Yoˇhaˬ 6:37 - Akha

³⁷ Ngaˬ Da neh ngaˬ-ahˇ kʼaˇ biꞈ laꞈ-euˬ tsawˇ haˬ yawˬ gʼaˬ yawˬ na luꞈ ngaˇ jawˇ gaˇ laˇ tehꞈ-a. Ngaˇ jawˇ gaˇ laˇ-eu tsawˇ haˬ aˬ geu gʼaˬ-ahˇ maˬ kaˬ, ngaˇ maˬ ha geuꞈ nehˬ ni maˬ byehˇ.

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

³⁷ Aqda Miqyaer nae ngaq-anr kharbif-euq tsawrhaq dawqtawvluf ngar jawr-eu gar lar taef-a. Ngar jawr-eu gar kharlar-eu tsawrhaq-anr ngar tiqjeq ghaenae-iq maq taedzae.

Yoˇhaˬ 6:37 ပူးပေါင်းရင်းမြစ်များ

Jaceuq 102:17

Byehˇ dzeh taˬ-euˬ aˬ yawꞈ-euˬ tsawˇ jeuˬ shaˇ dawˬ-awˇ, aˬ yawꞈ naˇ haˬ geuꞈ nehˬ tehꞈ-a.

Jaceuq 110:3

Muiˇ-eu deuˬ-ahˇ nawˇ guiˇ deuˆ-eu aˇ nah keuˆ laˇ ngeh, nawˬ-euˬ tsawˇ haˬ deuˬ nui ma keuˆ-awˇ caw ba tehꞈ-a. Uˬ shawˬ yaw naꞈ-ehˇ ga-eu ceuˬ loꞈ-ehˇ, muiˬ-eu shawˇ-eu gawˬ jawˬ kʼoeˇ taˆ, nawˬ-euˬ zaˬ guˬ deuˬ nawˇ jawˇ gaˇ laˇ tehꞈ-a.

Iˇsaˬyaˇ 41:9

Mˬ dzeˇ miˇ dzeˇ-ahˇ neh nawˬ-ahˇ ngaˇ sheuˬ doˆ-awˇ, gaˇ mahˇ kaˬ-eu miˇ ma laꞈ coeˇ-ahˇ neh kuˇ doˆ laꞈ-awˇ, nawˇ ngaˬ-euˬ zaˬ kʼaˆ ma lehˇ ehˇ-euˬ ma. Nawˬ-ahˇ ngaˇ maˬ byehˇ dzeh byoˆ-euˬ uˬ taꞈ, tseˇ doˆ geuꞈ taˬ-euˬ ma.

Iˇsaˬyaˇ 42:3

Daˇ gʼahˬ taˬ-euˬ aˇ toꞈ aˇ kahˬ aˬ yawꞈ maꞈ ngawˬ kʼehꞈ-ehˇ, miˆ-iˇ luꞈ-eu tsiˇ kʼmˬ aˬ yawꞈ maˬ baw miˆ ni, dawˬ tawˆ kʼoeˇ taˆ yaw tsaˬ yaw dawˇ jeˬ bi keuˆ le-eu meh.

Iˇsaˬyaˇ 55:7

Haiˬ-euˬ tsawˇ haˬ deuˬ dehꞈ jeˬ dehꞈ kawˆ bi paˇ-awˇ, nui noeˬ bi paˇ laˇ-awˬ. Aˬ yawꞈ maꞈ-ahˇ Sahˬpaˬ Miˬyehˇ jawˇ paw bi gʼoꞈ laˇ-awˇ, gʼawˬ shaˬ bi haw gaˬ-awˬ. Aˬ yawꞈ maꞈ Miˬyehˇ jawˇ paw gʼoꞈ laˇ ngeh, iˬ baˇ dawˬ tawˆ luꞈ-ahˇ pyehˬ nehˬ tehꞈ-a.

Maꞈtehˬ 11:28

“Kʼaˆ behˆ yaw kah pi-awˇ gʼaˬ doeˇ doeˇ-eu tsawˇ haˬ dawˬ tawˆ luꞈ ngaˇ jawˇ gaˇ laˇ-awˬ. Ngaˇ naw maꞈ-ahˇ gʼaˬ naˬ bi naˬ ma.

