Yeˬlaˬmiˇ 7:30 - Akha

³⁰ “Yuˇdaˆ tsawˇ haˬ deuˬ haiˬ dui dui-eu jeˬ mˇ-euˬ meh. Ngaˇ bye dui dui-eu jeˬ pyeuꞈ-eu aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ-ahˇ ngaˬ-euˬ Uˬ duˬ tahˬ nymˇ nymˇ ma laꞈ kʼoeˇ aˬ yawꞈ maꞈ baꞈ taˬ-awˇ, Uˬ duˬ tahˬ nymˇ nymˇ ma-ahˇ laˆ jawꞈ-euˬ meh.

Yeˬlaˬmiˇ 7:30 ပူးပေါင်းရင်းမြစ်များ

2 Sahˬpaˬ 21:3

Aˬ yawꞈ-euˬ aˬ da Heˬsaˬgiˇ neh laˆ cawˆ yaꞈ-euˬ lawˇ ciꞈ zaˬ deuˬ uˬ duˬ tahˬ-eu jawˇ duˬ kʼoeˇ deuˬ-ahˇ, aˬ yawꞈ neh paˇ tsoˆ muiˬ-euˬ meh. Iˇsaˬleˬlaˆ sahˬ paˬ Aˬhaˆ neh mˇ-euˬ loꞈ-ehˇ, Baˬlaˇ miˬyehˇ-ahˇ uˬ duˬ tahˬ-eu gʼaˇ duˬ, aˬ yawꞈ lawˇ duˬ tsoˆ-awˇ, Aˬsheˇlaˬ miˬyehˇ ma-euˬ mawˇ kawˇ aˬ yawꞈ tehˆ-euˬ meh. Aˬ guiˇ deuˬ-ahˇ kʼawꞈ aˬ yawꞈ uˬ duˬ tahˬ-euˬ meh.

2 Sahˬpaˬ 21:4

“Ngaˬ-ahˇ uˬ duˬ ya tahˬ-eu jawˇ duˬ meh” lehˇ, Sahˬpaˬ Miˬyehˇ neh ehˇ taˬ-euˬ Uˬ duˬ tahˬ nymˇ nymˇ ma laꞈ kʼoeˇ, lawˇ ciꞈ zaˬ deuˬ-euˬ lawˇ duˬ aˬ yawꞈ jahˇ ahˇ-euˬ meh.

2 Sahˬpaˬ 21:7

“Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ miˇ kʼahˬ dawˬ tawˆ luꞈ laꞈ kʼoeˇ, Yeˬluˇsaˬlehˬ meuˬ-ahˇ jaˆ-eu Uˬ duˬ tahˬ nymˇ nymˇ ma heu nymˇ-aˬ, ngaˬ-ahˇ uˬ duˬ bi tahˬ-eu gʼaˇ duˬ ngaˬ neh tsoˆ taˬ-euˬ jawˇ duˬ pyeuꞈ-eu ma” lehˇ, Daˬbiˇ hawˇ-eu Sawˇlaˬmoˬ aˬ nyaꞈ da zaˬ-ahˇ Sahˬpaˬ Miˬyehˇ neh ehˇ tsaˬ tsoˆ nehˬ taˬ-euˬ Uˬ duˬ tahˬ nymˇ nymˇ ma kʼoeˇ nymˇ laꞈ kʼoeˇ, Maˬnaˇseˬ neh Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ bi jaˆ-euˬ meh.

2 Sahˬpaˬ 23:12

Sahˬ paˬ Aˬkaˆ jawˇ-eu aˇ lawˆ kʼoeˇ taˆ nyiˬ paˆ-ehˇ, sahˬ paˬ-euˬ hawˇ nymˇ nymˇ mˬ kʼoeˇ taˆ jaˆ-eu Yuˇdaˆ sahˬ paˬ deuˬ neh tsoˆ taˬ-euˬ lawˇ duˬ hawˇ-eu, Uˬ duˬ tahˬ nymˇ nymˇ ma-euˬ kʼoeˇ paˆ ma paˆ-ehˇ jaˆ-eu sahˬ paˬ Maˬnaˇseˬ neh tsoˆ taˬ-euˬ lawˇ duˬ deuˬ-ahˇ, sahˬ paˬ Yawˇshiˆ neh laˆ cawˆ-euˬ meh. Lawˇ duˬ kʼoeˇ deuˬ-ahˇ aˬ yawꞈ deh meuˇ-awˇ, Giˇdaˬloˬ deh kʼawꞈ-ahˇ baꞈ dzeh-euˬ meh.

