Kena Yesiusi wa'm waya se asina ko “Ona me ko anikee waa, Mee Yombai, ni ko ni me maa me kaa waya ukaata. Me maa me kaa waya meta mugo ndoe Ni'm Naamee wa'm ese abayai aoo-aoo aoo se ao da me nda tomu naka se dodo ndoe ukaata. Kena, ni'm epo wado bage waa ku nde miya ni mesema ukaata. Se ukimana ko peu-pau awapea bage ku kaa peu aya yadotaa taata. Dama awapea bage ku kaa dama aya yadotaa taata. Mee'm awamea-awamea mugo dodo ndo se yadotaa taata kumana ni'm gai-gai ku ndo yaa mu-mu taao ndo bada, me ona, wido,” aseke.
Wahayu 22:12 - Anegisemee'm Mina Kapuge12-13 Kena Yesiusi wa'm asimi mina ona me ko me se de. “Ese eduga edugana kam ata kisee ese pake-takanu kam miyo epopi nda ku en'ndo otuma ni aoo-aoo ku aoo ndo se towoo semuu siwoo naka. Waya wada nda se-kao we-kao en'ndo otuma aoo kiyaama mee to me ni. Kisena ndo waa ko ku otuma dano kiyaata mee to me nde miya ni. Ku kindo ko ni'm mina ku dama nayito taae! Ni, eki mbo memaao pasi. Kena, eki mbo memana peu-pau awapea bage ku kaa peu aya yadotaa taamba. Dama awapea bage ku kaa dama aya yadotaa taamba. Ni'm eki mbo memana se awaata,” asimi. Yesiusi wa'm se asimi. အခန်းကိုကြည့်ပါ။ |
Wahayu 22:12
19 ပူးပေါင်းရင်းမြစ်များ
Ku kaa ni waya kasiinka ndeo. Anegisemee wa'm bai mugo me ko me eki. Kena wa mesema masii yaamata se bage waa ku anai. Ku kindo ko wa naa iyoo weke, wa naa uwo iyemoo se koya tau. Ana papi mbaya ona ndo. Ana papi Anegisemee'm bayoo masii masiwoona ndo waa ko ana'm masii yaamata sipa ku kaa kiyoo wa'm naediisi. Wa naedeke se dodo me kaa ko otuma dodo ndo naedeke se ku tau. Dee, mee ona wai ese ebo masii maseke kipii kindo ese ebo yaediisi. Eé, mee ona wai mbeenaa ndo kipii kindo ko ku nde miya mbeenaa ndo yaediisi. Me ko me Anegisemee wa'm wa tao ndanda yaa-awapea bage waa ku pikamoona yaedeke sese, kui. Waya mina ebeabea da kasiinka ndeo. Eki ko eki Anegisemee wa'm ee mugo dodo se bage waa.
Kena maa en'ndo otuma togea se-bage we-bage ku ko ekii a kaa yima kiki kiwoo nakea. A kaa kagodeta siwoo sipea koya endo se gumba pi-pam'dai se dodo ndoe a'm ekii'm woo-woo se kaa yima kiki me nde miya uwa da kaa deyaabuu nae kumana paamee Anegisemee, paamee! Ku kaa kiyoo endo se gumba me kaa ko me eduga bomea bage ekii'm awamea-awamea ku ndamana em yadasi na gumba. Me ona. Ona me ko endo se gumba me kaa ko me maa en'ndo otuma ku nuwa, mee tuma kaa bage ku nuwa, ku se ku si maaniyaabuu sipea bage waa ku nde miya em yadana yambatumei sisi na se gumba. Me ona. Ona me ko endo se gumba me kaa ko me a ekaa da ebo mbeana kapapa nakea bage waa ekii tao dama aya yadotaa sisi na se gumba. Ebo se bage ku nde miya, mbeedi se bage ku nde miya kui. Ku kaa kiyoo a'm dama aya yadotaake se bage kuwa ku nabi bage waa. Ku nabi bage kuwa ku a kaa a tao a'm gai-gai kaawanaa sipea bage waa. Kena a'm a tao wenimapi bage waa ku nde miya dama aya yadotaa taambe. Me ona. Endo se gumba ku se ku pi-pam'dai se gumba kumana paamee Anegisemee! Paamee!” se aseke. Kudoo-padoo se ebo bage, eki maa nda mbatona Anegisemee kaa yapapa se se dodo me kaa ku mugo mina asetoo nakea, se yema.
