Biblia Todo Logo
အွန်လိုင်း သမ္မာကျမ်းစာ

- ကြော်ငြာတွေ -




Wahayu 2:10 - Anegisemee'm Mina Kapuge

10 Endo ko ni'm mina ku dama nayewee! Ibedisi wa ko wai eki ebanaa peniyada ee nda kadomoo taasi. Ese anikee waa se ku tau. Kadomoo taasi yoo pasi keo. Kena wa'm kaawaasi me ko me eki'm dimina waa ku Anegisemee kaa dimi wiya-wiya kakiyaao kan peniyada ee nda kadomoo taasi. Ku kaa kiyoo onu haas mugo mike bodi ababa semuu taasea. Bodi ababa taasea koya ku kaa si widaae. Kambatumake nde miya, katoyaake nde miya, eki Anegisemee kaa dimi si wiya-wiya taae. Kase enta mugo ndoe, Anegisemee kaa dimina ona ndo yaa mu-mu se kipii kindo ko ku kaa kiyoo omiwoo towoo katoyaasi na aya kadotaa taata sima.

အခန်းကိုကြည့်ပါ။ ကော်ပီ




Wahayu 2:10
36 ပူးပေါင်းရင်းမြစ်များ  

“Kase enta mugo ndoe, eki ni ekaa da kaa ‘Mike ae,’ se nanigimagea yako mee en'ndo otuma ese kawisinaasea,” aseke. “Ese kawisinaasea koya eki'm buwaasea yoo me kam miyo ni kaa dimina ona ndo kan si dan ndo ‘Mike ae,’ se nanigiwoo sipea kipii kindo ko eki ko aii bage tau se kadetaka. Kase enta mugo ndoe, ni kaa magi tau kan kusipimana takea se bage waa eki'm widigi aoo se toke yoo ku Anegisemee wa'm mbeedi kaambeana ese dama omiwoo towoo katoyaabuu taasi,” aseke.


“Mee tuma kaa bage ku si widaae. Dee, mee tuma kaa bage ku mee'm maa buboo ku yambatumana yaboyaake sekii koya wa'm dimina da yaboyaao kana. Ku koya Anegisemee wa ko wai mee'm maa buboo ku mesema dimina da mesema ku akaa ndepo bidea uwo ndoiba nda yadomaana yapisime-mbeaseao sekii kumana wa kaa ndo widaao ndo bada,” aseke.


Kiyoo kam Yesiusi waya se asina ko “Me mugo widigi aoo se gumba aoo kaasea koya ese pake-takanu se gado me kaa miyo ni kaa ‘Mike ae,’ se nigeke se dimina me si mbana-mbeaseke kipii kindo ko me maaneke. Kase enta mugo ndoe ku mugo kusipimana takea se bage waa ekii'm widigi aoo se toke yoo ku Anegisemee wa'm mbeedi yaambeana ese dama omiwoo towoo yatoyaabuu taasi koena,” aseke.


“Dee, eki ni ekaa da kaa ‘Mike ae,’ se nanigimagea yako mee en'ndo otuma ese kawisinaasea,” aseke. “Ese kawisinaasea koya eki'm buwaasea yoo me kam miyo ni kaa dimina ona ndo kan si dan ndo ‘Mike ae,’ se nanigiwoo sipea kipii kindo ko eki ko aii bage tau se kadetaka. Kase enta mugo ndoe, ku mugo kusipimana takea se bage waa eki'm widigi aoo se toke yoo ku Anegisemee wa'm mbeedi kaambeana ese dama omiwoo towoo katoyaabuu taasi,” aseke.


“Waya ku kaa uketake mina kasiinka ndeo. Dee, a'm maa kaa toke yoo ku dimi kan ‘Yesiusi kaa boke ni be. Ni'm gai-gai ku ndo awaao gai, ae,’ se dimina ku ndo yaa mu-mu taao gai kipii kindo ko ku kaa kiyoo a'm toke yoo aii bada kaasea sima. A'm dimi kan yaa mu-mu sipe kao ku otuma aii oseoyaambe kao waa. Ku mike aii bada kaasi kao waa koena,” aseke. “Ku koya, Anegisemee'm dama mina ku kaa nuwa, ni kaa nuwa, ku kaa naaboke kipii kindo ko a'm toke yoo nuwa, a'm dimina da nuwa, ku ese dama omiwoo towoo tuwaase sima. Oseoyaake sekii tau,” se aseke.


“Ku se ku aoo kaasea koya ku ogu waa pi-pamaasi kao waa. Ku se ku pi-pamaan tau yoo me kaa miyo ogu bage waa ekii'm eki kaa peu-pau kaawawoo taasea se gumba me kita aoo kaasi. Dee, eki ko ni mbaya bage kumana ogu bage waa kayapamitana peu-pau kaawawoo taasea. Peu-pau kaawawoo nakea se dodo me kaa ona me ko yaa kawedona Yahudi bage'm andagatake ee waa ku nda pi-kambembo taasea. Ku nda pi-kambeana ko em kadasi na eki kaa mina daasea. Me ona. Ona me ko peniyada ee waa ku nda kadomoo taasea. Me ona. Ona me ko yaa kawedona ese ata emi tau ebo se toke se bage nuwa, maa wado ebo toke se gubenuda se bage waa ku nuwa, ku mugo bage waa ekii'm egi kaa kiyoo yaa kawedona pi-kambembo taasea. Pi-kambeana ko em kadasi na mina daasea. Me ona. Kase enta mugo ndoe, eki ni mbaya bage kumana peu-pau se aya kadotaa taasea,” aseke.


