mee'm se-kao we-kao ku kaa dimoke me ona, mee me peu-pau yaawake me ona, mee me yadeba se me ona, dim peke se dimina me ona, mee agumee'm dama toke yoo ku kaa ‘Ni nakiyaayaa oowoo,’ se dimina me ona, mee agumee kaa ese peu, si maaniyaake mina eneke me ona, mee'm wa kaa to dodo se se dimi me ona, dim'mba tau sese awake me ona,
Epesiusi 5:4 - Anegisemee'm Mina Kapuge4 Kena enii'm kewii se kao ku kaa mbeenaa kaa miya mina si amoe-moe taae. Tubaka kaa mina ku nuwa, dim'mba tau se mina nuwa, ese daa, ese peu se kao ku kaa kea taambea se mina ku nuwa, ku mina kuwa si aseae. Ku nde miya enii'm aseao kewii se kao waa koena. Anegisemee kaa “Paamee, aii!” se mina ku ndo asei taao bada. အခန်းကိုကြည့်ပါ။ |
Epesiusi 5:4
29 ပူးပေါင်းရင်းမြစ်များ
Kena ndo waa ko ku bage ku ko ekii Anegisemee kaa yanigi taao be kumana Anegisemee wai “Bada o bada, awas,” se nigeke. Mbao awasi na “Awas,” se enta mugo ndoe, tau. Ku mugo bage ekii'm peu se dimina da ku guna miyo tona ese awaao daa se kao ku ndo awawoo sisi na, Anegisemee wai “Bada o, awas,” se nigeke.
Kena, eki'm naasetoo se mina ku nde miya namaaniyaabuu taambea se mina waa. Ku kumana Anegisemee mbo naasetoo siwoo taae. Dee, mee oba mugo ku Anegisemee mbo naasetoo se kipii kindo ko Anegisemee wai dama tosi na aya nadotaa siwoo nai. Kena wa'm enii tao dama natoyaabuu nai ku nadegea yako mee oba mugo ekii “Paamee Anegisemee, paamee,” se mina yasetoo taambea sima. Ku aoo kaambea kumana Anegisemee mbo naasetoo siwoo taae.
Kena mina ona me ko me se de. Eki mina aseke se dodo me kaa si maaniyaambea se mina ku si aseae. Ese dama se dimina koesi na se mina ku ndo aseae. Mee agumee'm toke yoo dama ditona ndo waa ko ese maaniyaambea mina, ese widigi tau tosi na mina ku ndo aseae. Eki'm mina ku kaa mee agumee dama se dimina yakumaasi nde.
Waya wada nda eki'm dimina ku mbeenaa kaa miya si gigi kaae. Si gigi kin ndo eki'm toke yoo en'ndo otuma ku kaa Anegisemee mbo ndo yasetoo siwoo taae. Eki'm toke yoo ku maanisi na wa mbo yaedaake bada. Ku koya aii se yaedaake se ku tau. Eki'm “Oowoo,” se kao ku kaa yasetoo siwoo sita mugo ndoe, wa'm kaawawoo nai ku kaa nde miya “Paamee,” se asetoo siwoo taae.
Ku koya endo ko ku se ku si awaao ndo sekii. Ku ese uwo kaa wamaake ndo sekii. Ku kumana ku uwo kaa wamaao kan mee kaa si yagodeae. A'm yima kiki ku mbeas. Me ona. Ona me ko mee kaa beake kan si yamaaniyaao gai se dimina waa me nde miya mbeas. Me wiya. Kena ona me ko mee agumee kaa yawisinisi na mina ku aii bage mbo ku pi si aseae. Me wido. Ona me ko ese kewii, ese daa se mina ku mbeenaa kaa miya si aseae. Me wui.
Kena ona me ko Anegisemee wa'm gai kan se kaambeana ko “Keditusi Yesiusi nda dipinimapi se bage en'ndo otuma eki'm toke yoo, ku peu toke nde miya, dama toke nde miya, ku en'ndo otuma ku kaa ‘Paamee! Aii!’ se naseao ndo bada,” se kaambeasipi. Ku kaa kiyoo eki wa kaa si dan ndo “Paamee! Aii!” se ku ndo asiwoo taae.
