Yoˇhaˬ 8:29 - Akha

²⁹ Ngaˬ-ahˇ kʼehˇ gʼeh leꞈ-euˬ gʼaˬ ngaˬ nehˬ-ehˇ jawˇ ma. Aˬ yawꞈ ngaˬ-ahˇ maˬ byehˇ dzeh nehˬ laꞈ-a. A jeˬ miˇ neh ehˇ naˇ, aˬ myah luꞈ aˬ yawꞈ nui ma tsaˬ-eu jeˬ tehꞈ-ehˇ ngaˇ mˇ-eu ma.”

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

²⁹ “Ngaq-anr khaerghae lef-euq ghaq, ngaq naeq-aer jawrluf-eu mae. Aqda Miqyaer, ngaq-anr byaerdzae-awr, ngar tiq ghaq taef-aer maqbi jawrnaeq laf-a. Aqjeq mirnae aernar-aq, ngar aqmyanluf aqyawf nuima tsaq-eu heudeuq mrluf-eu ma.”

Yoˇhaˬ 8:29 ပူးပေါင်းရင်းမြစ်များ

Iˇsaˬyaˇ 42:1

Sahˬpaˬ Miˬyehˇ ehˇ-eu, “Heu-aˬ, ngaˬ-euˬ zaˬ kʼaˆ ma. Ngaˇ hehˇ tehˇ nehˬ luꞈ-eu gʼaˬ ma. Aˬ yawꞈ-ahˇ ngaˇ tseˇ doˆ-awˇ, nui kʼahˇ shiˇ luꞈ-eu gʼaˬ ma. Aˬ yawꞈ kʼoeˇ taˆ ngaˬ-euˬ Yaw sahˇ jawˇ-awˇ, tsawˇ jeuˬ yawˬ jeuˬ na luꞈ kʼoeˇ taˆ, yaw tsaˬ yaw dawˇ jeˬ aˬ yawꞈ bi keuˆ le tehꞈ-a.

Iˇsaˬyaˇ 42:21

Sahˬpaˬ Miˬyehˇ ka kʼoꞈ-eu nui ma keuˆ-eu miˇ neh, aˬ yawꞈ-euˬ zahˇ dawˬ kʼoꞈ dawˬ deuˬ-ahˇ bi goˇ-awˇ, aˬ yawꞈ-euˬ tsawˇ haˬ deuˬ zahˇ dawˬ kʼoꞈ dawˬ-ahˇ taˬ huiˬ gaˇ, aˬ yawꞈ haw mawꞈ mawˇ mawꞈ-eu meh.

Iˇsaˬyaˇ 42:6

“Sahˬpaˬ Miˬyehˇ pyeuꞈ-eu ngaˇ nawˬ-ahˇ kuˇ-awˇ, miˇ tsaˬ kʼoeˇ taˆ yaw tsaˬ yaw dawˇ jeˬ jaˆ laˇ ni, nawˬ-ahˇ baoˬ biꞈ taˬ gʼaˬ-euˬ ma. Nawˬ-ahˇ gʼoe-eu laꞈ kʼoeˇ tsawˇ jeuˬ dawˬ tawˆ luꞈ-ahˇ, ngaˇ saˇ jaˇ dzaˬ taꞈ ma. Nawˬ-ahˇ gʼoe-awˇ tsawˇ jeuˬ dawˬ tawˆ luꞈ-euˬ kʼoeˇ taˆ, ngaˇ yaw shehꞈ bi bya ma.

Maꞈtehˬ 17:5

Beˬtuˆluˆ kʼoeˇ loꞈ-ehˇ ehˇ luꞈ ngeh, yaw shehꞈ bya-eu mˬ dmˇ aˬ yawꞈ maꞈ kʼoeˇ taˆ zaꞈ le-awˇ, “Heu-aˬ, ngaˇ gaˬ dui dui-awˇ nui kʼahˇ shiˇ dui dui-eu ngaˬ-euˬ zaˬ maˇ ma. Aˬ yawꞈ-euˬ dawˬ-ahˇ naˇ haˬ geuꞈ-awˬ” lehˇ, mˬ dmˇ laꞈ kʼoeˇ dawˬ ngehˬ doˆ laˇ-euˬ meh.

Maꞈtehˬ 3:15

Ehˇ kʼawꞈ, Yeˬsuˇ ehˇ-eu, “Miˬyehˇ-euˬ nui kʼahˇ byah laˇ ni, nymˬ-mˇ aˇ nyaꞈ heu loꞈ-ehˇ ya mˇ meh.” Kʼoeˇ ngeh, Yeˬsuˇ-ahˇ iˇ cuꞈ shawˇ nehˬ-eu gʼaˇ duˬ Yoˇhaˬ nui ma tsaˬ-euˬ meh.