Maꞈtehˬ 24:24

Aˬ jeˬ miˇ neh ehˇ naˇ, Ka li jaˬ myawꞈ deuˬ hawˇ-eu, Miˬyehˇ gʼaˇ duˬ ngehˬ dah-eu jaˬ myawꞈ deuˬ doˆ le tehꞈ-a. Aˬ yawꞈ maꞈ zahˬ dui dui leˇ paˬ-ehˇ gʼeh-eu jeˬ hawˇ-eu, kʼaˆ jeˬ-ehˇ gʼeh-eu jeˬ mˇ mehˬ-eu laꞈ kʼoeˇ, gʼeh nya naˇ, Miˬyehˇ neh tseˇ doˆ-euˬ tsawˇ haˬ deuˬ-ahˇ kʼawꞈ mehˇ shuiˇ shuiˇ tawˆ-awˇ, gaˇ ma sheuˬ bahˬ gʼeh tehꞈ-a.

Yoˇhaˬ 17:11

Nymˬ-mˇ nawˇ jawˇ gaˇ ngaˇ gʼoꞈ laˇ-eu lehˇ gʼeh-eu ma. Ngaˇ-aˬ, miˇ tsaˬ kʼoeˇ taˆ maˬ paˇ jawˇ ma. Ehˇ kʼawꞈ, aˬ yawꞈ maꞈ miˇ tsaˬ kʼoeˇ taˆ ya jawˇ-a siˬ. Muiˬ-eu shawˇ-eu Aˬda-oˇ, aˇ nyaꞈ Da zaˬ tiˬ gʼaˬ tehꞈ-ehˇ pyeuꞈ luꞈ-eu loꞈ-ehˇ, aˬ yawꞈ maꞈ kʼawꞈ nui ma tiˬ siˬ tehꞈ-ehˇ taˬ nya ni, nawˬ neh ngaˬ-ahˇ biꞈ laꞈ-euˬ tsawˇ myahˇ kʼoeˇ myahˇ-euˬ baoˬ neh aˬ yawꞈ maꞈ-ahˇ haw lahˇ nehˬ-awˬ.

Yoˇhaˬ 17:2

Aˬ jeˬ miˇ neh ehˇ naˇ, nawˬ neh aˬ yawꞈ-ahˇ kʼaˇ a nehˬ taˬ-euˬ tsawˇ haˬ dawˬ tawˆ luꞈ-ahˇ mˬ maˬ maˬ byaˆ zaˇ ziˇ dehꞈ-eu jeˬ aˬ yawꞈ biꞈ nya ni, miˇ tsaˬ tsawˇ jeuˬ dawˬ tawˆ luꞈ kʼoeˇ taˆ aˬ yawꞈ-ahˇ nawˇ baoˬ biꞈ taˬ-euˬ meh.

Yoˇhaˬ 17:24

Aˬda-oˇ, nawˬ neh biꞈ laꞈ-euˬ tsawˇ haˬ heu deuˬ nawˇ ngaˬ-ahˇ biꞈ laꞈ-euˬ yaw shehꞈ kʼahˬ sehˇ-ahˇ mawˇ nya ni, aˬ yawꞈ maꞈ-ahˇ ngaˇ kʼaˇ jawˇ gaˇ bi jawˇ mawꞈ-eu ma. Aˬ jeˬ miˇ neh ehˇ naˇ, miˇ tsaˬ tahˬ kʼawˇ maˬ beh mi naˆ-ehˇ nawˇ ngaˬ-ahˇ gaˬ-euˬ meh.

Yoˇhaˬ 17:6

Miˇ tsaˬ heu kʼoeˇ taˆ nawˬ neh ngaˬ-ahˇ biꞈ doˆ nehˬ laꞈ-euˬ tsawˇ haˬ deuˬ nawˬ-ahˇ siˬ nya ni ngaˇ mˇ gʼaˬ-euˬ ma. Aˬ yawꞈ maꞈ nawˬ-euˬ tsawˇ haˬ pyeuꞈ laˇ-awˇ, nawˬ neh ngaˬ-ahˇ biꞈ laꞈ-euˬ meh. Nawˬ-euˬ dawˬ-ahˇ aˬ yawꞈ maꞈ naˇ haˬ geuꞈ-euˬ meh.

