“Dee, eki ko eki dim peu se bage waa koya eki'm yopaa waa ku tao dama tosi na se kao ku maneao epi. Dim peu se naamee waa ku dama tosi na se kao maneao epi koya Siduga maa me kaa toi se Naamee to, ese dim bada se Naamee me me, wai dama tosi na kao maneao eo yee? Tau na. Nakayoo maa kaa togea se naamee waa ekii'm yopaa waa dama tosi na kao maneao epi ku ese miyo. Anegisemee Naamee wa'm maneao epi ku ese asiyoo. Ku kaa kiyoo kam Anegisemee Naamee wa mbo ‘Anegisemee Dim'mba nii,’ se yaedaapea se bage ku ko ku Anegisemee wa'm ese mike Anegisemee Dim'mba maniimbi se bage waa kui!” Yesiusi wa'm se asimi.
Epesiusi 1:13 - Anegisemee'm Mina Kapuge13 Eki Yahudi tau se bage ku nde miya Keditusi nda kadipinimai yako eki Yesiusi mbaya se Yahudi bage'm sese dodo kidai. Dee, eki ko ndumbo mina yeke. Me ndumbo mina me ko me Anegisemee'm dama mina da. Woo-woo se kaa em si kadasi na se mina da. Omiwoo towoo sisi na se mina da. Ku dama mina ku yena ko Keditusi kaa “Mike ae,” se yanigeke. “Mike ae,” se yanigimaai ndoe Keditusi nda dipinimake kidai. Ku semai ndoe Anegisemee Dim'mba eki nduwawe kadomaake. Me Anegisemee Dim'mba me me, me Yesiusi wa'm “Anikee waa kaapeyaata,” asimi se Anegisemee Dim'mba mei! Kena Anegisemee Dim'mba kaneke me ko me eki nduwawe Anegisemee wa'm yaa dine kamatapi mugo dodo. Eki ko wa'm bage ae se nigisi na ebeabea da mei! Enii nduwawe okaa toi se Anegisemee Dim'mba wa ko. အခန်းကိုကြည့်ပါ။ |
Epesiusi 1:13
38 ပူးပေါင်းရင်းမြစ်များ
“Ku mee mbo donaa asinaa taasea koya endo ko tau. Endo ko Yedusedem okaa yoo kiyoo ndo mbeenaa ndo pi-nadito siwee taae,” aseke. “Mbao kaa nadito siwee taae se ee? Tau, ni'm mina ku dama nayito taae! Eduga ko Anegisemee Naamee wa'm se asina ko ‘Anegisemee Dim'mba ekii tao maniita,’ se aseke. Wa'm aseke mina me mike ba-gamitaao kana se mina kumana wa'm eki tao kaneao kan sipi me ni'm pi-masewena eki mbo yapeyaata,” aseke. “Siduga kaa kam eki mbo yapeyaai ndoe ese oyu se yaa mani da eki kaa kakumaata,” aseke. “Me mugo yaa mani da me eki kaa kakumaana dai kaa waa ko ni kaa mina ku dopeana mee mbo donaa asinaa taae,” se aseke. “Me kaa miyo tau,” aseke. Yesiusi wa'm se asimi.
Ese eduga ko Anegisemee wai wa'm okaa mee tupisi na mina me enii tao nanige-manesi na ku Musia mbo yamatai yako nanige-manemi. Ku koya Anegisemee wa'm aii se dama natoyaao gai se dimina da me nuwa, kena wa kaa mike ndumbo mina waa ku nuwa, ku enii'm Yesiusi Keditusi wa kaa kiyoo kam epi kimea se mina waa.