“Ku mugo yaa, mee tuma da bage namba kui. Dee, a'm nakayoo maa kaa toke yoo me dimi kan, a'm gai-gai ku ndo awaao gai kipii kindo ko ku kaa kiyoo a'm toke yoo si maaniyaana aii bada kaase sima. Ku koya a'm toke yoo dimi tau kan ‘Ni'm gai-gai awaao be. Yesiusi'm gai-gai ku ndo awaao gai ae,’ se nigeke kipii kindo ko me dimina me kaa kiyoo a'm toke yoo aii bada kaase keke sekii tau. Waya na kiyaa, Anegisemee mesema si dan ndo omiwoo towoo semuu taase kui,” se aseke.


Me gapi, ndee se dodo me kaa ko Yesiusi wai wa'm tupinaa se bage mesema noke kao noke. Noke kao noke se dodo me kaa ko Simoni yombai, Yudasi Isikadiondi me ko wa'm dim'mba nda kiyoo Yesiusi yaekamaasi na se dimina da aoo. Aii dodo Ibedisi wa'm se yakumami koena.


“Ee,” se asemana Yudasi wai me edoondi bita da me me masewena noke. Me masewena noke se dodo waa ko Ibedisi wai wa nduwawe ndemina yamugu-mugu siyaai. Ku semai ndoe Yesiusi wa'm Yudasi se asina ko “A'm awaao gai se kao ku mani pi-awaae,” se aseke.


“Se nanige-manepi koya ‘Tau, bada o,’ se nigeo. Toke nde miya, boke nde miya ku mbeedi. Tuhani Yesiusi wa'm nemi ndanda kuwa ku ndo yaa-awataina otou wandetake kindo me ese ebo. Wa'm nemi ndanda me ko me Anegisemee'm dama se mina, wa'm mee tuma kaa aii se gane kan dama natoyaake mina kuwa ku mee mbo donaa asinaa sisi na se ndanda. Me ndo wa'm ebo se ndanda nemi ae se nigeo. Wa'm nambeasipi ndanda ku ndo otou wandetaao gai sima,” se aseke. Paudusi wa'm se asimi.


Paudusi wa'm se nasina ko “Yai, eki'm yee se ku kase koena?” aseke. “Ku mbao awaao kan dimina dano-dano nakiyaagea ee?” aseke. “Dee, ni'm nigina ko ‘Yedusedem okaa yoo me kaa kiyoo ni Tuhani Yesiusi wa ekaa da kaa yaa napineaseke nde miya bada o. Me ekaa da kaa nambatumake nde miya bada o. Naawas, ae,’ se nigeo ndeo,” aseke.


Me gado me kaa eki'm sese ona me ko eki Anegisemee mina tamoo se bage, ekii'm tata ku ndo awawoo simea, me ona. Kena ona me ko eki Ibedisi wa'm gai-gai ku ndo yaawawoo simea, me ona, wiya. Me Ibedisi me me, me mbaa waa wado ebo toke se mbaa mbato. Kena endo nde miya Anegisemee'm mina tamoo se se bage waa ekii'm dim'mba nda yakumawoo nai se mbaa mbato, me nde miya mei!


Ese eduga ko Anegisemee wa'm se asina ko “Ni kaa naembaake se bage ku en'ndo otuma ku ni'm omiwoo towoo yatoyaabuu taata se bage waa,” se asimi. Me mina me ko me ese ba-gamitaao kana se mina. Kena wa kaa yaembaake bage enii ko enii'm toke yoo ku widigi toke se dodo me kaa me ko me enii'm Anegisemee kaa “Mike ae,” se nigeke se dimina da me naa ebe'm ndo ee? Dimina nda kam kapimape se dimina da ee? se kadesi na se kao. Ku kumana mee ona wai widigi toke nde miya Anegisemee kaa dimina magi tau ndo se tai kipii kindo ko yau-yau bage ekii'm yanigina ko “O, mee me me, me Anegisemee wa'm dama tosi na aya yadotaa taasi mee to ae,” se yanigaao sekii. “Wai Anegisemee kaa dim wiya-wiya tau kumana omiwoo towoo tosi na yoo maniisi ae,” se ku ndo yanigaao sekii.


Eki penatuwa bage waa eki'm ndanda ku dama yaa mu-mu se kipii kindo ko anikee waa, eki'm moo wado ese ebo se Dom'mba Maniwoo nai se Mee to, Keditusi wa ko, wa ukeke se dodo me kaa ese abayai ebo tosi na se aya kadotaasi sima. Me mugo aya kadotaana dai kaa waa ko dano keke sekii tau. Me eki'm moo wado ese abayai tosi na aya ndo se towoo semuu taasea. Anegisemee wa'm dom'mba se bage waa ku dama yaadito simea kumana se towoo semuu taasea.


