Yeˬlaˬmiˇ 7:24 - Akha

²⁴ Ehˇ kʼawꞈ, aˬ yawꞈ maꞈ naˬ bawˇ maˬ gaˬ leˇ-ehˇ, aˬ yawꞈ maꞈ-euˬ gʼahˇ-eu nui ma hawˇ-eu haiˬ-eu nui ma laꞈ kʼoeˇ kʼaˇ noeˬ doˆ laˇ-euˬ jeˬ mˇ-awˇ, muiˬ laˇ jaˬ laˇ-eu jeˬ maˬ jaˆ-eu uˬ taꞈ, tiˬ jawˇ saˇ-i tiˬ jawˇ doeˇ dzehˬ laˇ-euˬ meh.

Yeˬlaˬmiˇ 7:24 ပူးပေါင်းရင်းမြစ်များ

Neˬhaˬmiˇ 9:29

Nawˬ neh mehˬ-euˬ tsoˆ-euˬ jeˬ-ahˇ naˇ haˬ-awˬ lehˇ, aˬ yawꞈ maꞈ-ahˇ nawˇ mehˬ nehˬ-euˬ meh. Ehˇ kʼawꞈ, aˬ yawꞈ maꞈ nui ma huiˬ-eu laꞈ kʼoeˇ, nawˬ-euˬ zahˇ dawˬ kʼoꞈ dawˬ-ahˇ byehˇ-euˬ meh. Nawˬ-euˬ zahˇ dawˬ kʼoꞈ dawˬ mehˬ nah caw teh-eu jeˬ-aˬ, dehꞈ-eu saꞈ laˇ gaˇ ma pyeuꞈ kʼawꞈ, aˬ yawꞈ maꞈ nui ma huiˬ-eu gʼahˇ-eu laꞈ kʼoeˇ, maˬ naˇ haˬ geuꞈ ni dehꞈ-euˬ meh.

Jaceuq 81:13

Ngaˬ-euˬ tsawˇ haˬ deuˬ ngaˬ-euˬ ehˇ dawˬ bi naˇ haˬ mawꞈ dui dui nya. Ngaˬ neh mehˬ-euˬ dawˬ-ahˇ bi naˇ haˬ geuꞈ mawꞈ nya.

Yeˬlaˬmiˇ 13:10

Haiˬ-eu tsawˇ haˬ kʼoeˇ deuˬ ngaˬ-euˬ ehˇ dawˬ-ahˇ maˬ naˇ haˬ geuꞈ-a. Dzeuˇ laˇ ngeh loꞈ-ehˇ aˬ yawꞈ maꞈ nui ma gʼahˇ-awˇ haiˬ-eu laꞈ kʼoeˇ, miˬ yehˇ nui deuˬ-ahˇ uˬ duˬ tahˬ-awˇ miˬ yehˇ kʼoeˇ deuˬ-euˬ nui kʼahˇ mˇ-eu meh. Kʼoeˇ miˇ neh, peuˬ-iˇ-euˬ joꞈ paꞈ kʼoeˇ kahˇ loꞈ-ehˇ aˬ yawꞈ maꞈ ya cawˆ-iˇ tehꞈ-a.

Yeˬlaˬmiˇ 13:11

Joꞈ paꞈ kʼoeˇ joꞈ-ahˇ deuˇ geuˆ ni paꞈ ziꞈ taˬ-euˬ loꞈ-ehˇ, Iˇsaˬleˬlaˆ tsawˇ haˬ hawˇ-eu Yuˇdaˆ tsawˇ haˬ dawˬ tawˆ luꞈ, ngaˬ-ahˇ ziꞈ dah ni bi byaˇ tehˬ mawꞈ-eu ma. Aˬ yawꞈ maꞈ ngaˬ-euˬ tsawˇ jeuˬ pyeuꞈ laˇ-awˇ, ngaˬ-euˬ tsawˇ myahˇ yaw shehꞈ kʼahˬ sehˇ huiˬ-awˇ, ngaˬ-ahˇ ja ceuˬ-eu jeˬ bi doˆ laˇ-eu gʼaˇ duˬ, ngaˇ kʼoeˇ loꞈ-ehˇ jahˇ-euˬ ma. Ehˇ kʼawꞈ, ngaˬ-euˬ ehˇ dawˬ-ahˇ aˬ yawꞈ maꞈ maˬ naˇ ha geuꞈ-a.”