Yoˇhaˬ 6:39

Ngaˬ-ahˇ kʼehˇ gʼeh leꞈ-euˬ gʼaˬ-euˬ nui kʼahˇ-aˬ, ngaˬ-ahˇ kʼaˇ biꞈ laꞈ-euˬ dawˬ tawˆ luꞈ, tiˬ gʼaˬ-iˬ maˬ ya byoˆ-iˇ-eu uˬ taꞈ, aˇ saˬ saˬ ngeh nah yawˬ gʼaˬ yawˬ na luꞈ bi gʼoꞈ dehꞈ laˇ-eu gʼaˇ duˬ pyeuꞈ-eu meh.

Yoˇhaˬ 6:65

Aˬ yawꞈ paˇ ehˇ-eu, “Kʼoeˇ miˇ neh, Aˬda neh bi laˇ-euˬ maˬ ngeuˇ naˇ, tsawˇ haˬ tiˬ gʼaˬ-iˬ ngaˇ jawˇ gaˇ maˬ laˇ nya-a lehˇ, naw maꞈ-ahˇ ngaˇ ehˇ nehˬ-euˬ ma.”

Yoˇhaˬ 9:34

Aˬ yawꞈ maꞈ aˬ yawꞈ-ahˇ ehˇ-eu, “Nawˇ loꞈ-ehˇ gʼeh-eu iˬ baˇ laꞈ kʼoeˇ dehꞈ le-awˇ huiˬ laˇ-euˬ tsawˇ haˬ tiˬ gʼaˬ nga maꞈ-ahˇ paˇ mehˬ paˇ tsoˆ-eu gʼeh te loˇ.” Kʼoeˇ naˇ, aˬ yawꞈ-ahˇ Yuˇdaˆ tsawˇ haˬ-euˬ uˬ duˬ tahˬ nymˇ-ahˇ maˬ bi taꞈ ni teh dzeh nehˬ-euˬ meh.

Lormav 5:20

Zahˇ dawˬ kʼoꞈ dawˬ biꞈ leꞈ-euˬ-aˬ, yaw lehˬ mˇ-eu bi myaˬ laˇ-eu gʼaˇ duˬ meh. Ehˇ kʼawꞈ, iˬ baˇ kʼaˇ myaˬ laˇ gaˇ Miˬyehˇ-euˬ guiˬ lahˬ kʼoeˇ myaˆ maˬ tseˇ myaˬ laˇ luꞈ-eu meh.

Piˇliˇpiˆ 1:29

Aˬ jeˬ miˇ neh ehˇ naˇ, Ka li neh naw maꞈ-ahˇ biꞈ taˬ-euˬ muiˬ dui dui-eu guiˬ lahˬ kʼoeˇ-aˬ, aˬ yawꞈ-ahˇ jah-eu jeˬ tehꞈ-ehˇ maˬ ngeuˇ-ehˇ, aˬ yawꞈ gʼaˇ duˬ shaˬ zahˬ ya mˇ-eu jeˬ kʼawꞈ ahˇ-eu meh.

1 Tiˆmoˇseˬ 1:16

Aˬ cawˬ naˆ maˬ tseˇ iˬ baˇ huiˬ dzehˬ-eu gʼaˬ pyeuꞈ-eu ngaˬ-ahˇ Yeˬsuˇ Ka li nui ma gʼawˬ mahˇ ni taˬ-awˇ oˇ dzeuˇ nehˬ laꞈ gaˇ keuˆ ni, Miˬyehˇ ngaˬ-ahˇ gʼawˬ shaˬ gaˬ nehˬ laꞈ-euˬ meh. Kʼoeˇ-aˬ, aˇ nah aˬ yawꞈ-ahˇ jah-eu laꞈ kʼoeˇ mˬ maˬ maˬ byaˆ zaˇ ziˇ dehꞈ-eu jeˬ-ahˇ za-eu tsawˇ haˬ deuˬ bi dzaw geuꞈ-eu gʼaˇ duˬ pyeuꞈ-eu meh.

