San Juan 21:15 - Nuevo Testamento Tzeltal de Amatenango

¹⁵ Lajikix ta weꞌel a, te Jesuse la sjojkꞌobe te Simon Pedroe: —Simon, te xnichꞌanat te Jonase, ¿me mas kꞌux ya awaꞌiyon ta awoꞌtan jich tutꞌ yan to? —xchi. Te jPedro la sjakꞌ: —Jich, Kajwal. Anaꞌoj te kꞌuxat ta koꞌtane —xyut. Te Jesuse la yalbe: —Kanantaybon me te jkarneraetik kuꞌun cheꞌe —xchi.

Bible in Tzeltal Bachajón

¹⁵ C'alal laj yo'tanic ta we'el, te Jesús la yalbe te Simón Pedro: Simón, snich'anat Jonás, ¿c'ax bal hich c'uxon ta awo'tan a te bin ut'il te yantic ini? xchi. C'ux, Cajwal. Ana'oj te c'uxat ta co'tan, xchi te Pedro. Mac'limbon te bic'tal tuminchijetic cu'un, xchi te Jesús.

Bible in Tzeltal de Oxchuc y Tenejapa

¹⁵ Te c'alal lajix yo'tanic ta we'ele, te Jesús caj yalbey te Simón Pedroe: —Simón, te snich'anat Jonase, ¿c'ax bal jich c'uxon ta awo'tan a te bit'il in yantic to? —xi'. La yal te Pedroe: —C'ux, Cajwal. Ana'oj stojol te c'uxat ta co'tane —xi'. La yal te Jesuse: —Mac'linbon te alal chijetic cu'un jiche —xi'.

San Juan 21:15 ပူးပေါင်းရင်းမြစ်များ

San Mateo 10:37

“Te machꞌa ben kꞌux ta yoꞌtan te smeꞌ-state teme ma jichuk kꞌuxon ta yoꞌtane ma snujpꞌuk te kuꞌun ya xkꞌote. Sok te machꞌa ben kꞌux ta yoꞌtan te yuntikile teme ma jichuk kꞌuxukon ta yoꞌtane, ma snujpꞌuk te kuꞌun ya xkꞌote.

San Mateo 16:17

La yal te Jesuse: —Ben me tsaꞌam alekil jaꞌat Simon te xnichꞌanat te Jonase. Porke ni jtuluk winik te la yaꞌbeyat anaꞌbe sluwar. Jaꞌ a yaꞌbeyat anaꞌ sluwar te jTat te ay ta chꞌulchane.

San Mateo 18:10

“Ila me abaik, ma me ayuk jtuluk te maꞌyuk ta jkuenta awuꞌunik te machꞌatik chꞌin ayike. Ya kalbeyex te sil tiempo tekꞌatik te chꞌul angeletik yuꞌunik ta stojol te jTat te ay ta chꞌulchane.

San Mateo 26:33

Te jPedro la yal: —Aunke spisilik ya xchꞌojat jilel, pero te joꞌone makꞌ me ya jchꞌojat jilel —xchi.

San Mateo 26:35

Te jPedroe la yal: —Makꞌ jmukat ta koꞌtan. Ya xjuꞌ ya joyinat ta milel —xchi. Y jich a yalik ta spisilik euk te yane.

San Marcos 14:29

Pedro la yal: —Manchuk me spisilik ya sjilesat, yan te joꞌone makꞌ jilesat —xchi.

San Lucas 12:32

“Ma me xiꞌanik, karneraetik kuꞌun, jaꞌex te ma bayalukexe. Te Jtatike ben jun yoꞌtan ya yakꞌex teꞌa te ba ya xmantaleje.

San Lucas 22:32

Pero la jkꞌambeyix te Diose yuꞌun te manchuk ya xchꞌay te xchꞌuunel awoꞌtan ta jtojol te jaꞌate. Te jaꞌate te kꞌalal ya achaꞌsujtes awoꞌtan ta jtojole, koltaya me te awermanotake, aꞌbeya me smukꞌul yoꞌtanik —xchi.

San Juan 1:42

Te nax a te jꞌAndrese la yikꞌ bael te Simon te ba ay te Jesuse. Kꞌalal la yil te Jesuse, la yalbe: —Jaꞌat te Simon te xnichꞌanat Jonase. Pero Cefas abiil ya xkꞌoat —xyut. Te Cefas, “Pedro”, xchi kꞌoem abi.

San Juan 13:37

Te jPedro la yal: —Kajwal, ¿tuꞌun te ma spas ya jtsꞌakliyat bael te ora to? Dispuesto ayon te ya kakꞌ jba ta milel ta akaje —xchi.

San Juan 16:27

porke te Tatile kꞌux ya yaꞌiyex ta yoꞌtan. Jaꞌ kꞌuxex ta yoꞌtan porke kꞌuxon ta awoꞌtanik, sok xchꞌuunej awoꞌtanik te talemon ta stojol te Diose.

San Juan 21:12

Te Jesuse la yaltalanbe: —Laꞌ me, weꞌanik —xchi. Ni jtuluk te jnopojeletike la sjojkꞌobeyik machꞌa a, yuꞌun snaꞌojikix te jaꞌ te Kajwaltike.

San Juan 21:7

Jich te jtul jnopojel, te machꞌa ben kꞌux ya yaꞌi sba sok te Jesuse, la yalbe te jPedroe: —Jaꞌ te Kajwaltike —xchi. Y kꞌalal la yaꞌi te Simon Pedroe te jaꞌ te Kajwaltike, ba slap ta ora te skꞌuꞌ-spakꞌe yuꞌun tꞌaxal, y la xchoj sba ochel ta jaꞌ.