Yeˬlaˬmiˇ 15:6

Naw maꞈ ngaˬ-ahˇ byehˇ dzeh-euˬ meh. Naw maꞈ ngaˬ-ahˇ naˇ kʼah ciˬ pyawˇ nehˬ laꞈ-euˬ meh. Kʼoeˇ baˬ da neh ngaˇ nui ma pehˇ-eu maˬ dzahˬ tehˬ coeˇ-ehˇ, ngaˬ-euˬ aˬ laꞈ cawˬ doˆ leꞈ-awˇ, naw maꞈ-ahˇ baꞈ deh leꞈ-euˬ ma.

Yeˬlaˬmiˇ 16:12

Ehˇ kʼawꞈ, naw maꞈ-aˬ, naw maꞈ-euˬ aˬ poeˬ aˬ bawˇ kʼoeˇ deuˬ naˆ maˬ tseˇ dehꞈ doeˇ-euˬ meh. Naw maꞈ dawˬ tawˆ luꞈ nui ma gʼahˇ dui dui-awˇ, yaw haiˬ jeˬ mˇ-eu laꞈ kʼoeˇ, ngaˬ-euˬ ehˇ dawˬ maˬ naˇ haˬ geuꞈ-a.

Yeˬlaˬmiˇ 17:23

Aˬ yawꞈ maꞈ-euˬ aˬ poeˬ aˬ bawˇ deuˬ ngaˬ-euˬ ehˇ dawˬ-ahˇ maˬ taˬ huiˬ-ehˇ maˬ naˇ haˬ geuꞈ-eu uˬ taꞈ, nui ma gʼahˇ dui dui-awˇ, ngaˬ neh mehˬ nehˬ-euˬ dawˬ naˬ bawˇ-ahˇ maˬ gaˬ leˇ-ehˇ, ngaˬ-euˬ zahˇ sahˇ kʼoꞈ-ahˇ maˬ dzaw geuꞈ-a.

Yeˬlaˬmiˇ 17:9

Tsawˇ haˬ zaˬ-euˬ nui ma aˬ suˇ gʼaˬ siˬ nya ta. Nui ma loꞈ-ehˇ laꞈ gʼoꞈ baw-eu tiˬ jeˬ-iˬ maˬ jaˆ-a. Yaw cawˆ myaˬ-eu miˇ neh maˬ laˆ muiˬ geuꞈ nya-a.

Yeˬlaˬmiˇ 18:10

tsawˇ jeuˬ kʼoeˇ jeuˬ ngaˬ-euˬ ehˇ dawˬ maˬ naˇ haˬ-ehˇ yaw haiˬ jeˬ mˇ naˇ, ngaˬ neh ehˇ-euˬ loꞈ-ehˇ ngaˇ maˬ mˇ ni byehˇ nya ma.

Yeˬlaˬmiˇ 18:12

Ehˇ kʼawꞈ, aˬ yawꞈ maꞈ heu loꞈ-ehˇ ehˇ tehꞈ-a. ‘Aˬ jeˬ miˇ neh nga maꞈ dehꞈ jeˬ dehꞈ kawˆ paˇ-eu loˬ ta. Nga maꞈ nui ma kʼaˇ gʼahˇ mawꞈ-eu gʼahˇ-awˇ, yaw haiˬ jeˬ mˇ mˇ-ehˇ dehꞈ ma’ lehˇ ehˇ tehꞈ-a.”

Yeˬlaˬmiˇ 2:27

Aˇ bawˇ-ahˇ aˬ da shaˇ kuˇ-awˇ, kʼaˬ lo-ahˇ aˬ ma shaˇ kuˇ-eu naw maꞈ, ngaˬ-ahˇ naˇ kʼah ciˬ pyawˇ nehˬ yaꞈ-euˬ baˬ da neh, daˬ ga-awˇ ya shaꞈ dawˇ tehꞈ-a. Ehˇ kʼawꞈ, shaˬ-eu zahˬ-eu jeˬ-ahˇ naw maꞈ ya tahˬ puˬ ngeh, ka kʼoꞈ nehˬ laꞈ lehˇ ngaˬ-ahˇ shaˇ-eu meh.

