2 Timotiusi 2:3 - Anegisemee'm Mina Kapuge3 Timotiusi woe, a ko ai Keditusi Yesiusi wa tao ndanda yaawake se dodo me kaa ko ese dama se tentada mee to wa'm sese mugo masewena dodo awaae. Ku taao kan bodi ababa se aoo nde miya ku kaa si mbugu kaae. “Bada o! Awas!” se ku ndo nigaae. A enii mesema Keditusi wa tao bodi yaababa taao kan “Bada o! Awas!” se dimina me ndo nigiwoo taae. အခန်းကိုကြည့်ပါ။ |
2 Timotiusi 2:3
20 ပူးပေါင်းရင်းမြစ်များ
Kena mee kaa yaembaake se dimina aoo kipii kindo ko mee'm peu-pau awapea en'ndo otuma ku kaa nuwa, si maaneke awapea en'ndo otuma ku kaa nuwa, ku se ku kaa kiyoo mani dim katu kaao kana se dimina da, aii magi tau kan yaembaawoo nai se dimina da me ndo, me ona. Ona me ko mee kaa yaembaake se dimina aoo kipii kindo ko mee agumee'm peu se kao kaawake nde miya “Tau, ku wa'm dime tau kan naawapi ae,” se nigaao sekii se dimina, me ona. Ona me ko “Tau, si maaneke aoo ko aoo koya wadobo bada kaasi, ae,” se nigimana em'ndoo se se dimina da, me ona. Mee kaa yaembaake se dimina aoo kipii kindo ko ku dimina ku ndo yanigiwoo nakea.
Ku kaa dama masimasea na mee tuma kaa bage'm sese ku kaa dama nigi si pe taae. Ona me ko tentada se mee to wa'm sese. Tentada se mee me ko wai wa'm kipe ku kaa kiyoo kam yape maseke yee? Tau na. Wa'm moo wado maa kaa ebo toke mee to, wa'm yaedipi kipe waa ku kaa kiyoo ndo yape yaamasiwoo se, me ona. Mina ebeabea da ona me ko me aniguda poo bayoo masii mata se mee me ko anikee waa ayuwee se gumba ndoe poo si naasi yee? Tau na. Wa'm masii masimi me kaa kiyoo poo naasi, me ona, wiya. Kena mina ebeabea da ona me ko me kam'mbini egina mugo man'ta se mee me ko wai kam'mbini egina man'ta se koya kam'mbini egina ama uwo ku si naambi yee? Tau na. Ku man'ta sita mugo ndoe ku namba nowoo nai, me ona, wido. Ku mina ebeabea da wido ku ko ku ni'm sese mugo dodo ae se masimasea na se kaseao kan sipa.
Ku kindo ko enii'm bodi ababa se ku eki tao maanisi na se kao sima. Kase enta mugo ndoe, Anegisemee wa'm takun natoyaapi sese ku eki nadegea yako “O, enii nde miya takun natoyaabuu taambi ae,” se nigaao sekii. Kena eki'm dimina takun katoyaabuu nai kumana ku kaa kiyoo kam eki enii'm sese mugo bodi ababa se se dodo nde miya aii dimina si katu kina aii magi tau ndo kusipimana towoo taambea ndo.
Niyombai, Timotiusi woe. Eduga ko mee'm a kaa amanimake mina waa kaenimea. Mee'm aii dodo kaenimamea mina ku ni'm kaseao kan sipa mina waa mugo dodo. Ku kindo a kaa mina ku dama pi-pamiyaabuu sise na, mbae mina tupita se bage waa ku mbo ese oyu kan dama yatupaae. Ku se ku yatupaao kan me etaa se ndanda se ku tau. Me mbeenaa Anegisemee tao yape yaamaseke se ndanda mugo dodo. Ku kindo wa tao yape yaamaseke se ndanda ku dama awaae.
