk ka duru la ke moli lokono e me deka Ida Tapolngon ma due agegeng ke iye ma iye yagos. E osep ka tidong ke taklak ka angainsak tidong ke Ida Tapolngon ila buk ka mosongon ina kovok nogrum ke alo ka Ida Tapolngon due taklak ma tidigrik e aitno lisak mter pula ine. Kesua ke oglou ongwa tonari dong e eknikane iye dong kovok e mase ma iye dong blang.”