Yeˬlaˬmiˇ 22:21

Naw maꞈ dehꞈ dzaˬ luꞈ ngeh Sahˬpaˬ Miˬyehˇ dawˬ ngehˬ cawˬ gaˇ, naw maꞈ naˬ bawˇ maˬ ciˬ kʼmˇ-aˬ. Naw maꞈ dehꞈ dzeuˇ laꞈ-euˬ aˇ yamˬ heu myah laꞈ kʼoeˇ, Sahˬpaˬ Miˬyehˇ ehˇ dawˬ maˬ naˇ haˬ-aˬ.

Yeˬlaˬmiˇ 23:17

Ngaˬ-euˬ ehˇ dawˬ maˬ naˇ haˬ-eu tsawˇ haˬ deuˬ-ahˇ, nui saˇ oꞈ tehꞈ-a lehˇ aˬ yawꞈ maꞈ gʼaˬ biꞈ-awˇ, nui ma gʼahˇ dui dui-eu tsawˇ haˬ yawˬ gʼaˬ na luꞈ-ahˇ, shaˬ zahˬ maˬ puˬ le-aˇ lehˇ aˬ yawꞈ maꞈ gʼaˬ baꞈ baꞈ-eu meh.”

Yeˬlaˬmiˇ 3:13

Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ nawˇ puiˬ-euˬ miˇ neh, nawˇ iˬ baˇ ahˇ-eu ma lehˇ ehˇ doˆ naˇ gʼaˬ ma. Aˇ bawˇ naˇ shmˇ kʼaˇ muiˬ-eu tsahˇ uˬ moˆ, boeˇ miˬ siˬ kʼaˬ-euˬ Miˬyehˇ deuˬ-ahˇ nawˇ gaˬ-awˇ, ngaˬ-euˬ zahˇ dawˬ kʼoꞈ dawˬ-ahˇ nawˇ maˬ naˇ haˬ geuꞈ-euˬ gaˇ kawˆ, dawˇ coe ni ehˇ doˆ jiˇ-awˬ lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Yeˬlaˬmiˇ 3:17

Aˇ yamˬ kʼoeˇ yamˬ keuˆ laˇ ngeh, Yeˬluˇsaˬlehˬ meuˬ-ahˇ ‘Sahˬpaˬ Miˬyehˇ -euˬ nuiˇ mahˬ’ lehˇ kuˇ-awˇ, tsawˇ jeuˬ dawˬ tawˆ luꞈ kʼoeˇ gaˇ uiˬ laˇ-awˇ ngaˬ-ahˇ uˬ duˬ tahˬ tehꞈ-a. Aˬ yawꞈ maꞈ-euˬ haiˬ-eu gʼahˇ-eu nui ma neh kʼehˇ-euˬ jeˬ-ahˇ, aˬ yawꞈ maꞈ maˬ mˇ ni byehˇ tehꞈ-a.

Yeˬlaˬmiˇ 32:23

Ehˇ kʼawꞈ, miˇ kʼahˬ heu kʼahˬ aˬ yawꞈ maꞈ za-awˇ jawˇ luꞈ ngeh, nawˬ-euˬ dawˬ-ahˇ aˬ yawꞈ maꞈ maˬ naˇ haˬ geuꞈ-ehˇ, nawˬ neh mehˬ nehˬ tsoˆ nehˬ-euˬ loꞈ-ehˇ maˬ dehꞈ ni, nawˬ neh bi mˇ-euˬ jeˬ-ahˇ aˬ yawꞈ maꞈ maˬ mˇ-a. Kʼoeˇ miˇ neh heu loꞈ-ehˇ gʼeh-eu luˬ-iˇ seˇ-iˇ-eu jeˬ, aˬ yawꞈ maꞈ kʼoeˇ taˆ nawˇ bi keuˆ le-euˬ meh.

Yeˬlaˬmiˇ 32:33

Aˬ yawꞈ maꞈ ngaˬ-ahˇ naˇ kʼah ciˬ pyawˇ-awˇ, ngaˬ neh tiˬ poˆ saˇ-iˬ tiˬ poˆ mehˬ nehˬ tsoˆ nehˬ-euˬ dawˬ-ahˇ naˬ bawˇ maˬ ciˬ kʼmˇ-a.

