“Ku kumana Simoni woe. Ibedisi wa'm se kaoya-oya taambi ku kaa kiyoo a'm ni kaa ‘Mike ae,’ nanigeke se dimina da me dim wiya-wiya kaase. Ai ni kaa dim wiya-wiya kaase koya a'm ni kaa ‘Mike ae,’ nanigeke se dimina da waya wadobo oyu kise na Anegisemee mbo se kaasetoo sipa,” aseke. “Ku kaa kaasetoo sipa kumana a'm dim wiya-wiya se dimina mbanamana waya ni kaa dimina ona ndo kaase. Kam waa ko ai ni kaa waya dimina ona ndo yaa mu-mu sita mugo ndoe, kiyoo kam ni mbaya bage ogu ku ekii tao oyu se dimina pi-yatakuniyabuu taae,” aseke.
Epesiusi 4:12 - Anegisemee'm Mina Kapuge12 Aii se nambeaseke se ku tau. Ku Anegisemee wa'm bage waa ku yatupinaa sisi na se bage waa. Kena ekii'm tupitakea ku kaa kiyoo ogu Yesiusi mbaya bage ekii'm Anegisemee tao ndanda yaawawoo nakea ku maan'dai taambea. Waya na kiyaa wa naa'm ndanda, wa naa'm ndanda ku otuma maan'dai siwoo nakea se gumba ndoe, ku dipinimana Keditusi'm maa buboo se bage waa ku takuniyaabuu siwoo taambea. အခန်းကိုကြည့်ပါ။ |
Epesiusi 4:12
45 ပူးပေါင်းရင်းမြစ်များ
An'diokiya okaa yoo me kaa pemana ko Banabasi wa'm se dena ko “Ai, ai, Anegisemee wai ekii'm dimina da waa ese dama yakumamoo sipi kumana ekii dama ndo awawoo nakea ae,” se deke. Se detai ndoe Banabasi wai ese bani-bani se aoo. Ese bani-bani se se dodo me kaa ko wa'm tupeke mina me ko “Endo kam wado eki'm dimi wiya-wiya se ku otuma mbeana Tuhani wa kaa ndo kusipimana magi tau ndo tuta taae,” se aseke. Ekii'm dimina nda dama yakoeta taao kan se aseke.
“Se nanige-manepi koya ‘Tau, bada o,’ se nigeo. Toke nde miya, boke nde miya ku mbeedi. Tuhani Yesiusi wa'm nemi ndanda kuwa ku ndo yaa-awataina otou wandetake kindo me ese ebo. Wa'm nemi ndanda me ko me Anegisemee'm dama se mina, wa'm mee tuma kaa aii se gane kan dama natoyaake mina kuwa ku mee mbo donaa asinaa sisi na se ndanda. Me ndo wa'm ebo se ndanda nemi ae se nigeo. Wa'm nambeasipi ndanda ku ndo otou wandetaao gai sima,” se aseke. Paudusi wa'm se asimi.
“Endo ko penatuwa bage waa woe. Eki kaa to nuwa, eki'm yaa da kaa dito nakea se Yesiusi mbaya bage ku nuwa, ku dama dito taae. Kase enta mugo ndoe Anegisemee Dim'mba wai ku bage ku wado ebo dito se se bage waa se kambeasipi koena. Eki'm dito nakea se Yesiusi mbaya bage kuwa ku Yesiusi wa'm emu yaa-ogayaana tabemapi se bage waa. Ku kindo ko ekii Anegisemee wa'm dom'mba egina mugo dodo se bage waa. Eki ko wa'm dom'mba egina maneke bage mugo dodo nde. Ku kumana ku bage kuwa dama dito taae,” aseke.
Kam waa ko Yesiusi mbaya bage, Yudea maa kaa togea bage ku nuwa, Gadidea maa kaa togea bage ku nuwa, Semadiya maa kaa togea bage ku nuwa, ekii otuma widigi tau ndo towoo nakea. Yesiusi mbaya bage mbatumaao gai se bage ekii mbeenaa wisin'take koena. Kena Yesiusi mbaya bage ku ko ekii widigi tau toke se dodo me kaa ko Anegisemee Dim'mba wai ekii dim'mba nda ese dama yakumamoo nai. Dama yakumai yako ekii'm dimina da waa yatakuniyaabuu nai, kena ese bani-bani se nde miya aoo. Ekii'm nigina ko “Yai Tuhani ese ebo, ni widaa ndeo,” se nigiwoo nakea ndoe ekii mbaya bage ese oba kiwoo, agi kiwoo se awawoo simea.