Me kapuge me ko me ni, Paudusi, ni'm kaawudumeo kapuge. Ni ko ni Keditusi Yesiusi wa'm wa kaa wa tao napeyaami se mee to. Anegisemee wa'm gai kan se nambeasimi koena. Kena wa'm napeyaami me ko me wa'm enii tao ba-gamitaao kana se mina da me mee mbo donaa asinaa sisi na napeyaami. Wa'm enii tao ba-gamitaao kana se mina me se de. Keditusi Yesiusi mesema dipinimake se bage waa ku Anegisemee wa'm mike omiwoo towoo yatoyaabuu taasi se bage waa. Me mina me ko me ni'm donaa asinaa naka se mina da.
Enii nduwawe me bage Dim'mba nadomaami kumana enii'm Tuhani kaa mina ku kaa si ego kaae. Ku kaa si ego kin ndo mee mbo uwa pana pi-yaeniwoo taae. Kena ni ko ni peniyada ee nda toke ko toke koya ni kaa nde miya si naego kaae. Ni kaa si naego kina ni'm sipa mugo dodo awawoo taae. Ni'm sipa me ko me se de. Ni ko ni Anegisemee'm dama mina ku mee mbo donaa asinaa taao kan bodi ababa se kan donaa asinaa naka. Ku kindo ko ni'm awapa ku dodo ndo masewena a namba dodo ndo awawoo taae. Anegisemee'm yaa mani da kaa bodi ababa se aoo nde miya, tau. Wa'm dama mina ku mee mbo si dan ndo donaa asinaa siwoo taae.
Ku kumana ni dim katu tau. Mee'm bodi naababa siyaabuu nakea ku kaa nigina ko “Bado o! Naawa o!” se nigeke. Mbao awasi na “Bada o! Naawa o!” se nigeke ee? Tau. Anegisemee wa'm pikimami se bage waa ebanaa ku Anegisemee'm dama mina yiin tau. Kum seta kaa ekii nde miya ekii'm woo-woo se kaa si em yadasi na waya ese asiyoo kam asiyoo abayai se omiwoo towoo sisi na, ni'm ekii tao yaawaao be se kao ona kaa miya emi tau. Ese yai, bodi ababa se aoo se dodo nde miya Keditusi Yesiusi wa'm naawami mina ku eniwoo semuu naka ndo, se nigeo.
Kena me dama tosi na mina me mee mbo kam mee mbo donaa asinaa sipa kumana ni bodi ababa se nde miya aoo. Ni'm eniwoo naka sese ku kaa mee'm nabeagea yako ni'm yaa-yaa, bado-bado ku besi one waa pai-nawemana peniyada ee nda nadomaamea. Ekii'm naawamea me ko me peu awapi mee to wa kaa awayaa mugo dodo se naawamea. Kena ekii besi one pai nawemagea yako ni ko ni mee mbo penaa taao kana koya Anegisemee'm dama tosi na mina me pai wemake iyo. Kum seta kaa, endo nde miya me mina me ko mee mbo kam mee mbo odeeniyaabuu siwoo nakea.
Waya a'm nadewoo sime kao ona me ko eduga ko ni Anegisemee'm mina donaa asinaa se kumana mee waa ekii peu aya nadotaa siwoo simea. Peu aya nadotaa simea bage ku ko ku An'diokiya okaa yoo togea se bage ku nuwa, Ikonium okaa yoo togea se bage ku nuwa, Diseda okaa yoo togea se bage ku nuwa, ku bage ku ese peu aya nadotaa siwoo simea kumana bodi ababa siwoo sima! Ku kaa bodi ababa siwoo se koya tau. Ekii'm peu naawamea kao kuwa, ku otuma Tuhani wa'm mbeedi naambeana dama natoyaabuu simi. Ku se ku nde miya a nadewoo sime. Aii se nadito se se ku tau. Ni'm sipa mugo ku a namba ekokeduwaao kan se nadewoo sime.
