“Kena Anegisemee tao se-kao we-kao daa yambeaseke ku nuwa, wa kaa bidea kaa yaaponoyaake kao ku nuwa, ku ebo ko ebo koya tau. Ese asiyoo ebo kam ebo se mina me ko me Anegisemee kaa nuwa, mee kaa nuwa, ekii kaa yaembaake se mina da. Ku kumana Anegisemee wa kaa yaembaake se dodo me kaa ko enii'm se-dimina we-dimina en'ndo otuma ku nuwa, se-nigemoo we-nigemoo en'ndo otuma ku nuwa, se-yaa mani da we-yaa mani da en'ndo otuma ku nuwa, ku se ku en'ndo otuma dipinimana wa kaa yaembaawoo taae se mina me ko, me ese asiyoo kam asiyoo mbeaseao eo se mina da. Waya wada nda a kaa to embaake se dimina ku kisiu masewena a'm yau-yau bage ku kaa nde miya dodo ndo yaembaae se mina da me nde miya ese asiyoo mbeaseao eo se mina da,” aseke. “Mee Tupeke Mee to a'm nasipe mina mugo kui,” aseke.
Ibedani 10:4 - Anegisemee'm Mina Kapuge4 Kase enta mugo ndoe, siapi mbaii mugo egina waa ku nuwa, kam'mbini egina waa ku nuwa, ku mugo egina ekii'm emu ku mee'm woo-woo se okaa tabemake sekii tau. Mike iyo! အခန်းကိုကြည့်ပါ။ |
Ibedani 10:4
19 ပူးပေါင်းရင်းမြစ်များ
Mee ona wai daamee kaa tomu se se dodo me kaa ko wa'm ayaya da deao sekii. Me ayaya da me ko, me miga mee to me tau koya me mee'm sipi mugo kao mbeenaa deao sekii. Ku mugo yaa, anikee waa Anegisemee wa'm enii tao dama se-kao we-kao niisi. Kena wa'm niisi se kao ku kaa ayaya da aoo. Me ayaya da me ko me Anegisemee'm okaa mee tupisi na mina. Kase enta mugo ndoe, Anegisemee'm okaa mee tupisi na mina ndamata mugo ndoe, wa'm anikee waa niisi se kao ku mbeenaa deao sekii. Koya mbeenaa tau. Ese ayaya da mugo dodo. Kena mee tuma kaa bage ekii Anegisemee'm okaa mee tupisi na mina dito se se dodo me kaa ko Anegisemee mesema apoeao kan egina mugo kao mbatumei-paina bidea kaa yaaponoyaabuu se. Daamee endii pakei, waya endii pakei ku kisiu omiwoo towoo semuu sita mugo ndoe, ekii'm eduga awawoo simea ku waya wadobo nde miya dodo ndo awawoo semuu nakea. Ku koya, Anegisemee'm okaa mee tupisi na mina me aii ayaya da mugo kao kumana me kaa kiyoo mee'm dimina da waa ku ndumbo yakiyaake sekii tau se mina da. Ekii'm woo-woo se ndigi.
Eduga sese me kaa kiyoo ko imam se bage waa ekii'm awawoo nakea ku se de. Omiyaa siyaa ku ndo ekii'm ndanda awaao kan inewena awawoo nakea. Inewena awawoo nakea se dodo me kaa ko egina mugo kao ku mbatumayu bidea kaa yaponoyaake, waya egina mugo kao mbatumayu, bidea kaa yaponoyaake, waya egina mugo kao mbatumayu, bidea kaa yaponoyaake, se ku ndo awawoo semuu nakea. Omiyaa siyaa ku ndo ese dodo se ndanda se awawoo semuu nakea koya aii bada ndo. Ku mee'm woo-woo se mbeenaa kaa miya ekide-mbeaseao kana koena.
Anegisemee'm okaa mee tupisi na mina me dito se kipii kindo ko egina mugo kao ku mbatumana emu ogayaake sese me nuwa, kena ku egina ku Anegisemee tao bidea kaa yaaponoyaake sese me nuwa, kena mee'm woo-woo se kaa Anegisemee tao daa yaambeaseke se-kao we-kao ku nuwa, Anegisemee yapapa taao kan se-kao we-kao daa yaambeaseke ku nuwa, ku mugo sese waa awawoo nakea, Anegisemee'm okaa mee tupisi na mina dito se kindo. Ku koya ku mugo sese ku kaa kiyoo Keditusi wa'm Anegisemee mbo se asimi mina ku kaa waya nigi si pe taae. Dee, wa'm asimi mina kasipa me kaa kiyoo wa'm asina ko “Ku se ku awake ku a'm ‘Se naa-awagea waa oowoo,’ se nigeke kao se ku tau. Ku a'm deke ko deke koya ku kaa kabani-bani siyaan tau koena,” se asimi.
Dee, eduga memea se maa ee nuwa, me nda se-to we-to ku nuwa, ku endo se gumba pi-pamiyaake mina waa ku kaa masimasi na se kao waa. Ku kumana eduga okaa mina dito siwoo simea se bage waa, ekii Anegisemee yapapa taao kan se-kao we-kao daa yaambeana “Ee, ee, ee,” se asiwoo simea. Waya ekii'm woo-woo se kaa dom'mba mugo egina waa ku mbatumei-pai semana bidea kaa yaaponoyaabuu siwoo simea. Ku se ku ekii'm awawoo simea koya aii bada kimea. Kase enta mugo ndoe, ku se ku awawoo se ko awawoo se koya ekii'm “Wai, wai, peeto. Ni woo-woo se aoo ae,” se nigeke se dimina da me dano kiyaake sekii tau. Aii dodo ndo se tuta siwoo simea.