Galesia 5:20 - Aria New Testament

²⁰ E osep tilotuim sapingen e tidue muso e tidue burwa e aitno lisak engil e tidue amnga e aitno lisak soulu. E tingale gute silang ila wan e aitno lisak vri ke isak tona e orsak mluk pulu e tidardar ke osua osua.

Galesia 5:20 ပူးပေါင်းရင်းမြစ်များ

Pas ka Pol sogoe uti la ke osep Rom ina 2:8

E osep ka aitno lisak vri ke isak e tipul dogur ke elio itau e tidue elio soulu vala ma Ida Tapolngon aitno engil ke isak. Ma aitno engil lokono ke isak e ila wadengen ma due isak.

1 Korin 11:19

Deka aitno lungong mter langka lumu duningen bitna langka dar boto ma umeile itau ke osep ka aitno lisak dagar ke Ida Tapolngon ila elio itau.

2 Korin 11:19

Umu tona aitno lumu mter lumu ilengen ombatno e umosongon osep ka isak kaka tiwai ke umu.

2 Korin 12:20

Ma ngapolou ke umu e dau aitno lungong nesik lama lumu elio langka elio ka ngawaiki umodue kovok. E silang blang ngawaiki aitno lumu itau ke lou elio blang. Aitno lungong kro lama ngavati elio soulu ke umu ka langane. Opmu mluk pulu e aitno lumu rim ke osep leklou e aitno lumu nevlik amnga. E aitno lumu mter ke umu kenmu kenmu vala e umawai soulu ke osep e umodue adis. E aitno lumu mter langka umomole osep leklou e umodue elio ulik ulik vala.

Galesia 5:15

E langka umu amnga umu pulu e umodue evlei pulu airavu ke umu deka ma umeile umu itau. Lama umu ka pula keniye umodue agegeng pulu.

Taitus 3:10

Langka gute gesa wai pele-ngon ka due Ida Tapolngon ila osep tidardar deka amwai pelengon dagar ke iye ma ommosi aitno. Ma iye wai langane blang kovok. Langka omdue langane aling orwo ina e iye dau klingen pelengon kovok deka umopul dogur ine e umodong kap iye kovok.

Jems 3:14

E langka aitno lumu rim ke osep leklou e aitno lumu vri ke umu kenmu kenmu deka umakakai angainmu kovok. Kesua langka aitno lumu langane umayak umu tona e umedidi pelengon ka lokono kovok.

2 Pita 2:1

E oglou osep napaprangan yakngan ina tidong kap osep Israel ina. E eriar langane osep parerengen yakngan ina ma tipolou ke umu blang e tibisi urok pelengon yakngan e tiwaiki tinak umu ma umedidi urok pelengon. Tiwaiki urok pelengon yakngan due pogle ke aitno lumu ila dagar. E tipul dogur ke Ida Puda ka kli urok elio epmes ina deka suong ma Ida Tapolngon koli urok elio soulu e due agegeng ke isak.

1 Jon 3:15

Gute gesa ka aitno soulu e engil ke iye sisrok iye langka gute ka due burwa. E umeile gute ka due burwa ke gute silang iye due mosongon ka dong vala dong kovok.

Pelengon kukwopngon 21:8

“E osep ka tilim ke wan bitna bitna koke osep ka tisongon aitno lisak ila dagar isak blang kla ke eiou ombatno. E osep ka tidue elio epmes ina bitna bitna ka soulo lokono e osep ka tipagam osep isak blang kla ke eiou ombatno. E osep ka tidue elio isungon e osep muso ina isak blang kla ke eiou ombatno. E osep ka tilotuim sapingen e osep yakngan ina isak blang kla ke eiou ombatno. Eiou ombatno tonari engil lokono e opmu salfa ka eiou ngene dong ine blang. Eiou tonari metengen orwo ina.”