Dee, ku se ku aoo kaasea kumana omiyaa siyaa ku ndo a kaa to a yimbi manina dimina andimana towoo taae. Bodi ababa se aoo nde miya tukuu wemana oyu kan ndo towoo taae. Waya Anegisemee'm dama mina ku mee mbo donaa asinaa taae. Waya wadobo Anegisemee wa'm kamatapi ndanda ku otuma otou wandeta siyaabuu taae.
Kena me kapuge me a tao ndo se ku tau. Eniikinaa ambii, Apiya me me, wa namba “Aba, aba,” se kaseo. Kena Adikipusi wa namba “Aba, aba,” se kaseo. Adikipusi wa'm sese ko me mbeenaa tentada mee to wa'm sese mugo dodo. Kase enta mugo ndoe, wai enii mesema dim mbugu tau kan Keditusi kaa ndanda yaa mu-mu nai se mee to koena. Kena Pidemoni woe, a'm ee nda andagata siwoo nakea se Yesiusi mbaya bage waa ku nde miya “Aba, aba,” se aseao gai.
Me mina me ko me ese widaasi na se mina koya me mina me eki kaa si kaameaniyaasi na eki'm eduga dama awamea-awamea sese waa ku waya wadobo nde miya yaa mu-mu taae. Dee, eduga ko eki'm dimina da waa ku Keditusi kaa mina kawadaniyaabuu simi. Eki'm dimina kawadaniyaana ndo waa ko ogu bage ku bodi kaababa siyaabuu simea. Ku kaa kiyoo kam eki ese em'mbee widigi aoo se aya dowoo simea koya tau, ese dimina ona ndo kan magi tau ndo se towoo simea, se kadema.
Kisena ndo waa ko Musia wai Anegisemee kaa “Mike ae,” se yanigimami kumana wai Mesida maa kaa kam batana pemi. Me mugo awake kindo me Mesida maa wado ese ata emi tau ebo tomi se mee to wa'm yima kiki ese ebo yakiyaambi kao koya wa'm yima kiki ku kaa Musia yawidaan tau. Aii peke ndo. Se peta sita mugo ndoe widigi aoo ko aoo koya wai Anegisemee kaa kusipimana magi tau kan ndo peta simi ndo. Me Anegisemee me me, me mee tuma kaa bage'm deao kana se Anegisemee koya tau. Musia wa'm Anegisemee kaa “Mike ae,” nigimami se dimina me kaa kiyoo wai Anegisemee dito taao sekii mugo dodo kimi. Ku kaa kiyoo wa kaa kusipimana peta simi ndo.
Me mugo tamaao eo se mina enimi kumana Abedaham wa'm dimina magi tau. Aii dim magi tau kan pi-yaapamiyaasi yoo me ndo dito siwoo simi. Ese mani tau pi si yaapamiyaasi koya dimina andimana dito siwoo simi. Aii dito, dito, dito siwoona ndo waa ko Anegisemee wa'm “Se kaawaata,” se mina ku wa tao pi-yaapamiyaake kidai.
Ese eduga ko Anegisemee wa'm se asina ko “Ni kaa naembaake se bage ku en'ndo otuma ku ni'm omiwoo towoo yatoyaabuu taata se bage waa,” se asimi. Me mina me ko me ese ba-gamitaao kana se mina. Kena wa kaa yaembaake bage enii ko enii'm toke yoo ku widigi toke se dodo me kaa me ko me enii'm Anegisemee kaa “Mike ae,” se nigeke se dimina da me naa ebe'm ndo ee? Dimina nda kam kapimape se dimina da ee? se kadesi na se kao. Ku kumana mee ona wai widigi toke nde miya Anegisemee kaa dimina magi tau ndo se tai kipii kindo ko yau-yau bage ekii'm yanigina ko “O, mee me me, me Anegisemee wa'm dama tosi na aya yadotaa taasi mee to ae,” se yanigaao sekii. “Wai Anegisemee kaa dim wiya-wiya tau kumana omiwoo towoo tosi na yoo maniisi ae,” se ku ndo yanigaao sekii.
ကြော်ငြာတွေ