Edoma 10:2 - Anegisemee'm Mina Kapuge

² Yahudi bage ekii'm sese ku ni'm se dena ko ekii ese dimina ona ndo kan Anegisemee'm gai-gai ku ndo yaa mu-mu taao gai. Ku koya ekii'm yaa mu-mu nakea ku si nige-neke kan koweke aoo ae se detaka.

Edoma 10:2 ပူးပေါင်းရင်းမြစ်များ

Yohanesi 16:2

“Dee, anikee waa mee waa ekii'm peu-pau kaawaasea ona me ko me se de. Ekii'm kasina ko ‘Yahudi bage'm andagatake ee waa ku nda si ndemaae! Ka! Kiyoo kam pee!’ se kasiisea, me ona. Ona me ko ekii'm kaboyaasea se gumba ndoe, ekii'm si nige-neke kan se nigina ko ‘Tau, Yesiusi mbaya bage yaboyaake me ko me Anegisemee tao dama se ndanda yaawake mugo dodo ae,’ se nigaasea, me ona,” aseke.

Edaseo Bage 21:20

Paudusi wa'm yanige-manepi mina yemana ko ku penatuwa bage kuwa ekii ese “Anegisemee paamee! Mataae!” se aseke. Ekii'm se aseke koya wa-nini mina kaa ekii'm Paudusi se asina ko “Nikinaamee woe. Dee, Yesiusi kaa ‘Mike ae,’ se nigeke se Yahudi bage waa ku ese eaao kana. Ese oba aoo. Kena ku oba kuwa ku otuma ese Musia'm kapuge tupina mina kaa ese dimina ona ndo kan yaa mu-mu nakea se bage waa,” aseke.

Edaseo Bage 21:28

Ekii'm dipu-dipu se mina ese ebo mbeana se asina ko “Isedeo bage waa woe! Isedeo bage waa woe! Enii mba nda mewee! Me mee me me, wai maa en'ndo otuma mee en'ndo otuma tupinaa se se dodo me kaa ko wa'm tupeke mina ese dim'mba tau se mina asinaa sipi,” aseke. “Wa'm tupina mina ona me ko me enii Yahudi bage kaa nawisinisi na se mina tupinaa se, me ona. Ona me ko Musia'm kapuge si yesi na se mina tupinaa se, me ona. Ona me ko Yahawee'm ee me kaa beasi na se mina tupinaa simi, me ona. Me mee me me ku wa'm se tupinaa nai se mina waa. Kena endo nde miya Yahawee'm ee nda Yahudi tau se bage bada yamadopi kumana enii'm ese daa se ee peu naakiyaapi sima!” aseke.

Edaseo Bage 22:22

Mee kooda ku Paudusi wa'm mina koo yito se koya “Yahudi tau se bage mbo kapeyaamba,” se mina yemata mugo ndoe yima kiki kigea. Yima kiki kigea yako mina ebo mbeana se asina ko “Yai, me mugo mee to maa kaa toke me dim'mba tau de! Maa kaa kam yaekide-mbeaseae! Yambatumana yaboyaae!” se mina en'takea.

Edaseo Bage 22:3

“Ni ko ni Yahudi bage. Ni'm one nadamea yoo ko me Kidikiya maa kaa Tadasiusi okaa yoo. Tadasiusi okaa yoo one nadamea koya tau. Ni'm ebo kima yoo ko me Yedusedem okaa yoo nakayoo,” aseke. “Nakayoo ebo keke, ebo keke se dodo me kaa ko natupita simi mee to me ekaa da ko Gamadieo. Gamadieo wa'm natupita siwoo sita mugo ndoe, enii'm eedoo bage'm dito se mina waa, Anegisemee'm okaa mee tupisi na mina kuwa ku ni namba ese epi kumama. Ku epi kina ko Anegisemee'm gai-gai yaawawoo taao kan ni ese mike dimina ona ndo kima. Ese endo gapi eki'm nigigea dimina mugo dodo kima,” se aseke.

Edoma 10:1

Yesiusi kaa eniikinaa bage waa woe. Ni'm ese “Oowoo,” se kao me ko me Yahudi bage ku nde miya em si yadana omiwoo towoo yatoyaabuu taasi. Ku kaa ese “Oowoo,” se nigeke kumana ni'm Anegisemee mbo asetoo siwoo naka se mina da mei!

