“Kase enta mugo ndoe, Mee Yombai ni ko ni nde miya mee tuma da bage ekii'm ni tao masii namasisi na mepa se ku tau. Ni eki tao masii kaamaseao kan mepa. Waya wada nda ni kaa to ‘Ee,’ se asemana eki kaa eki tao kaatabeao kan mepa. Mee waa ese oba mugo eki'm woo-woo se ku kaa yaa kapatataao kan eki kaa eki tao kaabuwaata,” aseke. Yesiusi wa'm se asimi.
Epesiusi 1:7 - Anegisemee'm Mina Kapuge7-8 Anegisemee wa'm aii se nagane kan dama natoyaabuu nai me ko me ese wa-nini keo. Eneke sekii tau. Kena Keditusi wa'm naa-awami ku kaa kiyoo Anegisemee'm aii se nagane kan dama natoyaake dimi me me, me enii kaa nameaniyaapi kidai. Dee, wa'm emu ogayaana boke ku kaa kiyoo enii'm woo-woo se naatabemapi kidai. Me ona. Enii'm woo-woo se otuma naawise-mbeana mina dano kidai. Me ona, wiya. Kena ese se-nigemoo we-nigemoo epi se dimina waa ku nde miya nakoemoo se. Me ona, wido. Kena ese dimina aoo se dimina waa ku nde miya otuma enii nduwawe nakoemoo se. Me ona, wui. Ku wui kasipa kuwa ku Keditusi kaa naameaniyaapi kao waa. Yai, Anegisemee paamee! အခန်းကိုကြည့်ပါ။ |
Epesiusi 1:7
67 ပူးပေါင်းရင်းမြစ်များ
“Kase enta mugo ndoe, ku noke kindo me ni'm emu ku kaa nigisi na ebeabea da mugo dodo. Dee, mee waa ese oba mugo, eki'm woo-woo se ku kaawise-mbeasisi na ni'm emu ku eki tao kaa-ogayaata,” aseke. “Waya wada nda, me emu me kaa kiyoo Anegisemee wai eki mesema ese okaa tamaao kana se mina kaa-aoo kiyaasi,” aseke. “Ku kaa nigi sisea na ‘Nowee,’ se kasipa,” aseke.
Aniguda poo odi ku nom'tana waa ko Yesiusi wa'm ekii se asina ko “Aniguda poo odi ku ni'm emu ku kaa nigisi na se ebeabea da. Ni'm emu ku ko ku'm mee oba eki kaa eki tao kaa-ogayaata. Se kaa-ogayaata kumana ni'm emu ku kaa kiyoo Anegisemee wai eki mesema ese okaa tamaao kana se mina kaa-aoo kiyaasi,” aseke. “Ku kaa nigi sisea na ‘Nowee,’ se kasipa,” aseke.
Ona me ko ni'm awama me kaa kiyoo kam mee tuma kaa bage, ekii'm woo-woo se ku mbana-mbeana Anegisemee mbo emba matake kipii kindo ko Anegisemee wai ekii'm woo-woo se kaa mina ku wise-mbeaseke ndo. Ni'm awama me kaa kiyoo mina bota. Ku kumana me dama mina me ko me ni ekaa da kaa Yedusedem okaa yoo kam kise mee en'ndo otuma maa en'ndo otuma donaa asinaa taao ndo sekii. Anegisemee'm mina kapuge me nda se wudumamea, me ona, wido,” se aseke.
“Anegisemee Dim'mba kanepa me kaa kiyoo eki mee'm dimina pikamoo taao sekii kaasea. Ku kaa kiyoo eki ko eki ‘Anegisemee wai a me woo-woo se kaawise-mbeasipi,’ se asiisea se bage waa, ekii me woo-woo se ku mike yaawise-mbeasiisi. Waya kawitana ‘Anegisemee wai a me woo-woo se kaawise-mbeasiin tau,’ se asiisea se bage waa, ekii'm woo-woo se kaa mina ku mike ndigi ndo se kaasea,” aseke. Yesiusi wa'm se asimi.
