Pas ka Pol sogoe uti la ke osep Rom ina 5:17 - Aria New Testament

¹⁷ Oglou ari Adam due elio epmes ina deka metengen duru ke osep ka pula keniye e due isak timete. E elio ka Yesus Krais lua ite ine mole elio ka oglou Adam due e duru dong ke ite. Deka osep ka Ida Tapolngon makai isak omba e due isak tipolou itau e osuk ke bitna kodong urok mosongon itau lokono. E osep ka tipolou itau e osuk ke Ida Tapolngon bitna kodong ma tidong itau kap Yesus blang.

Pas ka Pol sogoe uti la ke osep Rom ina 5:17 ပူးပေါင်းရင်းမြစ်များ

Matyu 25:34

Deka ma gute ka vri mgo ke omur are wai ke osep ka tidong ke galna odung langane. ‘Umu osep ka Livou due aitno lumu itau itau umomo e umodue omur ka Ida Tapolngon rere ke umu alo ka iye tapol wan ka pula keniye.

Jon 10:10

E gute panakongon ina me ma iye panako wan e due burwa ke osep e due agegeng ke osep vala. E ngame ma osep tidue mosongon ka dong vala dong e mosongon tonari due wan itau bon ke isak.”

Pas ka Pol sogoe uti la ke osep Rom ina 5:12

Oglou ari Adam due elio epmes ina gesa ka mgo ke elio epmes ina ka pula keniye. Deka ari elio epmes ina e metengen duru dong ke iye. Deka elio epmes ina e metengen tonari pakes duru ke itosep ka pula keniye. Kesua batne elio epmes ina ka mgongon ka Adam due.

Pas ka Pol sogoe uti la ke osep Rom ina 5:15

E Adam ka mgo ke ite e gute ka mase dau tauni me polou ke ite urok elio la pulu kovok. Kesua oglou Adam due elio epmes ina. Deka osep ka pula keniye ka tipolou batne ke iye timete batne ke elio epmes ina tonari ka iye due. E gute Yesus due elio epmes ina gesa langka oglou Adam due kovok. Aurou. Yesus me polou ke ite e lua ite vala e dong itau vala. Deka Ida Tapolngon due ila makaingan polou ke osep ka pula keniye e lua isak ke urok elio epmes ina. Iye lua osep langane batne ke gute kene Yesus Krais vala.

Pas ka Pol sogoe uti la ke osep Rom ina 5:20

Oglou ari Ida Tapolngon due Moses aitno deka iye sogo Ida Tapolngon ila pelengon ka dong kap osep. E osep ka tile omur ke sogongon tonari tidare aling pula e urok elio epmes ina pula vri ke isak. E alo ari Ida Tapolngon didi aitno e pagei ila makaingan ke osep ari e ila makaingan tonari res polou ombatno e mole elio soulu ka dong ke osep ari.

Pas ka Pol sogoe uti la ke osep Rom ina 6:14

Umadangdang elio epmes ina ma iye dong upu puda kovok. Kesua eknikane umedidi elio langka Ida Tapolngon ila makaingan. E umedidi Moses ila sogongon kovok.

Pas ka Pol sogoe uti la ke osep Rom ina 6:23

E osep ka tidue elio epmes ina bitna bitna ma timete ine. Kesua elio epmes ina ina klingen metengen. E ite ka Ida Tapolngon klok udo elio epmes ina kodong iye kar ite mosongon ka itau ka dong vala dong. Iye lua ite batne ke Ida Puda Yesus Krais dong e itokoli batne la ine kovok.

Pas ka Pol sogoe uti la ke osep Rom ina 8:39

Omur ka egim koke omur ka moli tikaranga tidangdang Ida Tapolngon ma iye lana iye ke ite kovok. Wan kene gesa dong ke omur ka pula keniye ka karanga dangdang Ida Tapolngon ma iye lana iye ke ite kovok. Aurou. Iye lana iye ke ite vala kesua batne ke Ida Puda Krais Yesus dong.

1 Korin 15:49

E eknikane itodong eriar langka gute taklak ina. E mase ma itodong eriar langka gute omur heven ina.