Pidemoni woe. Ni mbo nawisinise na mina mbeenaa aoo. Ni ko Paudusi. Ni kudoo se mee to. Ni Keditusi Yesiusi kaa mina donaa asinaa se kumana ku kaa kiyoo peniyada ee nda nadomaamea se mee to. Ku kumana ni'm kaedaao gai se mina ku nayito taae. Ni'm kaedaao gai se mina me ko se de. Onesimusi, a tao masii kaamata se mee me me, wai si maaneke kaawami koya ku si diton ndo dama yaawae waa bada ae se kanigeo. Aii se dama yaawake me Yesiusi mbaya bage enii'm sese kumana a namba wa kaa dama yaawaao ndo sekii. Ku mugo mina kaseao kan ni widaa tau. Ese oyu nde miya “Se awaa. Se awaa,” se ku katupaao sekii. Ku koya oyu kan katupaao be. Dee, a'm Anegisemee mbaya bage ku kaa ese yaembaake aoo kumana ni oyu se mina si kaseke nde miya sekii. Aii tunaa kan “A'm mee kaa embaake se dimina me kaa kiyoo Onesimusi wa kaa nde miya dama yaawae waa bada ae,” se mina ku ndo kaseao gai.
Ku kindo Anegisemee wai bani-bani sisi na egina mugo kao mbatumana wa tao “Ee,” se aseke se ku tau. Waya na kiyaa Yesiusi wa'm enii tao naawami me kaa kiyoo enii uwa pana se asina ko “Yai! Anegisemee nuwa, wa'm sese nuwa, ku ese asiyoo se kao waa. Ku kaa ni ese ‘Paamee, mataae,’ se eniwoo naka se kao waa,” se aseke. Ku mugo mina aseao ndo bada. Kena enii'm ebe'm asipea mina ku “Anegisemee a tao ee,” se aseke kipii kindo ko ku yemana ko wai bani-bani se aoo, me ona. Kena ona me ko dama se kao awaao sekii kipii kindo ko ku si wisin'taae. Me ndo awawoo taae, me ona. Ona me ko mee ona wai tapoo omeke kipii kindo ko a'm aya mba nda aoo se kao maneae, me ona. Ku mugo kao awake kipii kindo ko me Anegisemee'm emaa misi kaa dom'mba egina mugo yaambatumana wa tao “Ee,” se asiyaa mugo dodo. Ku dena ko bani-bani taambi koena.
Kase enta mugo ndoe, ekii mee mbo mina tupitakea se dodo me kaa abayai ae se yesi na se mina en'takea koya dim'mba tau se mina ku ndo en'takea, ese mike aii bada kaasea se mina waa kui. Waya na kiyaa, ekii'm eneao kan sipea mina ku mee kaa yaoya-oya taao gai. Ku kaa kiyoo kam ekii mina ebo mbeana se enina ko “Enii'm tupeke mina ku yaa mu-mu se kipii kindo ko a'm awaao gai ku en'ndo otuma awaao sekii kaambe. A'm moo wado kayaamaambi se mina ona kaa miya emi tau kaambi. Ku kaa kiyoo a'm mee tuma kaa dimina da me kaa dim peta se kao en'ndo otuma ku awaao sekii kaambe. Tubaka awake nde miya bada o. Awas! Enii'm tupeke mina yaa mu-mu se kindo,” se en'takea. Waya mbae da mina en'takea se bage waa ekii'm se enina ko “Enii'm mina nayito se kipii kindo ko eki'm moo wado kayaamana tai se mina ona kaa miya emi tau kaambi. Aii dimina wooda ndo se tuta taambea,” se en'takea koya mbeduwa. Ku bage ku nde miya dimina wooda ndo tutakea se bage waa se ku tau. Kase enta mugo ndoe, ekii'm moo wado ebo toke me ko me eki kaa to si maaniyaambi se dimina da mei! Me dimina me me, me ekii'm mbeedi mbeaseao kana se dimina da koena. Ku kaa kiyoo kam ni'm kaseao gai se mina me ko me se de. Mee ona wai wa'm moo wado mbeedi mbeaseao kana se sese aoo kipii kindo ko wai me sese me guna miyo tona wa-nini kao awaao kana se mee to se towoo nai. Dimina wooda ndo se toke se ku tau. Ku kumana ekii'm tupitakea mina ku mee waa si maaniyaabuu nakea se mina waa. Dee, ekii'm tupitakea bage waa ku ko ku endo ndo “Mike ae,” se nigeke se bage waa. Kase enta mugo ndoe, ekii'm tupitakea bage ku mbeenaa eduga ko ogu mike tau se mina yaa mu-mu nakea se bage mesema dipinimana peu-pau awawoo simea se bage waa. Kena ku mugo sese ku wisin'tana mike mina emba matana wado onu oba omaan tau. Endo ndo oopea se bage waa mugo dodo. Ku koya peu-pau sese ku guna miyo waya pi-toyaasi na mbae da mina tupita se bage kuwa ekii dime kan ombe yawoeta semuu nakea se detaka.
