Wahayu 7:2 - Anegisemee'm Mina Kapuge2 Ku epo wado bage wui ku ko ku Anegisemee'm yaa mani da manipi se epo wado bage waa. Wa'm manipi yaa mani da me ko me maa nuwa, maakaa uwo ku nuwa, ku se ku si maaniyaasi na manipi se yaa mani da. Kena ku se ku deta mugo ndoe waya epo wado mee to ona mitai se dema. Ese daamee mitai yato kiyoo kam paketai se dema. Me epo wado mee to wa yaa da kaa doke me ko ebeabea da waa yamamake kao dopi se dema. Me ebeabea da waa yamamake kao me ko me iyaao tai se Anegisemee to wa'm yaa dine ebeabea da mamake kao. Me bage kao do-paketa mugo ndoe wai mina ebo woeke. Epo wado bage wui ku kaa mina ebo woeke. အခန်းကိုကြည့်ပါ။ |
Wahayu 7:2
29 ပူးပေါင်းရင်းမြစ်များ
Wa'm se aseke koya Yesiusi wai mina koo tomu se ndo. Kena ese ata emi tau se imam mee to wa'm Yesiusi se asina ko “Endo ko ese oyu mina kasiinka ndeo. A ko ai ese mike Keditusi se mee to yee? Anegisemee wa'm daa mbeana kameyaapi se Wayombai me ai yee? Tau yee? Iyaao toi se Anegisemee to, wa kadito nai kumana ku kaa kiyoo ndumbo ndo nasewaae,” se aseke.
“Dibeao mani se noke kao ku si ebaae,” aseke. “Dibeao kana se noke kao ku ndo ebaae,” aseke. “Kase enta mugo ndoe, Mee Yombai ni ko ni'm kaniita ku ko ku si kaboyaasi na mugo noke kao. Ese si dan ndo omiwoo towoo katoyaasi na se noke kao. Ku mugo noke kao ku ekii tao kanesi na Anegisemee Naamee wai ni nameyaami. Kum seta kaa ni'm kaneao kan sipa noke kao ku kaa ndo nigi si pe taae,” aseke.
Ona me ko Anegisemee wai wa'm Dim'mba enii tao nemi kumana me wa'm yaa dine enii kaa namatami mugo dodo. Enii wa'm bage ae se desi na se namatami, me ona. Ona me ko enii nduwawe Anegisemee wai wa'm Dim'mba nadomaami se dodo me kaa aii se nadomaami se ku tau. Wa kaa kiyoo enii'm se nigina ko “O, Anegisemee Dim'mba me kita nemi kumana waya wadobo daa naambembo se kao ku mike niisi, ae,” se ku ndo nigaao sekii, me ona. Dee, Anegisemee wa'm dimina me membe-pembe se dimina se ku tau. Kena wa'm mina donaa asinaa se mee to ni ko ni namba wa'm sipi mugo dodo, se kaseao kan sipa.
Eki Yahudi tau se bage ku nde miya Keditusi nda kadipinimai yako eki Yesiusi mbaya se Yahudi bage'm sese dodo kidai. Dee, eki ko ndumbo mina yeke. Me ndumbo mina me ko me Anegisemee'm dama mina da. Woo-woo se kaa em si kadasi na se mina da. Omiwoo towoo sisi na se mina da. Ku dama mina ku yena ko Keditusi kaa “Mike ae,” se yanigeke. “Mike ae,” se yanigimaai ndoe Keditusi nda dipinimake kidai. Ku semai ndoe Anegisemee Dim'mba eki nduwawe kadomaake. Me Anegisemee Dim'mba me me, me Yesiusi wa'm “Anikee waa kaapeyaata,” asimi se Anegisemee Dim'mba mei! Kena Anegisemee Dim'mba kaneke me ko me eki nduwawe Anegisemee wa'm yaa dine kamatapi mugo dodo. Eki ko wa'm bage ae se nigisi na ebeabea da mei! Enii nduwawe okaa toi se Anegisemee Dim'mba wa ko.
