Wahayu 4:2 - Anegisemee'm Mina Kapuge

² Se nasemana mina wiya tau kumana Anegisemee Dim'mba wai ni nduwawe namugu-mugu siyaake. Ni nduwawe namugu-mugu siyaai yako ni'm dema ku se de. Siduga maa me kaa kiyoo ese ata emi tau ebo toke se mee to wa'm animake yoo se dema. Me ebo animana ta se yoo me deta mugo ndoe, “O, mee ona me kaa animana tai ae,” se dema.

Wahayu 4:2 ပူးပေါင်းရင်းမြစ်များ

Mandiusi 22:43

Kena Yesiusi wa'm se asina ko “Ku ndumbo ko ndumbo koya dama nigi si pe taae. Anegisemee Dim'mba wa'm Daudi yakumami mina me kaa kiyoo Daudi wai Keditusi kaa se wudumina ko ‘Ni'm ebo se Tuhani,’ se wudumami. Kase koena Daudi'm se wudumami?” aseke.

Ibedani 8:1

Enii'm kaseao kan sipa mina me ko me se de. Asiyoo Siduga maa kaa kiyoo ese asiyoo kam asiyoo se Anegisemee wa'm ebo animana ta se yoo kiyoo aoo. Kena wa'm meyaa yato ebo animana toi se mee to me enii'm kasipa se imam mee to mei! Wai enii tao ese ata emi tau ebo toke se imam mee to se towoo nai.

Wahayu 1:10

Kiyoo pi-nambeana ndo waa ko Hadi Min'gu gapi, Tuhani kaa yapapa se gapi me ko Anegisemee Dim'mba wai ni'm dim'mba nda namugu-mugu siyaai yako ni duwato kiyoo mina ebo se mina da yema. Mina ebo se mina yeke me ko me ese tuwoo-tuwoo awe da minasiyaake se mina mugo dodo se yema. Ese ebo.

Wahayu 12:5

Ku taao kan kiyoo dito se koya iyo! Mbayuwaa yuwa one yadamana ndo waa ko Anegisemee wai me yuwa me mani mbimewena asiyoo wa mbo yadotaapi kumana naao iyo. Waya wada nda Anegisemee mbo yadotaai ndoe wa'm ebo animana ta se yoo me kaa nde miya yatoyaai. Kase enta mugo ndoe, me ambii me me, wa'm one yadamapi se mbayuwaa yuwa me aii mee to se ku tau. Wa ko wai mee en'ndo otuma ku wado ese ata emi tau ebo towoo taambi se mee to. Kena wa'm ebo toke yoo ku tunaa kan ebo toke se ku tau. Ese, ese oyu kan ebo towoo taasi. Se.

Wahayu 17:3

Se nasemana ko Anegisemee Dim'mba wai namugu-mugu siyaai yako me epo wado mee me me, wa'm ni nadopeana mee tuwaan tau yoo maa ndani se maa me kaa pi-nambeaseke. Me kaa pi-nambeana se dembea ndoe ese em'mbee emo da se emii mbato deke. Me emii me ko moo gea dada se emii to. Kena ku moo gea dada ku kaa wado piya poo haas aoo ae, se dema. Kena wa'm maa buboo kaa wudumapea ku ko ku ekaa da waa oba wudumapea se dema. Ku ese peu se ekaa da waa. Ku Anegisemee ekaa da peu kiyaasi se ekaa da waa se wudumei sipea. Ku mugo ekaa da waa dema. Kena wa'm em'kaa kiyoo animana tomu nai se ambii to ona aoo se dema.

Wahayu 19:4

Ku semagea ndoe kudoo-padoo se ebo bage waa 24 ku nuwa, iyaao takea se emii wui ku nuwa, ku ekii maa nda mbato ndoe Anegisemee kaa yapapa se. Ebo animana ta se yoo me kaa animai mee to, Anegisemee me me, wa kaa yapapa se. Wa kaa yapapa taao kan mina ebo mbeana se yapapana ko “Kui! Ogu mee kooda waa ekii'm enipea mina ku ese mike mina kumana enii namba ‘Kui,’ se nigeo! Ku kindo Yahawee mataae!” se yapapa semuu nakea.

Wahayu 20:11

Ken ndo waa ko ni'm se dena ko ese em'mbee pode da se ebo animana ta se yoo dema. Waya me kaa animana tai se mee to me nde miya dema. Ku se ku deta mugo ndoe, maa nuwa, epo nuwa, ku otuma egidaseopi se dema. Me kaa animai mee to wa kaa widaagea yako wa mbo kam oopea mugo dodo, se egidaseopi. Ku se ku ese okaa egidasiyaai yako waya wadobo deke mike iyo, se dema.

Wahayu 21:10

Se nasemana ni'm dim'mba nadopeana ese asiyoo em'mbee ndii patu da kaa nadotaami. Me kaa nadotaana wa'm se naadeyaana ko Anegisemee wa'm wa kaa wa tao daa wenimami se okaa yoo, Yedusedem okaa yoo me me, me naadeyaami. Me naadeyaata mugo ndoe, Anegisemee wai me okaa yoo me wa mbo kam Siduga kaa kam domaai se dema.

