2 Gawˇliˬtu 4:4 - Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

⁴ Maqjan-eu tsawrhaq-anr Miqyaer-euq shaevdzeuf pyeuf-eu Kali-euq yawshaef khanqsaer byadov lef-eu guiqlanqdawq, maqbi bya’naeq-eu gharduq, heuzir-euq miqyaer, aqyawf maf-euq nuima-euq myavnuiv bibaef-ir taq-euq mae.

Akha

⁴ Miˇ tsaˬ heu-ahˇ uˆ lahˇ luꞈ-eu miˬyehˇ pyeuꞈ-eu nehꞈ Saˬdaˬ neh aˬ yawꞈ maꞈ-euˬ nui ma-ahˇ yaw zahˇ laꞈ kʼoeˇ piˬ lahˇ taˬ-euˬ miˇ neh, aˬ yawꞈ maꞈ maˬ jah-a. Kʼoeˇ miˇ neh, Miˬyehˇ-ahˇ duˇ duˇ dehꞈ dehꞈ pyeuꞈ-eu Ka li-euˬ gaˇ kawˆ Laˬ kʼaˬ cehˇ-eu Guiˬ lahˬ dawˬ-euˬ yaw shehꞈ kʼahˬ sehˇ aˬ yawꞈ maꞈ kʼoeˇ taˆ bya luꞈ gaˇ aˬ yawꞈ maꞈ maˬ mawˇ nya-a.

2 Gawˇliˬtu 4:4 ပူးပေါင်းရင်းမြစ်များ

Jaceuq 50:2

Hawmuiq duidui-eu Ziroq-anr nae, Miqyaer, yawshaef byadovlef taef-a.

Maꞈtehˬ 13:22

Aqgan daefmyaq-eu tsanr-anr ga-ir-euq deuq-aq, tsawrhaq tiq ghaq, Miqyaer-euq dawq yagaq-euq khawf, mirtsaq-euq khoertav jawr ngae, khanqlanr-eu jeq hawr-eu pyurshuir myawqganq-euq jaqmyawf maershuir nae, dawq khoerdeuq-anr uvtaeq taq-euq mirnae, arsiq maq siqle nya-eu gar aer-eu mae.

Yoˇhaˬ 1:14

Dawq khoer-aq, shiqshaq pi-awr aqdui naeq-aer jawrle-euq mae. Aqyawf-euq yawshaef khanqsaer-anr aqdui ya’mawr-euq ma. Yawshaef khanqsaer khoer-aq, Aqda-euq Zaqyo tiq ghaq taef-euq yawshaef khanqsaer mae. Zaqyo heughaq-aq, guiqlanq yawdzanr hawr-eu yawtsaq yawdawr jeq byan-eu mae.

Yoˇhaˬ 1:18

Tsawrhaq tiqghaq-iq tiqjawr-iq Miqyaer-anr maq mawrhaw-aq. Aqda-euq bawkhanr-euq lafkhoer jawr-eu Zaqyo tiq ghaq taef nae, Miqyaer-euq garkawv tsafgaq le-euq mae.

Yoˇhaˬ 12:31

Nymq-mr mirtsaq heu-anr yarkhaq dar-eu aryamq tsaqlar-euq mae. Nymq-mr mirtsaq heu-anr uvlanr luf-eu ghaq yabi taedov taef-a.

Yoˇhaˬ 12:35

Yeqsur, aqyawf maf-anr heulof-aer aernaeq-euq mae, “Nawmaf jawr-eu gar yawshaef tiqkhaeq bya-a siq. Yawzanr nawmaf-anr maqbi taemini, yawshaef bya ngae can-awq. Yawzanr-euq lafkhoer can-eu tsawrhaq-aq, aqyawf aqgeugar irluf-eu le laer maq siqnya-a.

Yoˇhaˬ 12:40

“Aqyawfmaf, myavnuiv maqya mawr-aer, Nuima-euq lafkhoer maqya ghovshaw-eu uqtaf, nuima maqya parlar-aer, Ngar, aqyawf maf-anr ya lavtaqni, Miqyaer, aqyawf maf-euq myavnuiv bibaef-ir-awr, aqyawf maf-euq nuima bighanr lar-euq mae.” (Isy 6:10)

Yoˇhaˬ 12:45

Ngaq-anr mawr-euq tsawrhaq-aq, ngaq-anr khaerghae lef-euq ghaq-anr mawr-euq mae.

Yoˇhaˬ 14:30

Aqkar nar-aq, ngar, nawmaf naeq-aer dawq ghawqmya’ni maqpar ngaeq ma. Aqjeq mirnae aernar-aq, mirtsaq heu-anr uvlanr luf-eu ghaq larluf-eu mae. Aqyawf, ngaq-euq khoertav baoq tiqpawf-iq maqjav-a.

Yoˇhaˬ 15:24

Tsawrhaq tiqghaq nae-iq maq mrhaw-euq gardeuq, ngar, aqyawf maf-euq ghanrcae maqmr-euq lawnmr-aq, aqyawfmaf iqbax maqanr-ar. Aerkhawf, nymq-mr aqyawfmaf gar khoerdeuq-anr ya’mawr-awr, ngaq-anr khawf, ngaqDa-anr khawf byae-eu mae.

