Wahayu 3:3 - Anegisemee'm Mina Kapuge

³ Ku awaao kan eki'm eduga yemea mina waa, Anegisemee kaa katupimea mina kuwa ku si andibuu taae. Ku dama yaa mu-mu taao kan ekii'm si maaneke awake ku kaa duwa matana dama ndo awawoo taae. Ku se ku awasea na dimina wodoniwee se kasipa. Koya dimina wodoneao be kipii kindo ko eki mbo medona em kadaata ndeo. Kena ni'm ukeke mbutu da si kasiimba. Ese oma maseke mee to wa'm sese mugo dodo kaawaata. Aii koo-koo se medona em kaadaata. Eki ko ku mugo mbanamaao be kipii kindo ko ni se kaawaata.

Wahayu 3:3 ပူးပေါင်းရင်းမြစ်များ

Mandiusi 25:13

Yesiusi wai me mugo mina ebeabea da asemana ndo waa ko wa'm waya se asina ko “Ku mugo yaa, ni'm waya wadobo ukaata yoo, me me gapi ukaata ee? Me gado naa ukaata ee? Ku eki naeo kumana dimina wodonina nadito siwoo taae. Se katupaao kan sipa,” aseke.

Madakusi 13:33

“Eki ko ‘Kaina gapi aoo kaasea naa yaa?’ se nigigea yako dimina wodoneae! Dimina wodonina mbikana ndo dito siwoo taae,” aseke.

Madakusi 13:36

“Dee, ea na gado ukaambi se dodo ndoe, a'm dimina si wodonina omita sipi yoo mugo kadiimbi ndeo. Me ko me ese disi se kao baa,” aseke.

1 Timotiusi 6:20

Timotiusi woe. Eduga ko Anegisemee wa'm kamatana ko wa tao ndanda ku nuwa, wa'm mina ku nuwa, ku se ku kamatami. Ku kindo ko wa'm kamatami kuwa ku dama dito taae. Ku dama edimaae. Ku dama edimaao kan mee agumee ekii ese ea, dim'mba tau se mina waa ku kaa mina amoe-moe se se dodo me kaa ko ku duwa matana si yito taae. Eé, ebanaa bage ekii'm tupaambea se mina ku wa-nini se mina waa. Ku mugo mina tupeke bage ekii'm se asina ko “Enii nigita kaa eneke mina waa ku ese ndumbo, ese maaneke se mina waa,” se aseke. Ekii'm se aseke koya mbeduwa. Ku wa-nini mina kuwa ku mbae da mina waa. Ku kindo ku nde miya si dito taae.

2 Timotiusi 1:13

Timotiusi woe. Ni ko ni eduga a mbo mina katupeke se dodo me kaa ko kupoo se mina ku katupaan tau. Ese dama, ndumbo se mina ku ndo katupiwoo sima. Ku kindo ni'm sese ku a namba dodo ndo ekokeduwaae. Ni'm katupiwoo sima mina ku dama yaa mu-mu sita mugo ndoe mee mbo ndumbo ndo pi-yatupiwoo taae. Pi-yatupiwoo nae se dodo me kaa ko a'm yaa mu-mu taao bada se dimina wiya aoo. Ona me ko Anegisemee kaa “Mike ae,” nigimana wa kaa egan'ta taao gai se dimina, me ona. Ona me ko wa kaa nuwa, mee kaa ogu kaa nuwa, ku kaa yaembaake se dimina, me ona. Ku dimina ku Keditusi Yesiusi wa'm kakumawoo nai se dimina kumana ku kaa kiyoo kusipimana ndumbo se mina ku ndo tupiwoo taae.

Ibedani 2:1

Anegisemee Yombai wai ese ata emi tau ebo se mee to kumana enii'm wa kaa yemea mina kuwa, ku ese oyu kan dama yaa mu-mu taae. Ku kaa dama si yaa mu-mu se kipii kindo ko aii koo nigee-nigeena duwa matana si dito taambea koena.

2 Petadusi 1:13

Dee, enii'm Tuhani Yesiusi Keditusi wa'm se nanige-manena ko “Petadusi, a'm buwaase yoo pasi,” se nanige-manemi. Ku kaa kiyoo kam ni'm se nigina ko endo kam wado kisee buwaata kam miyo epota kaa ndigi se gumba en'ndo otuma kuwa ni'm kasipa mina ku waya wadobo nde miya si dan ndo kasiwoo semuu taamba ndeo. Si andibuu sisea na se kasiwoo-kasiwoo semuu taamba.

2 Petadusi 3:1

Ni'm kaembaake se nemugoi nakawaa woe. Me kapuge me ko me ni'm eki tao wiya aoo me kaawudumeo se kapuge. Kena ni'm eduga kaawudumama kapuge nuwa, ni'm endo kaawudumitaka kapuge me nuwa, ku akaa ndepi ku kaa kiyoo ni'm kaseao kan sipa mina ku se de. Ona me ko Yahawee'm mina yaa-enei simea se bage waa ekii'm amanimamea mina waa ku si andibuu taae, me ona. Ona me ko Edaseo bage ekii'm eki mbo kaeniwoo simea se mina waa ku nde miya si andibuu taae, me ona. Dee, eduga ko enii'm woo-woo se kaa em si nadan ndo omiwoo towoo natoyaabuu nai se mee to, Tuhani Yesiusi wa ko wai mee waa ku mbo mina yatupiwoo simi. Ku mbo mina yatupiwoona ndo waa ko wa'm tupiwoo simi mina ku Edaseo bage ekii'm dopeana eki mbo mi-katupiwoo simea. Ku kindo ko nabi bage ekii'm eduga amanimamea mina waa ku nuwa, Tuhani wa'm tupiwoo simi mina ku nuwa, ku akaa ndepi waya kayeyaao gai. Kena ku mina kuwa ku aii se kayeyaao gai se ku tau. Eki'm nigeke-nigeke ku ese dama, ese ndumbo se dimina da waa ku ndo nigi sisea na dim kakoeta taao kan sipa ku kapuge wiya kuwa kaawudumeo.

