2 Korin 3:3 - Bro Nkifrarhu Mrokfot

³ Nom Bro Nkifrarhu hingrneft hingrnamot to toko niko Bro Nkifrar hikwokomr. Nd yuhatn to bi nikomn bi toko nmoh hingrnefthu kfo nuhasyuk gontwat Kraisr wandfamot. Yimam niko htihato kfo mirahm, “Nd yimam Porrhu mrokfom wany yakiohato Kraisr hikwom.” Kraisr nd gontwat wandfamohat, nhai ndar tu yimam yakitohwa pene wandfarmort. Nhai. Toh nkifraniruha Nkifrarhu Yafothaye nd kfo nuhas gontwat wandfamort. Yo nd gontwat wandfamohat, nhai yura nmbi tahimn wandfarmorm. Nhai. Yimaroh yiro yima yuhumn riwandfamorm.

2 Korin 3:3 ပူးပေါင်းရင်းမြစ်များ

Matyu 16:16

Saimon Pitar kfo memor, “Ni, bbinysof thofroh minrfa htiyakyuk yima Kraise. Ni, tu toh nkifraniruha Nkifrarhu Yone.”

1 Korin 3:5

To no afo wamdukakkmno. Apolosr froher? To na froha? No, no be hingrna yimayeno. Rpa yimarparhu hingrneft hingrnewuno. Hingrnefmn nndoh nndoh hingrnefm hingrnewuno. No nd Kraisrhu hingrneft ahingrna duha yino, to niko to finji Kraisrhu mrokfom htihato rorhu mrokfom hikrfokomm? Nonn nd rorhu hingrneft hingrnamotnont niko tuko hti hik yo wany hikmokomtn hikwokomt.

2 Korin 3:6

Bro Nkifrarn hingrna duka tafsefr hemotrnom, ee btn Bro Nkifrar yak dbkafmo nfri yihotoharhu mrokfot kfo pthamonomt. Nd Bro Nkifrar duka htamo nfri yihotoharhu yak dbkaf mrokfot nhai bingot Mosesr yakmo boririfhut kanjo inji yikaht. Nhai. Ndt tu Bro Nkifrarhu Yafothatn mhfnahnewutt. Mosesrhu boririfhut-pno yimam nohwom, tfit Bro Nkifrarhu Yafothatn toh nkifraniyuk yafothat thu hmbritrm.

2 Korin 3:7

Wadukakomt nkifra boririfhut hingrnamo yuhat. Boririfhut niamot, noheft rpat boririfhutpno fak tkafak-namot. Nd boririfhu mrokfom nmbi tahimn wandfakhato hemohat, Bro Nkifrarhu bro funa nanyjareftpno niamom. Mosesr nd boririfhu tahim wuyaknamohat, rorhu nyingatikt memom nndo marr tewur. Isrerm htimohat nyingam mmrtamomm. Kto nd nyingatikt hatohmo funeft tfit wuyak hanymotn be minoh hmbrenimot.

2 Korin 6:16

Tone finji kanjo Bro Nkifrarhu temperri tahi rmonm rpat yak htakfot? Nom to toh nkifraniruha Bro Nkifrarhu kunyenom. To bi tu Bro Nkifrar bi kfo memor, “Isrerm tom tu nanhu tannefenm. Na toya rompno tohhato rompno ye wussoh htfasruha. Na kfo bruttna hakurahma rroh Bro Nkifraya kanjo. Rroh fitoh rim yau myau yuham yo tamoh nefm rom nayukm, na toya yukatoh hakuruhanm.” Wkp 26.12; Ese 37.27

1 Tesalonaika 1:9

Nom tumn tfit kfo tndh nuhas hanitwomnom nom nikmoha yihato Jisas Kraisrhu mrokfot kfo pthahato niko wanyakiohato nd nkifra tahi yifonm myafhonihato yima yuhu yakkekutmo yuhat, yo niko Bro Nkifrarhu hingrna yimako yorhwa yuhat. Nd ndm kfo tndh nuhaswomnom.

Hibru 10:16

“Bro Nkifrar kfo memor, ‘Tfit kto rompno kndhakruha nfri yihotarhu hingrneft tfit nndo rhuraht. Nanhu boririfhut yimaroh yima yuhumn rhuraht. Yimaroh yima yuhum rhuruhatt nd boririfhutn yak hta bohtarahtm na Bro Nkifraya hikneft.’”

Hibru 8:10

Tfit kto Isrermpno kndhakruha nfri yihotarhu hingrneft tfit nndo rhuraht. Nanhu boririfhut yimaroh yima yuhumn rhuraht. Yimaroh yima yuhum rhuruhatt nd boririfhutn yak hta bohtarahtm na Bro Nkifraya hikneft. Nhai wom tahi furam o wom tahi nasungwarm kfo tatoruhatm. Nanpraya rroh Nkifraya rhuruha. Tukann hti yukatoh hasoruhanm nd nanhu yon kunyshu tamoh tamoh nefm.

