Hibru 11:26 - Aria New Testament

²⁶ Aitno mter langane. Langka ngong mnak ngong batne aitno lungong la ke gute Krais ka Ida Tapolngon wai dagar ma iye pagei me deka elio ane mole brokngon ka pula keniye ka dong ke omur Isip. Moses aitno mter langane kesua aitno mter mase ma Ida Tapolngon kar ila kerengen ka itau lokono ke iye.

Hibru 11:26 ပူးပေါင်းရင်းမြစ်များ

Matyu 10:41

Langka gute gesa due gute napaprangan ina sep ke ila ninu kesua iye gute napaprangan ina vala ma iye due wan itau lokono ka gute napaprangan ina ma due. E langka gute gesa due gute itau sep ke ila ninu kesua iye gute itau vala ma iye due wan itau lokono ka gute itau ma due.

Matyu 5:12

Aitno lumu neser e aitno lumu itau ine kesua ma umodue wan ka itau ke omur heven. Kesua oglou osep tidue elio soulu langane blang ke osep napaprangan ina ka tidong mgo ke umu.”

Matyu 6:1

Yesus wai blang langane. “Umaplau umu itau lama umodue elio itau ke osep amtarsak ma osep tipalem umu vala. Langka umodue langane Pmomu ka dong ke omur heven ma kar kerengen ka itau ka omur heven ina ke umu kovok.”

Luk 14:14

E ma aitno lugom itau itau ine. Kesua lama tikaranga tikoli batne ke wom kovok mase alo ka Ida Tapolngon due osep ka tidong itau e osuk ke bitna titito tidong blang ma iye koli batne ke wom.”

Luk 14:33

E lang­ane ke umu blang. Langka umosongon lumu wan keniye kovok umakaranga umodong lou disaipel kovok.”

Aposel 5:41

Deka osep aposel tisongon osep kaunsil ina amtarsak e kla ke dogur. E aitno lisak itau ke Ida Tapolngon kesua iye rere isak e tinamani agegeng ka polou ke isak batne aitno lisak dagar ke Yesus.

2 Korin 12:10

Ngadue Krais ila bokongon e wan bitna bitna tipolou ke ngong. Lou arit kovok e osep tiwai soulu ke ngong e wan polou ka opru ngong. E agegeng e elio soulu polou ke ngong. Wan tonari polou ke ngong e aitno lungong mter isak wan gesa kovok kesua alo ka lou arit kovok deka Ida Tapolngon ila arit lua ngong.

2 Korin 6:10

Aling pula aitno limi kro ke elio soulu ka polou ke imi e dau aling aling aitno limi neser. Imodong langka osep ka urok mani isuk boto vala e dau limem bokongon lua osep pula ma tidong itau. Limem wan bitna bitna ka taklak ina pula kovok e dau Ida Tapolngon lua imi ke ila kerengen ka itau.

Efesus 1:18

Ngapmi Ida Tapolngon ma iye lua umu ma umeile omur ke pelengon lokono ka ila poloungon batne ke iye. Ma umeile omur ke wan bitna bitna keniye ka Ida Tapolngon waiki kere ila osep ine e itapara ine.

Efesus 3:8

E angain ngong omba kovok. Aurou. Ida Tapolngon ila osep keniye angainsak timole angain ngong. Lama langane Ida Tapolngon kere ngong ke ila makaingan. E ngapaur Ida Tapolngon ila omon itau ke umu ka osep Yuda ina kovok. Omon tonari palongo udo ke wan keniye ka itau lokono ka Krais kare ke ite e itakaranga iteile aikovoli ine kovok.

Filipai 3:7

E lou elio isuk isuk ka oglou ngawaiki tilua ngong eknikane aitno lungong mter isak wan adai vala. Aitno lungong mter langare kesua aitno lungong dagar ke Krais kodong.

Hibru 10:33

Alo ari aling leklou osep tiwai apok ke umu e tidue agegeng ke umu ke osep pula amtarsak. E aling leklou osep tidue langane ke osep leklou e umevri kap isak.

Hibru 10:35

E eknikane aitno lumu dong dagar langka oglou iye dong dagar. E ma Ida Tapolngon kar ila kerengen ka itau lokono ke umu.

Hibru 11:6

E langka aitno lite dagar ke Ida Tapolngon kovok deka itakaranga itodue elio gesa ka Ida Tapolngon aitno itau ine kovok. Kesua gute ka waiki polou olwo boto ke Ida Tapolngon ma aitno dagar ke elio ka Ida Tapolngon dong e iye kar wan itau itau ke osep ka tikrim ke iye e tipado iye.

Hibru 13:13

Deka ite blang langka itala ke armok dogur e itanamani mnakngan langka Yesus namani mnakngan.

Hibru 2:2

Oglou Ida Tapolngon kar pelengon kene ka karanga segesege kovok ke ila ensel e ila ensel tikare ke Moses deka Moses sogoe ma osep Israel ina tididie. E langka tididie kovok deka Ida Tapolngon ules isak ine.

1 Pita 1:11

Ari Krais Ano Itau due aitno lisak deka nis isak ke elio ka mase Krais namani agegeng ka polou ke iye. Ano Itau nis osep napaprangan ina ke elio tonari deka tiwaiki tile omur lesen ma elio tonari polou lokono e elio itau lokono lange ma polou.

1 Pita 4:14

Langka osep tiwai soulu ke umu batne umu Krais ila osep aitno lumu itau itau ine. Kesua elio ane nis ite Ida Tapolngon Ano Itau ka itau lokono dong kap umu.

Pelengon kukwopngon 2:9

‘Ngaile elio ka polou ka opru umu. E ngaile umodong langka lumu wan isuk boto vala. E lokono lumu wan pula dong para ke umu ke omur heven. E ngaile pelengon soulu ka osep leklou tiwai ine ke umu. Osep tonari tiwai langane. “Imi osep Yuda ina.” E isak osep Yuda ina kovok. Aurou. Isak Satan ila osua vala.

Pelengon kukwopngon 3:18

Deka ngawaiki ngakar pelengon ane ke umu. Lou gol ka eiou ngene ma wan sasi dong ine kovok dong. Are itau ma umekli gol tonari ke ngong deka lumu mani pula dong. E are itau ma umekli klos okou ka kading tarna lumu. Deka osep ma tikaranga tivati umu albus umu kovok e umu mnak umu ine kovok. E itau ma umekli marasin ka umodue sep ke omtomu ma umakaranga umavati omur itau.