2 Petadusi 3:10

Ku kindo ko Tuhani wa'm ebo se gapi me mani tau si ukaasi koya ea na gapi, mee tuma kaa bage ekii wa'm ukaasi yoo me kaa si yadito sita mugo ndoe, kuhai-kuhai mani ukaasi. Ese oma maseke mee to wa'm sese mugo dodo. Kase enta mugo ndoe, epomee wai dama si dito sita mugo ndoe kuhai-kuhai oma masiyaa mugo dodo. Kena Tuhani ukaasi se dodo waa ko ese em'mbee giu-giu se mina minasita mugo ndoe epiyoo da otuma egida seopi taasi. Waya epiyoo kaa daamee nuwa, aumo nuwa, okude waa ku nuwa, ku se ku nde miya bidea kaa wideoneoyaapi taasi. Waya maa en'ndo otuma ku nuwa, ku kaa se-kao we-kao ku nuwa, ku en'ndo otuma ku nde miya egida seopi taasi. Dano!

Wahayu 16:15

Ku semana ndo waa ko ekii'm “Amo-mo siwee!” se asipea mina kaa maa en'ndo otuma ebo togea se edaya bage waa ekii'm tentada bage waa ku bada madona Amagedoni maa me kaa amo-mo semagea. Amagedoni maa se ekaa da me ko me Ibedani ebe kaa mina kasipa se ekaa da. Kiyoo amo-mo semagea se dema. Ku se ku dena ko Tuhani Yesiusi wa'm se asina ko “Ni'm mina ku dama nayito taae,” aseke. “Ni ko ni eki mbo mike ukaata koya oma maseke mee to wa'm ukeke sese mugo dodo se ukaata,” aseke. “Mee'm si nadito sita mugo ndoe ea na dembea ndoe ukaata koena,” aseke. “Ku kumana dimina wodoneae! Dee, mee ona wai oma maseke mee to si diton ndo manaa se kao ku bea-mana omeke kipii kindo ko oma maseke mee to ukeke se dodo me kaa amaa ndago kan ego kaambi sima,” aseke. “Ku mugo yaa, dimina wodoneae! Ni'm ukaata yoo me nadito taae. Nadito nakea me ko me manaa se kao ku si bea-mana ndo aii mata siwoo nakea mugo dodo se dimina da. Me mugo dimina yaa mu-mu se kipii kindo ko ego keke iyo. Aii si ego kina bani-bani siwoo taambea ndo,” se aseke. Tuhani Yesiusi wa'm aseke mina ni'm se yema.

Wahayu 22:7

Se asemana ndo waa ko Yesiusi wa'm se asina ko “Ni'm mina ku dama nayito taae!” aseke. “Ni ko ni meao pasi ndeo,” aseke. “Ku kumana me kapuge me nda amanimake mina waa, anikee waa pi-pamiyaabuu taasea se mina kuwa, ku dama yaa mu-mu se kipii kindo ko ku mugo bage ku bani-bani siwoo nakea se bage waa. Ku mina ku yeao be kipii kindo tau!” se aseke. Yesiusi wa'm se asimi.

Wahayu 3:11

Ni'm meeta yoo pasi. Kam waa ko dama aya kaadotaata. Ni'm dama aya kaadotaake me ko me ese ebo edaya mee to wa'm eamasi daikomiya mayaa me mugo kaamatake mugo dodo. Ku koya mee'm peu-pau kaawapea ku kaa kiyoo Anegisemee'm dimina mbana-mbeaseke kipii kindo ko iyo. Dama aya si kaadotaata. Ku kumana dama aya kaadotaasi na mee'm kaawapea ku si dito taae. Anegisemee'm dimina ku si mbanaman ndo waya wadobo nde miya dama yaa mu-mu siwoo nakea waa bada ae, se kanigeo.

Wahayu 3:19

Ku mina ku aii se kasipa se ku tau. Ni ese kaembaake kan kasipa. Kase enta mugo ndoe, ni'm ese embaake se bage waa ku ni'm dim koeta se se bage waa dodo. Ku ni'm tupita se bage waa dodo. Si kaembaake waa, si kasiyaa. Ku kumana eki'm ni kaa dimi wiya-wiya se dimina ku wananiyaae. Dimina ona ndo kan ni'm dimina me ndo dowoo taae. Se.

Wahayu 3:2

Kase enta mugo ndoe, eki'm awatakea ku Anegisemee'm emaa misi kaa naa mugo maaneke, naa mugo si maaneke se kadetai. Kena ekii maaneke awatakea ku dim pisiniin tau kan awatakea kumana ku nde miya si maaniyaao pasi. Ku kumana ku taa kisi na dimina wodoniwee! Eki'm naa maaneke ku awatakea kuwa ku ese tukuu wemana kusipimana waya wadobo dama awawoo taae.