Ku mugo yaa, me enii Yesiusi mbaya bage enii'm sese mugo dodo. Enii ko oba ko oba koya Yesiusi nda nadipinimai yako maa buboo ona ndo kidai. Wa naa wa-nini, wa naa wa-nini se ku tau. Enii ndepo maanisi na, wa naa enii'm yaa da mugo. Wa naa enii'm bado mugo. Wa naa enii'm emaa misi mugo. Kum seta kaa eki'm awaao epi ku kaa si dodo taae.
Yesiusi kaa eniikinaa bage waa woe. Ni eki kaa nigi si pe se se dodo me kaa ko ni eki kaa dim wiya-wiya se mbeenaa kaa miya emi tau. Ni ese dimina ona ndo kan se kanigina ko “O, eki'm ogu bage kaa ese dama ndo yaawawoo taao gai ae,” se kanigeo, me ona. Ona me ko eki'm awaao bada sese waa ku otuma eki epi, se kanigeo, me ona. Ona me ko eki dimina a-koeta naa-koeta siwoo taao sekii ae, se kanigeo, me ona.
Kiyoo kam ni'm kaseao kan sipa mina me ko me se de. Ni'm eki se kadena ko eki Anegisemee Dim'mba wa'm kakumamoo taao sekii se yaa mani da waa ku kaa dim pipi kan “Ku nei waa oowoo,” se nigiwoo nakea, se kadetaka. Ku eki'm “Oowoo,” se kao kumana ogu Yesiusi mbaya bage ekii'm “Mike ae,” nigeke se dimina da waa ku kusipimana yatakuniyaabuu taao sekii se yaa mani da waa ku kaa ndo “Oowoo,” se nigimana awa-de siwoo taae. Se kaseao kan sipa.
Nikinaa bage nakawaa woe, ni'm katupaao kan sipa mina me ko me se de. Eki Yesiusi kaa andagatake se dodo me kaa ko eki'm se awagea waa bada ae se mina ku se de. Eki'm awake-awake ku otuma Yesiusi kaa en'kiki se dimina a-kapai naa-kapai taao kan dama sese ku ndo awawoo taae. Ku taao kan ebanaa ku euu mina patatake. Ebanaa ku mina tupeke. Ebanaa ku Anegisemee'm yipi se yakumapi mina ku uwa da kaa eneke. Ebanaa ku wa-nini maa ena kaa bage'm mina eneke. Ebanaa ku wa-nini maa ena kaa bage'm mina yeke se dodo waa ko ku mina ku Yesiusi mbaya bage masimasi na ekii'm ebe kaa mina mbeana yanige-maneke. Ese epota kaa mee to wa'm sese mugo dodo. Ku se ku awake bada.
Ni'm ese kaembaake se nemugoi nakawaa woe. Ni'm kaawudumapa kapuge ku ndamata mugo ndoe, eki'm enii kaa kase naanigeke naa ya? Mee'm enii kaa peu mina naseke kumana enii kaa to edimaao kan kapuge kaawudumapa se ku ndo se naanigeke yee? Tau na! Me mugo naanigeke kipii me mike tau se mina. Dee, enii ko enii Keditusi mesema nadipinimai yako wa'm kaseao kan sipi mina waa ku ndo kaeniwoo naka. Anegisemee'm emaa misi kaa ndumbo mina kaseo. Ku kaa kiyoo enii'm kaawudumapa mina ku eki'm dimina ku Anegisemee kaa oyu kakiyaasi na se mina, ku ndo kaawudumaao kan sipa.
