Jon 5:24 - Aria New Testament

²⁴ “Ngawai lokono ke umu langane. Gute sei ka klingen lou pelengon e aitno la dagar ke Ida Tapolngon ka pagei ngong ngame iye due mosongon ka dong vala dong e Ida Tapolngon ma wade iye kovok. Aurou. Iye mole metengen kodong e due mosongon ka dong vala dong.

Jon 5:24 ပူးပေါင်းရင်းမြစ်များ

Matyu 25:46

E Yesus babrum ila pelengon langane. “Osep tonari ma tidue ulesngen ka dong vala dong. E osep ka tidong itau e osuk ma tidue urok mosongon ka dong vala dong.”

Mak 16:16

Deka osep seisei ka aitno lisak dagar ine e tididi elio paunimngen ina ma ngalua isak ke urok elio epmes ina. E osep seisei ka aitno lisak la dagar ke ngong kovok ma Ida Tapolngon kot isak ine ke omur hel.

Jon 11:26

E gute ka dong e aitno dagar ke ngong ma iye mete kovok. Aitno lugom dagar ke lou pelengon ane?”

Jon 12:44

Deka Yesus daiku langane. “Langka gute aitno dagar ke ngong deka aitno dagar ke ngong vala kovok. Aurou. Aitno dagar ke Ida Tapolngon ka pagei ngong ngame blang.

Jon 20:31

E ngasogo pelengon ane batne langane. Ma aitno lumu la dagar langane. Yesus iye gute Krais ka Ida Tapolngon rere ma iye lua osep ke urok elio epmes ina e iye Ida Tapolngon Otno Arang. E langka aitno lumu dagar ke iye ma umodue mosongon ka dong vala dong.

Jon 3:16

“Ida Tapolngon lana iye ke osep ka pula keniye ka tidong ke taklak deka iye pagei Otno Arang ka kene vala ke osep. Ma osep seisei ka aitno lisak la dagar ke iye timete kovok. Aurou. Ma tidue urok mosongon ka dong vala dong.

Jon 3:18

Gute sei ka aitno la dagar ke iye ma Ida Tapolngon wade iye kovok e gute sei ka aitno la dagar ke iye kovok Ida Tapolngon wade iye kodong kesua aitno la dagar ke Ida Tapolngon Otno Arang ka kene vala kovok.

Jon 3:36

Osep seisei ka aitno lisak la dagar ke Ida Tapolngon Otno Arang ma tidue urok mosongon ka dong vala dong. E osep seisei ka tipli iye ma tidue mosongon ka dong vala dong kovok e Ida Tapolngon aitno ila engil ma dong ke isak.”

Jon 4:36

E oku ane osep ka tipi ngangon tidue inarak klingen ine kodong e titagom wan ma tidue urok mosongon ka dong vala dong. Ma osep ka tiusak wan e osep ka tipi wan tonari aitno lisak neser pulu.

Jon 6:40

E Livou aitno langane. Osep seisei ka tivati Otno Arang e aitno lisak la dagar ke iye ma tidue urok mosongon ka dong vala dong. E ma ngadue isak titito e tidong blang ke oklou ka Ida Tapolngon wade osep ka pula keniye urok elio ine.”

Jon 6:47

Ngawai lokono ke umu langane. Gute ka aitno dagar ke ngong ma iye due mosongon ka dong vala dong.

Jon 6:50

E bret ka duru me ke omur heven langane. Langka gute ngen bret are ma iye mete kovok.

Jon 6:51

Ngong bret ka duru ke omur heven ka kar mosongon ka dong vala dong ke osep. Langka gute ngen bret ane ma iye dong vala dong. Bret ane pampamu lungong ka ngakare ke osep taklak ina ma tikaranga tidue mosongon ka dong vala dong.”

Jon 6:58

Ane bret ka duru me ke omur heven. Ane langka lumu seia tingene ke omur ka dong adai vala kovok. Tingen bret are e mase timete. E gute sei ka ngen bret ane ma due mosongon ka dong vala dong.”

Jon 8:51

Ngawai lokono ke umu langane. Langka gute kis lou pelengon dagar e didie ma iye due mosongon ka dong vala dong e ma iye mete kovok.”

Pas ka Pol sogoe uti la ke osep Rom ina 8:1

E eknikane Ida Tapolngon aitno engil ke itosep ka iteneklep ke Krais Yesus kodong kovok. Aurou. Aitno epen ke ite vala e ma iye mulu ite kovok.

1 Tesalonaika 5:9

Ida Tapolngon rere ite ma itanamani aitno ila engil kovok. Iye rere ite ma Ida Puda Yesus Krais lua ite ke udo elio epmes ina.

1 Pita 1:21

Deka aitno lumu dagar ke Ida Tapolngon batne ke Krais. Oglou alo ka Krais mete Ida Tapolngon due poga tito ke ina denga deka iye kakai Krais tito la egim. Iye due langane deka aitno lumu dagar ke Krais e umapara ma iye didi ila pelengon ka iye wai ine kodong.

1 Pita 1:5

Aitno lumu dagar ke Ida Tapolngon deka iye plau umu ke ila arit. Iye waiki lua ite e elio ane ma polou malak alo ka Krais iding me.

1 Jon 3:14

Oglou itodong langka osep ka timete e oku ane itodong ke mosongon ka dong vala dong. E iteile itodong ke mosongon tonari kesua ite lana ite ke Ida Tapolngon ila osep. E osep ka isak lana isak ke osep leklou kovok isak dau tidong langka osep ka timete.

1 Jon 5:1

Osep ka aitno lisak dagar ke elio ka Yesus iye gute Krais ka Ida Tapolngon rere ma iye lua osep ke urok elio epmes ina isak Ida Tapolngon ila osep. E osep ka isak lana isak ke gute timla isak lana isak ke gute tonari blang.