Ku koya anikee waa ni eki mbo emi tau se dodo me kaa ko ni'm Naamee wai ni ekaa da kaa Anegisemee Dim'mba eki mbo yapeyaasi. Anegisemee Dim'mba yapeyaasi me ko me eki'm dimina da waa Kakumake Mee to se yapeyaasi. Wai eki'm dimina da waa ku nda yapeyaana ndo waa ko se-dimi we-dimi ku otuma katupiwoo taasi. Kena ni'm kasipa mina en'ndo otuma ku si andibuu sisea na ku nde miya waya kanige-mane siwoo taasi. Anegisemee Dim'mba me wa'm se kaawaasi,” se aseke.
Kena Yesiusi wa'm waya se asina ko “Ni ko ni Anegisemee Naamee mbo pemana ndo waa ko Dimina Kakumasi na Mee to eki mbo kameyaata,” aseke. “Dimina Kakumasi na Mee to me Anegisemee kaa mike ndumbo mina waa ku katupita siwoo taasi se Anegisemee Dim'mba mei! Dim kadake sekii tau. Kum seta kaa yapeyaata mugo ndoe wai Anegisemee Naamee mbo kam endidona ni kaa mina ku dopeana mee mbo kanige-mane siwoo taasi,” aseke.
Ku koya Anegisemee wa'm yameyaami mee to, Yesiusi me me, wai wa'm nanige-maneke mina waa ku ese Anegisemee wa'm enipi mina waa kui! Kase enta mugo ndoe, Anegisemee wai wa'm Dim'mba me Yesiusi tao maniwoo nai koena. Mbeenaa ndo tau. Ese oba wakiki siyaai yako wa'm Dim'mba otuma Yesiusi tao “Ee,” se maniwoo nai. Waya Anegisemee Dim'mba wa'm si dan ndo yakumawoo nai kumana me kaa kiyoo kam Yesiusi wa'm eneke mina ku otuma Anegisemee wa'm enipi mina waa ku ndo eniwoo nai. Kum seta kaa mee ona wai Yesiusi wa'm enipi mina ku kaa “Mike ae,” se nigeke kipii kindo ko me dimina da me kaa kiyoo ko wa'm uwa da kaa se deyaana ko “Anegisemee wa dim dake emi tau. Wa'm enipi mina ku otuma mike ndumbo se mina ndo ae,” se deyaake mugo dodo.
“Dibeao mani se noke kao ku si ebaae,” aseke. “Dibeao kana se noke kao ku ndo ebaae,” aseke. “Kase enta mugo ndoe, Mee Yombai ni ko ni'm kaniita ku ko ku si kaboyaasi na mugo noke kao. Ese si dan ndo omiwoo towoo katoyaasi na se noke kao. Ku mugo noke kao ku ekii tao kanesi na Anegisemee Naamee wai ni nameyaami. Kum seta kaa ni'm kaneao kan sipa noke kao ku kaa ndo nigi si pe taae,” aseke.
Kena Paudusi wa'm waya se asina ko “Nikinaa bage waa woe. Abedaham wa'm yopaa waa ku nuwa, Anegisemee yapapa nakea se Yahudi tau se bage ku nuwa, eki ni'm mina nayito taae. Enii'm woo-woo se kaa em si nadana ndo dama natoyaasi na se mina me me, me Anegisemee wa'm Keditusi kaa enii mbo naameyaami mina da,” aseke.
“Ku semana ndo waa ko Siduga maa me kaa yadotaake. Siduga maa me kaa yadotaana ko Anegisemee'm meyaa yato me kaa tomu se. Ese, ese ebo tosi nde. Me kaa ebo toke se dodo me kaa ko Anegisemee Naamee wai Anegisemee Dim'mba Yesiusi maneke. Anegisemee'm eduga enimi mina kui. Kena Anegisemee Dim'mba manina ko Yesiusi wai me Anegisemee Dim'mba me me enii'm dim'mba nda nadomoo sipi. Ku kindo ko endo gapi eki'm dito kea ku nuwa, eki'm yito kea ku nuwa, ku otuma me Anegisemee Dim'mba me me wa yaa mani da kaa nakumai yako aoo kiyaapi kao ku ndo dito kea,” aseke.
