Kena Yohanesi wa'm waya se asina ko “Ni'm sese masimasea na mina ebeabea da kasiinka ndeo. Keditusi wa ko wai ambii masiimbi se mee to mugo dodo. Ni ko ni wa'm dadaa se anamoo se mee to me ndo. Kena ogu bage waa ku wa'm masiimbi se ambii mugo dodo se bage waa. Ku kindo ko wa'm ambii mugo se bage waa ku wa mbo ndo meke bada. Ni mbo tau. Ni ko ni ese, ese bani-bani se kan wa mbo pasi kaa tomuna wa'm mina yito naka se mee to. ‘O, wai wa'm ambii mugo se bage waa ku wa mbo metakea ae,’ se deo yako ni'm bani-bani se dimina da me ese mike eneke sekii tau. Ese asiyoo kam asiyoo bani-bani se aoo,” aseke.
Wahayu 21:2 - Anegisemee'm Mina Kapuge2 Ku se ku aoo kiyaana ko ese yipi se Yedusedem okaa yoo me Siduga maa kaa kam endai se dema. Me okaa yoo me me, me Anegisemee wa'm wa kaa wa tao wa-nini wenimami se okaa yoo. Me okaa yoo me Anegisemee mbo kam endai, endai se dito sita mugo ndoe, me ese deao disi yakiyaapi se okaa yoo ae se dema. Se deo ndoe ni'm se nigina ko “Yai, me Yedusedem okaa yoo wa'm sese disi me ko me mee'm odi masiinki ambii to wa'm sese mugo dodo, ae,” se nigima. Kase enta mugo ndoe, mee'm masiinki ambii to wa'm sese ko yimee'm emaa misi kaa deao disi kisi na wai deao disi se kao waa matake. Ku mugo yaa, me yipi se Yedusedem okaa yoo me me, me ese deao disi yakiyaapi se okaa yoo ae se dema. အခန်းကိုကြည့်ပါ။ |
Wahayu 21:2
28 ပူးပေါင်းရင်းမြစ်များ
Ni'm kaseao kan sipa mina me ko me se de. Anegisemee mbaya bage eki'm dimina ku Anegisemee wa mbo tau kipii me dimina se kadena ko Anegisemee wai eki kaa kaemaayoo aoo. Ku mugo yaa, eki'm dimina da ku Keditusi kaa pataweke kipii kindo ko ni nde miya eki kaa kaemaayoo aoo. Ku kaa mina ebeabea da kasiinka ndeo. Eki ko eki Keditusi wa'm kamasiisi se ambii se bage waa mugo dodo. Kamaseao kan mina ku mike bota. Anikee waa mike kamasiisi. Kum seta kaa, anikee waa kamasimana wa'm egi kaa kiyoo tomu se se dodo me kaa ni'm eki kaa kaseao gai se mina ku se de. “Keditusi woe, a'm ambii se bage waa ku dee. Ese tubaka mbeenaa kaa miya si awan ndo a kaa dimina ona ndo kan towoo sipea se ambii, ku dee.” Me mugo mina kaseao gai. Ku se ku mike kaseao gai kumana ni eki kaa kaemaayoo aoo.
Abedaham wa'm “Take ee nda nde miya toke bada o,” se nigimami se dimina da me kase enta mugo ndoe, wa'm pi-too waa oowoo, se nigeke se okaa yoo me nakayoo maa me kaa okaa yoo se ku tau. Wa'm mbikana em'ndoo nai se okaa yoo me ko me Anegisemee wa nigita kaa ndo memami se okaa yoo. Me Anegisemee wa'm tukuu wemoona mei simi se ee waa aoo se okaa yoo kumana taa kiyaake sekii tau. Me mugo okaa yoo pi-tuwaao kan me wa'm ese mbikana em'ndoo se kao kumana wa'm nigina ko “Endo se gumba take ee nda ndo omiwee se bada o,” se nigiwoo simi.
Ku koya ekii'm batamea se maa me ese miyo se maa to. Ekii'm mbikana ndigi se maa me ko me ese asiyoo abayai se maa to. Me Siduga maa kaa tuwaasea se yoo. Me maa me kaa ndo “Pi-too waa oowoo,” se nigimamea. Ekii'm se nigeke kumana Anegisemee wai ekii tao kota okaa yoo yaepipi semami. Ku kaa kiyoo enii'm deao sekii se kao me ko me se de. Anegisemee wai ekii kaa ego tau. Ku mugo bage ekii ko “Enii Anegisemee mbaya bage ndeo,” se aseke kindo nde miya, me Anegisemee wa'm ese yeao gai se mina.