Hibru 9:14

Nd boririfhut, bingot Bro Nkifrar hingrnamo barkof yihotarhu boririfhut hikwom. Arihat bi Kraisrn tfit tu dborioh yihotar htakmorr. Kraisr nohhato nd nfri yihotar htakmorr. Nhai wom tamoh nefmpno nohrmor. Nhai. Mgogra yimar be noh furamor. Tu Bro Nkifrarhu Yafothatn thu bmtamottr kku bebt hatohmohat nhai marimor, “Yakrmiruha.” Ror hatohmo kkut Bro Nkifrar htihato nd yimam yak bebwa fasoh nefm fak thumorm. Arihat Bro Nkifrarpno yinyeft nhai tfit wom duka kinyaki hanykfot. Be yi furakfot. Ndnatn ror kfiwa yuhatn hikkfot.

Revelesen 2:1

Tfit nd mrokfo kfo pthamo yima Jisasr kfo memora, “Wom mrokfom wawandfakahnm taun Efesusko rhuyuk sioshu mounmotrpno wahtaftwanm. Mrokfom inji wahta-twanm: Na 7-pela gunym tirmif tire yakitohhato 7-pela gor ginym hatohet lamroh buha kau nanyor hakuta. Nann nda mrokfot kfiwann.

Revelesen 2:12

Tfit Jisasr wompam wom mrokfot kfo memor, “Yo tfit wom mrokfom wawandfakahnm taun Pergamumko rhuyuk sioshu mounmotrpno wahtaf-twanm. Mrokfom inji wahtatwanm: Na mano mano hanku namburet yuke bainat hatohwa.

Revelesen 2:18

Tfit Jisasr wompam wom mrokfot kfo memor, “Yo tfit wom mrokfom wawandfakahnm taun Taiatairako rhuyuk sioshu mounmotrpno wahtaf-twanm. Mrokfom inji wahtatwanm: Na Bro Nkifrarhu Yona, nanhu nyingam kangme kah banem, yo wuram kangme brasn kaht kandhihato bngo bijham kanjo wuram fnhutwom. Nann nd mrokfom kfefiwant.

Revelesen 2:8

Tfit Jisasr wompam wom mrokfot kfo memor, “Yo tfit wom mrokfom wawandfakahnm taun Smernako rhuyuk sioshu mounmotrpno wahtaf-twanm. Mrokfom inji wahtatwanm: Na kfomoya nda ni htita tamoh tamoht dborhamot. Na tfit kforuha nd tamoh tamoht tfit mhingrna tmbhoraht. Bingot na bi nohmoyann tfit sinyamo-yann tohwa.

Revelesen 3:1

Tfit Jisasr wompam wom mrokfot kfo memor, “Yo tfit wom mrokfom wawandfakahnm taun Sardisko rhuyuk sioshu mounmotrpno wahtaftwanm. Mrokfom inji wahta-twanm: Na Bro Nkifrarhu hingrneft hingrnaruha 7-pela yafothami 7-pela gunym kakitohwa. Nikmoh mrokfomn na htefiwa. Na bi htihnewanm niko nahniwa nefm. Kfo kangm, ‘Nd sioskfot Jisasr hik marnyewut.’ To nhai, bi minohni hanitwot.

Revelesen 3:14

Tfit nd yima Kraisr wompam wom mrokfot kfo memor, “Yo tfit wom mrokfom wawandfakahnm taun Laodisiako rhuyuk sioshu mounmotr-pno wahtaftwanm. Mrokfom inji wahtatwanm: Bro Nkifrar kfoyuk mrokfom yo kfo tahi mrokfom na kfo yakiohato wuyekwanm. Na Bro Nkifrarhu mrokfom tu kfo hik mifwanm. Na nhai wom kfo nhehefenr yakitoh-kaha, na kfoyuk mrokfom tu kfo mif mif mrokforpam kfiwa. Nanhu tngtpno Bro Nkifrar nd tamoh tamoht hingrna htamort. Nann ndar mrokfot htefiwant nikompno.

Revelesen 3:22

Yimbhindangeteko, wany marnyakfot siosmpno yiyuk mrokfom Bro Nkifrarhu Yafothat kfo pthiwam.

Revelesen 3:7

Tfit nd yima Kraisr wompam wom mrokfot kfo memor, “Yo tfit wom mrokfom wawandfakahnm taun Filadelfiako rhuyuk sioshu mounmotr-pno wahtaftwanm. Mrokfom inji wahtatwanm: Na Bro Nkifrar tohwa kanjo inji tohwa, na nhai wom kfo nhehefenr yakitohkaha, na kfoyuk mrokfom tu kfo mif mif mrokforpam kfiwa. Nann king Defitrhu kit kakitoh-want, nann bi tfanyant nhai tfit wom yimar frkihkfot. Yo nann bi frkihant nhai tfit wom yimar tfanykfot. Nann ndar mrokfom kfefiwanko.