Yeˬlaˬmiˇ 32:21 - Akha

²¹ Zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ mˇ-eu laꞈ kʼoeˇ, nga maꞈ-ahˇ muiˇ-eu deuˬ-ahˇ nawˇ laˆ guˆ nehˬ-awˇ, nawˬ-euˬ baoˬ-ahˇ gʼoe-eu laꞈ kʼoeˇ, nawˬ-euˬ tsawˇ jeuˬ Iˇsaˬleˬlaˆ tsawˇ haˬ deuˬ-ahˇ, Iˇjiˇtuˆ miˇ kʼahˬ laꞈ kʼoeˇ neh nawˇ sheuˬ doˆ nehˬ-euˬ meh.

Yeˬlaˬmiˇ 32:21 ပူးပေါင်းရင်းမြစ်များ

Dawˬmehˬ 26:8

Aˬ yawꞈ-euˬ huiˬ dui dui-eu baoˬ hawˇ-eu gʼaˬ-ahˇ gʼoe-awˇ, Iˇjiˇtuˆ miˇ kʼahˬ laꞈ kʼoeˇ neh nga maꞈ-ahˇ ka kʼoꞈ doˆ nehˬ laꞈ-euˬ meh. Kʼaˆ jeˬ-ehˇ gʼeh-eu jeˬ hawˇ-eu zahˬ leˇ paˬ-ehˇ gʼeh-eu jeˬ aˬ yawꞈ mˇ-awˇ, guˆ dui dui laˇ paˬ-ehˇ gʼeh-eu jeˬ bi pyeuꞈ doˆ laˇ-euˬ meh.

Doˆ-iˇ 6:6

Kʼoeˇ miˇ neh, ngaˇ heu loꞈ-ehˇ ehˇ-eu meh lehˇ, Iˇsaˬleˬlaˆ tsawˇ haˬ deuˬ-ahˇ ehˇ nehˬ-awˬ. Ngaˇ-aˬ, Sahˬpaˬ Miˬyehˇ ma. Iˇjiˇtuˆ tsawˇ haˬ deuˬ-euˬ laꞈ oˆ zaˬ kʼaˆ ya geuꞈ-eu laꞈ kʼoeˇ ngaˇ naw maꞈ-ahˇ bi buˬ-iˇ ma. Baoˬ ahˇ-eu ngaˬ-euˬ aˬ laꞈ cawˬ doˆ-awˇ, aˬ yawꞈ maꞈ kʼoeˇ taˆ guˆ dui dui laˇ paˬ-ehˇ gʼeh-eu kʼehˬ-eu kʼaˆ-eu jeˬ bi keuˆ le-eu laꞈ kʼoeˇ, naw maꞈ-ahˇ ngaˇ ka kʼoꞈ ma.

Jaceuq 105:43

Aˬ yawꞈ neh tseˇ doˆ-euˬ tsawˇ jeuˬ-ahˇ kʼoeˇ loꞈ-ehˇ sheuˬ doˆ gʼeh-awˇ, aˬ yawꞈ maꞈ laˬ kʼaˬ cehˇ-awˇ caˇ dawˬ caˇ-euˬ meh.

Jaceuq 105:37

Kʼoeˇ naˇ, Iˇsaˬleˬlaˆ tsawˇ jeuˬ-ahˇ aˬ yawꞈ sheuˬ doˆ gʼeh-awˇ, pyuˇ hawˇ-eu shuiˇ tawˬ-awˇ doˆ-iˇ-euˬ meh. Aˬ yawꞈ maꞈ dawˬ tawˆ luꞈ gʼoeˇ mˇ-awˇ gʼaˬ ahˇ-eu meh.

1 Laˬsaˬbaˬ 17:21

Aˬ cawˬ tsawˇ jeuˬ-euˬ zaˬ kʼaˆ ya geuꞈ luꞈ ngeh, nawˬ-euˬ tsawˇ jeuˬ bi pyeuꞈ laˇ-eu lehˇ, nawˬ neh ka kʼoꞈ nehˬ-euˬ Iˇsaˬleˬlaˆ tsawˇ jeuˬ-ahˇ duˇ-eu tsawˇ jeuˬ, miˇ tsaˬ kʼoeˇ taˆ maˬ jawˇ-a. Nawˬ neh aˬ yawꞈ maꞈ gʼaˇ duˬ mˇ-euˬ huiˬ dui dui-eu gaˇ deuˬ hawˇ-eu, zahˬ leˇ dui dui paˬ-ehˇ gʼeh-eu gaˇ deuˬ baˬ da neh, miˇ tsaˬ kʼoeˇ taˆ nawˇ tsawˇ myahˇ doˆ luꞈ meh. Nawˬ-euˬ tsawˇ jeuˬ-ahˇ Iˇjiˇtuˆ miˇ kʼahˬ laꞈ kʼoeˇ neh nawˇ ka kʼoꞈ doˆ nehˬ laꞈ-awˇ, nawˬ-euˬ tsawˇ jeuˬ le luꞈ-eu gaˇ ma tiˬ kahˇ mehˬ hu, aˬ cawˬ tsawˇ jeuˬ deuˬ-ahˇ nawˇ teh dzeh nehˬ-euˬ meh.