Isedeo bage waa ekii Sinai ndii ambamba pemana widaamea. Ku koya endo eki ko eki'm memapea yoo wa-nini. Eki namba ndii da ambamba me kaa memapea koya wa-nini ndii to. Sion ndii me me, me kaa memapea. Sion ndii me ko me Siduga maa kaa aoo se Yedusedem kota okaa yoo mei! Me kota okaa yoo me iyaao tai se Anegisemee wa'm kota okaa yoo mei! Me kaa memapea. Waya eki'm memapea yoo kiyoo ko ese, ese eaao kana ese epo wado bage kooda waa ku namba kiyoo aoo. Ku dim bani-bani se kan andagatagea se epo wado bage kooda waa.
Me kapuge me nda mina waa ku Yesiusi Keditusi wa'm uwa da kaa kiyaabuu simi se mina waa. Dee, ku mina kuwa ku mee'm eduga yiin tau se amanimake mina waa. Ku amanimake se mina kuwa ku mike pi-pamaao pasi se amanimake mina waa. Ku pi-pamaao pasi se mina kumana Anegisemee wai ku mina kuwa Yesiusi Keditusi mbo yamatake. Aii se yamatake se ku tau. Wa'm wa kaa wa tao ndanda yaawanaa se bage waa ku otuma ku namba epi kisi na Keditusi mbo yamatake. Ku kindo ku Keditusi mbo yamatana ko ku mina ku enii namba epi kisi na Keditusi wai wa'm epo wado mee to ona Yohanesi mbo yapeyaake. Yohanesi mbo yapeyaana ko ku mina kuwa dopeana pi-yanige-maneke. Me Yohanesi me me, wai Keditusi wa'm wa kaa wa tao ndanda yaawanaa nai se mee to. Wa mbo pi-yanige-maneke.
Me kapuge me ko me Yohanesi wa'm wudumami se kapuge. Ogiyoo Asiya maa me kaa kiyoo Yesiusi kaa andagatake yoo dada aoo. Ku dada andagatake yoo kiyoo andagatagea bage waa ekii tao kapuge, eewee. Nemugoi nakawaa woe, aba! Anegisemee Naamee mesema, wa'm Dim'mba mesema, Yesiusi Keditusi mesema, ekii'm aii se dama katoyaai waa bada ae se kaanigeo, me ona. Kena ona me ko, ese widigi tau se dimina da nde miya kakumai waa bada ae se kaanigeo, me ona. Ku se ku kaa-awatai waa bada ae, se kaanigimana “Aba, aba,” se kaseo. Anegisemee wa ko wai aoo-aoo ku aoo ndo se tutai se mee to. Ese eduga edugana nde miya towoo simi. Endo nde miya towoo nai. Waya wadobo nde miya towoo taasi. Me Anegisemee mei! Anegisemee wa'm ebo animana ta se yoo me embato kiyoo ko Anegisemee Dim'mba wa namba kiyoo aoo. Anegisemee Dim'mba wa ko wa'm yaa mani da ese oyu kam oyu se yaa mani da! Se.
Ni, Yohanesi, ni eki'm mesema Yesiusi kaa eniikinaa bage waa. Kena enii Yesiusi nda dipinimake kumana enii ndepo enii kaa nameaniyaabuu sipi kao ku se de. Ona me ko enii Yesiusi mbaya bage kumana mee waa ekii bodi naababa siyaake, me ona. Ona me ko bodi ababa se koya dimina katu tau. Aii dama kusipimana towoo semuu nakea ndo, me ona, wiya. Ona me ko enii'm ese ebo toke edaya mee to me Anegisemee. Enii ndepo wa'm guna miyo togea se bage waa, me ona, wido. Ku se ku ni, eki mesema Yesiusi nda dipinimai yako nameaniyaabuu sipi kao waa. Ni ko ni Anegisemee'm mina nuwa, Yesiusi kaa mina waa ku kaa nuwa, ku dopeana mee mbo eniwoo sima. Ku eniwoo sima kumana mee waa ekii nabeagea yako yaa napineana Patamosi epogo maa me kaa kiyoo pi-nambeasimea.
“Ku se ku ebeabea da ebeamake koya Yahawee'm okaa ee yau-yau yoo da waa ku tau. Me ebeabea da si ebeae. Kase enta mugo ndoe, yau-yau yoo da waa ku Anegisemee kaa si yapapa se se bage waa, ekii'm yoo da. Me yoo da me Anegisemee wa'm ekii tao se manipi se yoo da kumana ku ebeabea da si ebeae,” se nasimi. Kena wa'm waya se nasina ko “Dee, me gado me kaa ko Anegisemee kaa si yapapa se bage waa ekii'm awake ku se de. Ao 42 ku kisiu omitakea se dodo ndoe ekii Yedusedem okaa yoo si maaniyaabuu nakea. Me Anegisemee wa'm wa kaa wa tao wa-nini wenimami se okaa yoo koya, tau. Si maaniyaabuu nakea ndo. Ese ekii'm bado miyo ine-bane nakea se maa mugo dodo kiyaabuu nakea. Anegisemee kaa si yapapa se bage waa ekii'm se awawoo taasea,” se nasimi.
