Aposel 18:24 - Aria New Testament

²⁴ Alo ari gute gesa ka angaine Apolos la polou ke Efesus. Iye gute Yuda ina gesa ka ila armok batne armok Aleksandria. Iye gute ka wai pelengon itau e ile omur ke Ida Tapolngon ila pelengon.

Aposel 18:24 ပူးပေါင်းရင်းမြစ်များ

Matyu 13:52

E Yesus wai ke isak langane. “Deka osep ka tile itau ke Moses ila sogongon e silang blang tile itau ke elio ka Ida Tapolngon plau osep isak langka gute ka dong ke ila ninu. Iye la ke eliang ka ila wan itau lokono dong ine e iye due wan itau ka oku ina e wan itau ka oglou ina.”

Luk 24:19

E iye pmi isak langane. “Elio lange?” E tikoli tiwai langane. “Wan ka la ke Yesus ka Nasaret ina. Iye gute napaprangan ina e iye arit iye ke ila pelengon e ila elio ke Ida Tapolngon bitna e ke osep ka pula keniye amtarsak blang.

Aposel 18:19

Ari tisongon Senkria deka isak kla tipolou ke armok Efesus. Deka Pol songon isak e iye la sep ke osep Yuda ina urok duningen ina ninu ka dong ke armok tonari. E iye wai pula kap osep Yuda ina ka tidong ke duningen ina ninu tonari.

Aposel 18:21

Mase iye songon isak e wai ke isak langane. “Langka Ida Tapolngon waiki ngabauluk ke umu blang ma ngabauluk ke umu. E langka aurou ma ngabauluk kovok.” Deka iye sep ke sip e sip songon Efesus la.

Aposel 18:28

E iye wai dagar ke osep Yuda ina pula amtarsak e ila pelengon mole urok pelengon. Ari iye kis Ida Tapolngon ila pelengon e didie. E iye kere pelengon tonari lana ine e wai langane. “Yesus iye tona gute ka Ida Tapolngon rere Krais ka lua osep ke urok elio epmes ina.”

Aposel 19:1

Alo ka Apolos dau dong ke Korin Pol didi ekreng ka munu airavu ke provins Esia e la polou ke Efesus e soson Yesus ila disaipel leklou.

Aposel 27:6

Imodong ine deka gute ka plau osep ola ina buno kene pado sip gesa ka armok Aleksandria ina ka waiki la ke omur Itali. Deka imesep ke sip tonari e imosongon Maira.

Aposel 6:9

Ari osep leklou tipara pulu pelengon kap Stiven. Osep tonari isak osep ka tidong ke osep Yuda ina urok duningen ina ninu ka angaine osep Friman ina. Osep ane kap osep Sairini ina e osep Aleksandria ina e osep Silisia ina e osep Esia ina tipara pulu pelengon kap Stiven.

Aposel 7:22

Moses dong kap apmang tonari e osep Isip ina tiparere iye itau ke urok elio. Ari Moses arit iye ke ila pelengon e ila elio.”

1 Korin 1:12

Umotuk opmu pulu ke pelengon deka umu leklou umawai langane. “Ngadidi gute Pol.” E gute silang wai langane. “Ngadidi gute Apolos.” E gute silang blang wai langane. “Ngadidi gute Pita.” E gute silang blang wai langane. “Ngadidi Krais.”

1 Korin 16:12

E udo aten Apolos aitno langane. Ngawai dagar ke iye ma iye la kap sudo leklou alo ka isak kla tivati umu. E aitno itau ine dau kovok. Mase langka aitno itau ine ma iye uti la ke umu.

1 Korin 4:6

Sipmi. Ngawaiki ngalua umu deka ngawai ke umu ke pelengon ane ka la ke ngong orwo Apolos. E ngawaiki ma aitno lumu mter ke imorwo limem elio itau ma umeile Ida Tapolngon ila pelengon ka wai langane lana ine. Ma umoklou pelengon kovok. E ngawaiki aitno lumu vri ke umu kovok. E umakakai gute gesa angaine tito e umepes gute silang angaine duru kovok.

2 Korin 10:10

Osep leklou tiwai langane. “Pol sogo pelengon ka dagar ke ila pas keniye e alo ka iye polou ke amtada itavati iye langka ila arit kovok e elio ka iye wai ke osep are wan adai vala.”

Kolosi 3:16

Umosongon Krais ila pelengon keniye dong ke aitno lumu. Deka umedidi ilengen ka polou ke pelengon tonari e umaparere osep ine e umawai ke isak ma tikel isak itau. Umedidi sakul ka dong ke Buk Song e umodue sakul ka kakai Ida Tapolngon angaine tito la egim e umodue sakul ka Ano Itau due polou ke aitno lumu. Alo ka umodue sakul ma aitno lumu itau ke wan keniye ka Ida Tapolngon due.

Taitus 3:13

Emkere gute Apolos e gute Senas itau. Senas iye gute ka ile omur itau ke pelengon dagar bitna bitna. E omlua isak ke wan bitna bitna ke urok langan ma urok wan bitna bitna dong itau.