Epesiusi 2:1 - Anegisemee'm Mina Kapuge

¹ Eduga ko eki dimina bota-pata se bage waa kimea. Eki'm dimina bota-pata kimea ku ko ku eki'm peu-pau simea ku kaa nuwa, eki'm woo-woo simea ku kaa nuwa, ku kaa dimina bota-pata se bage waa kimea.

Epesiusi 2:1 ပူးပေါင်းရင်းမြစ်များ

Mandiusi 8:22

Ku koya Yesiusi wa'm se asina ko “Tau de! Bomapea bage ku mbo ndigi ku dimina bota-pata se bage waa kiyoo aoo. Ku kumana ekii'm ndo maa yiba manis,” aseke. “A ko tau. A ko ku si awana ni ogudi meae,” aseke.

Dukasi 15:24

‘Mbao kaa badii naambea ee? Tau, niyombai ukipi me kaa kiyoo badii naambea ndeo,’ aseke. ‘Eduga ko wai mike mee bota da mugo dodo se dema koya endo ko maa poo yoo ndomana waya iyaao tai se mee to mugo dodo ae se deo,’ aseke. ‘Waya wada nda, eduga mbaa kimi se mee to ae se yanigima koya endo ko ni mbo ukipi mee to ae se deo,’ aseke. ‘Ku kaa kiyoo “Badii naao nde,” kasipa,’ aseke. Se asemana ndo waa ko eki bani-bani se kan badii n'takea. Se awatakea,” aseke.

Dukasi 15:32

‘Me ona. Kena ona me ko awinaa pena dai kaa waa ko wa mike mee bota da mugo dodo se yadema koya endo ko maa poo yoo ndomana waya iyaao tai se mee to mugo dodo se deo,’ aseke. ‘Waya wada nda, eduga wa mbaa kimi se mee to mugo dodo ae se yanigima koya endo ko ni mbo ukipi mee to ae se deo,’ aseke. ‘Ku kaa kiyoo bani-bani se kan badii naao ndo bada ae se nigeo,’ se aseke.” Yesiusi wa'm mina ebeabea da waa ku kaa tupaao kan simi mina ku se de. Woo-woo se ku kaa mbana-mbeaseao gai se bage waa ku si yawisinin ndo Naamee wa'm sipi mugo bani-bani siwoo taao ndo bada ae se tupaao kaa simi se mina.

Yohanesi 10:10

“Oma maseke se mee to wa'm sese ko ku ese wa-nini keo. Kase enta mugo ndoe, wa'm awaao kan sipi ku oma maseke nuwa, mbatumake nuwa, boyaake nuwa, ku se ku awaao kan mepi se mee to,” aseke. “Ni ko tau. Ni'm dom'mba mugo bage ku dama yatoyaao kan mepa,” aseke. “Ekii'm toke yoo ku ese asiyoo kam asiyoo dama ndo omiwoo towoo sisi na, me mugo toke yoo yatoyaabuu taao kan mepa,” aseke.

Yohanesi 14:6

Kena Yesiusi wa'm se asina ko “Tau na, me nda pesi na se enda da me ko me ni,” aseke. “Dee, ndumbo mina epi kisi na se mee to me ni. Mike mee toyaasi na se mee to me ni,” aseke. “Ku kumana ko mee'm ni mbo kita ukina ndo waa ko ni'm Naamee mbo ukaao sekii,” aseke. “Ni mbo kita si ukeke waa, ni'm Naamee mbo ukaao kana kiyaa. Aii bada kaambi sima,” aseke.

Yohanesi 5:21

“Dee, ni'm Naamee wa'm sese ko wai mee bota-pata ku maa poo yoo ndomei-paina iyaao yatoyaabuu nai. Kum seta kaa ni namba wa'm sese ekokedona ni'm yatoyaabuu taao gai se bage waa ku dama iyaao yatoyaabuu taata. Ku nadegea yako eki ese ‘Abayai,’ se nanigaasea, me ona.

Yohanesi 5:25

“Se-kao we-kao en'ndo otuma yatoyaabuu nai se mee to me Anegisemee Naamee. Kena wa'm yatoyaabuu taao sekii se yaa mani da me Wayombai ni ko ni nde miya namatami. Ku kumana, dim bota-pata se bage waa ku ni'm mina naayito taao gai kipii kindo ko ku mugo bage waa ku ni'm okaa iyaao yatoyaabuu taata se bage waa kui. Ku koya anikee waa ndo se ku tau. Endo nde miya ni'm mina nayeao sekii. Ndumbo kaseo,” aseke.

