Mandiusi 7:7 - Anegisemee'm Mina Kapuge7-8 Kena Yesiusi waya se tupina ko “Anegisemee mbo yaedaawoo semuu sipea se bage waa ku Anegisemee wa'm ‘A'm naedaape kao, me a tao ee. Me mase o,’ se asiimbi se bage waa kui. Ku kumana a namba Anegisemee mbo asetoo-yaedaawoo taae. A'm yaedaawoo sipe mina ku kaa kiyoo mike kaniimbi koena,” aseke. “Kena ona me ko Anegisemee mbo asetaake sese me a'm ‘Oowoo,’ se kao ebaao kan wa mbo ebeke mugo dodo. Kena ku se ku wa mbo ebeke kipii kindo ko ‘A'm ebipe kao ku dee. Me mase o,’ se kasiimbi. Wa mbo ebiwoo nakea bage en'ndo otuma kui. Ku kumana a'm ‘Oowoo,’ se kao ku wa mbo ebiwoo taao ndo bada. Me ona. “Ona me ko Anegisemee mbo asetaake sese me gine kaawadisi na gine kaa mbaku-mbaku se awake mugo dodo. Kena Anegisemee wa'm sese ko wai wa mbo gine kaa mbaku-mbaku siwoo nakea se mugo bage waa wa'm ekii tao gine kaawaditake. Kaawadina ko ‘Mewee o,’ se asiimbi se bage waa. Ku kumana a'm asetaake mina ku kaa kiyoo Anegisemee mbo mbaku-mbaku siwoo taao bada. Me ona. Ku kumana a'm ‘Oowoo,’ se kao ku kaa si dan ndo Anegisemee mbo yaedaawoo taae. Se kaseao kan sipa,” aseke. အခန်းကိုကြည့်ပါ။ |
Mandiusi 7:7
43 ပူးပေါင်းရင်းမြစ်များ
“Ku kaa si dim gigi semana ese ata emi tau ebo toi se Anegisemee wa'm gai-gai yaawake nuwa, wa guna miyo ese dama ndumbo ndo tosi na sese nuwa, ku kaa ndo ‘Oowoo,’ se nigi si pe taae. Ku kaa ndo ‘Oowoo,’ se nigi siwoo nakea kipii kindo ko eki tao dama tosi na se-kao we-kao ku nde miya Anegisemee wa'm waya wadobo kanewoo taambi kao waa,” aseke.
“Dee, eki ko eki dim peu se bage waa koya eki'm yopaa waa ku tao dama tosi na se kao ku maneao epi. Dim peu se mee tuma kaa bage ku dama tosi na se kao maneao epi koya a'm Siduga maa kaa toi se Naamee to, ese dim bada se Naamee me me, wai dama tosi na se kao maneao eo yee? Maneao epi, ee? Tau na. Nakayoo maa kaa togea se bage ekii'm yopaa waa dama tosi na se kao maneao epi ku mbeedi. Anegisemee Naamee wa'm maneao epi ku ese asiyoo. Ku kaa kiyoo kam Anegisemee Naamee wa mbo yaedaapea se bage ku ko ku Anegisemee wa'm ese dama se kao waa aii se maniimbi se bage waa kui!” aseke. “Ku kumana a namba Anegisemee mbo asetoo-yaedaawoo taae, se kaseao kan sipa,” aseke. Yesiusi wa'm se tupimi.
“Dee, anikee waa me ee me epomee me me, wai inewena me gine me pi-manemaasi. Pi-manemana dai kaa waa ko yau kaa ndigi se bage ku me nda ndemaao kana kaasea,” aseke. “Gine kaa mbaku-mbaku se aseke nde miya iyo. ‘Ebo se mee to gine naawadee! Gine naawadee!’ se aseke se dodo nde miya iyo,” aseke. “Kase enta mugo ndoe, ee epomee mee to wa'm kaambewaasi se mina me ko me se de. ‘Eki ko mii? Eki kayoo bage?’ Se kaambewaasi,” se aseke.