Se nasemana ni'm dim'mba nadopeana ese asiyoo em'mbee ndii patu da kaa nadotaami. Me kaa nadotaana wa'm se naadeyaana ko Anegisemee wa'm wa kaa wa tao daa wenimami se okaa yoo, Yedusedem okaa yoo me me, me naadeyaami. Me naadeyaata mugo ndoe, Anegisemee wai me okaa yoo me wa mbo kam Siduga kaa kam domaai se dema.
Se asemana ko epo wado mee to ona wai ni mbo meke. Ni mbo meke se epo wado mee to me ni'm eduga dema se epo wado mee to. Dee, eduga ko epo wado bage waa ekii dada ku dema. Kena ku dada ekii'm yaa da kaa yaa mu-muna ko mee tuma bage kaa ese takanu bodi ababa sisi na keo-poo, dada, ku se ku yaa mu-mu simea se dema. Ku epo wado bage kuwa, ona me ko medona ni mbo se nasina ko “Ni mba nda me! Ana ogiyoo pee nde. Dom'mba Yuwa wa'm masiimbi ambii to me ni'm pi-kadeyaamba nde, ni mba nda mee!” se nasimi.
Anegisemee Dim'mba me nuwa, Dom'mba Yuwa to wa'm ambii se bage waa ku nuwa, ekii otuma “Mewee, mewee,” se mina eniwoo nakea. Kena, ku eniwoo sipea mina ku kaa “Mike ae,” nigimapea se bage ekii nde miya ukina waya “Mewee, mewee,” se mina en'takea waa bada ae se nigeo. Mbao awasi na “Mewee,” se mina aseao bada ee, tau na. Omiwoo towoo sisi na uwo mi-nosi na “Mewee,” se mina woeke. Ku kumana omiwoo towoo sisi na uwo naadi kipii kindo ko mi-noke bada. Kipe edina noke se uwo se ku tau. Aii se mi-noke ndo bada, se kaseao kan sipea.
Waya wada nda me kapuge me nda amanimake mina kuwa, me mina “Mbeduwa ae,” nigimana ko ebanaa ku ekide-mbeaseke kipii kindo mina ekide-mbeasipi mee to me nde miya Anegisemee wa'm em yadaambi se mee to. Em yadai yako me kapuge me nda dama tosi na se kao, mee si bosi na se piya me nuwa, Anegisemee wa'm wa kaa wa tao wa-nini wenimami se okaa yoo me nuwa, ku se ku si maniimbi. “Me okaa yoo me si ndemaae! Ku poo ku si naae!” se mina ku ndo yasiimbi. Ni'm wudumapa mina ku ekide-mbeasipi kindo Anegisemee wa'm se yaawaasi. Ku kindo ko me kapuge me nda mina waa ku otuma ndumbo ndo yaa mu-mu taae. Ku mbae da mina kisi na yipi mina mesema dipinimake me daa. Waya kawitana ni'm wudumapa mina ekide-mbeaseke nde miya me daa. Ku se ku mbeenaa kaa miya si awaae. Se kaseao kan sipa.
Si maaneke se kao ku mbeedi mbembo nai mee to wa kaa wa tao dama aya yadotaata. Wa kaa dama aya yadotaata ona me ko me se de. Mee me me, me ni'm yadopeana Anegisemee'm okaa toi se yoo me kaa pi-yatoyaata se mee to. Kiyoo pi-yatoyaa ndoe, ese Anegisemee'm emaa misi kaa kiyoo mee me me wai tukuu wetapa se mee to mugo dodo kidai. Ku kaa kiyoo waya badewena yau kaa peaniyaake sekii tau se mee to. Me bage aya yadotaata, me ona. Kena ni'm wiya aoo me yadotaata me ko me se de. Wa maa da kaa ekaa wido yaawudumaata. Ekaa da ona me ko ni'm Anegisemee, wa ekaa da yaawudumaata. Me ona. Ona me ko ni'm Anegisemee wa'm kota okaa yoo me ekaa da yaawudumaata. Me kota okaa yoo me Anegisemee wa'm Siduga kaa kam domaai se kota okaa yoo, ese yipi se Yedusedem okaa yoo mei! Me kota okaa yoo me ekaa da namba wa maa da kaa yaawudumaata. Wiya. Ona me ko ni'm yipi se ekaa da me nde miya wa maa da kaa yaawudumaata. Wido. Ku ekaa da wido kuwa wa kaa yaawudumaata.
ကြော်ငြာတွေ