Kena wa'm yopaa se bage waa, wa'm sese yaa mu-mu nakea se bage kuwa ku mbatumei-pai taamba. Ku peu-pau awapea bage kuwa ku em yadake se dodo me kaa kiyoo ko Yesiusi kaa andagatake bage waa maa en'ndo otuma andagatagea kuwa ekii'm ni kaa nanigaambea mina ku se de. Ona me ko ‘Ai, ai, wai mee'm se-dimi we-dimi nuwa, mee'm se-nigemoo we-nigemoo nuwa, ku se ku ndamanaa se mee to ae,’ se ku nanigaambea, me ona. Ona me ko ‘O, wa'm mee kaa yadotaasi ku ko ku yima kan yadotaasi ku tau. Wai mee'm awake-awake ku ndamana ko wa'm depi ku dodo ndo yadotaasi ae,’ se nanigaambea, me ona. Ku bage kuwa em yadake se ku nadegea yako ekii ni kaa se nanigaambea.
Kena ebo animana tai se mee to wa'm egi kaa inewena takea ku ko ku eduga bomea se bage waa maa poo yoo yandomai yako kiyoo inewena takea se dema. Ku bage kuwa ekii ebo tomea se bage waa ku nuwa, mbeedi tomea se bage waa kuwa, ku mugo bota-pata kooda waa se dema. Waya maakaa uwo ndoo da nda bomea se bage waa ku nuwa, mee bota-pata mbembo simi yoo kiyoo kam memapea se bage waa ku nuwa, ku bota-pata se bage en'ndo otuma maa poo yoo yandomana kiyoo inewena takea se dema. Ku se ku dena ko kapuge kooda waa ku namba kiyoo aoo ae se dema. Kapuge ona me ko me omiwoo towoo tuwaasea se bage waa, ekii ekaa da waa wudumami se kapuge, me ona. Kena ogu kapuge kooda waa ku ko ku mee'm awamea-awamea mina waa ku wudumei siwoo sipi se kapuge waa. Ku kapuge ku ekatai se dema. Mbao kaa ekatake ee? Tau. Bota-pata se bage ku ndumbo ndo em yadaao kan ekai-pai semai se dema. Ekai-pai semana ekii'm awamea-awamea mina ku ndamataina “Me dama. Me peu. Me dama. Me peu,” se pikamoo siwoo nai se dema. Ekii'm peu-pau ku oba awamea ae se ndamapi kipii kindo ebo em yadasi na aya yadotaake. Mbeenaa ndo kipii kindo mbeenaa ndo em yadasi na aya yadotaake. Ku kaa kiyoo ekii kaa moo tukitake mina waa ku otuma dodo tau koya otuma ndumbo ndo moo yatukita nai se dema.
Se asemana ndo waa ko Yesiusi wa'm se asina ko “Ni'm mina ku dama nayito taae!” aseke. “Ni ko ni meao pasi ndeo,” aseke. “Ku kumana me kapuge me nda amanimake mina waa, anikee waa pi-pamiyaabuu taasea se mina kuwa, ku dama yaa mu-mu se kipii kindo ko ku mugo bage ku bani-bani siwoo nakea se bage waa. Ku mina ku yeao be kipii kindo tau!” se aseke. Yesiusi wa'm se asimi.
Ni'm meeta yoo pasi. Kam waa ko dama aya kaadotaata. Ni'm dama aya kaadotaake me ko me ese ebo edaya mee to wa'm eamasi daikomiya mayaa me mugo kaamatake mugo dodo. Ku koya mee'm peu-pau kaawapea ku kaa kiyoo Anegisemee'm dimina mbana-mbeaseke kipii kindo ko iyo. Dama aya si kaadotaata. Ku kumana dama aya kaadotaasi na mee'm kaawapea ku si dito taae. Anegisemee'm dimina ku si mbanaman ndo waya wadobo nde miya dama yaa mu-mu siwoo nakea waa bada ae, se kanigeo.
ကြော်ငြာတွေ