Yeˬlaˬmiˇ 35:15

Miˬyehˇ gʼaˇ duˬ ngehˬ dah-eu deuˬ pyeuꞈ-eu ngaˬ-euˬ zaˬ kʼaˆ deuˬ-ahˇ naw maꞈ jawˇ gaˇ maˬ tsehˆ leˇ ni ngaˇ pyehˬ gʼeh leꞈ-awˇ, yaw haiˬ jeˬ mˇ-eu byehˇ-awˇ, yaw tsaˬ yaw dawˇ jeˬ mˇ-awˬ lehˇ bi ehˇ le-euˬ ma. Naw maꞈ-euˬ aˬ poeˬ aˬ bawˇ deuˬ hawˇ-eu naw maꞈ-ahˇ ngaˬ neh biꞈ taˬ-euˬ miˇ kʼahˬ heu kʼahˬ laꞈ kʼoeˇ naw maꞈ dehꞈ daˆ jawˇ daˆ leꞈ nya ni, miˬ yehˇ nui deuˬ-ahˇ uˬ duˬ taˬ tahˬ lehˇ, Miˬyehˇ gʼaˇ duˬ ngehˬ dah-eu kʼoeˇ deuˬ naw maꞈ-ahˇ yaw kʼaˆ kʼaˆ-ehˇ mehˬ nehˬ gʼaˬ-euˬ meh. Ehˇ kʼawꞈ, ngaˬ-euˬ dawˬ naw maꞈ-euˬ naˬ bawˇ-ahˇ maˬ ahˇ leˇ-a.

Yeˬlaˬmiˇ 6:16

Sahˬpaˬ Miˬyehˇ aˬ yawꞈ-euˬ tsawˇ haˬ deuˬ-ahˇ ehˇ nehˬ-eu, “Gaˇ ma gaˇ tsmˇ-ahˇ yawꞈ-awˇ haw duˬ-awˬ. Aˇ hu ba-euˬ gaˇ ma gaˇ oeˇ naˇ haˬ duˬ-awˬ. Gaˇ ma gaˇ muiˬ naˇ haˬ duˬ-awˇ cah naˇ, nui saˇ oꞈ-awˇ ya dehꞈ tehꞈ-a.” Ehˇ kʼawꞈ, “Gaˇ ma gaˇ muiˬ-ahˇ maˬ cah” lehˇ, Sahˬpaˬ Miˬyehˇ-ahˇ aˬ yawꞈ maꞈ ehˇ-eu meh.

Yeˬlaˬmiˇ 7:26

Ehˇ kʼawꞈ, tsawˇ haˬ tiˬ gʼaˬ-iˬ naˬ bawˇ gaˬ leˇ gaˇ maˬ duˇ-ehˇ, naw maꞈ-euˬ aˬ poeˬ aˬ bawˇ deuˬ naˆ maˬ tseˇ naw maꞈ nui ma gʼahˇ-awˇ, ngaˬ-ahˇ puiˬ mawꞈ-eu jeˬ aˇ dzehˬ dzeuˇ meh.

Yeˬlaˬmiˇ 8:5

Toˆ-ehˇ ngeuˇ naˇ aˬ jeˬ miˇ neh naw maꞈ mehˬ shiˬ ciˬ pyawˇ-awˇ doˆ-iˇ-euˬ, maˬ gʼoꞈ kʼoꞈ laˇ ni iˇ byoˆ te. Naw maꞈ tahˬ pahˬ aˬ ma mawˇ kawˇ maˬ byehˇ coeˇ-ehˇ, ngaˇ jawˇ gaˇ maˬ gʼoꞈ poˆ laˇ-a.

Yeˬlaˬmiˇ 9:14

Aˬ yawꞈ maꞈ-euˬ aˬ poeˬ aˬ bawˇ deuˬ neh mehˬ nehˬ yaꞈ-euˬ loꞈ-ehˇ, aˬ yawꞈ maꞈ nui ma gʼahˇ-eu laꞈ kʼoeˇ, Baˬlaˇ miˬ yehˇ-euˬ tahˬ pahˬ aˬ ma mawˇ kawˇ deuˬ-ahˇ, uˬ duˬ tahˬ-euˬ meh.

