Edoma 7:14 - Anegisemee'm Mina Kapuge

¹⁴ Anegisemee'm okaa mee tupisi na mina ku ko ku ese dama se mina waa. Ku Anegisemee Dim'mba wa'm nemi se mina waa. Ku se ku enii epi koya ni ko ni mee tuma kaa mee to. Ni mee tuma kaa mee to kumana ni'm moo wado ese ebo toke me ko me ni'm woo-woo se. Ni ko ni ni'm woo-woo se guna miyo toke kumana ku wisin'take iyo. Aii peu-pau ndo awawoo naka.

Edoma 7:14 ပူးပေါင်းရင်းမြစ်များ

Edoma 7:18

Ni'm nduwawe nda mee tuma kaa dimina da me me, me nda dama se kao mbeenaa kaa miya emi tau. Ku ni epi. Dee, ndumbo ndo awaao gai koya iyo. Mee tuma kaa dimina me ndumbo se kao awaao kana koena.

Epesiusi 3:8

Ni'm se awanaa se koya ni dimi bada se mee to ku kaa napeyaami se ku tau. Anegisemee wa mbaya bage otuma, wa'm wa tao wenimapi se bage kuwa, ku otuma ese asiyoo. Ni ko ese mbeedi. Ni ese mbeedi ko mbeedi koya Anegisemee'm aii se dama natoyaai yako Yahudi tau se bage mbo napeyaami. Keditusi kaa mina ku donaa asinaa sisi na, Anegisemee wa'm se napeyaami. Keditusi kaa mina donaa asinaa naka kuwa ku ese asiyoo kam asiyoo abayai se mina waa. Kase enta mugo ndoe, wa'm sipi-sipi ku kaa mina ku nuwa, wa'm enii tao dama naawatai se mina ku nuwa, ku mike ebata tau. Ku kaa mina otuma epi kaao gai koya iyo. Enii'm Keditusi kaa epi kaan tau ku oba ndigi koena. Eneke sekii tau!

Mandiusi 5:28

Ku yepea koya ni'm kaseao gai se mina me ko me se de. Ambii kaa dim petai se mee to, me wa'm dimina da nda nigipi ku tubaka awapi mugo dodo, se kaseo,” aseke.

Mandiusi 5:22

“Ku koya ni'm kaseao gai se mina me ko me se de. Mee mbatumapi mee to wa kaa ndo mina aoo se ku tau. Ogu bage kaa yima kiki aoo se mee to wa kaa nde miya mina aoo. “Kena mee ona wai mee agumee kaa yawisinii yako ‘A dim kapaan tau se mee to,’ se aseke kipii kindo ko me mugo mina asipi mee to me yaa wedona ogiyoo ebo mina dasi na se ebo bage waa ku egi kaa pi-mbeana mina dake ndo sekii. Kena mee agumee kaa ‘A dim'mba tau se mee to’ se asipi mee to me Anegisemee'm wa'm bidea uu ndoiba yadomaana em yadaao sekii se mee to, se kaseo,” aseke.

Dukasi 7:6

Ekii'm se asipea kumana Yesiusi wai ekii mesema pegea. Ekii mesema peta mugo ndoe, tentada bage dito se mee to wa'm ee mbeenaa pasi kaa pemai. Mbeenaa pasi pemai se dodo me kaa tentada dito se mee to wa'm Yesiusi mbo waya se yapeyaana ko wamugoi nakawaa ku nde miya yapeyaai. Wamugoi nakawaa ku nde miya yapeyaana Yesiusi mbo memagea se dodo me kaa ekii'm se asina ko “Tentada bage dito se mee to wa'm kaseao kan sipi mina me ko me se de. ‘Maa woe. Me kam waya naka si meae!’ se kasipi. ‘Kase enta mugo ndoe, ni ko ni mbeedi. A ese ebo. Ku kumana ni'm esimba nda si ndemaae,’ se kasipi,” se asigea.

Dukasi 5:8

Ku kisiu maminapedi kooda waa kuma kaa dotaana dembea ndoe ekii otuma ese “Abayai ae,” se nigigea. Simoni Petadusi me nuwa, wa mesema tomu nakea bage waa ku nuwa, ogu kuma da nda ekiimugoi nakawaa ku nuwa, ekii otuma “Abayai ae,” se nigigea. (Simoni wamugoi nakawii ku ko Sebedeusi yombai wiya. Ona me ekaa da ko Yakobusi. Ona me ekaa da ko Yohanesi.) Kena ekii otuma “Abayai ae,” se nigimagea yako Simoni Petadusi wai Yesiusi wa mbo pasi kaa amaa gapemana omeke. Amaa gapemana omita mugo ndoe wa'm se asina ko “Aa-oo, ni'm moo wado ebo toke se Tuhani woe! Ni ko ni ese woo-woo semuu naka se mee to kumana a ni mbo pasi kaa si tomu taae. A ni mbo nabatana ogiyoo bende kaa kiyoo pi-tomu taao ndo bada,” se aseke. Se asemana Yesiusi wa'm Simoni se asina ko “Tau de! Si widaae!” aseke. “Si widaae! Eduga ko ai maminapedi yaanaa se mee to se towoo sime koya endo me kam wado tau. Endo me kam wado mee waa ku ni mba nda mesi na mee yawenaa se mee to se kambeaseao! Me mugo ndanda se naa-awawoo semuu taambe,” aseke.

