Pas ka Pol sogoe uti la ke osep Rom ina 4:16 - Aria New Testament

¹⁶ Lama tididi pelengon dagar kovok Ida Tapolngon dau due elio itau ke isak kesua aitno lisak dagar ke iye. Ma iye vati isak eriar langka isak Abraham ila napakngan leklou. Kesua aitno lisak dagar ke iye eriar langka oglou Abraham aitno dagar ke iye. E osep ka pula keniye ka aitno lisak dagar ke Ida Tapolngon pmarak Abraham. Kesua aitno lisak dagar ke Ida Tapolngon vala.

Pas ka Pol sogoe uti la ke osep Rom ina 4:16 ပူးပေါင်းရင်းမြစ်များ

Luk 19:9

E Yesus wai ke iye langane. “Eknikane Ida Tapolngon lua osep ka tidong ke ninu ane ke urok elio epmes ina. Kesua wom blang Abraham ila napakngan gesa.

Pas ka Pol sogoe uti la ke osep Rom ina 15:8

Ngawai langane. Krais polou langka gute bokongon ina ma iye lua osep Yuda ina. Iye due langane ma tile omur Ida Tapolngon ila elio didi ila promis ka oglou iye wai ke urok seia ine.

Pas ka Pol sogoe uti la ke osep Rom ina 3:22

Eknikane elio kene vala dong ka Ida Tapolngon didie e due osep tipolou itau e osuk ke bitna. Iye due osep ka pula keniye ka aitno lisak la dagar ke Yesus Krais tipolou itau e osuk ke bitna. Iye due ila elio kene langane ke osep ka pula keniye.

Pas ka Pol sogoe uti la ke osep Rom ina 3:30

Ida Tapolngon iye kene vala dong. E osep ka pula keniye ka aitno lisak dagar ke iye ma iye due isak tipolou itau e osuk ke bitna langka tididi elio ulangngan ina koke tididi elio ulangngan ina kovok.

Pas ka Pol sogoe uti la ke osep Rom ina 4:11

Oglou Abraham aitno dagar lokono ke Ida Tapolngon kodong deka lokono Ida Tapolngon due polou itau e osuk ke bitna. Iye polou itau e osuk ke bitna e mase Ida Tapolngon kar iye elio ulangngan ina. E elio ulangngan ina nisngen gesa ka nis osep Ida Tapolngon aitno itau ke Abraham. Aitno itau ke iye kesua oglou Abraham aitno la dagar ke iye. E eknikane osep ka pula keniye ka aitno lisak dagar ke Ida Tapolngon e tipolou itau e osuk ke bitna pmarak Abraham. Iye pmarak lama oglou tididi elio ulangngan ina kovok.

Pas ka Pol sogoe uti la ke osep Rom ina 5:1

Eknikane itopolou itau e osuk ke Ida Tapolngon bitna kodong kesua batne aitno lite ila dagar la ke Ida Puda Yesus Krais mgo. Deka iye lua ite e due Ida Tapolngon aitno epen ke ite batne ke iye.

Pas ka Pol sogoe uti la ke osep Rom ina 9:8

E langane. Abraham ila napakngan leklou Ida Tapolngon titno kovok. E Abraham ila napakngan ka tipolou kesua batne ke Ida Tapolngon wai dagar ke Abraham ine iye vati isak kensak kensak langka Abraham ila napakngan lokono.

Galesia 3:14

Ida Tapolngon kar kerengen ke Abraham e iye wai ma kerengen la ke osep ka pula keniye. Deka ke bokongon ka Yesus Krais due kerengen tonari polou ke osep ka pula keniye kodong. Ite ka pula keniye ma aitno lite dagar ke omon itau e ma itodue Ano Itau langka oglou Ida Tapolngon wai promis ine.

Galesia 3:16

Oglou Ida Tapolngon wai ke wan itau ka mase ma polou. Ida Tapolngon kar promis dagar tonari ke Abraham orwo otno. Ida Tapolngon ila pelengon wai ke Abraham titno pula kovok. Aurou. Iye wai ke otno kene vala. Otno tonari Krais.

Galesia 3:22

Ida Tapolngon ila pelengon wai elio epmes ina due ite ka pula keniye ka itodong ke taklak itodong langka itodong ke kalabus. E Ida Tapolngon songon elio tonari polou ma aitno lite dagar ke Yesus Krais. Deka ma itodue wan ka Ida Tapolngon wai dagar kodong ka ma iye kare ke osep ka aitno lisak dagar ke iye.

Efesus 2:5

Iye lana iye omba ke ite e alo ari talda klingen Ida Tapolngon ila pelengon kovok e udo elio epmes ina tek ite ke Ida Tapolngon. Deka itodong langka osep ka angainsak timete kodong. E dau Ida Tapolngon makai ite e lua ite ke udo elio epmes ina. Deka iye due ite itopoga itetito e itodong blang e iteneklep ke Krais.

Efesus 2:8

Ida Tapolngon lua umu ke lumu elio epmes ina kesua batne ke ila makaingan ka dong ke iye tona. Iye lua umu ke lumu elio epmes ina kesua aitno lumu la dagar ke Krais. E iye lua umu kesua batne ke elio kene gesa ka umodue kovok. Aurou. Iye didi aitno e lua umu adai vala. Deka umakaranga umakakai angainmu ine kovok.

Taitus 3:7

Ida Tapolngon makai ite e due ite itopolou itau lokono ke bitna. Ke elio langane iye rere ite ma itodong ke udo mosongon ka oku ina aling aling. E itodong itapara ke udo mosongon ka dong vala dong.

2 Pita 1:10

Sipmi. Ida Tapolngon gi umu e rere umu ila osep kodong. Deka umu arit umu ma umodue elio isuk isuk ka itau ma umeile omur Ida Tapolngon rere umu ila osep umu. Langka umodue langane ma umopul dogur ke iye kovok.