Kena eki'm awake-awake ku kaa dama nigi si pe taae. Eki'm awake ku kaa kiyoo Anegisemee wa'm Dim'mba dano-dano siyaambea kipii kindo ko ku mugo kao ku si awaae. Eduga ko Anegisemee wai wa'm Dim'mba eki tao kaneke se dodo me kaa me eki kaa yaa dine kamatapi mugo dodo. Kase enta mugo ndoe, wa'm Dim'mba kanepi me me, me “Ku ni'm bage waa ae,” se nigisi na se ebeabea da se kanepi mugo dodo. Kena anikee waa wa'm Dim'mba'm yaa dine matapi bage kuwa ku si maaneke aoo se toke yoo ku kiyoo kam ekata-patana Siduga maa me kaa pi-natoyaasi. Ku kumana Anegisemee Dim'mba wa'm dimina dano-dano siyaambea kao ku si awaae.
Kena ni'm asiin tau yoo ogu bage ekii'm kita eki kaa nasipea mina ku se de. “Paudusi aii, a mesema penaa sipea bage ku Teseadonika bage ekii mbo pi-tupeke se dodo me kaa ekii kabeamea se ku tau. Aii ‘Mike ae,’ se ku ndo kanigimea. ‘Mike ae,’ se kanigimagea ndoe mbae da se anegisemee waa ku duwa matana ese mike se Anegisemee mbaya ndo emba mata simea. Ese ona ndo mike iyaao tai se Anegisemee to wa'm gai-gai yaawawoo taao kan wa mbaya ndo emba matamea, Teseadonika bage kuwa.
Ku koya Anegisemee'm mina ku ko ku ese magi tau se oo tukuu se mina mugo dodo. Wa'm magi tau se oo tukuu se mina ona me ko me se de. “Ese ebo toke se Tuhani wai wa mbaya bage ku en'ndo otuma ku wa'm epi se bage waa,” se mina me ona. Waya magi tau se oo tukuu se mina ona me ko “Mee ona wai ‘Ni'm ebo toke se Tuhani me ko me Yesiusi Keditusi mei,’ se asitai mee to wai peu-pau en'ndo otuma duwa mataao ndo sekii se mee to,” se mina me ona. Ku mina wiya kuwa ku Anegisemee'm okaa oo tukuu wemapi se mina waa. Ku mbeenaa kaa miya magi tau se mina waa. Ku mina ku kaa kiyoo enii kusipimaao ndo sekii.
Isedeo bage waa ekii Sinai ndii ambamba pemana widaamea. Ku koya endo eki ko eki'm memapea yoo wa-nini. Eki namba ndii da ambamba me kaa memapea koya wa-nini ndii to. Sion ndii me me, me kaa memapea. Sion ndii me ko me Siduga maa kaa aoo se Yedusedem kota okaa yoo mei! Me kota okaa yoo me iyaao tai se Anegisemee wa'm kota okaa yoo mei! Me kaa memapea. Waya eki'm memapea yoo kiyoo ko ese, ese eaao kana ese epo wado bage kooda waa ku namba kiyoo aoo. Ku dim bani-bani se kan andagatagea se epo wado bage kooda waa.
Anegisemee wa'm amanimami mina waa, Yohanesi wa'm yaawudumei simi mina kuwa ku mike pi-pamaao pasi se mina waa. Ku mike pi-pamaao pasi kumana ku mina ku dama yaa mu-mu se kipii kindo ko Anegisemee wai dama tosi na aya kadotaa taambi sima. Ku mina ku ndamatai se mee to me nuwa, kena wa'm ndamata se mina yito nakea se bage waa ku nuwa, ku akaa ndepo dama aya yadotaa taasi bage waa. Ku mina ku si tamake kindo.
Ken ndo waa ko ni'm waya wadobo se dena ko wa-nini se epo wado mee to ona deke. Ese yai, oyu se epo wado mee me ko. Se dema se dodo me kaa wai Siduga kaa kam endii se dema. Wa'm maa buboo ku sinu me komai se dema. Kena wa'm moo wado mbaandamo aoo ae se dema. Wa'm emaa-paa ku ese daamee wiki-wiki nai mugo dodo ae se dema. Wa'm kau bado wiya kuwa ku ese bidea tunee kan gida paketai se ee tukuu mugo dodo se dema.
Kena bidimi aoo me epo wado mee to wai wa'm keo me dopeana ese em'mbee Epadasi uwo kaada me kaa pi-gabemaake. Epadasi uwo me kaa pi-gabemaata mugo ndoe uwo deda-weda seopi. Mbao awasi na deda-weda siyaapi ee? Tau na. Me ko me ese ata emi tau ebo toke se bage waa ku nuwa, ekii'm guna miyo tentada bage kooda waa ku nuwa, ku Epadasi uwo ata yau kaa pesi na Epadasi uwo me me deda-weda siyaake. Ku ebo toke se bage kuwa ekii ogiyoo awea yato kam meesea se bage waa.