Anegisemee'm dama mina ku uwa pana enei taao kan ni ego tau sima. Ku mina kuwa ku ese Anegisemee wa'm yaa mani da me enii kaa meaniyaasi na se mina koena. Me mbao awasi na se yaa mani da ee? Tau, wa'm dama mina me kaa “Mike ae,” se nigipea se bage en'ndo otuma ekii'm woo-woo se ku kaa si em yadan ndo dama yatoyaabuu taasi. Yahudi bage ekii kita, kena Yahudi tau se bage ku ogudi ekii namba dodo kaasea.
Ku kindo ko ese eduga ko paita endii da da-mbeasiin tau yoo miyo Abedaham wai Anegisemee me mina kaa “Mike ae,” se nigimami. Se nigimai ndoe Anegisemee wai dim ndumbo se mee to se yambeasimi. Kisena ndo waa ko wai Anegisemee'm emaa misi kaa dim ndumbo se mee to ae se ku uwa pana desi na Anegisemee wa'm Abedaham se asina ko “Paita endii da da-mbeaseke ebeabea da awaae,” se asimi. Ku kindo ko paita endii da da-mbeaseke ebeabea da awaan tau se bage ku nde miya Abedaham wa'm sipi mugo “Mike ae,” se nigeke kipii kindo ko ekii Abedaham wa'm taii kaa bage waa kidai. Kiyoo kam Anegisemee wai ku mugo bage se dena ko “O, ku paita endii da da-mbeasiin tau se bage koya tau. Ekii ni kaa ‘Mike ae,’ nanigimapea kumana dim ndumbo se bage waa ae,” se yadetai.
Endo ko eki'm toke yoo wa-nini kipea kumana ni Anegisemee kaa “Paamee,” se yanigeo. Kase enta mugo ndoe, eduga ko eki dim peu se dimina da me guna miyo tomea. Ese peu se dimina me guna miyo togea yako me dimina me tao masii yaamata se bage waa mugo dodo se tomea. Se tomea se dodo me kaa ko ndumbo mina yemea. Ndumbo mina yena dai kaa waa ko dimina ona ndo kan me mina me dama yitona ku ndo awawoo nakea.
Ona me ko Anegisemee wai wa'm Dim'mba enii tao nemi kumana me wa'm yaa dine enii kaa namatami mugo dodo. Enii wa'm bage ae se desi na se namatami, me ona. Ona me ko enii nduwawe Anegisemee wai wa'm Dim'mba nadomaami se dodo me kaa aii se nadomaami se ku tau. Wa kaa kiyoo enii'm se nigina ko “O, Anegisemee Dim'mba me kita nemi kumana waya wadobo daa naambembo se kao ku mike niisi, ae,” se ku ndo nigaao sekii, me ona. Dee, Anegisemee wa'm dimina me membe-pembe se dimina se ku tau. Kena wa'm mina donaa asinaa se mee to ni ko ni namba wa'm sipi mugo dodo, se kaseao kan sipa.
Ona me ko Anegisemee wa'm yaa mani da me kaa kiyoo ese mike ndumbo mina ku ndo tupiwoo naka, me ona. Ona me ko enii ese dama ndumbo se kao ku ndo awawoo naka. Kena enii'm ndumbo ndo awake sese ku ko meyaa yato yaa da kaa enii yape yado doke sese mugo dodo. Waya ekiyaa yato yaa da kaa enii mbayo eba doke sese mugo dodo. Kase enta mugo ndoe, enii'm ndumbo ndo awawoo naka sese ku kaa kiyoo peu-pau mugo kao ku mbeedi mbembo siwoo naka, me ona. Ku kasipa sese kuwa ku enii ese mike Anegisemee tao ndanda yaa-awawoo naka se bage waa ae se nadesi na sese waa.
