Hibru 11:7 - Aria New Testament

⁷ Noa aitno dagar ke Ida Tapol-ngon e Ida Tapolngon palongo iye ke wan ka mase ma polou ka iye ile ine kovok. Ida Tapolngon wai deka Noa due anit ke iye e uri sip ombatno ma iye kap ila osua tidong itau ine. Noa aitno dagar deka ila elio tonari nis osep ka tidong ke taklak urok elio soulu. E Noa polou itau e osuk ke Ida Tapolngon bitna langka osep leklou ka aitno lisak dagar ke iye.

Hibru 11:7 ပူးပေါင်းရင်းမြစ်များ

Matyu 2:12

Mase timunu kudung e timunu ansak. Timunu ansak e Ida Tapolngon nis isak ma tiding ke Herot kovok. Alo ka titipa tisongon omur are e tiding ke urok omur ke ekreng silang.

Matyu 24:15

E Yesus wai blang langane. “Mase ma umavati wan ka soulu lokono ka gute napaprangan ina Daniel wai ine dong ke Ida Tapolngon ila ninu.” E gute ka ritim pelengon ane ma aitno mter itau ine.

Matyu 24:25

Umoklingen. Ngawai ke umu oku ane ke wan ka ma polou.

Matyu 24:38

Kesua mgo ke alo ka ongon ombatno me osep tingen e tinim e tigi e tikar titorok ke gingen la lama alo ka Noa sep ke sip omba.

Matyu 3:7

E alo ka iye vati osep Farisi ina e osep Sadyusi ina pula time iye wai ke isak langane. “Umu langka mota ka olune soulu dong ke orsak. Sei palongo lumu ma umoulou ke Ida Tapolngon aitno ila engil ka ma me?

Luk 17:26

Elio ka osep tidue alo ka Gute Ka Polou Langka Osep ma iding me isak eriar langka elio ka osep tidue oglou alo ka Noa dong.

Pas ka Pol sogoe uti la ke osep Rom ina 1:17

Ida Tapolngon ila omon itau nis ite ke elio ka Ida Tapolngon due ite itopolou itau e osuk ke bitna. Eriar langka aitno lite dagar ine ma Ida Tapolngon sir ite ila osep itau lokono. Deka udo mosongon ka itau lokono dong vala dong. Oglou osep napaprangan ina tisogo Ida Tapolngon ila pelengon langane. “Osep seisei ka aitno lisak dagar ke Ida Tapolngon ma iye lua isak ma tipolou itau e osuk ke bitna.”

Pas ka Pol sogoe uti la ke osep Rom ina 10:6

E Ida Tapolngon ila pelengon wai itopolou itau e osuk ke bitna kesua aitno lite ila dagar la dagar ke iye. Deka lange? Ma itawai ke aitno lite langane kovok. “Sei ma tito ke omur heven e due Krais duru polou ke ite?”

Pas ka Pol sogoe uti la ke osep Rom ina 3:22

Eknikane elio kene vala dong ka Ida Tapolngon didie e due osep tipolou itau e osuk ke bitna. Iye due osep ka pula keniye ka aitno lisak la dagar ke Yesus Krais tipolou itau e osuk ke bitna. Iye due ila elio kene langane ke osep ka pula keniye.

Pas ka Pol sogoe uti la ke osep Rom ina 4:11

Oglou Abraham aitno dagar lokono ke Ida Tapolngon kodong deka lokono Ida Tapolngon due polou itau e osuk ke bitna. Iye polou itau e osuk ke bitna e mase Ida Tapolngon kar iye elio ulangngan ina. E elio ulangngan ina nisngen gesa ka nis osep Ida Tapolngon aitno itau ke Abraham. Aitno itau ke iye kesua oglou Abraham aitno la dagar ke iye. E eknikane osep ka pula keniye ka aitno lisak dagar ke Ida Tapolngon e tipolou itau e osuk ke bitna pmarak Abraham. Iye pmarak lama oglou tididi elio ulangngan ina kovok.

Pas ka Pol sogoe uti la ke osep Rom ina 4:13

Oglou ari Ida Tapolngon wai promis ke Abraham ma omur ka pula keniye polou ina omur. Iye wai ila promis la ke Abraham gosok ila napakngan blang. Aitno lumu lange? Ida Tapolngon wai ila promis ke Abraham kesua Abraham didi Moses ila sogongon koke aurou? Aurou. Ida Tapolngon wai ila promis ke Abraham kesua Abraham aitno dagar ke iye vala. E ari Ida Tapolngon due polou itau e osuk ke bitna.