Ku koya dim ndumbo se bage waa ku wa-nini kaasea. Kase enta mugo ndoe, Dosi wa ko wai dim ndumbo se mee to. Kena wai dim peu se Sedomi bage waa ku mesema tomi se dodo me kaa ko wa'm dimina ese dano-dano se aoo. Mbao kaa dim dano-dano se ee enta mugo ndoe, tau. Omiyaa siyaa ku ndo wa mesema tomea se bage waa ku Anegisemee'm mina kaa duwa matana peu-pau awawoo simea. Kena ekii'm awake-awake nuwa, ekii'm eneke-eneke nuwa, ku se ku ditoi yako dim dano-dano kimi. Dee, ku bage kuwa ekii Anegisemee'm mina ese beagea yako apea se kao ku ndo awawoo simea kumana ku dei yako Dosi wa ko wa'm dimina da ese kai-bai aoo. Dosi wai me mugo dimina ndumbo se dimina da aoo kumana me kaa kiyoo yaboyaan tau. Anegisemee wai Sedomi bage ku yadano kiyaabuu sita mugo ndoe, Dosi yaosipitana dama yatoyaami.
Yai! Ese ebo toke Mikaeo, wai ogu epo wado bage kaa yawisineke widaake koya eki mbaya mesema koo anewepea se bage waa me ekii'm widaa tau se kao. Ekii'm dama masimaan tau se-kao we-kao ku kaa yawisiniwoo nakea. Ekii'm sese ko ese dim kapaan tau se emii waa mugo dodo. Ekii'm dimina nda ukipi kao ku ndo awatakea koena. Ekii'm dama masimaan tau sese awawoo nakea ku ko ku ekii kaa to si maaniyaasi na kao ku oba awatakea mugo dodo.
Kena ona me ko ekii'm sese ko ku ese maakaa uwo biku-biku kan yau kaa digewaake se dabedi podi ku mugo dodo. Kase enta mugo ndoe, ku dabedi podi ku ese eaa eponu aoo se dabedi podi waa mugo dodo. Kena ku mbae da mina tupeke bage waa ekii'm sese mugo dodo. Ekii kaa to ekii yimbi si manigea yako ese eaa, ekii kaa to ego kiyaasi na kao ku ndo awawoo nakea, me ona, wido. Kena ona me ko ekii'm sese me asiyoo epo kaa kiyoo aii kade-made semuu nakea se okude waa mugo dodo. Ku ndumbo se kao ku si awan ndo kupoo ndo awanaa se kumana Anegisemee wa'm ekii tao yaa-epipina ko ese, ese, tuku kam tuku se toke yoo yaa-epipi semami. Anikee waa Anegisemee wai ku mugo bage masewena ese tuku kam tuku aoo se yoo kiyoo yadomoo-pamoo semana omiwoo towoo yatoyaabuu taasi, me ona, wui.
ကြော်ငြာတွေ