1 Kodintusi 5:9 - Anegisemee'm Mina Kapuge

⁹ Ni'm eduga kaawudumama kapuge me nda mina se kasina ko “Tubaka aoo se bage ekii mesema si ekiimoo kaae. Ekii mesema si tomu taae,” se mina kasima.

1 Kodintusi 5:9 ပူးပေါင်းရင်းမြစ်များ

1 Kodintusi 5:10

Se kasima se dodo me kaa ko “Ibedisi mbaya bage ekii mesema si tomu taae,” se kaseao kan sipa mina se ku tau. Dee, nakayoo maa kaa togea se bage ekii tubaka miya aoo. Mee'm se-kao we-kao ku kaa dimoke se bage waa ku nde miya aoo. Mee'm kao oma maseke se bage waa ku nde miya aoo. Mbae da se anegisemee yapapa se bage waa ku nde miya aoo. Ku mugo bage ku se-yoo we-yoo ku otuma aoo kumana ku mesema tomu taao be kipii kindo ko boke ndo sekii. Buwaan tau yoo miyo iyo.

1 Kodintusi 5:2

Wa'm awapi ku kaa kiyoo eki otuma dimina dano-dano taao daan sipeai koya tau. Eki, eki kaa to apawoo nakea ndo. Yai, peu-pau awapi mee me me, wa mesema si yatomuu taae. Eki mbo kam mani yaeba-mbeaseae!

1 Kodintusi 5:7

Woo-woo se ku ese edagi dea mugo dodo kumana ku otuma uwo kaa wamoo taae. Eki mbo peu-pau mbee to mbeenaa kaa miya emi tau kisi na, ese edagi emi tau se edoondi dodo kisi na, ku peu-pau se ku en'ndo otuma eki mbo kam uwo kaa wamoo taae. Enii'm Um Dona Badii naao kan se dom'mba yuwa to me ko me Keditusi. Keditusi wa ko wai enii'm woo-woo se kaa naatabei yako ku kaa kiyoo enii'm woo-woo se kaa mina bota. Ku kaa kiyoo kam enii ko ese edagi dea emi tau se edoondi mugo dodo se nakiyaami. Kum seta kaa, eki'm woo-woo se otuma ku uwo kaa wamoo taao ndo bada.

2 Kodintusi 6:14

Yesiusi mbaya bage eki'm awaao gai me wa-nini. Yesiusi kaa “Mike ae,” nigaan tau se bage waa ekii'm awaao gai me wa-nini. Ku akaa ndepi dodo tau kumana ekii mbaya mesema si dipinimaae. Dee, ndumbo ndo awatakea se bage ku mina tamoo nakea bage mesema dipinimana mbaya ona ndo kiyaao sekii yee? Tau na, ekii'm awaao kan sipea dodo tau kumana dipinimake iyo. Eé, ao da mesema tuku, akaa ndepi dipinimana toke sekii yee? Tau na.

2 Kodintusi 6:17

Kiyoo kam Tuhani Anegisemee wai wa-nini gado wa'm waya se enina ko “Ku kumana ‘Mike ae,’ nigaan tau se bage ekii mbo si tomu taae. Ekii mbo gimitana wa-nini yoo pi-tomu taae. Ekii ekii-nini, eki eki-nini se wenimana tomu taae,” se enimi. “Ogu bage waa ekii'm peu-pau sese waa, ni'm emaa misi kaa ese deao niga sese kuwa, ku mbeenaa kaa miya si awake kipii kindo ko ‘Aba! Ni kagai keo! Ni mba nda mee,’ se kasiimba ndeo.

Epesiusi 5:11

Tuku nda togea se bage kuwa ekii'm awake-awake ku otuma si maaneke se kao waa. Aii bada kaambea se kao waa. Ku kumana ekii'm sipea mugo ku si awaae. Ekii'm peu-pau ku si awan ndo “Ku si maaneke ae,” se nigi sisi na mina ku ndo pi-yanige-mane taae.