Se dena ko wa-nini epo wado mee to ona mitai se dema. Ona mitai se dena ko wai medona mesiba bidea tuku me pasi kaa kiyoo mi-tomu nai se dema. Kiyoo mi-tomu nai se dodo me kaa wa'm yaa da kaa kiyoo dona ko me eamasi awe da dopi se dema. Me awe da me me, dama eponu aoo se kao bidea kaa yitaasi na se awe da, me mugo awe da yaatoo nai se dema. Se yaatoo nai se dodo me kaa dama eponu aoo se kao ku nde miya maneke. Bidea kaa yitana dama eponu pesi na se kao kuwa ku mugo kao ese oba maneke. Ku oba manina ko me epo wado mee me me, wai ku dama eponu aoo se kao ku nuwa, Anegisemee'm daa wenimapi bage waa ekii'm asetoo simea - asetoo simea mina waa ku nuwa, ku se ku dipinimana Anegisemee tao “Ee,” se aseke. Aii se “Ee,” se aseke se ku tau. Dee, mesiba bidea tuku me me, me Anegisemee wa'm ebo animana ta se yoo me kaa kam embato kiyoo aoo.
Me mina minai se yeta mugo ndoe me mina me se asina ko “Bidimi aoo me se tuwoo-tuwoo awe da minasiyaapi se epo wado mee to woe. Ogiyoo ese em'mbee Epadasi uwo kaada me pasi kaa kiyoo epo wado bage ekii wui aoo. Ku epo wado bage kuwa ku eduga Anegisemee wa'm one pai wetami se epo wado bage waa,” aseke. “Mbao kaa one pai wetami se epo wado bage waa ee? Tau. Ku Anegisemee wa'm eduga mbutu da manimi mbutu da me kaa kiyoo pi-pamii se gumba ndoe yaa ekatana yapeyaasi se epo wado bage waa. Yaa ekatana yapeyaasi se mbutu da manimi me ko tahuni namba me tahuni mei! Aumo namba me aumo mei! Gapi namba me gapi mei! Yam namba me yam mei! Se mbutu da yamanemi mbutu da kui,” se aseke. “Endo ko Anegisemee wa mbutu da manimi mbutu pi-pamii se gumba kumana ku epo wado bage wui kuwa yaa ekatana yapeyaae,” aseke. “Ku mbao awasi na yapeyaake ee? Tau. Ku mee tuma kaa bage ogu mee ona yambatumayu. Mee wiya paki toyaabuu. Mee ona yambatumayu. Mee wiya paki toyaabuu. Mee ona yambatumayu. Mee wiya paki toyaabuu. Se awawoo sisi na yaekatana yapeyaae,” aseke. Se asemana tuwoo-tuwoo awe da minasiyaapi se epo wado mee me me, wai pedona ogiyoo ku epo wado bage wui ku mbo pemake. Epo wado bage wui ku mbo pemana yaa ekatana yapeyaake.
Me mugo yaa mani da maneke se dodo me kaa Anegisemee wa'm se asina ko “Maa kaa boo-baa ku nuwa, se-piya we-piya ku nuwa, iyeke se-kao we-kao ku en'ndo otuma mbeenaa kaa miya si yaayaa taae!” aseke. “Mee tuma da kaa bage ku ndo pi bodi ababa siyaabuu taae,” aseke. “Mee tuma da kaa bage bodi ababa siyaabuu taae koya ni'm yaa dine ebeabea da waa etu kaa aoo kipii kindo ko ku ni'm bage kumana ku si yaayaa taae!” aseke. “Ogu bage ku ndo bodi ababa siyaabuu taae. Ao edidi omaasea ku kisiu bodi ababa siyaabuu taae ku koya boyaake ku ndo si yaboyaae. Aii bodi ababa siyaake ku ndo bada,” aseke. Se asemana ndo waa ko ku ebondu kooda waa kuwa ekii'm mee tuma da kaa bage bodi yaababa siyaabuu nakea ku ese wa-nini keo. Ese gidipasi wa'm sese kapi moo gudimana eo dayaa mugo dodo bodi yaababa siyaabuu nakea.
ကြော်ငြာတွေ