Yesiusi kaa eniikinaa bage waa woe. Ni'm ese pake-takanu mina ku kasiinka ndeo. Ona me ko bani-bani siwoo taae, me ona. Ona me ko si maaneke se kao ku duwa matana en'kiki se dimina me ndo kapiwoo taae, me ona. Ona me ko a-takuniyaabuu naa-takuniyaabuu siwoo taae, me ona. Ona me ko eki ndepo dimina ona ndo kina widigi tau ndo towoo taae, me ona. Ku se ku awawoo se kipii kindo ko “O, Anegisemee wai enii mbo aoo ae,” se nigaambea. Kase enta mugo ndoe, a-embaa naa-embaa se se dimina nuwa, widigi tau toke se dimina nuwa, ku se ku Anegisemee wa'm kakumawoo nai se dimina da waa koena. Kum seta kaa, ku mugo dimina yaa mu-mu se kipii kindo ko “O, Anegisemee wai enii mbo aoo ae,” se nigaao sekii kaambea.
Ni ko ni Edaseo se mee to kumana Tuhani Anegisemee wai ni tao yaa mani da namatami. Me yaa mani da me ko me eki Tuhani kaa dim katu kakiyaasi na se yaa mani da se ku tau. Me eki Tuhani kaa en'kiki kakiyaabuu siwoo sisi na se yaa mani da. Ku kumana ni'm awaao be me ko me ni eki mbo memana ndo waa ko woo-woo se aoo ae se deo yako Anegisemee wa'm namatami se yaa mani da masewena ese oyu kan katupeke kipii kindo ko, me ni'm ese awaao be se kao. Me eki'm dimina katu kakiyaabuu taata kumana me mugo sese me ni'm awaao be. Ku kindo me mugo sese si kaawaao kan ni eki mbo ukaan tau yoo me kapuge me me eki tao kaawudumeo, me ona. Kena eki Tuhani kaa en'kiki kisea na Anegisemee mbo kaasetoo siwoo naka, me ona. Dee, eki ko eki Tuhani kaa kusipimana oyu kaambea kipii kindo ko ku dena ko enii ese bani-bani se aoo. Mbao kaa bani-bani se ee, tau. Ese tunaa kan kaawaao sekii kaamba kumana ku kaa kiyoo bani-bani taata.
Ku kindo ko mee bosi na se mina me abayai se ao da nda aoo kiyaami se mina kipii kindo ko Anegisemee Dim'mba kaa natoyaasi na se mina me abayai se ao da emi tau se mina yee? Tau na. Eduga mina me mbeedi. Anegisemee Dim'mba wa'm natoyaabuu nai se mina me ese ebo. Me enii'm dim'mba nda kiyoo ese asiyoo kam asiyoo abayai se ao da nawadaniyaabuu nai se mina mugo dodo koena.
Yipi se bage nakiyaake me ko me Anegisemee wa'm naaoo kiyaapi kao. Dee, eduga ko enii Anegisemee'm emaa misi kaa yape se bage waa mugo dodo se naademi. Ku koya Keditusi wa'm naa-awami me kaa kiyoo enii Anegisemee mesema apoemana wamugoi nakawaa mugo se naaoo kiyaabuu simi. Waya kiyoo kam namatana ko ogu bage nde miya Anegisemee mesema apoesi na se mina da me namatana napeyaami.
Enii ko enii Anegisemee wa tao ndanda yaa-awawoo naka se dodo ndoe, mee'm emaa misi kaa ndumbo se kao ku ndo awawoo taao gai. Peu sese awake waa, ku nadena ko “Yai eki si maaneke aoo kumana eki'm mina yeao be,” se nanigiyaa. Ku kumana ekii'm “Mike ae,” nigaao sekii se enda da me kaa mbayoo si yamaao kan dama se kao ku ndo awawoo taao gai.
Ni'm ese embaake se nemugoi nakawaa woe. Anegisemee wai wa'm ba-gamitaao kana se mina me se enina ko “Eki ni'm yopaa se bage waa se kakiyaabuu taata,” se enimi. Ku wa'm mike pi-naapamiyaabuu taasi mina waa ku kumana peu se kao ku mbeenaa kaa miya si awaae. Dee, enii'm maa buboo nuwa, enii'm dimina nuwa, ku se ku peu-pau awake kipii kindo ko me enii kaa to ediga kiyaayaa mugo dodo. Ku kumana ku ediga kiyaake sese ku wise-mbeana dama, ndumbo se kao ku ndo awawoo taae. Waya kiyoo kam “Anegisemee wai ese asiyoo, widaa ndeo,” se dimina nigimagea yako eki'm dama awake ku oba kiwoo, agi kiwoo semuu taae. Peu-pau ku mbeenaa kaa miya emi tau kisi na se awawoo taae.
