Gálatas 2:16 - Nuevo Testamento Tzeltal de Amatenango

¹⁶ Pero jnaꞌojtik te maꞌyuk machꞌa libre ya xkꞌot yuꞌun smul ta skuenta te ya spas te tut ya yal te mantaliletik yuꞌun te jMoisese. Jaꞌ nax libre ya xkꞌootik yuꞌun jmultik ta skuenta xchꞌuunel te Jesucristoe. Jaꞌ yuꞌun, te joꞌotike jchꞌuunejtikix te Jesucristoe yuꞌun ya skoltayotik yuꞌun jmultik ta skuenta nax te xchꞌuunel-oꞌtanile, y ma jaꞌuk ta skuenta spasel te tut ya yal te mantaliletike. Porke maꞌyuk machꞌa ya xjuꞌ te libre ya xkꞌot yuꞌun smul ta skuenta spasel te tut ya yal te mantaliletike.

Bible in Tzeltal Bachajón

¹⁶ jna'ojcotic te ma ba toj ya x'ilot yu'un Dios te winic ta scuenta spasel bin ya yal te Ley, pero ta scuenta sch'uhunel te Jesucristo, ha nix hichotcotic jch'uhunejcotic te Jesucristo scuenta yu'un toj ya x'ilototcotic ta scuenta sch'uhunel te Cristo, ma ha'uc ta scuenta spasel bin ya yal te Ley, como mayuc mach'a toj ya x'ilot yu'un Dios ta scuenta spasel bin ya yal te Ley.

Bible in Tzeltal de Oxchuc y Tenejapa

¹⁶ Ja'uc me to, jna'ojtic stojol te jo'otique, ma ja'uc toj ya yilotic Dios ta swenta spasel te bila ya yal te mandalile. Ja' nax ta swenta xch'uunjel co'tantic ta stojol Jesucristo te toj ya yilotique. Melel la jch'uuntic Jesucristo swenta yu'un jich me toj ya yilotic Dios ta swenta nax xch'uunjel co'tantic ta stojol te Cristoe, ma ja'uc ta swenta spasel te bila ya yal te mandalile. Melel ma'yuc mach'a toj ya x'ilot yu'un Dios ta swenta bit'il yat'elinej spasel te bila ya yal te mandalile.

Gálatas 2:16 ပူးပေါင်းရင်းမြစ်များ

San Juan 20:31

Pero jaꞌ nax a yichꞌ tsꞌibayel to yuꞌun jich me ya achꞌuunik a te jaꞌ Cristo sok jaꞌ te xNichꞌan Dios te Jesuse. Y teme la achꞌuunike, ay akuxlejalik sbajtel kꞌinal ta skuenta te Jesuse.

Hechos 4:12

Maꞌyuk yan machꞌa ay kolel ta skuenta, porke maꞌyuk yan machꞌa ya xkolotik yuꞌun. Maꞌyuk yan biilil ta balumilal te ya xjuꞌ xkolotik yuꞌune —xchi te jPedroe.

Romanos 1:17

Yuꞌun ta skuenta te lek achꞌ kꞌope ya jnaꞌtik te tutꞌil toj ya yilelotik te Diose ta skuenta nax te xchꞌuunel koꞌtantike. Jich ya yal te tutꞌil tsꞌibabil jilele: “Jaꞌ me ya xkuxuyin te machꞌa ya xꞌilot yuꞌun Dios te tutꞌil toj aye ta skuenta te xchꞌuunel yoꞌtane”, xchi me.

Romanos 3:30

Yuꞌun jtul nax te Diose, maꞌyuk yan. Te Diose ya yakꞌ ta libre yuꞌun smulik spisilik te machꞌatik ay xchꞌuunel yoꞌtane. Ma jaꞌuk ya yichꞌ jkuenta yuꞌun teme yichꞌoj o ma yichꞌojuk sirkunsisione.

Romanos 4:2

Jich jaꞌuk a juꞌ yuꞌun te jꞌAbraham te toj a spas sba ta stukel naxe, ya wan spas te ya stoy sba te jichuke. Pero ma spas ya stoy sba ta stojol Dios.

Romanos 4:24

la stsꞌibabotik jkꞌoplaltik euk. Yuꞌun ta skuenta xchꞌuunel koꞌtantik, Dios ya yilotik jich tutꞌil te toj ayotike, yuꞌun jchꞌuunejtik te Dios la xchaꞌkuses tal te Kajwaltik Jesuse,

Romanos 8:3

Porke Dios a spasix te tut maꞌ juꞌ yuꞌun spasel te mantaliletik yuꞌun te jMoisese. Yuꞌun maꞌ juꞌ yuꞌun te mantaliletike, ta skaj te maꞌyuk spuersa te stiꞌbalul te mulawil winike. Dios a stikon tal te batsꞌil Xnichꞌan te batsꞌi jachik yilel te tutꞌil jmulawil winike, y la yakꞌ ta milbil majtanil skuenta yuꞌun mulil, yuꞌun jich a yakꞌ ta lajel te mulil te ay ta jtibalultike.