Yoˇhaˬ 16:11

Yarkhaq dar-eu-aq, mirtsaq heu-anr uvlanr-eu ghaq-aq, yarkhaq bi dartsaev ghaq-euq mirnae mae.

Yoˇhaˬ 8:12

Yeqsur, aqyawf maf-anr tiq pov par aernaeq-eu, “Ngar-aq, mirtsaq-euq yawshaef ma. Ngaq-euq maeqnan cantae-eu tsawrhaq-aq, yawzanr-euq lafkhoer maqpar can-aer, daef-eu jeq bif-eu yawshaef za taef-a.”

Gʼaˬkʼehˇ 26:18

Aqyawf maf-euq myavnuiv pannaeq-awr, yawzanr-euq lafkhoer nae yawshaef jav-eu gar bilar-awr, naef Saqdaq-euq baoq-euq uqmov jawr-eu gar nae Miqyaer jawr-eu paw bi ghoflar-eu uqtaf, ngaq-anr jan-eu baqda’nae, Miqyaer, aqyawf maf-euq iqbax pyaeqnaeq-awr, muiqlar shawrlar-euq tsawrhaq naeq-aer jeqbir za’ni, ngar, nawq-anr aqyawfmaf jawr-eu gar bi’ir-eu ma.’ ”

Gʼaˬkʼehˇ 26:23

Kali-aq, yashaq yazanq-awr, shir-euq gar nae ghofdaef baebae lar-euq ghaq pyeuf-awr, Yurdav tsawrhaq hawr-eu aqcawq tsawrjeuq tsawrca-anr yawshaef-euq garkawv dzawrnaeq taef-a.”

1 Gawˇliˬtu 10:20

Ngar aermawf-eu-aq, aqcawq tsawrjeuq tsawrca deuq lawrnaeq-euq khoer-aq, Miqyaer-anr lawrnaeq-euq maqngeur-a, naef-anr lawrnaeq-euq mae. Ngar, nawmaf-anr naef naeq-aer cawq maqbi cawqtafmawf nya.

2 Gawˇliˬtu 2:11

Maqngeur nar-aq, naef Saqdaq heulof-aer ghae-eu yamq-anr zmq-awr, aqdui-anr ghaqlar nya-eu baw-mr. Aqjeq mirnae aernar-aq, aqdui, aqyawf-euq bawqtov-anr maq siqnya-eu maqngeur.

2 Gawˇliˬtu 2:12

Kali-euq guiqlanqdawq maeq-eu laer ngar, Daqlor-anr larkeuv ngae, Sanqpaq Miqyaer, ngaq-euq gharduq larghov pannaeq laf-euq mae.

2 Gawˇliˬtu 3:11

Byov-ir luf-eu jeq khawf yawshaef khanqsaer jav-eu ngeur nar-aq, gmq-eu jeq-aq, khoernav maqtser yawshaef khanqsaer javdzaeq-eu mae.

2 Gawˇliˬtu 3:14

Aqyawf maf-euq nuima-euq myavnuiv-aq, baef-ir taq-euq mae. Iqnan keuvni dawqma sarjax yawoer-anr gui ngae, daeqkaq taq-euq saqpar khoer maq yurdzae-aq siq. Aerkhawf, Kali-euq lafkhoer saqpar khoer yurdzae-euq mae.

2 Gawˇliˬtu 3:18

Aqdui yawqghaq navluf-euq myavpyawq-anr saqpar maq daeqkaqni, pyawqhaw-anr hawluf-eu lof-aer, Sanqpaq Miqyaer-euq yawshaef khanqsaer-anr hawluf-eu ma. Aqdui, Sanqpaq Miqyaer-euq shaevdzeuf-anr durlarni, Sanqpaq Miqyaer-euq Saflar-euq baqda’nae, yawshaef khanqsaer tiqtiv sair tiqtiv javdzaeqlar luf-eu ma.

2 Gawˇliˬtu 4:6

Yawzanr-anr nae yawshaef byadov larni dawq bif-euq Miqyaer-aq, aqdui-euq nuima-anr yawshaef bi byalar naeqlaf-euq mae. Heu-aq, Yeqsur Kali-euq myavpyawq-anr nae byadov lef-eu, Miqyaer-euq yawshaef khanqsaer-anr siqnya-eu tsawrganr biza-eu gharduq mae.

Gaˬlaˬtiˆ 1:4

Zawr doer-eu heuzir-anr aqdui yabuq-ir ni, Kali-aq, aqdui-euq Aqda Miqyaer nuima tsaq-eu lof-aer, aqdui-euq iqbax-euq gharduq aqyawf-euq mawrdo lawrnaeq-euq mae.

Eˇpeˇsu 2:2

Khoerngae, nawmaf-aq, mirtsaq heu-anr taf-eu canjeq cankawv-euq lafkhoer daef-awr, mq-anr aryaq jav-eu mqsanr-euq maeqnan can-euq mae. Nymq-mr uvlanr-eu saflar heu, maq narhaq geuf-eu tsawrhaq-euq lafkhoer gar mrluf-eu mae.

