2 Corintios 3:14 - Nuevo Testamento Tzeltal de Amatenango

¹⁴ Pero te stukelike ni maꞌ kꞌot ta yoꞌtanik te jich aye. Y jich to ta ora to kꞌalal ya yilik te antibo tratee, ma xkꞌot ta yoꞌtanik a, jich tutꞌil makal to sitik yuꞌun te pakꞌe. Yuꞌun mato lokꞌemuk, porke jaꞌ nax ya xlokꞌ ta skuenta te Cristoe.

Bible in Tzeltal Bachajón

¹⁴ Pero mahc te spensaric, como c'alal ora yo'tic, te c'alal ya yilic te namey chapbil-c'op, ha nix hilem te pac' te mucul sit yelawic a, te ha ta scuenta Cristo ya yich' loq'uesel.

Bible in Tzeltal de Oxchuc y Tenejapa

¹⁴ Ja'uc me to, ma c'ot ta yo'tanic te bila la yilique. Ja' to c'alal ta ora to, te c'alal ya yilic te pocol tratoe, ja' nanix jich macal to sitic yu'un te paq'ue. Melel ja' nax ta swenta Cristo te ya xju' ya xloc' te paq'ue.

2 Corintios 3:14 ပူးပေါင်းရင်းမြစ်များ

Hechos 26:18

Yuꞌun ya xba awikꞌtalanbe sit, jich makꞌ xbeenikix ta ijkꞌal kꞌinal a, ta sakil kꞌinal xlaj beenix a. Yuꞌun ma sigueuk ya xjapuyot yuꞌun a te pukuje, jaꞌ ya xjapuyotix yuꞌun a te Diose. Yuꞌun teme la xchꞌuunikone, jich me ya staik perdon yuꞌun a te smulike. Sok ya me kakꞌ ayinuk te ba aylan te chꞌul jtejklum yuꞌun Diose”, xyuton te Jesuse.

Romanos 11:25

Kermanotak, ya jkꞌan te ya anaꞌik te tutꞌil ay te kꞌop to te ma akꞌot ta naꞌel ta nail toe, jaꞌ te tut snopoj ta yoꞌtan te Diose, skuenta yuꞌun makꞌ me ya atoy abaik a te tutꞌil ay apꞌijil ta akꞌopike. Te israeletike ay tulanejem yoꞌtanik olil, jaꞌ to teme tsꞌakay ta spisil te jich yipal ya xchꞌuunik Dios te machꞌatik ma stsꞌumbaluk Israele.

2 Corintios 4:6

Porke stukel mismo te Diose te la yakꞌ tal sakubuk kꞌinal te ba ay te ijkꞌal kꞌinale, jaꞌ nax te la yakꞌ sakubuk kꞌinal ta koꞌtantike yuꞌun ta skuenta jich ya xjuꞌ ya jnaꞌbetik sba a te stsaꞌamul Dios te ya xchiknaj ta sit-yelaw te Jesucristoe.

Hechos 16:14

Ay jtul ants te teꞌey ae, xLidia sbiil, te lijkem tal ta jtejklum Tiatirae. Jaꞌ yaꞌtelinej xchonel te ben tsaꞌam tsajal ijkꞌsukantik pakꞌ te ben toyol stojole. Te ants to ben lek xchꞌuunej te Diose, yipal ta yaꞌiyel te tut ya yal te jPabloe te nikbot yoꞌtan yuꞌun te Kajwaltike.

Hechos 13:15

Patil te la yichꞌix ilel a te sjunal te mantaletik yuꞌun te Diose sok te sjun alwanejetike, te stataletik yuꞌun te sinagogae la stikonik ta albeyel te jPablo sok te jBernabee: —Kermanotak, teme ay tut ya akꞌan ya awalik ta stojol te genteetik te ya awaꞌbe spuersa yoꞌtane, ya xjuꞌ xkꞌopojex —xchiik.

San Juan 12:46

Joꞌon te sakil kꞌinal te talemon ta balmilale. Te machꞌa ya xchꞌuuunone makꞌ xjilix ta ijkꞌal kꞌinal.

San Juan 12:40

“Dios a xchokutesbe sitik sok la stulantesbe yoꞌtanik, yuꞌun jich ma xyilik a, ni ma xyaꞌibe sluwar a te tut ya xꞌaltalanbote. Jich ma sujtes yoꞌtanik ta jtojol, y te joꞌone makꞌ jlekutes”, xchi me.

San Juan 8:12

Te Jesuse chaꞌsujt xan bael te ba ay te gentee. Jich a yal: —Joꞌon sakil kꞌinalon yuꞌun te genteetik ta balmilale. Te machꞌa ya stsꞌakliyone yichꞌojix te sakil kꞌinal te ya yakꞌ kuxlejale, y ni makꞌ xbeenix ta ijkꞌal kꞌinal —xchi te Jesuse.

San Mateo 16:17

La yal te Jesuse: —Ben me tsaꞌam alekil jaꞌat Simon te xnichꞌanat te Jonase. Porke ni jtuluk winik te la yaꞌbeyat anaꞌbe sluwar. Jaꞌ a yaꞌbeyat anaꞌ sluwar te jTat te ay ta chꞌulchane.

San Mateo 13:11

Te Jesuse la yaltalanbe: —Te jaꞌexe Dios me ya yaꞌbeyex anaꞌik sluwar te tutꞌil ay ta ajwalinel te Diose, te maꞌyuk ta naꞌel ta nail toe. Yan te yanetike ma xꞌaꞌbot snaꞌbeyik sluwaril stukel.

San Mateo 6:23

Yan teme ma tsaꞌamuk te asite, skojtol te atiꞌbalule ay ta ijkꞌal kꞌinal. Teme ya akuyik ta sakil kꞌinal te ijkꞌal kꞌinale, jmel ayex ta ijkꞌal kꞌinal abi.

2 Corintios 3:6

yuꞌun stukel snojpesejotik yuꞌun te ya xtuunotik yuꞌun te achꞌ tratee. Jaꞌ trate to ma tsꞌibabiluk ta letra, jaꞌ nax ta Espíritu. Te mantal tsꞌibabile ya xꞌakꞌawan bael ta lajel. Pero te Espíritu yuꞌun Diose ya yakꞌ kuxlejal.

Hechos 15:21

Porke nameyix ta jujun jtejklum te ya xꞌalot te mantaliletik yuꞌun te jMoisese, y ya yichꞌ kꞌoponel sjunal ta sinagogaetik ta jujun skꞌaalel te kuxo-oꞌtane —xchi te Jacobe.

2 Corintios 3:15

Asta ora to kꞌalal ya yilik te junetik yuꞌun jMoisese, yuꞌun makal to ta pakꞌ kꞌoem te yoꞌtanike.

Efesios 4:18

sok te ijkꞌuben ay te yoꞌtanike. Te stukelike makꞌ skꞌupinik te xkuxlejalik te ya xtal ta stojol te Diose. Porke yuꞌun ma snaꞌik kꞌinal ta skaj te stulanil yoꞌtanike.