Yeˬsaˬgeˬlaˇ 20:13

Ehˇ kʼawꞈ, bawˇ tsahˬ bawˇ dahˇ laꞈ kʼoeˇ aˬ yawꞈ maꞈ ngaˬ-ahˇ puiˬ-euˬ meh. Ngaˬ-euˬ zahˇ dawˬ kʼoꞈ dawˬ-ahˇ aˬ yawꞈ maꞈ puiˬ-awˇ, ngaˬ neh dawˬ biꞈ-euˬ gaˇ maˬ naˇ haˬ geuꞈ-a. Ngaˬ-euˬ zahˇ dawˬ kʼoꞈ dawˬ mehˬ nah kʼaˇ caw teh-eu tsawˇ haˬ yaw dehꞈ ya dehꞈ-eu meh. Jawˇ nah-ahˇ aˬ yawꞈ maꞈ laˆ jawꞈ-euˬ meh. Bawˇ tsahˬ bawˇ dahˇ kʼoeˇ tsahˇ-ahˇ, aˬ yawꞈ maꞈ-ahˇ ngaˬ-euˬ nui ma bi mawˇ-awˇ, laˆ cawˆ nehˬ ma lehˇ ngaˇ lehˬ hmˬ-euˬ ma.

Yeˬsaˬgeˬlaˇ 20:16

Aˬ yawꞈ maꞈ ngaˬ neh dawˬ biꞈ-euˬ gaˇ maˬ naˇ haˬ geuꞈ-ehˇ, ngaˬ-euˬ zahˇ dawˬ kʼoꞈ dawˬ-ahˇ byehˇ dzeh-awˇ jawˇ nah-ahˇ laˆ jawꞈ-euˬ miˇ neh, ngaˇ kʼoeˇ loꞈ-ehˇ ehˇ tsehˆ nehˬ-euˬ ma. Aˬ yawꞈ maꞈ tahˬ pahˬ aˬ ma mawˇ kawˇ-ahˇ uˬ duˬ tahˬ mawꞈ dzehˬ-eu meh.

Yeˬsaˬgeˬlaˇ 20:21

“Ehˇ kʼawꞈ, aˬ yawꞈ maꞈ-euˬ zaˬ kʼoeˇ deuˬ kʼawꞈ, ngaˬ-ahˇ puiˬ-eu laꞈ kʼoeˇ, tsawˇ haˬ zaˬ-ahˇ yaw dehꞈ bi dehꞈ-eu ngaˬ-euˬ zahˇ dawˬ kʼoꞈ dawˬ deuˬ-ahˇ byehˇ dzeh-euˬ meh. Jawˇ nah-ahˇ aˬ yawꞈ maꞈ laˆ jawꞈ-euˬ meh. Bawˇ tsahˬ bawˇ dahˇ kʼoeˇ tsahˇ-ahˇ, ngaˬ-euˬ nui ma aˬ yawꞈ maꞈ-ahˇ bi mawˇ-awˇ, sehꞈ-eu lehˇ gʼeh-euˬ ma.

Yeˬsaˬgeˬlaˇ 20:8

Ehˇ kʼawꞈ, aˬ yawꞈ maꞈ ngaˬ-ahˇ puiˬ-awˇ, ngaˬ-euˬ ehˇ dawˬ maˬ naˇ haˬ geuꞈ-a. Nui daˆ daˆ laˇ paˬ-ehˇ gʼeh-eu aˬ yawꞈ maꞈ-euˬ tahˬ pahˬ aˬ ma mawˇ kawˇ kʼoeˇ deuˬ-ahˇ maˬ biˬ dzeh-ehˇ, nui daˆ daˆ laˇ paˬ-ehˇ gʼeh-eu Iˇjiˇtuˆ miˬyehˇ deuˬ-ahˇ kʼawꞈ, aˬ yawꞈ maꞈ maˬ byehˇ coeˇ-a. Kʼoeˇ gaˇ, Iˇjiˇtuˆ miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˬ-euˬ nui ma bi mawˇ-eu lehˇ ngaˇ noeˬ tsehˆ-euˬ ma.

Daˬyeˬlaˇ 9:6

Nga maꞈ-euˬ sahˬ paˬ sahˬ ma deuˬ, nga maꞈ-euˬ aˬ poeˬ aˬ bawˇ deuˬ hawˇ-eu, nga maꞈ tsawˇ jeuˬ-ahˇ, nawˬ-euˬ tsawˇ myahˇ uˬ moˆ ngehˬ-eu tmˇ-eu deuˬ pyeuꞈ-eu Miˬyehˇ gʼaˇ duˬ ngehˬ dah-eu nawˬ-euˬ zaˬ kʼaˆ deuˬ-euˬ ehˇ dawˬ nga maꞈ maˬ naˇ haˬ ni dehꞈ-euˬ ma.