Dimina wodoneae. Dimina wodonina eki kaa to eki yimbi maneae. Kase enta mugo ndoe, eki mesema yape kamata se mee to aoo. Me yape kamata se mee me me, me Ibedisi mei! Ibedisi wa'm sese me ko wai mbaa kamino wa'm sese mugo dodo. Kase enta mugo ndoe, mbaa kamino wa'm sese ko wai emii waa ku naao kan buba kaa penaa se. Eo tasinimana ndo penaa se. Ku mugo yaa, Ibedisi wa namba penaa se koya emii ebaao kan penaa se tau. Wa'm si yamaaniyaao sekii se mee to ebinaa taao kan penaa se. Kum seta kaa, wa'm kaoya-oya taao kan sipi mina ku si yito sisea na dimina wodonina eki kaa to eki yimbi maneae.


Ken ndo waa ko dim peu se emii me me wai yape maseke. Wa'm yape bage ku ko ku Anegisemee wa'm wa-nini wenimapi se bage waa, ku mesema yape maseke. Ku mesema yape masewena mbeedi mbembo siwoo nai. Anegisemee wa'm si yaamake kumana, aii “Awas!” se asipi kumana ku kaa kiyoo me emii me me wa'm se awatai. Ku se ku semai ndoe, mee wado ebo tosi na se yaa mani da me nde miya maneke. Me yaa mani da me kaa kiyoo wa'm guna miyo bage waa ku mee en'ndo otuma, maa en'ndo otuma, ku se ku wa'm guna miyo togea bage waa kidai. Mina tuma ona ndo se bage se ku tau. Eba epoda ona ndo se bage se ku tau. Se-bage we-bage en'ndo otuma wa guna miyo mbeedi ndo yatoyaabuu nai.


“Ku semana ndo waa ko ku ebo bage haas kuwa ekii Dom'mba Yuwa me mbeedi yambeaseao kan yape pi-masiisea. Yape pi-maseke ko masiisea koya aii bada kaasea ndo. Kase enta mugo ndoe, se-ebo we-ebo se bage en'ndo otuma ku Dom'mba Yuwa wa guna miyo se bage waa. Ku otuma mbeedi. Dom'mba Yuwa wa ndo ese ebo kam ebo se edaya mee to. Wa ndo ese ebo kam ebo se Tuhani. Kum seta kaa ku edaya bage haas kuwa ku Dom'mba Yuwa mbo yape pi-masiisea se dodo me kaa iyo kaasea. Wa'm ndo ku haas kuwa mbeedi yambembo-pambo semaasi koena,” se nasimi. “Ku se ku mbeedi mbeaseke se dodo me kaa me Dom'mba Yuwa wa mba nda penaa nakea bage ku ko ku aii bage waa se ku tau. Ku wa'm mina woewepi se bage waa. Ku wa'm ese dimi, wa-nini pikimami se bage waa. Ku wa kaa dimi wiya-wiya se mbeenaa kaa miya emi tau se bage waa. Ku mugo bage ku wa mbaya anewena wa ogudi penaa nakea se bage waa,” se nasimi.


Eki'm toke yoo me ni epi. Eki'm togea se okaa yoo me ko me Ibedisi wa'm ese ata emi tau ebo toi se okaa yoo. Ibedisi wa ko wai kiyoo ebo toke koya eki ni ekaa da kaa dimina ona ndo kan ni'm dimi me ndo dowoo nakea se kadeta. Dee, eduga ko eki mbo ni kaa mina dimina ona ndo kan eniwoo simi se mee to ona aoo. Wa ekaa da ko An'ndipasi. An'ndipasi wa ko wai eki mesema Ibedisi wa'm toi se okaa yoo me nda toke se dodo me kaa ko mee'm yambatumamea. Mee'm yambatumamea koya me gado me kaa nde miya eki'm ni kaa ‘Mike ae,’ nanigeke se dimina da me wisin'taan tau. Aii yaatoo-yaatoo se takea se kadema.


Eki'm ese bodi ababa se ku ni epi. Eki ese bakata aoo se ku nde miya ni epi. Ku kaa kiyoo ni'm kadena ko eki maa buboo kaa dama tosi na se kao ku kaa bakata ko bakata koya eki'm dim'mba dama tosi na kao ku kaa sinowi se ene, se kadeta. Kena Yahudi bage ebanaa ekii eki ekaa da waa peu kakiyaao kan mike tau se mina eki kaa kaata sipea. Ku mugo Yahudi bage ku ni'm emaa misi kaa mike Yahudi bage se ku tau. Ku Ibedisi kaa andagatagea se bage waa ku mugo bage ku se detaka. Ku se ku nde miya ni epi.


ကြှနျုပျတို့နောကျလိုကျပါ:

ကြော်ငြာတွေ


ကြော်ငြာတွေ