Gálatas 2:2 - Nuevo Testamento Tzeltal de Amatenango

² Boon porke Dios la yaꞌbonix jnaꞌ te puersa ya xboone. Y teyix ta Jerusalen ay jun junta te ba kalbe yaꞌiyik te stataletik te ayik ta jkuentae. La kaltalanbe te skꞌoplal kolel te la kal te ba ay te machꞌatik ma juriyouke. Te tutꞌil jich a jpase, yuꞌun ma jkꞌan teme maꞌyuk sluwaril ya xjil te tut jpasojixe sok te ya to jpas xane.

Bible in Tzeltal Bachajón

² Mohon bahel tey a yu'un te bin a'boton quil yu'un Dios, soc scuenta yu'un ma tojoluc yacon ta ahnimal o ma tojoluc ahnimajon, hich la jc'opon ta stuquelic te mach'atic muc' sc'oblalic, la jcalbe ya'iyic te lec yach'il c'op te yacon ta yalel ta yohlil te jyanlumetique.

Bible in Tzeltal de Oxchuc y Tenejapa

² Jich boon, melel Dios la yac'bon jna' te puersa ya xboone. Soc te bit'il ayonix ta Jerusalén a, la jtsob jba soc te mach'atic na'bil sbaique te yich'oj yat'elic ta jwolwaneje, soc la jcholbey yaiyic te sc'oplal colel te la cal ta stojol te jyanlumetique. Jich la jpas in to, yu'un ma jc'an te tojol ya xch'ay te cat'el te yacon ta spasele.

Gálatas 2:2 ပူးပေါင်းရင်းမြစ်များ

San Mateo 10:16

“Ilawilik ya jtikonex bael jich tutꞌil karnera ta yolil te genteetike te pajal sok jweꞌawal teꞌtikil tsꞌiꞌetik ta atojolike. Pꞌijanik me jich tutꞌil pꞌij te chane. Sok manso me xꞌawakꞌ abaik ta stojol te genteetike jich tutꞌil manso te palomae.

Hechos 15:12

Jich ma machꞌa kꞌopojix a, y la yaꞌiybeyik sluwar skꞌop te jBernabe sok te jPabloe te la yalik te seña milagroetik te Dios a pasbot ta stojolik ta yolil te machꞌa ma juriyouke.

Hechos 15:2

Te jPablo sok te jBernabee jicha lijk bayal kꞌop yuꞌunik sok. Jich a yichꞌik tꞌujel te jPablo sok te jBernabee sok xan yanetik yuꞌun ya xbajtik ta Jerusalen ta xchapel te kꞌop sok te apostoletike y sok te ansianoetik yuꞌun te hermanoetik te ba Jerusalene.

Hechos 15:4

Te kꞌalal kꞌot ta Jerusalen te jPablo sok te jBernabee, te hermanoetik te stsoboj sbaik, sok te apostoletike y sok te ansianoetike ben jun yoꞌtanik a yikꞌik ta stojolik. Y te jPablo sok te jBernabee lijk yaltalanbe spisil te tutik a spas Dios ta stojolike.

Hechos 18:9

Ay jun ajkꞌubal a wayuchej te jPabloe, albot yuꞌun te Kajwaltike: —Ma me xiꞌan. Akꞌa me puersa yalel te jkꞌope. Ma me akom aba.

Hechos 23:11

Kꞌalal och te ajkꞌubale, te Kajwaltike la yakꞌ sba ta ilel ta stojol te jPabloe, y la yalbe: —Pasa me puersa, Pablo, porke jich tutꞌil te la awalbonix jkꞌoplal liꞌ ba Jerusalene, jich mismo ya xkꞌo awalbon jkꞌoplal ta Roma —xꞌutot yuꞌun.

Hechos 5:34

Pero te ba stsoboj sbaik te machꞌatik ay yaꞌtelike ay jtul fariseo tey a te Gamaliel sbiile, te jaꞌ maestro yuꞌun te mantaliletike te ben lek aꞌbil ta jkuenta yuꞌun te jtejklume. Jaꞌ a tejkꞌaj jajchel y la yakꞌ mantal te ya to xlokꞌ bael jtsꞌinuk te apostoletike.

Romanos 9:16

Jich yuꞌun, ma jaꞌuk ya yichꞌ naꞌel tut ya skꞌan te winike ni ma jaꞌuk te yaꞌtele. Jaꞌ nax ya snop stukel Dios teme ya xkꞌuxutayotike.

1 Corintios 1:23

Pero te joꞌotike jaꞌ ya kaltik te tutꞌil a milot ta krus te Cristoe. Jaꞌ to jaꞌ nax xcheꞌbantesel yoꞌtanik yuꞌun te juriyoetike, y te machꞌatik ma juriyouke, jowil nax kꞌoem ta yoꞌtanik.

