Jon 5:19 - Aria New Testament

¹⁹ E Yesus wai ke isak langane. “Ngawai lokono ke umu langane. Ngong ka Ida Tapolngon Otno Arang ngakaranga ngadue wan ka didi aitno lungong vala kovok. Aurou. Ngakaranga ngadue wan ka ngavati Livou due vala kesua wan gesa ka Livou due io ngong ka Otno Arang ngadue langane blang.

Jon 5:19 ပူးပေါင်းရင်းမြစ်များ

Matyu 26:39

E iye la isuk boto e munu ke taklak e bitna pes taklak e iye wai itau langane. “Livou langka empi elio soulu ka osep ma tidue ke ngong are itau e dau ngawaiki ngadidi aitno lungong kovok e ngawaiki ngadidi aitno lugom vala.”

Luk 21:15

Kesua ma ngakar lumu pelengon e lumu ilengen ke umu e ma upu oul tikaranga tiplie koke tipara pulu ine kovok.

Jon 10:18

Gute kene karanga due ngong ma ngamete kovok. Aurou. Ngadidi aitno lungong e ngamete e silang blang ngakaranga ngadue lou mosongon blang. Livou wai dagar ke ngong ma ngadue langane.”

Jon 12:49

Ngadidi aitno lungong e ngawai kovok. Aurou. Livou ka pagei ngong ngame wai dagar ke ngong ke pelengon ka ma ngawai ine.

Jon 12:50

E ngaile ila pelengon tonari karanga due osep tidue mosongon ka dong vala dong. Deka ngawai pelengon ka Livou waiki ngawai vala.”

Jon 14:10

Aitno lugom lange? Aitno lugom dagar ke elio ka ngadong kap Livou e Livou dong kap ngong koke aurou? Ngadidi aitno lungong e ngawai pelengon ke umu kovok. Aurou. Livou ka dong kap ngong didi aitno e due wan ka iye waiki due.

Jon 2:19

E Yesus koli wai ke isak langane. “Umadar ninu ane e ma ngaurie blang ke oklou eklu.”

Jon 3:3

E Yesus koli wai langane. “Ngawai lokono ke wom. Langka gute polou oku langka mimi edimor kovok iye karanga dong ke omur ka Ida Tapolngon plaue kovok.”

Jon 5:21

Eriar langka Livou due osep ka timete kodong tipoga titito ke inarak denga e kar mosongon oku ina ke isak ngong ka Otno Arang ngakar mosongon oku ina ke osep ka ngawaiki ngakar mosongon tonari ke isak.

Jon 6:38

Kesua ngaduru ngame ke omur heven ma ngadidi aitno lungong kovok. Aurou. Ngame ma ngadidi gute ka pagei ngong ngame aitno vala.

Jon 8:28

E Yesus wai ke isak langane. “Alo ka umakakai ngong ka Gute Ka Polou Langka Osep ke ngau akai ma umeile ngong Gute Ka Ngadong Kodong e ma umeile ngadidi aitno lungong e ngadue elio bitna bitna kovok. Aurou. Ngawai pelengon ka Livou nis ngong ine vala.

Jon 9:4

Ke oklou kene kene alo ka oklou dau bublo ma itodue Ida Tapolngon ka pagei ngong ngame ila bokongon. Kesua epmes ma polou e osep tikaranga tiboko ke epmes kovok.

Aposel 2:24

Iye mete deka Ida Tapolngon didi ila arit e due poga tito ke ina denga. Deka iye ngangir ke metengen kovok. Deka metengen karanga mole iye kovok kesua Ida Tapolngon mole kodong.

Pas ka Pol sogoe uti la ke osep Rom ina 6:4

Elio paunimngen ina nisngen eriar langka itogosok Yesus itemete deka osep tiyas ite itesep ke ina denga e itomunu ine. Itomunu ine deka Ida Tapolngon didi ila arit e due ite itogosok Yesus itopoga itetito ke ida denga. Iye due ite itopoga itetito ke ida denga kesua iye waiki ma itedidi elio oku ina vala.

