Ku mugo yaa, endo se gumba enii'm Anegisemee kaa epi se dimina naa epi, naa eo kumana yopaa sese dimina mugo dodo. Ku kaa kiyoo ni'm wa kaa epi se dimina me mbeenaa wika uu da aoo kindo wika nda ndamai ndoe wa agada emi mbeenaa deke ko deke koya, mbeenaa si deke mugo dodo. Dama aga-neke se ku tau. Koya anikee waa wa mesema ade semai ndoe wa kaa agaga da nda ade se se ku tau. Ese uwa da kaa emaa-paa ade se kumana wa kaa se-epi we-epi en'ndo otuma epi kaata. Endo ko wa'm ni kaa naeo se kao me ona kaa miya emi tau. Ku mugo yaa, anikee waa ni namba wa kaa yaeo se kao ku ona kaa miya emi tau kaata. Se.
Mandiusi 5:8 - Anegisemee'm Mina Kapuge8 “Kena, si maaneke se kao ku ona kaa miya nigaao be se bage waa, ku Anegisemee mbo pi-yadiisea se bage waa. Ku kaa kiyoo ekii'm moo wado ese dama tosi na se aya aoo ae, se deo,” aseke. အခန်းကိုကြည့်ပါ။ |
Mandiusi 5:8
25 ပူးပေါင်းရင်းမြစ်များ
Ni'm ese embaake se nemugoi nakawaa woe. Anegisemee wai wa'm ba-gamitaao kana se mina me se enina ko “Eki ni'm yopaa se bage waa se kakiyaabuu taata,” se enimi. Ku wa'm mike pi-naapamiyaabuu taasi mina waa ku kumana peu se kao ku mbeenaa kaa miya si awaae. Dee, enii'm maa buboo nuwa, enii'm dimina nuwa, ku se ku peu-pau awake kipii kindo ko me enii kaa to ediga kiyaayaa mugo dodo. Ku kumana ku ediga kiyaake sese ku wise-mbeana dama, ndumbo se kao ku ndo awawoo taae. Waya kiyoo kam “Anegisemee wai ese asiyoo, widaa ndeo,” se dimina nigimagea yako eki'm dama awake ku oba kiwoo, agi kiwoo semuu taae. Peu-pau ku mbeenaa kaa miya emi tau kisi na se awawoo taae.
Dim ndumbo se bage waa ekii'm nigina ko “Daa se noke kao ona kaa miya emi tau. Daa se gapi ku nde miya ona kaa miya emi tau. Ku se ku otuma dau se kao ndo, ae,” se nigitakea se bage waa, dim ndumbo se bage kuwa. Eé, Yesiusi kaa “Mbeduwa ae,” se nigitakea se bage waa ku nuwa, si maaneke se dimina yaa mu-mu nakea se bage waa ku nuwa, ku “Me daa ae. Me dau ae,” se pikamoo taao kana se bage waa. Ku kaa kiyoo dama se kao ona kaa miya awaao kana se bage waa. Kiyoo kam dim'mba tau se dimina ku ndo dowoo nakea se bage waa, ese si maaneke me ko.
Kum seta kaa, enii ndepo Anegisemee mbo pasi kaa kiyoo pi-tomu taao ndo bada. “O ni naa awaao sekii ee? Awaao iyo ee?” se dimina me si nigaae. Me enii'm mike awaao sekii se kao koena. Dee, eduga ko imam se bage waa ku Anegisemee kaa yapapa taao gai se dodo me kaa ko Anegisemee'm emaa misi kaa dau kisi na ekii uwo wisewoo simea. Waya ekii kaa to emu iyewita simea. Ekii'm awamea sese ku Yesiusi wa'm enii kaa naawami sese mugo dodo. Dee, Yesiusi wa'm awami me kaa kiyoo me enii'm maa buboo ku kaa ese maa mbeenaa kaa miya emi tau se uwo nawisemami mugo dodo. Me wa'm emu ku enii'm dimina da kaa iyewita simi mugo dodo. Se na-iyewita simi kumana enii kaa to “Aa-oo, ni peu-pau awapa ae,” se dimina da me me, me mike dano. Me mugo dimina me wa'm emu'm nawise-mbeasimi se dimina da mugo dodo koena. Ku kumana dim si wiya-wiya kaae. Ese dimina ona ndo kan Anegisemee kaa yapapa taao gai se dimina me ndo yaa mu-mu taae. Me yaa mu-mu sita mugo ndoe, “Mike ae,” nigimana Anegisemee mbo pasi kaa pi-tomu taae.