Eˇpeˇsu 6:12

Aqjeq mirnae aernar-aq, aqdui guirdeuv deuv-eu-aq, shiq hawr-eu shaqjir-anr deuvluf-eu maqngeur. Aqdui heudeuq-anr deuvluf-eu ma, mqsanr deuq, aryaq deuq, mirtsaq yawzanr-euq khoertav baoq jav-eu deuq hawr-eu, mq-anr jawr-eu yawcawv-euq saflar deuq-anr deuvluf-eu ma.

Piˇliˇpiˆ 2:6

Aqyawf, Miqyaer pyeuf-eu khawf, Miqyaer lof-aer pyeuf-awr di-eu jeq-anr ya nyaeftaeq taq-eu mae laer maqnoeq-aq.

Gawˇlawˇsehˇ 1:15

Kali-aq, maq mawrlar-eu Miqyaer-euq shaevdzeuf pyeuf-awr, baetaq-euq yawqjeq navluf-euq khoertav huqbaw zaqyo ghaq pyeuf-eu mae.

Gawˇlawˇsehˇ 1:27

Zaftaq-euq heujeq, yawshaef khanqsaer arnavni sanr-eu garkawv, Miqyaer, aqcawq tsawrjeuq tsawrca-euq ghanrcae jawr-eu aqyawf maf-anr bi siqnya mawf-eu mae. Zaftaq-euq jeq heu-aq, Kali, nawmaf-euq lafkhoer jawr-eu mirnae, nawmaf, yawshaef khanqsaer za’ni noeqtmqduq pyeuf-eu mae.

1 Tiˆmoˇseˬ 1:11

Tsaq-awr tsanr-eu jan-eu jeq khoer-aq, ngaq-anr a’naeq laf-euq guiqlanq byan-eu Miqyaer-euq yawshaef khanqsaer huiq-eu guiqlanq dawq-anr tsaqler-eu mae.

Tiˇtuˆ 2:13

Aqdui-euq huiqdui manr duidui-eu Miqyaer pyeuf-eu, Kakhof-eu ghaq Yeqsur Kali-euq yawshaef khanqsaer dovle-eu gar, aqdui laqkhaq caertavni noeqtmq luf-eu ma.

HeˬByehˇ 1:3

Aqyawf-aq, Miqyaer-euq yawshaef khanqsaer-euq yawshaef pyeuf-awr, Miqyaer-euq shaevdzeuf byan-eu ghaq pyeuf-eu mae. Aqyawf, aqyawf-euq baoq anr-eu dawq-anr ghoe-awr, dawqtawv luf-anr hawlanr lavsav luf-eu mae. Aqyawf, aqyawf-euq mawrdo nae aqdui-euq iqbax-anr tsiqshawr ghaq-awr, yawgor-anr khanqsaer huiq-eu Ghaq-euq armar paw nuirluf-eu mae.

HeˬByehˇ 6:4

Aqjeq mirnae aernar-aq, yawshaef-anr mawrhaw-awr, mq-euq khoertav-euq lafsawq-anr myeufhaw-euq uqtaf, aqcawq lof-aer Yawshawr Saflar za-awr,

2 Beˬtuˆluˆ 1:19

Khoermirnae, aqdui yawduq baw-eu, Miqyaer gharduq ngaeqdan-eu dawq jav-eu ma. Nawmaf dawq khoer-anr narhaqgeuf nar-aq yawmuiq mae. Khoer-aq, nawmaf-euq nuima-euq lafkhoer, uqbya byalar-awr, shawqmuir dovlar ngae keuvni, yawzanr-euq lafkhoer byaluf-eu yawshaef-anr nawmaf ghoe-eu lof-aer dur-eu mae.

1 Yoˇhaˬ 2:11

Aerkhawf, yawqha-euq maernmr-anr byae-eu tsawrhaq-aq, yawzanr-euq lafkhoer jawr-awr, yawzanr-euq lafkhoer canluf-eu mae. Yawzanr khoer aqyawf-anr myavbaef bibaef-ir-euq mirnae, aqyawf aqgar irluf-eu le laer maq siqnya-a.

1 Yoˇhaˬ 2:8

Aerkhawf, khaerdawq yawshuif laer aernya-eu tiq dawq ngar, nawmaf-anr bofanr lef-eu ma. Dawq khoerdawq tsaq-awr dawr-eu-aq, Kali-euq lafkhoer hawr-eu nawmaf-euq lafkhoer mawrlar-eu mae. Aqjeq mirnae aernar-aq, yawzanr byov-ir luf-awr, nymq-mr marjawvni ghae-eu yawshaef byadovlar luf-eu mae.

1 Yoˇhaˬ 5:19

Aqdui-aq, Miqyaer-euq zaqdeuq pyeuf-awr, mirtsaqzaq dawqtawvluf yawcawv khoerghaq uvlanr-eu uqmov jawrluf-eu mae laer siqnya ma.