Mbao awasi na naatabemami ee? Tau, eduga ko Anegisemee wai dama tosi na aya me Abedaham moo kaa yaadotaami. Kena Abedaham moo kaa yaadotaami aya me waya wadobo Yahudi tau se bage ku kaa nde miya yadotaao sekii kisi na Keditusi wai enii'm woo-woo se naatabemami. Waya wada nda enii'm “Mike ae,” nigeke se dimina me kaa kiyoo ko wa'm Dim'mba me nde miya enii tao neao sekii kidai. Me Dim'mba me me, me wa'm ese eduga, “Kaniita,” se mina mamami se Dim'mba to mei! Ku kumana Yesiusi kaa “Mike ae,” se nigita mugo ndoe, ku kasipa kuwa ku enii tao pi-naapamiyaabuu nai. Se.
Kena eki'm awake-awake ku kaa dama nigi si pe taae. Eki'm awake ku kaa kiyoo Anegisemee wa'm Dim'mba dano-dano siyaambea kipii kindo ko ku mugo kao ku si awaae. Eduga ko Anegisemee wai wa'm Dim'mba eki tao kaneke se dodo me kaa me eki kaa yaa dine kamatapi mugo dodo. Kase enta mugo ndoe, wa'm Dim'mba kanepi me me, me “Ku ni'm bage waa ae,” se nigisi na se ebeabea da se kanepi mugo dodo. Kena anikee waa wa'm Dim'mba'm yaa dine matapi bage kuwa ku si maaneke aoo se toke yoo ku kiyoo kam ekata-patana Siduga maa me kaa pi-natoyaasi. Ku kumana Anegisemee Dim'mba wa'm dimina dano-dano siyaambea kao ku si awaae.
Enii Anegisemee'm mina katupeke se dodo me kaa ko eki'm nigitakea ku se de. “O, ku mina kuwa ku mee'm ndo nigita kaa mina waa natupeke se ku tau. Ku ese mike Anegisemee wa'm mina ndo ae,” se nigimamea. Eki'm se nigimamea kumana ku kaa kiyoo enii ese si dan ndo Anegisemee mbo “Paamee,” se asetoo siwoo naka. Eki'm nigimamea ku ese ndumbo. Kase enta mugo ndoe, enii'm katupima mina ku ese mike Anegisemee wa'm mina waa kam tau. Ku mina ku kaa “Mike ae,” se nigimamea kumana endo nde miya ku mina kuwa, ku eki nduwawe ndigi. Ku eki'm dimina da waa katupiwoo nai se mina waa koena. Ku kaa kiyoo “Yai, Anegisemee paamee, paamee,” se nigiwoo naka. Se.
Kena, Timotiusi woe. A ko Anegisemee wa tao ndanda yaawake se dodo me kaa ko wa emaa misi kaa ego kaambe se kao ku si awaae. “Awanke! Awanke!” se kasisi na se kao ku ndo dimina ndidinta kan yaawawoo taae. “Awanke, awanke,” kasisi na wa'm mike mina ku dama yaa mu-mu taae. Ku taao kan wa'm mike mina ku mee mbo ese ndumbo ndo yatupiwoo taae.
Ku koya Anegisemee'm mina ku ko ku ese magi tau se oo tukuu se mina mugo dodo. Wa'm magi tau se oo tukuu se mina ona me ko me se de. “Ese ebo toke se Tuhani wai wa mbaya bage ku en'ndo otuma ku wa'm epi se bage waa,” se mina me ona. Waya magi tau se oo tukuu se mina ona me ko “Mee ona wai ‘Ni'm ebo toke se Tuhani me ko me Yesiusi Keditusi mei,’ se asitai mee to wai peu-pau en'ndo otuma duwa mataao ndo sekii se mee to,” se mina me ona. Ku mina wiya kuwa ku Anegisemee'm okaa oo tukuu wemapi se mina waa. Ku mbeenaa kaa miya magi tau se mina waa. Ku mina ku kaa kiyoo enii kusipimaao ndo sekii.