1 Corintios 2:2

Te kꞌalal la joyinexe, la jnop ta koꞌtan te jaꞌ nax ya kalbeyex skꞌoplal te Jesucristoe, sok te tutꞌil a cham ta kruse.

1 Corintios 9:24

Te jaꞌexe anaꞌojik teme ay jun jꞌalawe spisilik ya xꞌanimajik. Pero úniko jtul nax te ya yichꞌ smajtan yuꞌun ya yaꞌiy tsalawe. Lek ay, animajanik me ta apisilik, jich me ya xkꞌo ata te amajtanike.

1 Corintios 9:26

Te joꞌone, ma jichuk ya xꞌanimajon tutꞌil te machꞌa ma xyil ba ya xbajte. Ni ma jichukon te tutꞌil machꞌa ya stsalawan ta tajmal te jowil nax ya yakꞌ te skꞌabe.

2 Corintios 12:1

Ma jkꞌan te ya jtoy jba ta mismo jtukel naxe. Pero jaꞌ me ya jta ta alel te tutik a kil y la yaꞌbon jnaꞌ te Kajwaltike.

Gálatas 1:12

Ma teyuk a jta a ni ma teyuk jnopoj a te ta skuenta nax jtul winike, yuꞌun jaꞌ ta skuenta te Jesucristoe stukel mismo a yaꞌbon jnaꞌ.

Gálatas 1:16

Te kꞌalal jich a skꞌan yoꞌtane, la yaꞌbon jnaꞌbe sba te Xnichꞌane, yuꞌun jich me ya kalbe skꞌoplal te kolel te ba ay machꞌatik ma juriyouke. Ma jaꞌuk a ba jojkꞌobey te yanetik genteetike,

Gálatas 1:6

Lom ayon ta ajtal-oꞌtan awuꞌunik te tutꞌil ora nax ya xjakalex bael ta stojol Diose, te la yikꞌex ta skuenta slekil yoꞌtan te Cristoe. Yuꞌun jaꞌ ya apasik seguir te yan kꞌop te kuybil te ya xkolotik yuꞌun.

Gálatas 2:6

Pero te machꞌatik ay yaꞌtelik tey ae maꞌyuk tut achꞌ a yalbon. Aunke te joꞌone ma kocheluk te tut aꞌtel yichꞌojike, jich mismo te Diose ma jaꞌuk ya yichꞌ jkuenta te tut yilelike.

Gálatas 2:9

Jaꞌ yuꞌun te Jacobe, te jPedroe sok te Juane, te jaꞌlan yiptajib te hermanoetike, la snaꞌik te Dios a yaꞌbon ta jkuenta te aꞌtel to. Jaꞌ yuꞌun la xchechbotik jkꞌabtik joꞌon sok te jBernabe, jaꞌ seña te joyinej jbajtik ta aꞌtel. Sok la yalik te joꞌotik ya jkuentaintik te aꞌtel te ba ma juriyouke, y te stukelik ya me xba aꞌtejikuk te ba ay te juriyoetike.

Gálatas 5:7

Te jaꞌexe lek ayex ta nail. ¿Machꞌa la xchebantesbeyex awoꞌtanik te ya ajilesik ta chꞌuunel te tut batsꞌi jiche?

Filipenses 2:16

Jich me ya xjuꞌ awuꞌunik te tutꞌil ya awalbeyik ta jamal te skꞌoplal kuxuyinele. Jich te kꞌalal ya xtal te Cristoe, ben kontento ya sujton ta akuentaik, yuꞌun jnaꞌoj te ma jowiluk nax kakꞌoj puersa ta aꞌtel ta akuentaike.

Filipenses 2:29

Ikꞌaik me sok sbujtsꞌ awoꞌtanik jich tutꞌil hermano ta skuenta te Kajwaltike, sok akꞌaik me ta jkuenta sil tiempo te machꞌa pajal yoꞌtan soke.

1 Tesalonicenses 3:5

Jaꞌ yuꞌun, kꞌalal ma stsijk kuꞌun ta mas aye, la jtikon ta jojkꞌoyel tutꞌil ayex sok te tutꞌil ay te xchꞌuunel awoꞌtanike. Jaꞌ la jnaꞌ teme la achꞌuunik sujel yuꞌun te pukuje, sok te jowiluk nax ya xkꞌot te kaꞌteltike.

2 Timoteo 4:7

Juꞌix kuꞌun te lekil tsalawe. Kꞌoonix te ba ay ya xꞌanimajon baele. Jun koꞌtan jchꞌuunej te Diose.

Hebreos 12:1

Jaꞌ yuꞌun, te joꞌotike joybilotik ta bayal gente te machꞌatik ya yakꞌix ta ilel te xchꞌuunejik Diose. A me jilestik ta xujktik spisil te tut a te ya smakotike y sok te mulil te ya sjoyotike. Y ya me jpastik puersa ta animal te ya xkꞌoj jtajtik te tut ay ta jtojoltike.