Maꞈtehˬ 3:17

“Heu-aˬ, ngaˇ gaˬ dui dui-awˇ nui kʼahˇ shiˇ dui dui-eu ngaˬ-euˬ Zaˬmaˇ ma” lehˇ ehˇ-eu teˇ saˇ, mˬ-ahˇ neh gaˬ doˆ le-euˬ meh.

Yoˇhaˬ 14:31

Ehˇ kʼawꞈ, ngaˇ Aˬda-ahˇ gaˬ-eu gaˇ kawˆ siˬ nya-eu tsaˬ meh. Kʼoeˇ miˇ neh, aˬ yawꞈ neh ngaˬ-ahˇ dawˬ kʼaˇ biꞈ taˬ-euˬ yawˬ jeˬ na luꞈ ngaˇ mˇ-eu ma. “Zoˬ-awˬ. Jawˇ duˬ heu tsahˇ-ahˇ neh aˬ dui maꞈ doˆ-iˇ kaˇ-euˇ.”

Yoˇhaˬ 15:10

Ngaˬ Da-euˬ dawˬ-ahˇ ngaˇ naˇ haˬ geuꞈ-awˇ, ngaˬ Da-euˬ gʼoeˇ-eu gaˬ-eu jeˬ laꞈ kʼoeˇ ngaˇ jawˇ-eu loꞈ-ehˇ, naw maꞈ ngaˬ-euˬ dawˬ-ahˇ naˇ haˬ geuꞈ naˇ, ngaˬ-euˬ gʼoeˇ-eu gaˬ-eu jeˬ laꞈ kʼoeˇ naw maꞈ jawˇ tehꞈ-a.

Yoˇhaˬ 16:32

Naw maꞈ dawˬ tawˆ luꞈ bi teh byaˆ jiˇ-awˇ, yawˬ ha-euˬ nymˇ-ahˇ yawˬ ha cehˆ gʼoꞈ jiˇ-awˇ, ngaˬ-ahˇ tehꞈ-ehˇ byehˇ dzeh yaꞈ-eu aˇ yamˬ keuˆ le luꞈ meh. Aˇ yamˬ kʼoeˇ aˬ diˇ keuˆ le taˬ-euˬ meh. Ehˇ kʼawꞈ, ngaˇ-aˬ, tiˬ gʼaˬ tehꞈ maˬ ngeuˇ. Aˬ jeˬ miˇ neh ehˇ naˇ, Aˬda ngaˬ nehˬ-ehˇ jawˇ ma.

Yoˇhaˬ 17:4

Miˇ tsaˬ kʼoeˇ taˆ nawˬ-euˬ yaw shehꞈ kʼahˬ sehˇ ngaˇ bi mawˇ gʼaˬ-euˬ ma. Nawˬ neh bi mˇ laꞈ-euˬ gaˇ-ahˇ ngaˇ mˇ luiˆ gʼaˬ-euˬ ma.

Yoˇhaˬ 4:34

Yeˬsuˇ aˬ yawꞈ maꞈ-ahˇ ehˇ nehˬ-eu, “Ngaˬ-euˬ dzaˇ-aˬ, ngaˬ-ahˇ kʼehˇ gʼeh leꞈ-euˬ gʼaˬ-euˬ ehˇ dawˬ naˇ haˬ-awˇ aˬ yawꞈ neh bi mˇ laꞈ-euˬ gaˇ-ahˇ mˇ jiˇ-eu jeˬ pyeuꞈ-eu ma.

Yoˇhaˬ 5:30

“Ngaˬ-euˬ baoˬ-ahˇ ngaˇ gʼoe-awˇ yawˬ haˇ yawˬ ha tiˬ jeˬ-iˬ maˬ mˇ nya-a. Miˬyehˇ ngaˬ-ahˇ ehˇ nehˬ laꞈ-euˬ loꞈ-ehˇ ngaˇ yaˇ kʼaˬ daˇ-eu ma. Kʼoeˇ miˇ neh, ngaˬ neh yaˇ kʼaˬ daˇ-euˬ-aˬ, tsaˬ-eu dawˇ-eu meh. Aˬ jeˬ miˇ neh ehˇ naˇ, ngaˬ-euˬ nui kʼahˇ ngaˇ maˬ mˇ-ehˇ, ngaˬ-ahˇ kʼehˇ gʼeh leꞈ-euˬ gʼaˬ-euˬ nui kʼahˇ mˇ-eu ma.

Yoˇhaˬ 6:38

Aˬ jeˬ miˇ neh ehˇ naˇ, ngaˇ mˬ kʼoeˇ taˆ neh oe-euˬ-aˬ, ngaˬ-euˬ nui kʼahˇ mˇ le-euˬ maˬ ngeuˇ. Ngaˬ-ahˇ kʼehˇ gʼeh leꞈ-euˬ gʼaˬ-euˬ nui kʼahˇ mˇ le-euˬ ma.