Ea na gapi Yesiusi wai wa'm tupinaa se bage yatupaao gai se mina me ko me se de. Anegisemee mbo edaake se dodo me kaa ko dimina si katu kaae. Anegisemee wai mani si kaambewaake nde miya dimina ona ndo kan yaedaawoo taae se mina ku yatupaao gai. Ku mugo mina yatupaao gai kumana wai mina ebeabea da ona me se asina ko
“Eduga ko eki ni mesema enimoo kaao na, eki'm ni napikeke se ku tau. Ni'm eki kapikimama,” aseke. “Kena aii se kapikimama se ku tau. Eki Anegisemee wa'm emaa misi kaa dama se kao pi-awawoo sisea na kapikimama. Me mugo ndanda me dano kiyaao kana se poo waa ikemoo sisi na se ndanda mugo dodo,” aseke. “Ku mugo ndanda waa awawoo sisea na kapikimama. Ku kumana ku mugo ndanda awaao kan ni ekaa da kaa Anegisemee Naamee mbo yaedaake kipii kindo ko eki'm yaedaapea mina en'ndo otuma ku kanewoo taambi kao waa,” se aseke.
Se asemana Yesiusi wa'm se asina ko “Tau. ‘Uwo naawoe-nii,’ se kasipa koya a ni kaa naepi waa, kena Anegisemee wa'm aii se kaneao gai se kao me nde miya epi waa, ku wiya ku kaa kiyoo a nigita kaa ndo ‘Uwo naawoe-nii,’ se naedaayaa. Waya ‘Uwo naawoe-nii,’ se naedaake waa, mee toyaasi na uwo ku kaneyaa,” aseke. Yesiusi wa'm se aseke.
Ebanaa bage ku ko ekii'm se nigina ko “Ni Anegisemee'm ao da aoo se yoo me kaa pi-tuwaao gai. Anegisemee wa'm ‘Paamee,’ se nasiisi mina yeao gai. Aii tomuna buwaao kana se toke yoo kiyoo tuwaao gai, ae,” se nigeke. Ku bage kuwa ekii omiyaa siyaa ku ndo ku kaa ese dimina ona ndo kan yaa mu-mu semana ese dama ndo awanaa nakea kipii, kindo ko ku bage kuwa Anegisemee'm buwaao kana se toke yoo yatoyaasi. Ku dama awawoo sipea bage ku otuma Anegisemee wa'm “Paamee,” se asiisi se bage waa. Ku otuma Anegisemee wa'm ao da aoo se yoo kiyoo ndo widigi tau ndo tuwaasea se bage waa. Yahudi bage ku kita, kena Yahudi tau se bage ku namba ku dodo ndo se tuwaasea. Ku koya ebanaa ogu bage ku ko tau. Ebanaa ogu bage ku ko ekii mike mina ku yito taao be. Aii tamoo-pamoo semana peu-pau awawoo nakea ndo. Waya ekii kaa to dama tosi na se kao ku kaa ndo nigi si pe taao gai. Ku mugo bage ekii'm moo kaa kiyoo ese em'mbee yima kiki se aya yadotaana em yadaasi. Waya ese dimina dano-dano se aya nde miya, ese widigi aoo tosi na aya nde miya, ku ekii'm moo kaa yadotaasi. Yahudi bage ku kita, kam Yahudi tau se bage ku namba, peu-pau awawoo sipea se bage en'ndo otuma ku mugo peu aya waa yadotaa taasi.
Ku mina ku kaa kiyoo enii'm nigaao sekii se mina me ko me se de. Anegisemee wa'm emaa misi kaa ese maaneke se dimina da me ko me wa kaa “Mike ae,” se nigeke se dimina da. Me mugo dimina da emi tau kipii kindo ko Anegisemee wai me mugo mee to yagai keke sekii tau. Mike iyo. Ku kumana mee ona wai Anegisemee mbaya emba matana wa mesema akaamoo kaao gai kipii kindo ko wa'm “Mike ae,” nigaao bada se kao wiya aoo. Ona me ko “Anegisemee wai mike iyaao toi ae,” se yanigaao ndo bada, me ona. Ona me ko “ ‘Anegisemee kaa yaepi keo waa oowoo,’ se nigiwoo nakea se bage waa ku Anegisemee wa'm ese dama aya yadotaa nai se bage waa ae,” se nigaao bada, me ona. Ku wiya ku kaa “Mike ae,” nigeke kipii kindo ko mee me me wai Anegisemee mesema akaamoo keke sekii. Ese wa mbo pasi kaa kiyoo pi-tomu taao sekii mugo dodo. Se.
Kam waa ko ekii'm dim wiya-wiya tau kan yaasetoo sipea mina ku kaa kiyoo mee me me wa'm kee ku yadano kiyaambi, Tuhani wa ko. Waya wada nda, mee me me wa'm kee me wa'm woo-woo sipi ku kaa kiyoo kee meanipi kipii kindo ko wa'm woo-woo se ku nde miya Anegisemee wa'm yaawise-mbeasiimbi sima. Mina mike dano se yakiyaambi.
ကြော်ငြာတွေ