Kolosi 2:10 - Aria New Testament

¹⁰ Umeneklep ke Krais deka umodue mosongon ka lokono lokono batne ke iye. Ila arit ombatno e iye mole e plau ano ka pula keniye ka tiplau wan bitna bitna.

Kolosi 2:10 ပူးပေါင်းရင်းမြစ်များ

Matyu 28:18

E Yesus polou olwo boto ke isak e wai ke isak langane. “Ida Tapolngon kar arit ka pula keniye ke ngong ma ngaplau wan ka omur heven ina e wan ka taklak ina blang.

Jon 1:16

Makaingan pula lokono dong ke iye e aling aling iye due elio itau lokono ke ite ka pula keniye.

1 Korin 15:24

Alo ari ma Ida Tapolngon due taim ane ma yagos. Deka Krais ma due osep ka tivri mgo ke omur omur isak yagos e ma iye due angelo soulu ka urok arit omba isak yagos. E ma iye due wan ka pula keniye ka urok arit dong ke isak yagos. Deka ma iye kar wan tonari keniye ke Timla ka Ida Tapolngon.

Efesus 3:10

Ida Tapolngon due ila pelengon ka oglou iye kukwope polou malak ke ila osep kodong. Iye due langane kesua iye waiki ensel keniye ka tivri mgo e tiplau wan ke omur heven ma tivati Yesus ila osep urok mosongon. Deka ma tile omur Ida Tapolngon ila ilengen ombatno lokono e iye ile wan bitna bitna keniye.

Efesus 3:19

Ngawaiki ma umeile omur ke elio ka Krais lana iye ke umu. Elio ka Krais lana iye ke ite mole itosep udo ilengen e itakaranga iteile omur ine kovok. E dau ngawaiki Ida Tapolngon lua umu ke ila elio ka keniye itau lokono ma ila elio bon ke aitno lumu. Deka ngawaiki ma lumu elio isuk isuk tididi ila elio ka itau lokono.

Kolosi 2:15

Iye due wan ka ano e angelo soulu ka tiplau omur omur urok arit yagos. Ke Krais ina akai Ida Tapolngon nis osep ka pula keniye iye mole wan tonari e due isak tipolou langka isak wan adai vala.

Kolosi 3:11

Ida Tapolngon lua ila osep ka pula keniye ke urok mosongon oku e aitno lite langane. Langka ite leklou osep Yuda ina e ite leklou osep ka isak osep Yuda ina kovok aitno lite mter ine kovok. E langka ite leklou itedidi elio ulangngan ina e ite leklou itedidi elio ulangngan ina kovok aitno lite mter ine kovok. E langka ite leklou osep ke kantri silang koke ite leklou osep omong aitno ina aitno lite mter ine kovok. E langka ite leklou langka wokboi nating e ite leklou langka itodong fri aitno lite mter ine kovok. Aitno lite mter langane kovok kesua Krais vala dong e iye dong ke aitno lite.

Hibru 5:9

Elio tonari polou ke iye deka iye polou gute ka lua osep ke urok elio epmes ina. Deka iye lua osep ka tini iye ke urok elio epmes ina dong vala dong.

1 Pita 3:22

Yesus la ke omur heven kodong e iye dong ke Ida Tapolngon limla odung. Deka ensel e wan ansak ka urok arit dong lisak tini iye.