Mandiusi 18:25

‘O, wa mike nakadewaao kana kaambi, ae,’ se nigimai yako me edaya mee me me, wai wa'm tentada bage waa se asina ko ‘Ni'm yagaika ku nakade-manesi na wa'm oto kao ku otuma dopeana ogu bage mbo kipe pi-naawinaa taae,’ aseke. ‘Kena me mee me nuwa, wa'm ambii me nuwa, wa'm yopaa waa ku nuwa, ku kaa nde miya kipe awimoo taao kan ku yaa wedona ogu bage mbo kipe pi-naawinaa taae. “Eki tao yaa pineana masii kaamata se bage waa, eewee. Kipe nii,” se pi-naa-awanaa taae,’ aseke.

Mandiusi 16:23

Wa'm se aseke koya Yesiusi wai duwa matana Petadusi se asina ko “Yai, a'm nasipe mina me Anegisemee'm gai-gai mbeana wisin'tasi na se mina da mugo dodo deo. Kase enta mugo ndoe, a'm nigeke me Anegisemee wa'm dimina dowoo nae se dimina se ku tau. Me mee tuma da kaa dimina ku ndo dowoo nae ae se kadeo. Ku kumana ni a kaa ogato kadamana ‘Ibedisi, ai ni mbo kam pee!’ se kaseo,” aseke. Yesiusi wa'm se asimi.

Ibedani 4:12

Kase enta mugo ndoe, anikee waa enii'm awamea-awamea en'ndo otuma ku kaa Anegisemee mesema mina daasea. Ku kaa mina data mugo ndoe yadeba se nde miya sekii tau. Wa'm aoo kiyaabuu simi se-kao we-kao en'ndo otuma ku wa'm dito taao sekii se kao waa koena. Wa'm deao kana se kao ona kaa miya emi tau. Wa'm si desi na dapimaao sekii se kao ona kaa miya emi tau. Ku otuma wa'm uwa pana dito nai se kao waa. Ku kumana enii'm awamea-awamea en'ndo otuma ku kaa mina daasea. Waya wada nda enii'm awamea-awamea ku nandamana pikamoo taasi se dodo me kaa wa'm mina da me kaa kiyoo kam se napikamoo taasi. Wa'm mina me ko me ese binduneke se mina da. Me ese uuda aoo se mina da. Ese uuda aoo se yape yado da, naa uuda aoo, naa uuda aoo, eo wiya aoo se yape yado da me me, me mbeenaa uuda tau. Anegisemee'm mina me ese uuda aoo. Dee, yape yado da me emii oi dake se dodo me kaa mitoo gamu okitaao sekii. Waya dudu maseao kan mitoo kapitaao sekii. Ku koya me mbeenaa mbeedi. Anegisemee'm mina me mee'm dim'mba nda nanugaao sekii. Me nda nanugina dimina da naa, se-nigemoo we-nigemoo naa se ku naokitaao sekii. Waya ku kaa kiyoo mee'm dim'mba nda se-dimina we-dimina en'ndo otuma ku nuwa, mee'm awaao kan sipea en'ndo otuma ku nuwa, ku otuma uwa da kaa uwa pana yadeyaabuu taao sekii. Anegisemee'm mina me ko. Me mina me kaa kiyoo Anegisemee mesema mina daasea kumana ese dimina ona ndo kan wa'm mina yaa mu-mu taae, se kaseao kan sipa.

Edoma 3:9

Ku kindo Yahudi bage ku ko ku Anegisemee wa'm emaa misi kaa mbeenaa asiyoo ee? Yahudi tau se bage ku mbeenaa miyo ee? Tau na! Ku tau de. Enii otuma dodo ndo se katupipa. Yahudi bage nuwa, Yahudi tau se bage nuwa, enii otuma enii'm woo-woo se ku guna miyo toke kumana enii otuma dodo ndo kidai.

Edoma 6:6

Eduga ko enii'm woo-woo se ku enii'm moo wado ebo tomea. Mbeedi mbeaseke sekii tau. Enii'm woo-woo se ku enii dimina yaa napineana woo-woo taao gai se dimina ku ndo nakumawoo se. Se nakumawoo se koya endo ko tau. Dee, Keditusi wai eda piya aoo se piya tukuu me kaa paku wemana boke se dodo me kaa ko enii'm woo-woo se aoo se dimina da me namba wa mesema boke. Enii'm moo wado woo-woo se yaa mani da ku dano kisi na enii'm mee tuma kaa dimina me Keditusi mesema boke.

Gadasiya 4:3

Ku mugo yaa, enii namba dodo. Eduga ko enii Yesiusi kaa dim kapaan tau se bage waa mugo dodo se dodo me kaa ko enii ko enii ni'm kasipa se yuwa mugo dodo se bage waa. Enii yaa pineana masii maseke bage waa mugo dodo. Kase enta mugo ndoe, enii'm moo wado ebo toke ku ko ku mbaa waa ku enii moo wado ebo tomea.