Romanos 9:30

¿Tut ya kaltik yuꞌun to? Te machꞌatik ma juriyouke te makꞌ sleik te machꞌa ya yakꞌ kolele, te Diose yalojix te kolemikix yuꞌun te smule ta skuenta nax xchꞌuunel yoꞌtanik.

1 Corintios 6:11

Y jich la apasik ta nail to euk te jaꞌexe. Pero te ora to la awichꞌikix sakutesel y lekutesbilix awoꞌtanik yuꞌun amulik ta skuenta te Kajwaltik Jesucristoe y sok ta skuenta te Chꞌul Espíritu yuꞌun te Dios kuꞌuntike.

Gálatas 4:5

Yuꞌun tal yakꞌ ta libre te machꞌatik ayotik to ta skuenta te mantaliletike, yuꞌun te Diose jich me ya yikꞌotik ta yal-xnichꞌan.

Gálatas 5:4

Jaꞌex te ya aleik te tutꞌil libre ya xjilex yuꞌun amulik ta skuenta spasel te mantaliletike, jich la apit abaikix ta stojol Cristo yuꞌun a, sok jich la apit abaikix ta slekil yoꞌtan te Diose.

Filipenses 3:9

sok te jun nax ya xkꞌoon soke. Ma jaꞌuk ya jle tutꞌil ya xlekubon ta skuenta xchꞌuunel te mantaliletike, sino ke jaꞌ nax ta skuenta xchꞌuunel te Cristoe. Dios a yakꞌonix ta libre yuꞌun jmul ta skuenta te xchꞌuunel koꞌtane.

1 Pedro 1:2

Jaꞌex te tsabilex yuꞌun te Jtatik Diose te nameyix jich snopoj ta yoꞌtane, sok te chꞌulutesbilexix ta skuenta te Espiritue. Yuꞌun me ya achꞌuunik y ya me awichꞌik sakutesel ta skuenta xchꞌichꞌel te Jesucristoe. Ichꞌaik te bayal slekil yoꞌtan te Jesucristoe y sok te bujtsꞌan kꞌinal yuꞌune.

1 Pedro 2:24

Te Cristoe jaꞌ a yichꞌ bael te jmultike ta stiꞌbalul te ba kruse. Yuꞌun jich me a laj jilel skꞌoplal a te mulile, sok ya xkuxuyinotik bael ta spasel te tut leke. Te Cristoe ejchentesot yuꞌun jich me a lekubex a te jaꞌexe.

1 Pedro 3:18

Porke te Cristoe kꞌax swokol ta milel yuꞌun te jmultik te jun nax buelta ta sbajtel kꞌinale. Lek yoꞌtan stukel, pero kꞌax swokol yuꞌun te machꞌatik ma lekuke, yuꞌun ya yikꞌex bael ta stojol Dios te jaꞌexe. Jich tutꞌil winik cham te stiꞌbalule; pero chaꞌkux sok te xchꞌulele.

2 Pedro 1:1

Joꞌon Simon Pedroon, jꞌaꞌtelon y apostolon yuꞌun te Jesucristoe. Ya jtsꞌibabeyex te karta to ta akuentaik, te pajal ay ta jkuentaik xchꞌuunel te tut ben tsaꞌame, porke toj yoꞌtan stukel te Diose y sok te jKoltawanej Jesucristoe.

1 Juan 1:7

Pero teme ayotik ta sakil kꞌinale, jich tutꞌil ay ta sakil kꞌinal te Diose, jich jun nax ayotik ta jpisiltik. Sok te xchꞌichꞌel te Xnichꞌan Diose, jaꞌ te Jesucristoe, ya spokbotik spisil te jmultike.

Apocalipsis 7:14

La kalbe: —Jaꞌat anaꞌoj, kajwal —xkut. Y jich a yalbon: —Jaꞌlan to te machꞌatik te kꞌaxemik tal ta tulan wokole. Jaꞌlan te machꞌatik sakꞌojik te skꞌuꞌ-spakꞌike y jaꞌ sakutesojik a te xchꞌichꞌel te Chꞌin Karnerae.

Apocalipsis 7:9

Ta patil la kil bayal genteetik yuꞌun te nasionetik te skajalskaj stsꞌumbale, sok yanetik tutꞌ xkꞌopojik, y sok yanetik slumalik. Tekꞌajtik ta sit te ba ay te mukꞌul naktajibale y ta sit te Chꞌin Karnerae. Lom bayalik, te maꞌyuk machꞌa ya xjuꞌ yuꞌun yajtayele. Sak skꞌuꞌ-spakꞌ yichꞌojik y yichꞌojik bael yaꞌnimal xan ta skꞌabik.