Edoma 10:3

Kase enta mugo ndoe, Anegisemee mbo kam dim ndumbo kiyaasi na se enda da me si masimagea. Me si masimagea yako yeao be. Aii si yitona ndo eki kaa to dim ndumbo kiyaasi na enda da me ndo ebinaa se.

2 Kodintusi 4:4

Dee, Keditusi kaa “Mike ae,” nigaan tau se bage ku ko ku emaa diyoo aoo se bage waa mugo dodo. Mbao kaa emaa diyoo aoo ee enta mugo ndoe, tau. Mee tuma da bage ekii'm yapapa nakea se mbae da se anegisemee to, maa en'ndo otuma ku wado ebo toi se Ibedisi wa ko, wai eki'm dimina da nda emaa diyoo aoo se dimina yakumamoo nai kumana enii dama se mina ku deao kana se yakiyaabuu nai. Dee, Keditusi wa ko wai Anegisemee wa'm sipi mugo ku uwa da kaa deyaabuu sisi na se mee to. Kena wa kaa dama mina me ese asiyoo kam asiyoo abayai se mina da. Ku kumana maa kaa togea bage ekii me mina me dama deke waa, ekii'm dimina yawadaniyaabuu siyaa. Ku kindo me mina me si desi na Ibedisi wai ekii'm dim'mba nda emaa diyoo se dimina yakumamoo nai.

2 Kodintusi 8:3

Ese ndumbo kaseo. Ni'm emaa misi kaa se dena ko ogu bage tao kipe maneke se dodo me kaa ko ekii'm maneao sekii ku ndo maniwoo sipea se ku tau. Ekii'm kipe ku mbeenaa kaa miya koo si yamana ekii kaa to dama tosi na se kipe waa ku nde miya ogu bage tao maniwoo simea, se yadema. Ekii'm kea-kea ku kaa kiyoo kam ogu bage tao maniwoo simea, se yadema.

Gadasiya 4:15

Eduga ko ni Anegisemee wa'm dama tosi na mina ku katupima se dodo me kaa ko eki bani-bani se aoo. Eki ko “Paamee. Aii,” se nanigimea. Eki'm nagai ku ni'm se kadena ko eki emaa misi ku mboeweke sekii waa, ku mike mboewena ni'm emaa misi kaa natakum'tayaa. Me mugo ese nagai se dimina se kadema koya endo ko me bage dimina ni si deke. Me dimina me kayoo nda peyaapea naa ya?

Pidipi 1:9

Kena ni'm eki kaa kaasetoo se mina ku se de. Ona me ko eki'm a-embaa naa-embaa nakea se dimina me ese oyu kiwoo, agi kiwoo sisea na ku kaa kaasetoo siwoo naka, me ona. Kena ona me ko Anegisemee wa kaa nuwa, wa'm gai-gai ku kaa nuwa, ku kaa epi se dimina da me agi kiwoo, kapiwoo sisea na ku kaa kaasetoo siwoo naka, me ona. Ona me ko “Me ndumbo ae. Me kupoo ae,” se ku pikamoo taao sekii se dimina da me me, me waya agi kiwoo semuu sisea na ku kaa nde miya kaasetoo siwoo naka, me ona. Ku dimina ku kaa agi kiwoo sisea na ni'm Anegisemee mbo kaasetoo siwoo naka.

Pidipi 3:6

Ona me ko ni'm dimina ese Anegisemee mbo kima kumana Yesiusi kaa andagatagea se bage waa ku kaa bodi yaababa siyaabuu sima, bidimi. Kena ona me ko Anegisemee'm okaa mee tupisi na mina ku yaa mu-mu se me ko ni ese ona kaa miya si taman ndo, dama ndo yaa mu-mu siwoo sima, dada. Dee, mee'm dama awake ku kaa kiyoo Siduga pakeao sekii waa, ni'm awawoo sima kuwa, ku mike koma kam koma wado kumana Siduga maa me kaa mike pake-toyaa sima.

Kodose 4:13

Epapedasi wa'm sese me ko me ni'm yadena ko wa'm dimina me ese eki mbo aoo ae se yadetaka. Kena Daodikiya okaa yoo togea se bage waa ku nuwa, Hedapodisi okaa yoo togea se bage waa ku nuwa, ku nde miya Epapedasi wa'm dimina da ekii mbo aoo ae se yadetaka. Ku kaa kiyoo wa'm eki tao Anegisemee mbo ese kanam-kanam kaasetoo siwoo nai sese ku mike, ese wa-nini ae, se yadeo yako wa'm dimina eki mbo ndigi se yadetaka, se kaseao kan sipa.