2 Laˬsaˬbaˬ 33:15

Uˬ duˬ tahˬ nymˇ nymˇ ma laꞈ kʼoeˇ jaˆ-eu aˬ cawˬ tsawˇ jeuˬ-euˬ miˬ yehˇ deuˬ hawˇ-eu aˬ yawꞈ neh bi jaˆ-euˬ tahˬ pahˬ aˬ ma mawˇ kawˇ maˬ ehˇ, Uˬ duˬ tahˬ nymˇ nymˇ ma tsoˆ taˬ-euˬ gawˬ duˇ-ahˇ hawˇ-eu Yeˬluˇsaˬlehˬ meuˬ doe ni jaˆ-eu lawˇ ciꞈ zaˬ deuˬ-euˬ lawˇ duˬ deuˬ maˬ ehˇ, dawˬ tawˆ luꞈ aˬ yawꞈ yuˇ-awˇ, meuˬ-euˬ laꞈ nyiˇ baꞈ dzeh-iˇ-euˬ meh.

2 Laˬsaˬbaˬ 33:3

Aˬ yawꞈ-euˬ aˬ da Heˬsaˬgiˇ neh laˆ luˬ laˆ seˇ yaꞈ-euˬ lawˇ ciꞈ zaˬ deuˬ uˬ duˬ tahˬ-eu jawˇ duˬ kʼoeˇ deuˬ-ahˇ aˬ yawꞈ paˇ laˆ muiˬ geuꞈ-euˬ meh. Baˬlaˇ miˬ yehˇ-ahˇ uˬ duˬ tahˬ-eu gʼaˇ duˬ lawˇ duˬ deuˬ aˬ yawꞈ tsoˆ-awˇ, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ deuˬ tehˆ-euˬ uˬ taꞈ, aˬ guiˇ deuˬ-ahˇ kʼawꞈ uˬ duˬ tahˬ-euˬ meh.

2 Laˬsaˬbaˬ 33:7

“Iˇsaˬleˬlaˆ tsawˇ jeuˬ tseˇ nyiꞈ jeuˬ-euˬ miˇ kʼahˬ dawˬ tawˆ luꞈ laꞈ kʼoeˇ, Yeˬluˇsaˬlehˬ meuˬ laꞈ kʼoeˇ jaˆ-eu Uˬ duˬ tahˬ nymˇ nymˇ ma heu nymˇ-aˬ, ngaˬ-ahˇ uˬ duˬ bi tahˬ-eu gʼaˇ duˬ ngaˬ neh tseˇ doˆ taˬ-euˬ jawˇ duˬ pyeuꞈ-eu ma” lehˇ, Daˬbiˇ hawˇ-eu Sawˇlaˬmoˬ aˬ nyaꞈ da zaˬ-ahˇ Miˬyehˇ ehˇ taˬ-euˬ Uˬ duˬ tahˬ nymˇ nymˇ ma kʼoeˇ nymˇ laꞈ kʼoeˇ, Maˬnaˇseˬ neh tahˬ pahˬ aˬ ma mawˇ kawˇ bi jaˆ-euˬ meh.