1 Kodintusi 15:45

Ku mugo mina ku Anegisemee'm mina kapuge nde miya aoo. Wa'm kapuge nda mina me ko me se de. “Ese eduga edugana se mee to, Adam me me, wai iyaao tai se mee to kimi.” Kisena ndo waa ko ese takanu se Adam, Keditusi me me, wa'm maa buboo ku Siduga maa tosi na se maa buboo kiyaana omiwoo towoo natoyaabuu sisi na se mee to kidai.

2 Kodintusi 5:14

Kase enta mugo ndoe, enii nduwawe namugu-mugu siyaabuu nai se dimina me ko me Keditusi wa'm naembaake ae se dimina me ndo namugu-mugu siyaabuu nai. Wa'm naembaake ae se dimina me kaa nigimaa yako enii wa kaa wa tao ndanda ese oyu kan yaa mu-mu nakea. Dee, wa'm naembaake ae se dimina me ko me se de. Ese ona ndo se Keditusi wa ko wai mee en'ndo otuma enii'm woo-woo se kaa naabomi. Ku kaa kiyoo enii otuma wa mesema dipinimana bomamea se bage waa kidai.

Epesiusi 4:18

Waya na kiyaa, Anegisemee kaa eo se bage ekii'm dimina ese mbiseoo. Ekii'm dimina ese mbiseoo kumana Anegisemee'm sese ku kaa si nige-neke se bage waa se tutakea. Ese emaa diyoo aoo. Ese ndumbo mina ku kaa dimina kapaan tau se bage waa. Ku kaa kiyoo ku mugo bage ekii Anegisemee'm omiwoo towoo natoyaasi yoo peao kana se bage waa. Aii dim mbiseoo kan boke ndo sekii se bage waa. Se detaa.

Kodose 2:13

Kase enta mugo ndoe, enii'm mee tuma kaa dimina nada-mbeasiin tau yoo enii, enii'm woo-woo se kaa dim bota-pata se bage waa se tomea. Ku koya Anegisemee wai enii'm woo-woo se ku naawise-mbeana waya enii'm dimina ku Keditusi mesema iyaao natoyaabuu simi.

1 Yohanesi 3:14

Waya ku kaa uketake mina me ko me se de. Mee ona wai ogu Yesiusi kaa kinaa bage kaa si yaembaake kipii kindo ko mee me me, me dim bota se mee to se yadeo. Kase enta mugo ndoe, mee me ko me Yesiusi kaa eniikinaamee to yabeake kipii kindo ko me Anegisemee'm emaa misi kaa mee yambatumana yaboyaapi se mee to mugo dodo se yadetai. Waya mee yambatumei-pai semana yaboyaabuu nai se bage waa ku omiwoo towoo tosi na dimina da ku aoo baa, tau se! Kum seta kaa ku bage ku okaa dim bota se bage waa se kasipa. Yibanda kiyaa, enii Yesiusi kaa eniikinaa bage yaembaawoo nakea kipii kindo ko enii'm nigaao sekii se mina ku se de. “O, eduga ni dimina bota se yoo toma koya endo tau. Endo ko ni ese mike iyaao toke se yoo me kaa tutaka ae,” se ku nigaao sekii. Yesiusi kaa eniikinaa bage kaa yaembaawoo nakea kindo se nigaao sekii.

Wahayu 3:1

Kena ni'm iya-iya da kaa dema se mee me me wa'm waya se nasina ko “Seadisi okaa yoo togea se Yesiusi mbaya bage ekii kaa ekii tao se epo wado mee to ona aoo. Wa tao kapuge naawudumaae. Wa tao naawudumaambe mina ku se de. Ese oyu kam oyu se Anegisemee Dim'mba wai ni nduwawe toi. Kena okude dada ku nde miya ni yaa da kaa yato naka. Kena ni'm kaseao kan sipa mina ku se de. Eki'm awake-awake ku ni epi. Dee, yau-yau bage ekii'm kanigina ko ‘O, ese dimina iyaao takea se bage waa ae,’ se kanigeke. Ogu bage ekii'm se kanigeke koya ni'm kadena ko wa-nini. Eki'm awake-awake ku deo yako ese dimina bota-pata bage waa mugo dodo se kadeta.