2 Corintios 5:12 - Nuevo Testamento Tzeltal de Amatenango

¹² Ma yuꞌunuk ya xlijk kaltik xan te lek jkꞌoplaltik te joꞌotik mismoe. Jaꞌ nax ya kaꞌbetikex te tutꞌil ben bujtsꞌan kꞌinal ya awaꞌiyik ta jkuentatike, yuꞌun jich me ya xjuꞌ awuꞌunik sujtesel skꞌopik te machꞌatik ya stoy sbaik yuꞌun te tut yilel yutsilal ta kꞌinale, te ni maꞌyuk skꞌoplal yuꞌunik te tut yilel te yoꞌtanike.

Bible in Tzeltal Bachajón

¹² Ma yu'unuc ya calcotic xan lec jc'oblalcotic ta atojolic, ha ya jc'ancotic te tse'eluc awo'tanic ta jtojolcotic, scuenta yu'un hich me ya xweht bin yac awalbeyic a te mach'atic ya stoy sbahic yu'un te bin chican ta ilel, ma ha'uc bin yilel yo'tanic.

Bible in Tzeltal de Oxchuc y Tenejapa

¹² Ma yu'unuc ya xjajch' caltic xan te lec jc'oplaltique. Ja' nax ya jc'antic te ayuc bit'il toyol q'uinal ya awaiyic cu'untic, swenta yu'un ya me xju' awu'unic te ya asujt'esbeyic sc'opic te mach'atic cajal ya yac' sbaic yu'un te bi yilel yutsilalic ta q'uinale, soc te xujt' ma'yuc sc'oplal yu'unic stuquel te bi yilel te yo'tanique.

2 Corintios 5:12 ပူးပေါင်းရင်းမြစ်များ

2 Corintios 1:14

Jich tutꞌil ta ora to awaꞌiyejbeyikix sluware chꞌinuk te tut kaloje. Te kꞌalal ya xchaꞌtal te Kajwaltik Jesuse ben jun awoꞌtanik kuꞌuntik, yuꞌun jichotik euk ben jun koꞌtantik ya kaꞌi bajtik awuꞌunik.

2 Corintios 10:12

Ma yuꞌunuk jaꞌ ya jpaj jbatik sok te machꞌatik te stukel nax ya yakꞌ sba ta akꞌel ta jkuentae. Pero te stukelike maꞌyuk spꞌijilik. Stukel nax ya spaj sbaik, y ya spaj sba sok te yan xane.

2 Corintios 10:18

Porke ma jaꞌuk lek ya xꞌilot yuꞌun Dios te machꞌa stukel mismo lek skꞌoplal ya yal sbae. Yuꞌun jaꞌ lek skꞌoplal te machꞌa lek ya xꞌalbot skꞌoplal yuꞌun te Kajwaltike.

2 Corintios 10:7

Te jaꞌexe jaꞌ nax ayex ta yilel te tut chikan ta ilel ya awilike. Teme ay machꞌa ya yal “Jaꞌ yuꞌunon te Cristoe”, teme xchie, ya skꞌan ya snaꞌ te jich yuꞌunotik euk te Cristoe.

2 Corintios 10:8

Y aunke ya jtoy jba ta kꞌop chꞌinuk yuꞌun te tutꞌil ay kꞌatele, maꞌyuk tut ya xkꞌexawon yuꞌun. Yuꞌun jaꞌ a yaꞌbotik kaꞌteltik te Kajwaltike yuꞌun jich ya jpastik te ya xmukꞌubex ta stojol Dios y ma yuꞌunuk ya jimtikex.

2 Corintios 12:11

Jicha jpasix jich tutꞌil jtul jowiyel. Pero jaꞌex la asujikon ta spasel. Porke jaꞌex ya skꞌan la awalbikon lek jkꞌoplal. Aunke ma tuton a te joꞌone, maꞌyuk machꞌa pekꞌ ayon yuꞌun ke te mukꞌul apostoletik awuꞌunik te jaꞌ atsꞌakliyejike.

2 Corintios 3:1

Te kꞌalal ya kaltik to, ¿Me yuꞌun ya akuyik te ya xlijk kakꞌ jbajtik ta akꞌel ta jkuenta te joꞌotik mismo aye? ¿Me yuꞌun ay nesesidad te ya jkaꞌbeyex karta te ya yal te lek ya xꞌaꞌtejotik, jich tutꞌil ya spasik te yane? ¿O meꞌn ay nesesidad ya jkꞌanbeyex karta ta atojolik te jaꞌexe te ya yakꞌotik ta naꞌbeyel jbae?

2 Corintios 6:4

Yuꞌun ta skuenta spisil ya jpastike, ya kaꞌbetik yilik te joꞌotik yaj-aꞌtelotik te Diose. Jich jun koꞌtantik ya me xkujch kuꞌuntik te ilbajinele, sok te tutik ay maꞌyuk kuꞌuntike, sok spisil te jwokoltike,

Filipenses 1:26

Jich me ya xba joyinex xan ta yan buelta, skuenta yuꞌun jich ya me awalbey kola yal te Cristo Jesus ta jkuentae.