Wa mbaya bage ku wa mesema dipinimai yako enii wa'm maa buboo mugo dodo kidai. Wa ko enii'm moo to mugo dodo kidai. Kena maa en'ndo epo en'ndo ku otuma puseoyaana magasiyaabuu nai se Keditusi me me, wai enii nduwawe nde miya napuseoyaana namagasiyaabuu nai. Napuseoyaana namagasiyaai yako enii Yesiusi mbaya bage ku otuma maan'dai. Ku se ku dama masimasea na Anegisemee mbo kaasetoo naka. Se.
Kena Keditusi guna miyo bage kuwa ku wa'm maa da mugo bage waa. Wa'm maa da mugo bage waa ku enii oba ko oba koya wa'm nadipinimana maa da ona ndo nakiyaake. Maa da ona ndo nakiyaana ko wa'm nambeasipi ndanda waa ku wa na'm awake, wa na'm awake, wa na'm awake sita mugo ndoe, Keditusi'm maa buboo se bage waa en'ndo otuma maaniyaabuu siwoo nakea. Kase enta mugo ndoe, enii'm a-embaa naa-embaa sipea kuwa, ku kaa kiyoo Keditusi wa'm maa da bage enii oba kiwoo, oyu kiwoo semuu nakea. Se.
Kena mina ona me ko me se de. Eki mina aseke se dodo me kaa si maaniyaambea se mina ku si aseae. Ese dama se dimina koesi na se mina ku ndo aseae. Mee agumee'm toke yoo dama ditona ndo waa ko ese maaniyaambea mina, ese widigi tau tosi na mina ku ndo aseae. Eki'm mina ku kaa mee agumee dama se dimina yakumaasi nde.
Enii ndepo Yesiusi nda dipinimagea yako enii'm sese ku kasiinka ndeo. Enii'm sese ona me ko enii Yesiusi mbaya bage en'ndo otuma enii wa'm ese ona ndo se maa buboo, enii ko. Me ona. Kena ona me ko enii ndepo enii nduwawe toi me me, me Anegisemee Dim'mba mei! Wiya. Kena ona me ko enii'm mbikana ndigi se kao me nde miya otuma ese dodo ndo. Dee, enii'm mbikana ndigi se kao me ko me se de. Enii Keditusi wa'm sipi mugo omiwoo towoo sisi na, Anegisemee wa'm “Ni mba nda mewee,” se nasimi. Ku kaa kiyoo enii otuma “Kaina gapi naa Keditusi'm sipi mugo omiwoo towoo natoyaambi naa ya?” se nigi takea. Me kaa ndo enii otuma ese dimina ona ndo kan se mbikana ndigi. Wido.
Eduga ko Keditusi wai wa mbaya bage tao, wa'm maa buboo se bage kuwa, ku wa'm enii tao bodi naa-ababa simi. Kisena ndo waa ko wa'm sese bodi naa-ababa se me ko me ni kaa nde miya nameaneke kidai. Anegisemee wa'm aii dodo se nambeasimi koena. Kena ni'm eki kaa eki tao bodi kaa-ababa se yoo ku mani dano tau. Ku ese oba ndigi. Ku ese oba ndigi ko ndigi koya tau. Wa'm nambeasimi ku pi-pamiyaabuu taao kan ni ese bani-bani se kan eki tao bodi kaa-ababa siwoo naka.
Me Keditusi kaa mina me me, me enii'm mee en'ndo otuma donaa asinaa naka se mina da. Kena wa kaa mina donaa asinaa sita mugo ndoe, enii ese dim pame kan se tupiwoona ko “Me ndumbo, me awaae! Me kupoo, me si awaae!” se mina ku nde miya tupiwoo naka. Mbao awasi na ku mugo mina tupiwoo naka ee? Tau. Ku bage kuwa ku anikee waa Anegisemee mesema ade taasea se dodo me kaa ko “O, ku Yesiusi kaa en'kiki kumapea se bage waa ae,” se ku desi na endo nde miya ku bage kuwa dim pame kan yatupiwoo semuu naka.