Ni'm kasipa mina waa, ku mee mbo tupisi na mina kuwa ni mbao kaa nigina kasipa ee? Tau na. Anegisemee wa ko wai enii mee tuma da bage dama natoyaao gai. Wa'm aii se dama natoyaao gai se dimina ku mike deao sekii. Wai mee en'ndo otuma enii tao enii'm woo-woo se kaa em si nadan ndo dama natoyaasi na se enda da naawadimapi koena. Wa'm enii tao se naawami kumana ku kaa kiyoo “Wa'm aii se nagane kan dama natoyaao gai se dimina da, me uwa da kaa nakiyaapi ae,” se ku deao sekii kidai. Kena wa'm enii tao dimina ku deao sekii kumana mee en'ndo otuma wa'm gai-gai ku ndo awawoo sisi na mina waa se kasipa kui.
Ku kindo Anegisemee'm okaa mee tupisi na mina me ebo ko ebo koya mbeenaa miyo. Ese asiyoo kam asiyoo abayai se mina me ko me Anegisemee wa'm em si nadan ndo omiwoo towoo natoyaabuu sisi na se mina da. Me ese ebo. Ku kaa kiyoo kam enii'm nigaao sekii se mina me ko me se de. Eduga ko mbeenaa miyo se mee tupisi na mina ku tamake kindo em yadake ndo. Ku kindo endo ko Anegisemee wa'm ese abayai se mina me kaa duwa matapi se bage waa ku Anegisemee wa'm ba si gamitana mike em yadaasi se bage sima! Se ku ndo nigaao sekii. Enii'm woo-woo se ku kaa em si nadan ndo omiwoo towoo toyaasi na se mina me ko me Tuhani wa'm kita enimi se mina da. Kena wa'm mina yemea se bage waa ekii wa'm mina masewena enii mbo mi-nasei simea.
Dee, enii tao dama tosi na se kao ona me ko me se de. Anegisemee wai enii tao se nambeana ko enii ko enii wa'm mike ndumbo mina ku kaa “Mike ae,” se nigeke kipii kindo ko me mina me kaa kiyoo yipi se dimina da one nadamaasi, se nambeasimi. Aii se, se naambeasimi se ku tau. Wa'm se-anegi we-anegi simi ku otuma mbeedi, kena enii ndo wa'm ese ebo, dimi se bage waa kisi na, ku taao kan wa'm se nambeasimi.
Yibanda kiyaa Anegisemee'm emaa misi kaa ndumbo ndo awasea na eki'm ese eaa se woo-woo se ku nuwa, eki'm peu-pau awawoo nakea ku nuwa, ku duwato damana uwo kaa wamaae. Ku uwo kaa wamana Anegisemee wa'm eki'm dim'mba nda domoo sipi mina ku guna miyo ndo tuta taae. Ku guna miyo ndo tuta sita mugo ndoe dama yito taae. Me mina me ko me a'm woo-woo se kaa em si kadan ndo dama katoyaasi se mina waa koena.
Ku epo wado bage wui ku ko ku Anegisemee'm yaa mani da manipi se epo wado bage waa. Wa'm manipi yaa mani da me ko me maa nuwa, maakaa uwo ku nuwa, ku se ku si maaniyaasi na manipi se yaa mani da. Kena ku se ku deta mugo ndoe waya epo wado mee to ona mitai se dema. Ese daamee mitai yato kiyoo kam paketai se dema. Me epo wado mee to wa yaa da kaa doke me ko ebeabea da waa yamamake kao dopi se dema. Me ebeabea da waa yamamake kao me ko me iyaao tai se Anegisemee to wa'm yaa dine ebeabea da mamake kao. Me bage kao do-paketa mugo ndoe wai mina ebo woeke. Epo wado bage wui ku kaa mina ebo woeke.
ကြော်ငြာတွေ