Kiyoo kam Petadusi wa'm se asina ko “Eki otuma eki'm woo-woo se ku mbana-mbeana Anegisemee kaa emba mataae,” aseke. “Se awata mugo ndoe Anegisemee wa ko wai eki tao eki'm woo-woo se kaawise-mbeasiimbi sima. Kena ekii'm woo-woo se kaawise-mbeasipi ku kaa eki ko Yesiusi Keditusi ekaa da kaa uwo ndoiba takumeweke ebeabea da awawee,” aseke. “Kena Anegisemee wa ko wai Anegisemee Dim'mba eki tao kaniimbi,” aseke.
“Endo ko penatuwa bage waa woe. Eki kaa to nuwa, eki'm yaa da kaa dito nakea se Yesiusi mbaya bage ku nuwa, ku dama dito taae. Kase enta mugo ndoe Anegisemee Dim'mba wai ku bage ku wado ebo dito se se bage waa se kambeasipi koena. Eki'm dito nakea se Yesiusi mbaya bage kuwa ku Yesiusi wa'm emu yaa-ogayaana tabemapi se bage waa. Ku kindo ko ekii Anegisemee wa'm dom'mba egina mugo dodo se bage waa. Eki ko wa'm dom'mba egina maneke bage mugo dodo nde. Ku kumana ku bage kuwa dama dito taae,” aseke.
Yai, Anegisemee wa'm ese dama se kao kaawawoo nai kuwa ku a si masimake yee? Dee, a'm woo-woo se ku wisin'tana ndumbo ndo awasi na Anegisemee wai mani kagodaan tau, me ona. Mani em kadaan tau, me ona. Kena ese dama ndo kaawawoo nai, me ona. Wa'm dama kaawawoo sipi ku eneke sekii tau. Ku koya ku degea yako “Tau. Ku mbeedi. Ni be,” se yawisinigea yee? Yai!
Yesiusi wai enii kaa naaboyaake mee to. Anegisemee wa'm se yambeasipi koena. Mbao awasi na yaboyaake ee? Tau, Anegisemee wa'm mee'm woo-woo se kaa yima kiki ku dano kisi na Yesiusi'm emu yaogayaami. Waya enii'm “Mike ae,” se nigeke se dimina me kaa kiyoo wa'm naatabeke ku enii kaa meaneke kidai. Enii'm woo-woo se ku naawise-mbeaseke kidai. Yesiusi wa'm emu ku naatabemapi ae se dena ko “O Anegisemee wai ndumbo ndo awake ae,” se nigi sisi na se kao. Dee, ese eduga edugana ko mee'm woo-woo simea ku kaa Anegisemee wa'm mani em yadaan tau. Wa kidaa wisin'take ndo. Mee'm woo-woo se ku kidaa wisin'take kumana “Anegisemee wai kupoo awami ee? Ndumbo awami ee?” se nigiyaa koya tau. Yesiusi me mee'm woo-woo se kaa naaboyaake se dodo me kaa
Mbao awasi na mani em si yadake ee? Tau. Mani em si yadake ae se ku degea yako wa'm aii se gane kan dama yatoyaabuu taasi se bage waa, ekii'm se nigina ko “Abayai! Anegisemee wa'm sese ku ese asiyoo kam asiyoo wa-nini sese waa ae,” se yanigaambea. Ku kindo wa'm sese se desi na wai mee'm woo-woo se kaa mani em si yadake. Kena Anegisemee wa'm aii se gane kan dama yatoyaabuu taasi se bage waa ku Yahudi bage ku ndo yee? Tau, ku enii, Yahudi bage nde miya, Yahudi tau se bage nde miya, wa'm mina nawoewepi se bage waa, enii. Kena wa'm mina nawoewena wa mbaya kumana ndo waa ko wa'm waya se nakiyaana ko wa'm aoo-aoo aoo se ao da nda omiwoo towoo tuwaao sekii se bage waa se nakiyaabuu simi. Aii dodo se dodo me kaa ko Anegisemee wa'm gai kan se nambeasimi koena.