Pas ka Pol sogoe uti la ke osep Rom ina 8:11

Oglou Yesus mete deka ari Ida Tapolngon due poga tito ke ina denga. E umu ka Ano Itau dong ke aitno lumu ma Ida Tapolngon due umu umopoga umetito ke upu denga. Ma iye due elio ke umu langka oglou iye due ke Yesus. E ma iye due pampamu lumu tipoga titito ke inarak denga.

1 Korin 15:12

Imanapapra pelengon ka Krais mete e Ida Tapolngon due poga tito ke ina denga. E umu leklou umawai gute ka mete kodong ma iye karanga poga tito ke ina denga kovok.

2 Korin 4:14

E silang blang imeile kodong langane. Ida Tapolngon due Ida Puda Yesus poga tito ke ina denga e ma iye due imi imopoga imetito ke ida denga kap iye. Deka imi kap umu itodong ke bitna.

2 Korin 5:10

Iteile mase ma ite kente kente itevri ke Krais bitna ma iye wade ite. Ma iye wade wan bitna bitna ka itodue ke taklak ane. Langka isak elio itau koke elio soulu.

Efesus 2:5

Iye lana iye omba ke ite e alo ari talda klingen Ida Tapolngon ila pelengon kovok e udo elio epmes ina tek ite ke Ida Tapolngon. Deka itodong langka osep ka angainsak timete kodong. E dau Ida Tapolngon makai ite e lua ite ke udo elio epmes ina. Deka iye due ite itopoga itetito e itodong blang e iteneklep ke Krais.

Efesus 3:16

Ida Tapolngon ila arit ka ombatno dong ke omur heven. Deka ngapmi iye ma Ano Itau lua umu ke ila arit. Ngapmi iye ma ila arit due aitno lumu ma aitno lumu tidong dagar.

Filipai 3:21

Alo ari iye ma due pampamu lite ka tikaranga timete tilumus tipolou itau lokono langka pampamu ine ka itau lokono. Iye karanga due langane kesua iye didi ila arit ka iye karanga plau wan ka pula keniye ine.

Filipai 4:13

Krais lua ngong ke ila arit deka ngakaranga ngadong itau ke elio bitna bitna ka tipolou ke ngong.

Kolosi 1:11

E imorwo imawai itau langane. Alo ka umanamani ke elio ka opru umu imawaiki Ida Tapolngon ila arit omba ka itau lokono lua umu ma umevri dagar ine. E ma aitno lumu dong epen e ma umodong umapara ke alo ka elio ka opru umu polou yagos. E ma aitno lumu itau e aitno lumu neser ine.

Kolosi 1:16

Ke Otno Arang ila arit Ida Tapolngon due wan ka pula keniye ke omur heven e ke taklak. Iye due wan ka pula keniye ka itavati e wan ka itakaranga itavati kovok. Wan ka itakaranga itavati kovok ane langka ensel ka urok arit omba e wan langka ano ka urok arit omba blang e wan leklou ka urok arit omba blang. Iye kar arit ke Krais deka Krais tapol wan ka pula keniye e wan ka pula keniye iye tona ila wan.

1 Tesalonaika 4:14

Aitno lite dagar langane. Yesus mete e mase iye poga tito e dong blang. Deka aitno lite dagar langane. Yesus ma me deka Ida Tapolngon ma due osep ka aitno lisak dagar ke Yesus ka timete kodong tipoga titito e tidong blang kap Yesus.

1 Pita 3:18

Aitno lumu mter ke Krais. Oglou iye mete aling kene batne ke udo elio epmes ina. Ite osep epmes ina e iye dong itau lokono. E iye mete ma iye paur ite ke Ida Tapolngon. Osep timluk Krais pampamu ine e iye mete deka Ida Tapolngon due poga tito ke ina denga e iye dong ano ke omur heven.

Pelengon kukwopngon 2:23

E osep ka tididi iye ma ngamluk isak ma timete. Deka sios ka pula keniye ma tile omur langane. Ngakaranga ngawade osep ka pula keniye aitno lisak. E ngakoli batne ke umu kenmu kenmu karanga ke elio ka umodue.”