Apocalipsis 22:17 - Nuevo Testamento Tzeltal de Amatenango

¹⁷ Te Chꞌul Espiritue y sok te machꞌa nujpunemix sok te Chꞌin Karnerae ya yalik: “La.” Te machꞌa ya yaꞌiye, a me yal: “La.” Y te machꞌa takin yoꞌtane, y te ya skꞌane, a me taluk y a yuchꞌ te jaꞌ yuꞌun kuxlejale ta majtanil nax.

Bible in Tzeltal Bachajón

¹⁷ Te Espíritu soc te Jnuhpunel Ach'ix ya yalic: La' me, xchihic. Te mach'a ya ya'iybe sc'op, hich ac'a yal: La' me, xchihuc. Ac'a taluc te mach'a taquin yo'tan. Mach'ayuc a te ya sc'an, smahtan ac'a yuch' te ha' scuenta cuxlejal.

Bible in Tzeltal de Oxchuc y Tenejapa

¹⁷ Te Ch'ul Espíritu soc te yinam te Alalchije ya yalic: “La' me”, xiic. Te mach'a ya yaiy stojol, jich ac'a yal uuc: “La' me”, xiuc me uuc. Te mach'a taquin yo'tane, ac'a taluc teme ya sc'an yo'tane. Smajt'an ya x'ac'bot yuch' te ja' te ya yac' cuxinele.

Apocalipsis 22:17 ပူးပေါင်းရင်းမြစ်များ

San Juan 1:37

Te chaꞌtul jnopojeletik yuꞌun te Juane la yaꞌi te jich a yale, y la stsꞌakliyik bael te Jesuse.

San Juan 4:10

Te Jesuse la sjakꞌbe: —Te yauk anaꞌ te tut ya yakꞌ te Diose sok te yauk anaꞌbon jba, joꞌon te ya jkꞌanbeyat jaꞌe, jaꞌat me ya akꞌanbon jaꞌ te jichuke. Jich me ya kaꞌbeyat te kuxul jaꞌ stukele —xchi.

San Juan 4:11

Te antse la yalbe: —Xiꞌlel, maꞌyuk tut ay awuꞌun yuꞌun ya alokꞌes tal a te jaꞌe, yuꞌun ben toyol te posoe. ¿Ba xba ata te kuxul jaꞌ te ya awaꞌbone?

San Juan 4:14

Pero te machꞌa ya yuchꞌ te jaꞌ ya kakꞌ joꞌone, sbajtel kꞌinal ma xtakej yoꞌtan yuꞌun. Porke te jaꞌ ya kakꞌ joꞌone jich ya xkꞌot tutꞌil lokꞌi-jaꞌ ta yoꞌtan te ya xkuxuyin sbajtel kꞌinal yuꞌune —xchi te Jesuse.

San Juan 4:29

—Laꞌik, laꞌ ila awilik, ay jtul winik te la yalbon spisil te tut ma tsaꞌamuk jpasoje. Naꞌtik me ma jaꞌuk te Cristoe —xchi.

San Juan 7:37

Jaꞌ ben tulan skꞌoplal yuꞌunik te último kꞌaal yuꞌun te kꞌine. Te kꞌaal abi, te Jesuse tekꞌa jajchel, y tulan a kꞌopoj. Jich a yal: —Teme ay machꞌa takin yoꞌtane, a me taluk ta jtojol, a me tal yuchꞌ te jaꞌe.

Romanos 3:24

Pero te Diose, ta slekil yoꞌtan y majtanil nax te la yakꞌotik ta libre yuꞌun te jmultike, ta skuenta te tojbilix jmultik yuꞌun te Cristo Jesuse.

1 Corintios 2:12

Y te joꞌotike ma jaꞌuk kichꞌojtik te spꞌijil te balmilale. Jaꞌ kikꞌojtik te Espíritu te tikonbil tal yuꞌun te Diose, yuꞌun jich me ya jnaꞌbeytik sluwar a te tutik yakꞌojbotik te Diose ta skuenta slekil yoꞌtan.

Apocalipsis 14:13

Jicha kaꞌiy jun xan kꞌop ta chꞌulchan te jich a yalbone: —Tsꞌibaya ta jun to: “Ben tsaꞌam slekil te ora to sok ta patil bael te machꞌatik ya xchamik ta skuenta te Kajwaltike —xchi. Sok la yal te Espiritue: —Ya me xkux yoꞌtanik yuꞌun te yaꞌtelike, sok ya me xꞌichꞌbot jkuenta yuꞌun te tut spasoje.

Apocalipsis 2:7

“Te machꞌa ay xchikine, a me yaꞌiy te tut ya yal te Espíritu ta stojol te juju-tijkꞌ hermanoetike. Te machꞌatik ya xjuꞌ yuꞌunik tsalawe, ya me kꞌabe sweꞌ te sit teꞌ yuꞌun te kuxuyinele te teꞌey ba ay te lekilal yuꞌun te Diose”, uta me —xchi.

Apocalipsis 21:2

La kil chꞌul mukꞌul jtejklum, jaꞌ te achꞌ Jerusalene, te yipal tal ta koel ta chꞌulchan ta stojol te Diose. Lek chapal jachik tutꞌil achꞌix te ya xnujpune.

Apocalipsis 21:6

Ta patil la yalbon: —Juꞌix ta pasel joꞌon te ayon ta slijkibale y sok ta slajibale. Te machꞌa takin yoꞌtane, ta majtanil ya me kaꞌbe yuchꞌ te lokꞌi-jaꞌ yuꞌun te kuxlejale.

Apocalipsis 21:9

Tal jtul ta sjuktulul te angeletike te yichꞌojik te jukeb basoetik te nojel ta jukkaj te último tulan wokoletike. Y la yalbon: —Laꞌ. Ya kakꞌ awil te achꞌix te ya xnujpun sok te Chin Karnerae —xchi.

Apocalipsis 22:1

Te ángele la yaꞌbon kil jun sakil ukꞌum, te jaꞌ yuꞌun kuxlajele. Ben klaro jachik tutꞌil espejo. Y teꞌ ya xlokꞌ tal ba ay te smukꞌul naktajib te Diose y sok te Chꞌin Karnerae,

Apocalipsis 22:16

La yal xan te Jesuse: —Joꞌon Jesuson te la jtikon tal te ángel kuꞌune yuꞌun ya yal ta jamal ta spisil to ta stojol te juju-tijkꞌ hermanoetike. Joꞌon slujp kꞌoemon te stsꞌumbal te jDavide. Joꞌon te ekꞌ te ya xojobin ta ben sabe —xchi.

Apocalipsis 7:17

Porke te Chꞌin Karnerae, te teꞌey ba yolil te mukꞌul naktajibale, ya skanantaylan jachik tutꞌil ya yichꞌ kanantayel te karneraetike. Y ya yikꞌtalan bael te ba lokꞌi-jaꞌ yuꞌun te kuxlejale. Y Dios ya skustalanbot yuꞌun spisil te yaꞌlel sitike —xchi.