Hawˇseˬ 10:6

Tahˬ pahˬ aˬ ma mawˇ kawˇ kʼoeˇ hmˬ, Aˬshuˇliˆ miˇ kʼahˬ-euˬ sahˬ paˬ, huiˬ dui mahˇ dui dui-eu gʼaˬ-ahˇ, ya baꞈ ha keuˆ nehˬ leˇ tehꞈ-a. Iˇsaˬleˬlaˆ tsawˇ haˬ deuˬ-aˬ, aˬ cawˬ ehˇ dawˬ geuꞈ-eu miˇ neh, daˬ ga-awˇ ya shaꞈ dawˇ tehꞈ-a.

Hawˇseˬ 4:16

Mawˇ neˇ mawˇ kʼaˇ yaw gahˇ loꞈ-ehˇ, Iˇsaˬleˬlaˆ nui ma gʼahˇ meh. Muiˬ dui dui-eu gaˆ dzaˬ duˬ-ahˇ, gaˆ dzaˬ luꞈ-eu yawˇ zaˬ loꞈ-ehˇ, Sahˬpaˬ Miˬyehˇ aˬ yawꞈ maꞈ-ahˇ, bi dzaˬ bi dawˇ nya tehꞈ-a loˇ.

Miˇkaˬ 6:16

Sahˬ paˬ Awˇmaˬliˇ hawˇ-eu aˬ yawꞈ-euˬ aˬ li sahˬ paˬ Aˬhaˆ aˬ nyaꞈ maˬ tsaˬ maˬ dawˇ-eu jeˬ mˇ gaˇ naw maꞈ caw teh-euˬ miˇ neh, naw maꞈ kʼoeˇ taˆ kʼoeˇ loꞈ-ehˇ keuˆ le tehꞈ-a. Aˬ yawꞈ nyaꞈ kʼaˇ dehꞈ yaꞈ-euˬ loꞈ-ehˇ naw maꞈ caw teh-awˇ dehꞈ-eu miˇ neh, luˬ-iˇ seˇ-iˇ-eu jeˬ naw maꞈ kʼoeˇ taˆ ngaˇ bi keuˆ le-awˇ, yawˬ gʼaˬ na luꞈ naw maꞈ-ahˇ yehˬ bawˬ sehˇ lu-ehˇ ehˇ niˇ gʼa tehꞈ-a. Aˬ cawˬ tsawˇ jeuˬ deuˬ naw maꞈ-ahˇ ja bu ja doeˇ tehꞈ-a.”

Zaˬkaˬliˇ 7:11

“Ehˇ kʼawꞈ, ngaˬ-euˬ tsawˇ haˬ deuˬ nui ma gʼahˇ-awˇ, maˬ naˇ haˬ geuꞈ-ehˇ, naˬ bawˇ dehˬ tsoeˬ taˬ-euˬ meh.

Dawˬmehˬ 29:19

Iˬ nah heu gaˇ yawꞈ luꞈ-eu tsawˇ haˬ deuˬ laꞈ kʼoeˇ, dawˬ ma saˇ jaˇ heu-ahˇ ya gaˬ gʼaˬ-euˬ kʼawꞈ, nui ma gʼahˇ-eu laꞈ kʼoeˇ, yawˬ ha kʼaˇ dehꞈ mawꞈ-eu loꞈ-ehˇ dehꞈ kʼawꞈ yaw muiˬ paˬ-ehˇ ya dehꞈ dzaˬ tehꞈ-a lehˇ tsawˇ haˬ tiˬ gʼaˬ-iˬ maˬ ya noeˬ ni yaw kʼaˆ kʼaˆ-ehˇ yahˇ-awˬ. Kʼoeˇ loꞈ-ehˇ noeˬ-eu jeˬ-aˬ, naw maꞈ dawˬ tawˆ luꞈ-ahˇ yaw muiˬ yaw doeˇ maˬ tseˇ ni, laˆ luˬ laˆ seˇ-eu jeˬ bi keuˆ le tehꞈ-a.