Iˇsaˬyaˇ 66:4

Kʼoeˇ baˬ da neh aˬ yawꞈ maꞈ guˆ-eu jeˬ pyeuꞈ-eu, luˬ-iˇ seˇ-iˇ-eu jeˬ aˬ yawꞈ maꞈ kʼoeˇ taˆ ngaˇ bi keuˆ le ma. Ngaˇ kuˇ ngeh aˬ yawꞈ maꞈ oˬ maˬ toˬ-ehˇ, ngaˬ-euˬ dawˬ-ahˇ maˬ naˇ haˬ-euˬ miˇ neh, kʼoeˇ loꞈ-ehˇ jahˇ nehˬ ma. Ngaˬ-euˬ mehˬ shi aˬ yawꞈ maꞈ yaw haiˬ jeˬ mˇ-awˇ, ngaˇ nui ma maˬ tsaˬ-eu jeˬ-ahˇ tseˇ geuꞈ-euˬ meh.”

Yeˬlaˬmiˇ 16:18

Shiˇ taˬ-euˬ tsawˇ haˬ loꞈ-ehˇ saꞈ maˬ gʼawˇ nya-eu tahˬ pahˬ aˬ ma mawˇ kawˇ deuˬ neh ngaˬ-euˬ miˇ kʼahˬ-ahˇ aˬ yawꞈ maꞈ laˆ jawꞈ-awˇ, maˬ ngeuˇ-eu miˬ yehˇ deuˬ hehˇ byah leꞈ taˬ-euˬ miˇ neh, aˬ yawꞈ maꞈ neh mˇ-euˬ iˬ baˇ aˇ poeˬ aˬ yawꞈ maꞈ-ahˇ ngaˇ nyiˬ bymˇ paˇ kʼehˬ poˆ nehˬ ma.”

Yeˬlaˬmiˇ 23:11

Sahˬpaˬ Miˬyehˇ ehˇ-eu, “Miˬyehˇ gʼaˇ duˬ ngehˬ dah-eu deuˬ hawˇ-eu, piˇ ma deuˬ Miˬyehˇ maˬ baw-ehˇ, Uˬ duˬ tahˬ nymˇ nymˇ ma laꞈ kʼoeˇ yaw haiˬ jeˬ mˇ luꞈ-eu, ngaˇ nyehꞈ duˬ taˬ-euˬ ma.

Yeˬlaˬmiˇ 32:34

Ngaˬ-ahˇ uˬ duˬ tahˬ-eu gʼaˇ duˬ tsoˆ taˬ-euˬ Uˬ duˬ tahˬ nymˇ nymˇ ma laꞈ kʼoeˇ, nui daˆ daˆ laˇ paˬ-ehˇ gʼeh-eu aˬ yawꞈ maꞈ-euˬ tahˬ pahˬ aˬ ma mawˇ kawˇ deuˬ baꞈ ahˇ taˬ-awˇ, Uˬ duˬ tahˬ nymˇ nymˇ ma-ahˇ laˆ jawꞈ gaˇ keuˆ ni aˬ yawꞈ maꞈ jahˇ keuˆ-euˬ meh.

Yeˬlaˬmiˇ 32:35

Moˇlehˆ miˬ yehˇ-ahˇ aˬ yawꞈ maꞈ-euˬ aˬ buˇ aˬ li deuˬ lawˇ nehˬ-eu gʼaˇ duˬ, Hiˬnoˬ deh kʼawꞈ-ahˇ Baˬlaˇ miˬ yehˇ gʼaˇ duˬ lawˇ duˬ tiˬ tsahˇ aˬ yawꞈ maꞈ tsoˆ-euˬ meh. Kʼoeˇ loꞈ-ehˇ jahˇ-eu gʼaˇ duˬ aˬ yawꞈ maꞈ-ahˇ ngaˇ maˬ mehˬ maˬ tsoˆ-euˬ uˬ taꞈ, aˬ yawꞈ maꞈ kʼoeˇ loꞈ-ehˇ jahˇ-awˇ Yuˇdaˆ tsawˇ haˬ deuˬ iˬ baˇ mˇ ni sheuˬ bahˬ nehˬ tehꞈ-a lehˇ, nui ma laꞈ kʼoeˇ tehꞈ-ehˇ kʼawꞈ ngaˇ maˬ noeˬ haw-aˬ.”