1 Korin 4:8

Aitno lumu lange? Lumu wan ka pula keniye bon kodong i? Lumu wan ka pula keniye dong e umodong itau lokono. Langka umomole imi kodong e umopolou langka osep ka tivri mgo ke omur omur. Aitno lumu langane i? Aisudo. Ngawaiki ma umodong umopolou langka osep ka tivri mgo ke omur omur lokono. Ma imi blang imopolou imodong langka osep ka tivri mgo ke omur omur blang kap umu.

Filipai 3:9

Ngadong kap Krais e ngadong itau e osuk ke Ida Tapolngon bitna batne ke elio ka ngadidi Moses ila sogongon kovok. Aurou. Eknikane ngadong itau e osuk batne aitno lungong la dagar ke Krais. Elio ka Ida Tapolngon due ngong ngadong itau ke bitna batne aitno lungong la dagar ke Krais.

1 Timoti 1:14

E Ida Puda Krais Yesus makai ngong omba lokono. E iye sruk aitno lungong ma aitno lungong dagar ke iye. E iye due aitno lungong la ke osep leklou blang.

2 Timoti 2:12

Langka itodong dagar ke elio ka opru ite mase ma itaplau osep kap Krais. E langka itopul dogur ke Krais mase ma iye pul dogur ke ite.

Jems 2:5

Sipmi. Umoklingen lou pele-ngon ane. Ida Tapolngon rere osep ka urok wan isuk boto vala ke taklak ane ma aitno lisak ila dagar dong dagar lokono ke iye. E iye rere isak ma mase tidong ke omur ka iye plaue ka iye wai promis ine ke osep ka isak lana isak ke iye.

1 Pita 2:9

E Ida Tapolngon rere umu ma umodong ila osep. E Ida Tapolngon ka vri mgo ke ite e plau ite rere umu ila osep loulou ina. E iye rere umu ila osua ka itau itau lokono. Iye rere umu ila osep kesua iye waiki umanapapra osep pula ke ila elio itau ka iye due. Iye gi umu ma umosongon lumu elio epmes ina e umesep ke ila bublongon ka itau lokono. Ila bublongon tonari itau itau lokono.

Pelengon kukwopngon 1:6

E iye rere ite ila osep ite e due ite itopolou langka osep loulou ina e itodong langka osep loulou ina ke Ida Tapolngon ka Pmada. Aling aling itakakai angaine tito la egim. E ila arit omba lokono e iye plau wan ka pula keniye. Lokono.

Pelengon kukwopngon 20:4

Deka ke omur heven ngavati kova pula e osep tidong ke isak ka Ida Tapolngon kar arit ke isak ma tiwade osep ka pula keniye urok elio isuk isuk. E silang blang ngavati ansak ke osep ka aitno lisak dagar ke Yesus e tipalongo osep ine e tidong dagar ke Ida Tapolngon ila pelengon. Oglou tilotuim ongwa kevena kene ina e ila sapingen kovok e tidue ila nisngen ke bara lisak koke limsak kovok. Deka ke batne langane osep tiblou otuk lisak ma timete. Timete deka Ida Tapolngon due isak tidong blang e tidong langka osep plaungan ina kap Krais la lama iding ke tobor 1,000 mela yagos.

Pelengon kukwopngon 20:6

Osep ka tipoga titito ke baulukngon kene ina Ida Tapolngon rere isak ila osep e aitno lisak itau itau ine. E metengen orwo ina karanga due isak blang kovok. E tidong langka osep loulou ina ke Ida Tapolngon e Krais e tidong tiplau osep kap iye iding ke tobor 1,000 mela yagos.

Pelengon kukwopngon 22:5

E epmes polou blang kovok e lam koke oklou tibublo blang kovok kesua Ida Tapolngon ka iye Ida Puda blang ila bublongon bublo ke osep tonari. E iye plau isak dong vala dong.

Pelengon kukwopngon 3:21

“Ma ngasongon gute ka mole elio soulu ma iye dong kap ngong ke lou kova langka oglou ngamole elio soulu e ngadong kap livou ke ila kova.