Ku kaa kiyoo kam enii'm kaseao kan keo mina me ko me se de. Kam'mbini mugo kao emu ku mee'm maa buboo ku ndo dau kiyaao sekii kipii kindo ko “O, Keditusi wa'm emu me ese asiyoo kam asiyoo maaneke se emu ae,” se ku ndo nigaao sekii. Kase enta mugo ndoe, wa'm emu ku enii'm maa buboo ku ndo dau kiyaake se ku tau. Ogindaa enii'm dimina da nda woo-woo se ku nde miya wise-mbeaseke sekii. Ku aii se wise-mbeaseke se ku tau. Ku kaa kiyoo kam aii bada kaasea sese ku duwa matana Anegisemee'm gai-gai ku ndo yaawawoo sisi na, me ona, Kena iyaao tai se Anegisemee wa kaa yapapa sisi na, me ona. Ku wiya ku awawoo sisi na wa'm emu ku enii'm dimina da waa ku wisemana dau nakiyaabuu taasi sima. Dee, Keditusi wa ko wai woo-woo se mbeenaa kaa miya emi tau. Ku kindo wai mee'm woo-woo se kaa tabeao kan wa kaa to Anegisemee tao “Ee,” se asimi. Ese si maaneke mbeenaa kaa miya emi tau se dom'mba egina “A tao ee,” se asiyaa mugo dodo. Se ata mugo ndoe, Yesiusi wai Anegisemee Dim'mba wa'm yaa mani da me kaa kiyoo wa kaa to “A tao ee,” se asimi. Me Anegisemee Dim'mba me me me ese si dan ndo omiwoo towoo nai se Dim'mba mei!
Yibanda kiyaa, Anegisemee mbo kam dim pame yakumamoo nai se mee to wa'm sese ku se de. Wa'm ese ebo se kao me ko, me Anegisemee'm gai-gai ku ndo awaao gai. Si maaneke se kao ona kaa miya awaao be, me ona. Waya wada nda ona me ko ogu bage mesema widigi tau tuwaao gai, me ona. Ona me ko ogu bage kaa tunaa ndo yaawawoo nai, me ona. Ona me ko ogu bage'm nigeke-nigeke nuwa, awaao kan sipi mina waa ku nuwa, ku se ku yito taao gai, me ona. Ona me ko wai ogu bage kaa ese, ese yagane aoo kumana dama yatoyaabuu taao gai, me ona. Ona me ko wa'm dama awake me oba kam oba dama ndo awawoo semuu nai, me ona. Ona me ko wai mee kaa dene-wene se dimina da mbeenaa kaa miya nigaao be, me ona. Ona me ko ogu bage kaa si yadebana ndo wa'm koo nigeke nuwa, uwa da kaa awake nuwa, ku akaa ndepi dipinimana ese dodo ndo se awawoo nai se mee to, me ona. Ku mugo sese ku ko ku Anegisemee mbo kam dim pame yakumamai yako awawoo nai sese kui.
Ni'm kasipa mina ku Anegisemee kaa mike mina waa. Kena ku mina kuwa ku eki'm yemata mugo ndoe tamaan tau se mina waa. Ku ese mike ndumbo se mina kuwa eki'm ese dama yaa mu-mu se kumana eki'm woo-woo se ku kaawise-mbeasimi. Waya kiyoo kam ogu Yesiusi kaa kinaa bage waa ekii kaa ese dim ndumbo kan yaembaao sekii kimea. Kum seta kaa, waya wadobo nde miya ese dimi kea se dimina me mbeenaa kaa miya si awana dimina ona ndo kan a-embaa naa-embaa siwoo taae.
ကြော်ငြာတွေ