Dee, Anegisemee'm mina kapuge me se asina ko, “Apake mina eneao gai se mee to me Yahawee Anegisemee wa kaa ndo yaapaae,” se aseke. Ku kindo ko enii wa kaa ndo yaapasi na wai enii Keditusi Yesiusi mesema nadipinimami. Enii Keditusi Yesiusi mesema nadipinimai yako wa kaa kiyoo kam Anegisemee wa'm dim pame kan naa-awaao gai ku enii kaa nameaniyaabuu nai. Kase enta mugo ndoe, Keditusi Yesiusi wa'm naa-awami ku kaa kiyoo Anegisemee wai dimi ndumbo nakiyaake, me ona. Ona me ko enii wa'm wa tao daa nawenimapi se bage waa nakiyaake, me ona. Ona me ko enii'm woo-woo se ku yaa napatataao kan naatabeke, me ona. Dee, Keditusi wa'm naa-awami ku kaa kiyoo Anegisemee wa'm dimi pame se dimina me uwa da kaa deao sekii kidai. Ku kumana enii kaa to apake sekii tau. Anegisemee, wa kaa ndo ya-apaao ndo sekii.
Ogu bage tao aii se maneao kan, eki'm epi se mina, Tuhani Yesiusi Keditusi wa'm aii se dama natoyaabuu simi se mina me ko me kaa dama nigi si pe taae. Dee, Yesiusi wai maa kaa ukaan tau yoo wai Siduga maa me kaa kiyoo ese sinowi se mee to towoo simi. Ku koya wa'm sinowi se toke yoo batana bakata se mee to kimi. Mbao awaao kan bakata kimi ee? Tau na. Wa'm sinowi ku eki kaa nde miya kasinowi kiyaao kan bakata se mee to kimi.
Anegisemee Dim'mba me kita nepi kumana wadobo daa naambembo se kao ku si niisi se ku tau. Mike niisi sima! Anegisemee mbaya bage ku yapatatana asiyoo nadotaasi koya tau. Maa kaa ndigi se dodo me kaa miyo Anegisemee Dim'mba enii nduwawe okaa toi kumana “O, wa'm niisi kao ku mike ba-gamitake sekii tau ae,” se nigiwoo nakea. Ku mina ku kaa kiyoo Anegisemee yapapa sisi na se mina waa. Ku wa'm sese ku kaa nuwa, wa ekaa da me kaa nuwa, ku kaa “Awanke! Mataae!” se yaapapa sisi na se mina waa.
Kena eki Anegisemee Naamee wa'm sese epi kumagea yako ni'm wadobo kaasetoo se mina me se de. “Anegisemee woe. A'm abayai natoyaabuu nae se kao kuwa, ku Epesiusi bage dama masimasi na ekii'm dimina ku dama yawadaniyaabuu taae,” se mugo mina kaasetoo naka. Dee, enii ko enii Anegisemee wa'm “Ni mbaya bage kaae,” se nasipi se bage waa, me ona. Enii wa kaa “Mike ae,” se yanigeke se bage waa, me ona. Enii wa'm wa tao daa nawenimapi se bage waa, me ona. Enii ku mugo bage kumana eki'm masimasea na mina waa wido aoo. Ona me ko enii aii bada kaasi se bage waa se ku tau. Enii ese dimina ona ndo kan se nigina ko “Enii, Keditusi mesema Siduga maa kaa ebo natoyaabuu taasi se bage waa ae,” se nigi siwoo nakea. Me ona. Ona me ko ese yai se natoyaai se dodo ndoe, wa'm daa naambembo se kao ku nde miya niisi. Wa'm niisi kao ku mbeenaa ndo se ku tau. Ese asiyoo mike eneao kana mugo ku kisiu niisi. Me ona.
Anegisemee wai Wayombai kaa ese yaembaake aoo. Kena enii Wayombai me mesema dipinimai yako dama tosi na se kao ku enii kaa nadotaake. Yagaika nadotaake se ku tau. Wa'm ese abayai aii se nagane kan dama natoyaao gai se dimina ku kaa kiyoo dama aya nadotaake. Ku kindo ko wa'm ese abayai aii se nagane kan dama natoyaake se dimi eneke sekii tau. Me dimina me kaa kiyoo “Paamee! Mataae!” se ku ndo aseao bada. Se.