Eduga ko enii'm ebo toke se Tuhani, Yesiusi Keditusi me me, wa'm se nanigina ko “Ni tao ndanda ku Paudusi maneke kipii kindo ko wai ndanda ku yambayaa tau kan mike naawaambi ae,” se nanigimi. Wa'm se nanigimai yako “Paudusi woe. Ni'm mina ku naduwaae,” se nasimi. Se nasimai ndoe ku awaao kan yaa mani da ku nde miya nemi. Ku kaa kiyoo ni nigi si pe se se dodo me kaa “Paamee,” se yanigeo.
Dee, ku se ku aoo kaasea kumana omiyaa siyaa ku ndo a kaa to a yimbi manina dimina andimana towoo taae. Bodi ababa se aoo nde miya tukuu wemana oyu kan ndo towoo taae. Waya Anegisemee'm dama mina ku mee mbo donaa asinaa taae. Waya wadobo Anegisemee wa'm kamatapi ndanda ku otuma otou wandeta siyaabuu taae.
Yesiusi kaa eniikinaa bage waa woe. Eki'm moo wado ebo kadito nakea se bage waa, ekii'm ndanda ona me ko me eki'm dimina ku Anegisemee mbo kisi na kadito siwoo nakea se bage waa. Se kadito nakea se dodo ndoe ku ebo bage ekii'm nigina ko “Anegisemee wa'm namata sipi ndanda ku ni dama yaa mu-mu se ee? Tau ee? Ku anikee waa Anegisemee mesema mina daasea, ae,” se nigitakea. Ekii'm se nigimagea yako dama ndo kadito siwoo taao gai. Ku kumana ekii'm guna miyo dama tuwaae. Ekii'm mina wado si pakaae. Kase enta mugo ndoe, ekii'm mina tamake kipii kindo ko dimina bodi kiyaambea kumana ekii ese dim bodi kan kadito taambea. Yai, eki'm ebo bage dim bodi kiyaake me ko me eki kaa to maaniyaambea se kao baa. Ku kindo dim bani-bani se kan kadito taao sekii kisi na, ekii'm mina ku dama yito taae.
Keditusi kaa mina ese amba yato tupina mina waa ku ko ku se de. Ona me ko mee'm dimina da dama yatoyaao kana se mina waa ku mbanamana si dito taae se tupina mina, me ona. Ona me ko Anegisemee kaa “Mike ae,” nigaae se tupina mina, me ona, wiya. Ona me ko uwo ndoo yiba nda takumeweke ebeabea da waa ku kaa tupina mina, me ona, wido. Ona me ko mee'm moo kaa yaa dapimake sese, me kaa tupina mina, me ona, wui. Ona me ko mee bota-pata maa poo ndomake mina me kaa tupina mina, me ona, edibi. Ona me ko Anegisemee wa'm mee'm awamea-awamea ku nandamana pikamoo se sese me kaa tupina mina. Mbao awasi na pikamoo se ee? Tau. Ebanaa bage ku bidea ndoiba nda yadomoo taasi se bage waa. Ebanaa bage ku Siduga maa me kaa ese dama yatoyaabuu taasi se bage waa. Se napikamoona dai kaa waa ko wa-nini yoo pi-toke sekii tau. Aii omiwoo towoo se taasea kui. Me kaa tupina mina me ona, bidimi. Ku mina kuwa ku Keditusi kaa amba yato tupina mina waa. Kena ku mugo mina ku ndo katupimana dai kaa waa ko waya ku ndo katupita, waya ku ndo katupita, waya ku ndo katupita semuu naka kipii kindo ko me sese me ko me se de. Me ee meao kan oo taa badeweyu waya wemoo. Badeweyu waya wemoo. Badeweyu waya wemoo. Se awawoo siyaa mugo dodo. Ku mugo yaa, amba yato katupima mina waa ku ndo waya wadobo katupiwoo taao be. Waya wada nda en'kiki kiyaasi na se mina waa ku nde miya amba yato mina mesema uketana katupiwoo taao bada.
ကြော်ငြာတွေ