Pas ka Pol sogoe uti la ke osep Rom ina 9:30

E aitno lite lange ke elio tonari? Kesua oglou ari osep ka isak osep Yuda ina kovok tikrim ekreng ma tipolou itau e osuk ke Ida Tapolngon bitna kovok. Lama langane Ida Tapolngon due isak tipolou itau e osuk ke bitna kesua aitno lisak dagar ke iye.

Galesia 5:5

Ke Ano Itau ila arit aitno lite dagar ke Ida Tapolngon e itapara ma iye sir ite osep itau.

Filipai 3:9

Ngadong kap Krais e ngadong itau e osuk ke Ida Tapolngon bitna batne ke elio ka ngadidi Moses ila sogongon kovok. Aurou. Eknikane ngadong itau e osuk batne aitno lungong la dagar ke Krais. Elio ka Ida Tapolngon due ngong ngadong itau ke bitna batne aitno lungong la dagar ke Krais.

Hibru 11:1

Aitno lite ila dagar lana ine langane. Aitno lite dagar langka wan bitna bitna ka itapara ine ka Ida Tapolngon wai ine kodong ma polou. E aitno lite dagar langka wan bitna bitna ka dau itavati isak kovok mase ma itavati isak.

Hibru 12:25

Deka umepli Ida Tapolngon ila pelengon kovok. Oglou iye dong ke gigri Sainai e wai ke osep Israel ina. E osep leklou tipli ila pelengon deka iye wade isak ine e tikos ke ila wadenen kovok. E eknikane iye dong ke omur heven e wai ke ite. Deka aitno lumu lange? Langka itepli ila pelengon itakaranga itokos ke ila wadengen? Aurou lokono.

Hibru 5:7

Alo ka Yesus dau dong ke taklak aling aling iye wai itau ke Ida Tapolngon e pmi iye ke wan bitna bitna. Iye daiku ke Ida Tapolngon e kngis kesua iye ile Ida Tapolngon karanga lua iye ma iye mete kovok. E Ida Tapolngon klingen ila pelengon e koli ila pmingen itau kesua iye due anit ke iye e ini iye.

Hibru 8:5

Oglou alo ka Moses waiki uri ninu molo ina Ida Tapolngon wai langane. “Emile wom itau e emdidi lou pelengon keniye ka la ke ninu molo ina ka nganis wom ine alo ka omdong ke gigri Sainai.” E tiboko ke Ida Tapolngon ila ninu ka dong ke taklak e ninu tonari langka ano vala ke Ida Tapolngon ila ninu ka dong ke omur heven.

1 Pita 3:20

Ansak tonari isak ansak ke osep ka tipul dogur ke Ida Tapolngon ila pelengon alo ka Noa uri sip ombatno. Alo ari tidue elio soulu pula e dau Ida Tapolngon wade isak ine kovok e iye dong para ma tibauluk aitno lisak ke urok elio soulu. Iye para la lama Noa uri sip kodong. Iye uri sip kodong deka osep lumeklu vala tisep ke sip tonari. Tisep kodong deka ongon ombatno polou e isak lumeklu vala tidong itau ke sip.

2 Pita 1:1

Ngong Saimon Pita ngong Yesus Krais ila wokboi nating e ila aposel gesa. Iye Ida Tapolngon e Ida Luangan blang. Iye due elio itau e osuk e kar ila elio tonari ke ite ma aitno lite la dagar ine. Ngasogo pas ane uti ke umu ka aitno lumu ila dagar eriar langka aitno limi ila dagar.

2 Pita 2:5

Mase osep ka tidong oglou ari tipul dogur ke Ida Tapolngon e tidue elio soulu deka iye ules isak ine. E iye lua gute Noa ka napapra Ida Tapolngon ila elio itau e osuk ke isak. Iye lua Noa kap ila osua lumorwo blang vala ma tidong itau alo ka ongon ombatno kading taklak ka pula keniye.

2 Pita 3:6

Mase Ida Tapolngon wai vala e due ongon ombatno polou deka taklak ka pula keniye ka dong alo ari polou yagos.