Wahayu 21:5

Kena ndo waa ko ebo animana ta se yoo me kaa animai mee to wa'm se nasina ko “Ni'm mina ku dama nayito taae,” aseke. “Se-kao we-kao en'ndo otuma ku ni'm yipi se-kao we-kao yakiyaabuu naka,” aseke. “Ku kasipa mina kuwa ku mbae da mina tau. Ku ese mike se mina kaseo. Ku ese ‘Mike ae,’ nigaao sekii se mina waa kaseo. Ku kumana ni'm kasipa mina ku masewena kapuge nda naawudumaae,” aseke. Ebo animai mee to wa'm se nasimi.

Wahayu 3:21

Si maaneke se kao ku mbeedi mbeaseke mee to wa kaa wa tao ebo yatoyaata. Dee, eduga ko si maaneke se kao ku ni'm mbeedi mbeasima se kao waa. Ku mbeedi mbeana ndo waa ko ni'm Naamee mbo pemana wa mesema animana tomu se, wa mesema ebo tuwaao nde. Ku kindo si maaneke se kao ku mbeedi mbeaseke mee to wa namba dodo se yatoyaata. Ni'm ebo animana ta se yoo wa namba kiyoo yaanimayaata, ni mesema ebo tuwaao na.

Wahayu 4:10

ku kudoo-padoo se ebo bage waa, 24 kuwa ekii maa nda mbato yapapa se. Ebo animana ta se yoo animai mee to wa egi kaa kiyoo maa nda mbato. Mee me me wai ese si bona ndo omiwoo towoo tutai se mee to. Ku kindo ekii wa kaa yapapa se. Emii waa wui ekii'm yapapa se mina yegea kindo. Se dema. Kena ku kudoo-padoo ebo bage kuwa ekii'm ebo tona eamasi daikomiya ku nde miya beawena ebo animana ta se yoo me kaa embato kiyoo mbeaseke. Ku kiyoo mbeana ekii'm eniwoo nakea mina ku se de.

Wahayu 4:5

Kena ese epopi nda se ebo animana ta se yoo kiyoo kam metakea se dena ko yaabebeo-yaabebeo, geemuu-geemuu, bo ndukuu mina - bo ndukuu mina ku se ku metakea se dema. Kena ebo animana ta se yoo me kaa embato kiyoo dena ko bidea aoo se osee amba dada kiyoo aoo ae se dema. Ku osee amba dada kuwa ku aii osee waa se ku tau. Ku ese oyu kam oyu se Anegisemee Dim'mba to mei!

Wahayu 4:9

Ku kindo ko ku iyaao takea se emii waa ekii “Paamee! Mataae! A ese asiyoo ae,” se mina eniwoo nakea. Ku mii kaa eniwoo se ee? Tau. Ebo animana ta se yoo me kaa animana tai se mee to wa kaa mina eniwoo nakea. Mee me me wai ese si bona ndo omiwoo towoo nai se mee to. Ku kindo wa kaa yapapa taao kan se eniwoo nakea. Kena wa kaa yapapataao kan mina enigea ndoe

Wahayu 5:1

Kena ni waya iya-iya da kaa se dena ko ebo animana ta se yoo me kaa animai mee to wa'm meyaa yato yaa da kaa kiyoo kapuge ona bibinimana yaatoo nai se dema. Me bibinimapi kapuge me ko me emba to nde miya duwato nde miya mina waa wudumapi ae se dema. Se dema koya ekatake sekii tau. Kase enta mugo ndoe, kapuge bibinimapi se dodo me kaa kapuge kapo otou kaa kiyoo ndagineke kao dada ndaginimapi kumana ekatake sekii tau ae, se dema.

Wahayu 5:13

Kena ndo waa ko ni wa-nini se euu mina me namba yeke. Ni'm yeke se euu mina me ko me Anegisemee wa'm anegi semami se-kao we-kao ku en'ndo otuma ku ekii'm euu mina patatagea se yeke. Siduga maa kaa toke se-kao we-kao ku nuwa, maa kaa toke se-kao we-kao ku nuwa, maa yiba nda toke se-kao we-kao ku nuwa, maakaa uwo ndoiba nda toke se-kao we-kao ku nuwa, ku se ku ekii'm yapapa se mina waa ku yeke. Ekii'm yapapa se mina ku se de. “Ebo animana ta se yoo animai mee to mesema Dom'mba Yuwa to, akaai ekaa da waa ku ebo yambeaseao waa bada ae, se kanigeo. (Haa ii) ‘Paamee! Mataae!’ se yasetoo nakea waa bada ae, se kanigeo. (Haa ii) Kena akaa'm ese ata emi tau ebo tutakea yoo me ko me enii kaa wado si dan ndo ese oyu kan omiwoo towoo togea waa bada ae, se nigimana yapapa taao bada. (Haa ii)” Ku mugo euu mina se yapapa nakea se yema.

Wahayu 6:16

Kiyoo pi-bon'takea se dodo me kaa ekii otuma mina ebo se woena ko “Ndii da waa woe. Oma bea da waa woe. Ebo animana ta se yoo animai mee to wa'm nadiimbi kumana enii kaa deo endiyaana nabibinemaae. Yai, Dom'mba Yuwa to wa'm yima kiki enii'm moo kaa endaaniimbi kumana ndii nuwa, oma nuwa, ku mugo kao ku kita nabibinimake bada.