Enii'm peu-pau sipea ku kaa dimina bota-pata se bage waa kimea koya me gado me kaa ko Anegisemee wai enii Keditusi mesema nadipinimana dama natoyaake. Anegisemee wa'm enii kaa nagane aoo se dimina me ese wa-nini keo. Wa'm naembaake se dimina me ese, ese asiyoo kumana ku kaa naembaana natoyaake. Enii'm awake ku kaa natoyaake se ku tau. Wa'm aii se nagane kan dama natoyaake.
Anegisemee wa'm Keditusi Yesiusi kaa dama naawake me ko me ese wa-nini keo. Wa'm aii se nagane kan dama natoyaake me ese asiyoo. Eneke sekii tau. Kena wa'm abayai se dimina da naadeyaao kan enii Yesiusi mesema dime nadipinimana Siduga kaa natoyaabuu nai. Ku kaa kiyoo anikee waa nde miya, ken gapi nde miya, wado ina gapi nde miya, kisee ese si dan ndo wa'm enii kaa abayai se dimina nadeyaabuu siwoo nai kui.
Kena ni'm eki kaa eki tao kaasetoo se ona me ko “Anegisemee woe. A'm Dim'mba me ekii'm dimina da nda dama yatakuniyaabuu taae. A'm yaa mani da kaa dama yatakuniyaabuu taae,” se mina kaasetoo naka. Dee, Anegisemee wa'm sese nuwa, wa'm dimina nuwa, wa'm yaa mani da nuwa, ku se ku katu baa. Ku se ku ese asiyoo, ese wa-nini ae se nigimagea yako kena ku kaa kiyoo “Eki'm dimina waa yatakuniyaabuu taae!” se mina kaasetoo naka.
Ni'm se awanaa se koya ni dimi bada se mee to ku kaa napeyaami se ku tau. Anegisemee wa mbaya bage otuma, wa'm wa tao wenimapi se bage kuwa, ku otuma ese asiyoo. Ni ko ese mbeedi. Ni ese mbeedi ko mbeedi koya Anegisemee'm aii se dama natoyaai yako Yahudi tau se bage mbo napeyaami. Keditusi kaa mina ku donaa asinaa sisi na, Anegisemee wa'm se napeyaami. Keditusi kaa mina donaa asinaa naka kuwa ku ese asiyoo kam asiyoo abayai se mina waa. Kase enta mugo ndoe, wa'm sipi-sipi ku kaa mina ku nuwa, wa'm enii tao dama naawatai se mina ku nuwa, ku mike ebata tau. Ku kaa mina otuma epi kaao gai koya iyo. Enii'm Keditusi kaa epi kaan tau ku oba ndigi koena. Eneke sekii tau!
Kena eki'm ni tao naawawoo sipea kuwa, ku waya kawitana Anegisemee wa'm namba eki tao kaawawoo taambi sese kui. Dee, ni'm yapapa naka se Anegisemee wa ko wai ese asiyoo kam asiyoo sinowi se Anegisemee to. Kena eki Keditusi Yesiusi mesema dipinimapea se bage waa kumana tapoo omeke sekii tau. Tapoo si omina ndo wa'm se-sinowi we-sinowi ku masewena eki tao kanewoo semuu taambi sima.
Wa'm gai kan nayeyaabuu simi mina me ko me se de. Me wa'm Yahudi tau se bage eki tao dama aya kadotaa taao gai se mina da. Wa'm dama aya kadotaa taao gai se mina me ko me Keditusi wai eki nduwawe tosi na se mina da. Kena Keditusi wai eki nduwawe toi yako eki ko eki ese bani-bani se kan se nigiwoona ko “Abayai! Anegisemee wai enii tao ese asiyoo kam asiyoo abayai se natoyaabuu taasi ae,” se nigiwoo nakea. Waya kiyoo kam “Kauu gumba naa pi-naapamiyaasi naa ya?” se nigiwoona em'ndiwoo nakea.