2 Tiˆmoˇseˬ 2:19

Ehˇ kʼawꞈ, Miˬyehˇ neh dawˬ pehˬ ziꞈ dah ni gawˬ taˬ-euˬ jeˬ-ahˇ aˬ yawꞈ maꞈ maˬ laˆ luˆ nya-a. Dawˬ pehˬ kʼoeˇ-euˬ kʼoeˇ taˆ, “Yawˬ ha-euˬ tsawˇ haˬ deuˬ-ahˇ Sahˬpaˬ Miˬyehˇ siˬ nya meh” lehˇ boꞈ taˬ-awˇ, “Sahˬpaˬ Miˬyehˇ-euˬ tsawˇ haˬ ma lehˇ kʼaˇ ehˇ-eu deuˬ maˬ tsaˬ maˬ dawˇ-eu jeˬ maˬ mˇ ni ya byehˇ dzeh meh” lehˇ boꞈ taˬ-euˬ meh.

HeˬByehˇ 4:15

Aˬ dui-euˬ Piˇma Yaw huiˬ gʼaˬ-aˬ, aˬ dui-euˬ gʼaˬ baˬ duˬ-ahˇ gʼawˬ shaˬ gaˬ-eu maˬ siˬ nya-eu gʼaˬ maˬ ngeuˇ-a. Aˬ dui loꞈ-ehˇ muˇ juˇ juˇ-eu yawˬ jeˬ na luꞈ-ahˇ ya daˬ haw-euˬ Piˇma Yaw huiˬ tiˬ gʼaˬ aˬ dui jawˇ-eu ma. Ehˇ kʼawꞈ, aˬ yawꞈ iˬ baˇ maˬ mˇ haw-aˬ.

HeˬByehˇ 7:25

Kʼoeˇ miˇ neh, nymˬ-mˇ maˬ ehˇ, aˬ kaˇ mehˬ hu paw aˬ geu yamˬ-ahˇ maˬ ehˇ, aˬ yawꞈ-ahˇ gʼoe-awˇ Miˬyehˇ jawˇ gaˇ kʼaˇ laˇ-eu tsawˇ haˬ-ahˇ aˬ yawꞈ ka kʼoꞈ nehˬ nya-eu meh. Aˬ jeˬ miˇ neh ehˇ naˇ, tsawˇ haˬ zaˬ-euˬ dah zaˇ Miˬyehˇ-ahˇ tahˬ shaˇ -eu gʼaˇ duˬ aˬ yawꞈ mˬ maˬ maˬ byaˆ zaˇ ziˇ dehꞈ-eu meh.

1 Yoˇhaˬ 2:19

Tsawˇ haˬ heu deuˬ-aˬ, aˬ dui-euˬ aˇ maꞈ aˇ muˇ-ahˇ maˇ maˇ ni taꞈ-eu deuˬ maˬ ngeuˇ-a. Kʼoeˇ miˇ neh, aˬ yawꞈ maꞈ aˬ dui-ahˇ gʼawˬ-iˇ-eu meh. Aˬ yawꞈ maꞈ aˬ dui-euˬ aˇ maꞈ aˇ muˇ-ahˇ taꞈ law nmˇ-aˬ, aˬ dui-ahˇ maˬ gʼawˬ-iˇ ni jawˇ tehꞈ-a. Aˬ yawꞈ maꞈ aˬ dui-ahˇ maˬ taꞈ-eu gaˇ kawˆ bi siˬ duˬ laˇ-eu gʼaˇ duˬ, aˬ dui-ahˇ gʼawˬ-iˇ-euˬ jeˬ pyeuꞈ-eu meh.

Panmaeq 22:17

Yaw sahˇ Miˬyehˇ hawˇ-eu dahˬ dzaˬ-iˇ-eu lehˇ gʼeh-eu Zaˬmiˬ kʼoeˇ gʼaˬ “Laˇ-awˬ” lehˇ ehˇ-eu meh. Kʼaˇ ya gaˬ-euˬ tsawˇ haˬ yawˬ gʼaˬ na luꞈ kʼawꞈ, “Laˇ-awˬ” lehˇ ehˇ-awˬ. Iˇ cuꞈ kʼaˇ mehꞈ-eu tsawˇ haˬ laˇ-awˬ. Kʼaˇ dawˇ mawꞈ-eu tsawˇ haˬ deuˬ dehꞈ-eu saꞈ laˇ iˇ cuꞈ yawꞈ ngehꞈ-ehˇ dawˇ laˇ-awˬ.