Yeˬsaˬgeˬlaˇ 7:20

Aˇ hu, muiˬ dui dui-eu pyuˇ shuiˇ myawˬ guˇ deuˬ-ahˇ aˬ yawꞈ maꞈ kʼahˬ sehˇ jehˆ-euˬ meh. Ehˇ kʼawꞈ, kʼoeˇ deuˬ yuˇ-awˇ aˬ yawꞈ maꞈ tahˬ pahˬ aˬ ma mawˇ kawˇ tehˆ-euˬ meh. Kʼoeˇ miˇ neh, aˬ yawꞈ maꞈ-euˬ pyuˇ shuiˇ myawˬ gahˬ deuˬ aˬ yawꞈ maꞈ-ahˇ paˇ bi laˆ jawꞈ ni, Sahˬpaˬ Miˬyehˇ jahˇ-euˬ meh.

Yeˬsaˬgeˬlaˇ 8:3

Aˬ laꞈ-ahˇ duˇ leˇ-eu jeˬ aˬ yawꞈ cawˬ doˆ leꞈ-awˇ, ngaˬ-euˬ uˬ duˬ tsehˇ kahˇ-ahˇ tsuˆ tehˬ-euˬ meh. Yaw sahˇ laꞈ kʼoeˇ kʼoeˇ loꞈ-ehˇ mawˇ laˇ-eu laꞈ kʼoeˇ Miˬyehˇ-euˬ yaw sahˇ ngaˬ-ahˇ yaw goˇ-ahˇ ciˬ diˇ-awˇ, Yeˬluˇsaˬlehˬ meuˬ-ahˇ sheuˬ gʼeh nehˬ laꞈ-euˬ meh. Miˬyehˇ-ahˇ nui ma bi pehˇ-euˬ tahˬ pahˬ aˬ ma mawˇ kawˇ jaˆ-eu tsahˇ pyeuꞈ-eu, Uˬ duˬ tahˬ nymˇ nymˇ ma-euˬ laꞈ taˆ pyawˬ lahˇ kʼehˬ laˇ gʼoˆ laꞈ kʼoeˇ gʼoˆ-ahˇ, ngaˬ-ahˇ sheuˬ gʼeh nehˬ laꞈ-euˬ meh.

Daˬyeˬlaˇ 11:31

Aˬ yawꞈ-euˬ yehˇ tiˬ paˆ na deuˬ, Uˬ duˬ tahˬ nymˇ nymˇ ma-ahˇ laˆ jawꞈ tehꞈ-a. Yawˬ nah na luꞈ lawˇ-eu shehˇ-eu jeˬ maˬ bi mˇ ni, aˬ yawꞈ maꞈ laˆ tsoeˬ-awˇ, doeˇ dui dui-eu nui daˆ daˆ laˇ paˬ-ehˇ gʼeh-eu jeˬ kʼoeˇ gaˇ bi jaˆ tehꞈ-a.

Daˬyeˬlaˇ 9:27

Uˆ lahˇ-eu tsawˇ haˬ kʼoeˇ gʼaˬ, shiꞈ kʼoꞈ keuˆ ni tsawˇ haˬ gʼawˬ mya gʼaˬ nehˬ-ehˇ dawˬ ma saˇ jaˇ dzaˬ taꞈ-awˇ, aˇ yamˬ tiˬ paˆ paˆ-iˇ ngeh, lawˇ-eu shehˇ-eu jeˬ maˬ bi mˇ ni laˆ tsoeˬ tehꞈ-a. Uˬ duˬ tahˬ nymˇ nymˇ ma-euˬ kʼaˬ boeˬ-ahˇ, doeˇ dui dui-eu nui daˆ daˆ laˇ paˬ-ehˇ gʼeh-eu jeˬ bi jaˆ-awˇ, kʼoeˇ loꞈ-ehˇ bi jaˆ-euˬ gʼaˬ-ahˇ yaˇ kʼaˬ daˇ-eu gʼaˇ duˬ, Miˬyehˇ neh lehˬ hmˬ taˬ-eu aˇ yamˬ maˬ keuˆ laˇ kʼoeˇ keuˆ ni, kʼoeˇ gaˇ jaˆ tehꞈ-a.”