2 Teseadonika 3:14

Kena enii'm kapuge kaa kaawudumapa mina ku kaa nayito taao be se mee to aoo kipii kindo ko mee me me wai ekaa da uwa da kaa ekaa woeke bada. Wai ekaa da uwa da kaa ekaa woena ko wa mesema si tomu taae. Wa mesema noke kao si naae. Wa'm si awake-awake awapi ku kaa kiyoo ego kisi na se awake bada.

2 Teseadonika 3:6

Yesiusi kaa eniikinaa bage nakawaa woe. Enii'm eki kaa mina se kayena ko eki ebanaa ku yambayaa aoo se kayepa. Eki ebanaa ku yambayaa kan eki'm ndanda eki kaa to awaao be. Eki'm ndanda ku wisin'tana ndo ogu bage mbo ekii'm ndanda pi-ndamanaana “Ku awaae. Ku si awaae,” se mina se ku yanige-mane semuu nakea, se mina yepa. Ku mugo yambayaa aoo se bage kuwa, ku mbo Tuhani Yesiusi Keditusi ekaa da kaa dimi yakoesi na mina aoo. Ku mugo bage ku kaa enii'm ese oyu kan dimina yakoeta taao gai se mina ku se de. “Eki'm ndanda ku eki ndo eki kaa to koo awawoo taae. Eki'm kipe-kipe, namo-namo ku se ku maseao kan eki'm yaa da'm ndo masii masina noke bada.” Ku mugo mina se yakoeta taao gai. Kena yambayaa tau se bage eki kaa nde miya mina aoo. Enii'm eki kaa mina ku se de. Tuhani Yesiusi Keditusi wai ekaa da kaa enii'm ese oyu kaseao kan sipa mina ku se de. Yambayaa aoo se Yesiusi kaa kinaa bage ekii mbo si tomu taae. Kase enta mugo ndoe, me mugo mee to wai enii'm Yesiusi mbo kam masewena katupima mina ku yeao be kan yambayaa ndo se tutai se mee to kumana wa mbo si tomu taae. Dee, eduga nde miya enii eki mbo ndigi se dodo me kaa ko enii'm oyu kan kasima mina ku se de. “Masii yambayaa se mee to noke kao ku si maneae. Aii nam tapoo ndo se omisi,” se kasima. Ku kindo ku mina ku dama yaa mu-mu taae. Enii'm “Yambayaa se dimina me mbeas,” se mina kasima koya aii ebe kaa mina ndo katupimea se ku tau. Enii'm awama-awama ku kaa nde miya me mina me ndo katupima kui. Enii ko enii Anegisemee'm mina donaa asinaa se bage kumana ku kaa kiyoo enii'm kaseao sekii kima se mina ku se de. “Enii'm katupipa mina ku kaa kiyoo kipe niwee. Namo ku nde miya niwee.” Enii'm se kaseao sekii kima koya dime kan kasiin tau. Kase enta mugo ndoe, enii'm sese ku eki namba dodo ndo awasea na “Kipe niwee. Namo niwee,” se mina se ku ona kaa miya asiin tau. Ku se ku aseao be kumana apikaa nde miya, ndeemaa nde miya, namasii masiwoo sima. Ese egaa'm ndo masii masiwoo sima. Enii'm ediin tau se namo ona kaa miya naan tau. Enii'm awama-awama dena se awawoo sisea na se awama. Ku kindo ko eniikinaa bage waa woe. Dama ndo awawoo taao kan ku kaa dimina si katu kaae. Kase enta mugo ndoe, enii'm awama-awama ku eki'm nademea. Enii ko enii aii tomu sima baa. Ku se ku eki nademea kumana dama awake sese ku eki eo baa. Ku kindo ko enii'm yambayaa tau kan awawoo sima sese ku masewena dodo ndo awawoo taae. Ku dama awake ku si wisin'tana dama awawoo taae.