San Juan 8:42

Te Jesuse la sjakꞌtalanbe: —Te batsꞌi jaꞌuk aTatik te Dios te jaꞌexe, kꞌuxon ta awoꞌtanik te jichuke. Porke te joꞌone talemon ta stojol Dios y liꞌ ayon to. Ma joꞌukon a jnop tal te talone. Jaꞌ a stikonon tal te Diose.

Hechos 20:28

Jaꞌ yuꞌun ila me abaik, y kanantayaik me spisil te hermanoetik ta kongregasione te ba yakꞌojbeyex awaꞌtelik ta kanantawanej te Chꞌul Espiritue, yuꞌun ya akanantayik te machꞌatik xchꞌuunejikix te Kajwaltike, te stukel smanoj ta xchꞌichꞌele.

Hechos 20:29

Ya jnaꞌ te kꞌalal boemonix ae, ya xtal yan jich tutꞌil tiꞌawal teꞌtikil tsꞌiꞌ te ya xlijk yilbajin jichuk karnera te hermanoetik te ma xpichꞌuk yoꞌtane.

Romanos 14:1

Junuk me awoꞌtan abaik sok te machꞌa xchopet xchꞌuunel yoꞌtane. Ma me xꞌalijkes kꞌop sok te tutꞌil ay te yoꞌtane.

Romanos 15:1

Te joꞌotik te tulanotik sok te xchꞌuunel koꞌtantike jichukotik me te ya jnaꞌbetik yoꞌolil sbaik te machꞌatik ma tulanuk xchꞌuunel yoꞌtanike. Y ma jaꞌuk ya jletik te joꞌotik nax lek ya kaꞌiy jbajtike.

1 Corintios 8:11

Jich te jaꞌate, yuꞌun te anaꞌojbeyix sluware, jich ya awakꞌ bael te chꞌayel te awermano te ma to ayuk spuersa yoꞌtane, te jaꞌ chamen Cristo yuꞌune.

Gálatas 5:6

Porke jun nax ayotik sok te Cristo Jesuse, jich ma baleukix ya xkꞌot a teme kichꞌojtik sirkunsisione o teme ma kichꞌojtikuke. Te tut lom balee jaꞌ te ay xchꞌuunel koꞌtantike. Y te xchꞌuunel-oꞌtanile ya yakꞌ kuxuyinukotik sok te skꞌuxul koꞌtantike.

Efesios 4:14

Ma me jichukotikix tutꞌil untik te jtsꞌin nax ya xyanej sok te bayuk nax ya xꞌikꞌot bael jich tutꞌil ikꞌ ta xchꞌuunel achꞌ nojpesele. Asta ya xloꞌlayot bael yuꞌun gente te ya xloꞌlaywan te ya xbeenik te ba sbelel te chꞌayele.

Efesios 6:24

Dios a me yaꞌbey te slekil yoꞌtan ta stojol spisil te machꞌatik sil tiempo kꞌux ta yoꞌtanik te Kajwaltik Jesucristoe. Jichuk.

Hebreos 13:20

Te Dios yuꞌun butsꞌan kꞌinal la chaꞌkuxes tal te ba animaetik te Kajwaltik Jesuse, te stukel mukꞌul jkanan yuꞌun te karneraetike, ta skuenta xchꞌichꞌel te la xchap a te trate sbajtel kꞌinal aye.

Hebreos 4:13

Ni maꞌyuk tut a te spasoj Dios te ya xjuꞌ ya snakꞌ sba ta stojole; spisil jamal ta ilel ya yil ta sit stukel te machꞌa ya yichꞌbotik jkuenta te kaꞌteltike.

1 Pedro 1:8

Te jaꞌexe kꞌux ya awaꞌiyik ta awoꞌtanik te Jesucristoe aunke ma to awilojikuk; y te ora to, achꞌuunejik te Jesucristoe aunke ma to awilojikuk. Lom kontento ayex sok sbujtsꞌ awoꞌtanik te lom mukꞌe, y te ben tsaꞌam slekil te ma xjuꞌ xlaj ta alel skꞌoplale,

1 Pedro 2:2

Jachikukex me te tutꞌil untik te ayinel toe, leaik me te lekil lech ta skuenta te Espiritue. Yuꞌun jich me ya xchꞌiex ta skuenta sok jich me ya ataik a te kolele,

1 Pedro 2:25

Yuꞌun te jaꞌexe te nail to jachikex tutꞌil karneraetik te chꞌayemik ta bayuk nax aylane. Pero te ora to, chaꞌsujtexix tal ta stojol te Cristoe, te ya skꞌanantayex jachik tutꞌil jtul jkanan te ma xway te ya skanantay te akuxlejalike.

1 Juan 4:19

Te joꞌotike kꞌux ya kaꞌiy jbajtik, porke nail a xkꞌuxutayotik te Diose.

1 Juan 5:1

Spisil te machꞌa xchꞌuunej ta yoꞌtan te jaꞌ Cristo te Jesuse, jaꞌ yal-xnichꞌan Dios abi. Y te machꞌa kꞌux ya yaꞌiy te jtul tatile, jich kꞌux me ya yaꞌiy ekꞌa te yuntikil te tatil abi.

Apocalipsis 2:23

Y ya me kakꞌ lajuk te yuntikile. Jich me ya snaꞌik spisil te juju-tijkꞌ hermanoetik te joꞌon jnaꞌoj asta ta yutil pensar y ta oꞌtanil. Y ta juju-tul te jaꞌexe ya kaꞌbeyex chikan te tutiꞌ apasojike.