Kena ni'm kanam-kanam awawoo naka me ko me mbao awasi na awawoo taao gai ee? Tau! Ona me ko eki a-embaa naa-embaa semana dimina ona ndo kiwoo sisea na kanam-kanam awawoo taao gai, me ona. Waya dimina ona kiwoo semagea yako eki'm dimina nda kiyoo ese oyu se dimina katakuniyaabuu taao kan kanam-kanam se ndanda kaawawoo taao gai, me ona. Kena ona me ko Keditusi kaa mina, Anegisemee wa'm eduga koo gamami se mina me ko me kaa epi kisea na kanam-kanam ndanda kaawawoo naka, me ona. Dee, Keditusi kaa mina ku dama masimake kipii kindo ko eki'm dim wiya-wiya se se dimina me mike dano kaambea sima! Aii, dimina ona ndo kan “Abayai! Me Keditusi kaa mina me ko me ese abayai dama tosi na mina ae,” se ku ndo nigaambea. Ku kumana ku mugo dimina aoo kisea na eki tao ndanda oyu kan kaawawoo taao gai. Se kaseao kan sipa.
Epota kaa mee to kimana ndo waa ko mee en'ndo otuma naatabeao kan wa kaa to ekamana “Ee,” asimi. Aii se gumba awami se ku tau. Anegisemee wa'm eduga mbutu da manimi mbutu da me kaa kiyoo pi-pamii se dodo ndoe se awami. Wa'm naawami ku kaa kiyoo se naadeyaana ko Anegisemee wai mee tuma da bage enii'm woo-woo se kaa em nadaao be ae. Aii omiwoo towoo natoyaabuu taao gai ae se nadeyaami.
Me Yesiusi me me wai wa kaa to ekamana enii tao naabomi. Wa'm enii tao naabomi ona me ko me enii'm peu-pau ku otuma mbeedi nambeana yaa napatatake mugo dodo. Kena wa'm enii tao naabomi ona me ko me enii'm woo-woo se naawise-mbeaseao kan naabomi. Mbao awasi na naawise-mbeasimi ee? Tau. Ona me ko, enii wa kaa wa tao dau se bage waa nakiyaao kan enii'm woo-woo se ku naawise-mbeasimi, me ona. Ona me ko enii dimina ona ndo kan dama se kao ku ndo awaao gai se bage waa kisi na enii'm woo-woo se ku naawise-mbeasimi, me ona. Ku mugo bage ku wa kaa wa tao se bage waa nakiyaao kan Yesiusi wai enii tao naabomi. Yai, Anegisemee wa'm aii se dama natoyaao gai se dimina da me ese mike deao sekii, sima!
Ndumbo kaseo, ekii Anegisemee'm okaa mee tupisi na mina yaa mu-mu simea se dodo me kaa ko me mina me kaa kiyoo kam se-kao we-kao en'ndo otuma ku Anegisemee'm emaa misi kaa dau se kao waa kisi na emu iyewita siwoo simea. Ku kindo ekii'm emu iyewita taan tau se kao ku ese mbeenaa ku aoo kumana waa ko emi tau kiyaa. Kase enta mugo ndoe, emu ogayaake kipii kindo ko Anegisemee wai mee'm woo-woo se kaa mina ku wise-mbeaseke sekii. Emu ogayaan tau waa, mee'm woo-woo se kaa mina ndigi ae, se ku ndo nigiyaa. Se.
Keditusi wa ko wai enii'm woo-woo se kaa em nadake yoo ku wa kaa yadotaasi na wa'm maa buboo ku wa kaa to “Ee,” se asimi. Wa kaa to “Ee,” se asemana eda piya aoo se piya tukuu me kaa paku wemana naabomi. Mbao awasi na naabomi ee? Tau, enii ko enii waya wadobo si woo-woo sisi na naabomi, me ona. Wiya aoo me enii dama, ndumbo sese ku ndo awawoo sisi na naabomi, me ona, wiya. Ku wiya ku awasi na naatabemami. Ku kindo wa'm maa buboo dai-pai se me kaa kiyoo kam me enii'm si maaneke ku naadano kiyaabuu simi.