Yoˇhaˬ 8:16

Ehˇ law hawˇ kʼawꞈ, ngaˇ aˬ cawˬ-ahˇ yaw lehˬ nga lehˇ daˇ naˇ, ngaˬ neh daˇ-euˬ kʼoeˇ tsaˬ ma. Aˬ jeˬ miˇ neh ehˇ naˇ, ngaˇ tiˬ gʼaˬ tehꞈ-ehˇ kʼoeˇ loꞈ-ehˇ daˇ-eu maˬ ngeuˇ. Ngaˬ-ahˇ kʼehˇ gʼeh leꞈ-euˬ Aˬda ngaˬ nehˬ-ehˇ jawˇ ma.

2 Tiˆmoˇseˬ 4:17

Ehˇ kʼawꞈ, Sahˬpaˬ Yeˬsuˇ ngaˬ nehˬ-ehˇ jawˇ-awˇ, ngaˬ-ahˇ gʼaˬ biꞈ nehˬ laꞈ-euˬ meh. Kʼoeˇ miˇ neh, Yuˇdaˆ tsawˇ haˬ maˬ ngeuˇ-eu deuˬ-ahˇ Miˬyehˇ dawˬ kawˬ nui kʼahˇ tiˬ shiˇ ya mehˬ yaꞈ-euˬ ma. Kʼoeˇ uˬ taꞈ, ngaˬ-ahˇ sehꞈ-eu gʼaˇ duˬ yaˇ kʼaˬ maˬ daˇ nehˬ laꞈ ni nya dzeuˇ-iˇ-euˬ ma.

2 Tiˆmoˇseˬ 4:22

Nawˬ-euˬ nui ma laꞈ kʼoeˇ Sahˬpaˬ Yeˬsuˇ jawˇ luꞈ-uˇ. Miˬyehˇ-euˬ guiˬ lahˬ yaw dzahˇ naw maꞈ dawˬ tawˆ luꞈ kʼoeˇ taˆ jaˆ luꞈ-uˇ.

HeˬByehˇ 4:15

Aˬ dui-euˬ Piˇma Yaw huiˬ gʼaˬ-aˬ, aˬ dui-euˬ gʼaˬ baˬ duˬ-ahˇ gʼawˬ shaˬ gaˬ-eu maˬ siˬ nya-eu gʼaˬ maˬ ngeuˇ-a. Aˬ dui loꞈ-ehˇ muˇ juˇ juˇ-eu yawˬ jeˬ na luꞈ-ahˇ ya daˬ haw-euˬ Piˇma Yaw huiˬ tiˬ gʼaˬ aˬ dui jawˇ-eu ma. Ehˇ kʼawꞈ, aˬ yawꞈ iˬ baˇ maˬ mˇ haw-aˬ.

HeˬByehˇ 7:26

Kʼoeˇ baˬ da neh, Yeˬsuˇ-aˬ, aˬ dui kʼaˇ loˬ-eu jeˬ mˇ byah nehˬ nya-eu Piˇma Yaw huiˬ gʼaˬ pyeuꞈ-eu meh. Aˬ yawꞈ-aˬ, yaw muiˬ yaw shawˇ meh. Ehˇ kʼaˇ tiˬ pawꞈ-iˬ maˬ za-eu uˬ taꞈ, iˬ baˇ tiˬ pawꞈ-iˬ maˬ ahˇ-a. Iˬ baˇ zaˬ deuˬ nehˬ-ehˇ maˬ bi keuˬ ni aˬ yawꞈ-ahˇ Miˬyehˇ yuˇ doˆ taˬ-awˇ, mˬ naˆ maˬ tseˇ goˇ-eu tiˆ-ahˇ ciˬ huiˬ ciˬ mahˇ keuˆ nehˬ-euˬ meh.

1 Yoˇhaˬ 2:1

Ngaˇ gaˬ dui dui-eu zaˬ deuˬ-oˇ, naw maꞈ iˬ baˇ maˬ bi mˇ-eu gʼaˇ duˬ, gaˇ kawˆ heu deuˬ naw maꞈ jawˇ gaˇ ngaˇ boꞈ ahˇ laꞈ-eu jeˬ pyeuꞈ-eu ma. Ehˇ kʼawꞈ, tsawˇ haˬ tiˬ gʼaˬ na iˬ baˇ mˇ lawˬ naˇ, aˬ dui-euˬ dah zaˇ Aˬda Miˬyehˇ-ahˇ tahˬ shaˇ leˇ-eu gʼaˬ jawˇ ma. Kʼoeˇ-aˬ, yaw tsaˬ yaw dawˇ tsawˇ haˬ pyeuꞈ-eu Yeˬsuˇ Ka li meh.

1 Yoˇhaˬ 3:22

Aˬ yawꞈ-euˬ dawˬ-ahˇ aˬ dui naˇ haꞈ geuꞈ-awˇ, aˬ yawꞈ nui kʼahˇ shiˇ-eu jeˬ aˬ dui mˇ-eu miˇ neh, aˬ yawꞈ-ahˇ kʼaˇ shaˇ-eu jeˬ aˬ dui za-eu ma.