Dee, Keditusi wa namba dama se kao awaao kan bodi ababa simi. Kase enta mugo ndoe, Keditusi wa ko wai ese dim ndumbo se mee to. Ku kindo wa'm bodi ababa simi yoo me wa'm woo-woo se ku kaa bodi ababa simi se ku tau. Me enii'm woo-woo se ku kaa enii tao bodi naababa simi. Dee, enii Anegisemee mesema apoesi na wai ea ona ndo enii tao bodi naababa simi. Enii tao bodi naababa se se dodo ndoe wa'm maa buboo ku mee'm yaboyaamea. Mee'm yaboyaana ko Anegisemee Dim'mba me kaa kiyoo wai maa poo yoo yandomana iyaao yatoyaami.
Anegisemee kaa yopaa mbee to mugo dodo se bage waa woe. Keditusi wai eki'm woo-woo se ku kaatabemami kumana wa ekaa da me kaa kiyoo kam eki'm woo-woo se ku otuma kaawise-mbeasipi. Ku kaawise-mbeasii yako eki ko eki Anegisemee Naamee wa kaa yaepi kumapea. Ese dadaa se ekimoo kumapea. Ku se ku eki kaa mike mina kumana eki tao kapuge kaawudumeo. Kena Anegisemee kaa naamee mugo dodo se bage waa woe. Epo nuwa, maa nuwa, ku se ku anegi taan tau yoo kam ata towoo nai se mee to me ekii'm yaepi se mee to. Wa kaa yaepi kumagea yako dadaa se ekimoo kumapea se mee to. Ku eki kaa mike mina kumana eki tao kapuge kaawudumeo. Kena Anegisemee kaa eginao mugo dodo se bage waa woe. Eki ko eki ese oyu se bage waa. Eki'm dimina da nda Anegisemee'm mina dowoo nakea se bage waa. Waya ese dim peu se Ibedisi me me, me eki'm mbeedi yambeasipea se Ibedisi. Ku se ku eki kaa mike mina kumana eki tao kapuge kaawudumeo.
Aii se gapemapi se ku tau. Ku Anegisemee mesema Dom'mba Yuwa akaai kaa akaai tao gapemapi se bage waa kisi na. Ku akaai tao gapemapi bage kuwa ku oba aoo ko aoo koya mbeenaa ndo. Waya wadobo ese oba aoo kaasea. Ese oba aoo kaasea kumana Anegisemee mesema Dom'mba Yuwa to akaa'm nigina ko “O, ku mee tuma kaa bage kuwa ku anai tao ese amba mato kaa kiyoo ikiina ayuwee keke se dodo me kaa dawepea se poo-paa mugo dodo se bage waa. Kase enta mugo ndoe, ku mugo bage waya wadobo oba yagapei siwoo taata ae,” se nigeke. Ku 144.000 kooda waa kuwa ku Dom'mba Yuwa wa ogudi penaa nakea se bage waa. Ekii'm dimina ku ese Dom'mba Yuwa wa mbo kumana wa-nini kao yapapa se mbeenaa kaa miya awaan tau se bage waa. Kiyoo kam ese tubaka mugo mbeenaa kaa miya awaan tau se bage waa mugo dodo se dema.
Kena maa nda mbatona tomu nakea kuwa eki yipi se euu mina patatake. Ekii'm yipi se euu mina me se enina ko “Bibinimapi kapuge maseke me a'm ndo maseweao sekii se kao. (Haa ii) Kena me kapuge me kaa ndaginimake kao ku a'm ndo opitaao sekii se kao. (Haa ii) Kase enta mugo ndoe, mee'm kambatumamea kumana me kapuge me masewena ekataao sekii. (Haa ii) Kena ona me ko a'm emu ogayaamea ku kaa kiyoo Anegisemee tao mee tuma kaa se bage waa ku yaatabemame kumana me kapuge me masewena ekataao sekii. (Haa ii) A'm Anegisemee wa tao yaatabemame se bage kuwa ku tai ona ndo tau. (Haa ii) Bage ona ndo yaabome se ku tau. (Haa ii) Eba epoda ona ndo yaabome se ku tau. (Haa ii) Mina tuma da ona ndo yaabome se ku tau. (Haa ii) Ku kaa kiyoo a'm tabemame se bage waa ku maa en'ndo otuma aoo. (Haa ii) Ku kisiu a'm emu yaa-ogayaana yaatabemame kumana me bibinimapea kapuge me a'm ndo masewena ekataao sekii. (Haa ii)
ကြော်ငြာတွေ