Dawˬmehˬ 4:34

Naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ neh Iˇjiˇtuˆ miˇ kʼahˬ laꞈ kʼoeˇ jahˇ-euˬ loꞈ-ehˇ, aˬ cawˬ tsawˇ jeuˬ-euˬ uˬ moˆ jawˇ-eu tsawˇ jeuˬ tiˬ jeuˬ-ahˇ aˬ yawꞈ-euˬ tsawˇ haˬ bi pyeuꞈ laˇ-eu lehˇ sheuˬ doˆ laˬ-iˇ peuˬ-eu miˬ yehˇ nui gʼaˬ jawˇ meh loˇ. Naw maꞈ-euˬ myaˆ kʼeh aˬ yawꞈ-euˬ huiˬ-eu baoˬ hawˇ-eu gʼaˬ-ahˇ zmˬ-awˇ, shaˬ zahˬ naˇ gawˇ maˬ ehˇ, guiˇ deuˆ-eu jeˬ maˬ ehˇ, zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ maˬ ehˇ, guˆ dui dui laˇ paˬ-ehˇ gʼeh-eu jeˬ maˬ ehˇ, aˬ yawꞈ bi keuˆ le-euˬ meh.

Doˆ-iˇ 13:14

Mehˬ hu paw dehꞈ daˆ leꞈ ngeh, ‘Bawˬ-iˬ heu hmˬ-euˬ dawˬ tsuiꞈ aˬ jeˬ-a’ lehˇ, naw maꞈ-euˬ aˬ li deuˬ naw maꞈ-ahˇ naˇ haˬ laˇ naˇ, heu loꞈ-ehˇ ehˇ kʼoꞈ nehˬ-awˬ. ‘Iˇjiˇtuˆ miˇ kʼahˬ laꞈ kʼoeˇ, nga maꞈ aˬ cawˬ zaˬ kʼaˆ geuꞈ luꞈ ngeh, Sahˬpaˬ Miˬyehˇ-aˬ, aˬ yawꞈ-euˬ huiˬ-eu baoˬ-ahˇ gʼoe-awˇ, nga maꞈ-ahˇ sheuˬ doˆ nehˬ laꞈ-euˬ meh.,

Doˆ-iˇ 13:9

Bawˬ-iˬ heu hmˬ-aˬ, naw maꞈ-euˬ laꞈ du-ahˇ maˬ ehˇ, naˇ kʼawˇ-ahˇ maˬ ehˇ, laꞈ tuiˆ paꞈ taˬ-euˬ loꞈ-ehˇ, tiˬ jawˇ-iˬ maˬ ngehˇ leˇ ni noeˬ mawˇ-eu jeˬ pyeuꞈ tehꞈ-a. Bawˬ-iˬ heu hmˬ-aˬ, Sahˬpaˬ Miˬyehˇ-euˬ Zahˇ dawˬ kʼoꞈ dawˬ-ahˇ maˬ tsehˆ leˇ ni gui poˆ-awˇ dzaw geuꞈ-eu gʼaˇ duˬ, naw maꞈ maˬ ya ngehˇ ni, bi noeˬ mawˇ-eu jeˬ pyeuꞈ tehꞈ-a. Aˬ jeˬ miˇ neh ehˇ naˇ, Sahˬpaˬ Miˬyehˇ-aˬ, aˬ yawꞈ-euˬ huiˬ-eu baoˬ-ahˇ gʼoe-awˇ, naw maꞈ-ahˇ Iˇjiˇtuˆ miˇ kʼahˬ laꞈ kʼoeˇ neh sheuˬ doˆ nehˬ-euˬ meh.

Doˆ-iˇ 6:1

Kʼoeˇ ngeh, Moˇseˬ-ahˇ Sahˬpaˬ Miˬyehˇ ehˇ nehˬ-eu, “Sahˬ paˬ kʼoeˇ gʼaˬ-ahˇ ngaˇ aˬ joˆ-ehˇ jahˇ nehˬ-eu lehˇ gʼeh-eu gaˇ kawˆ, nymˬ-mˇ nawˇ ya mawˇ tehꞈ-a. Ngaˬ-euˬ tsawˇ haˬ-ahˇ maˬ pyehˬ nehˬ-ehˇ maˬ jawˇ tehˬ coeˇ ngeh keuˆ ni aˬ yawꞈ-ahˇ ngaˇ jahˇ nehˬ ma. Aˬ diˇ aˬ maˇ, aˬ yawꞈ maꞈ-ahˇ miˇ kʼahˬ heu kʼahˬ laꞈ kʼoeˇ neh ya teh doˆ gaˇ keuˆ ni, aˬ yawꞈ-ahˇ ngaˇ jahˇ nehˬ ma.”

Dawˬmehˬ 7:19

Naw maꞈ-euˬ myaˆ-ahˇ ya mawˇ duˬ-euˬ guˆ dui dui laˇ paˬ-ehˇ gʼeh-eu jeˬ, zahˬ leˇ paˬ-ehˇ gʼeh-eu jeˬ hawˇ-eu kʼaˆ jeˬ-ehˇ gʼeh-eu jeˬ, huiˬ-eu baoˬ hawˇ-eu gʼaˬ, heu deuˬ-ahˇ gʼoe-awˇ, naw maꞈ-euˬ Miˬyehˇ pyeuꞈ-eu Sahˬpaˬ Miˬyehˇ naw maꞈ-ahˇ bi buˬ-iˇ laꞈ-euˬ gaˇ noeˬ keuˆ-awˬ. Iˇjiˇtuˆ tsawˇ haˬ deuˬ-ahˇ aˬ yawꞈ laˆ luˬ laˆ seˇ nehˬ-euˬ loꞈ-ehˇ, iˬ nah naw maꞈ guˆ luꞈ-eu tsawˇ haˬ dawˬ tawˆ luꞈ-ahˇ aˬ yawꞈ laˆ luˬ laˆ seˇ nehˬ tehꞈ-a.

2 Saˬmeuˬlaˆ 7:23

Nawˬ-euˬ tsawˇ jeuˬ bi pyeuꞈ laˇ-eu gʼaˇ duˬ, aˬ cawˬ tsawˇ jeuˬ-euˬ zaˬ kʼaˆ geuꞈ luꞈ ngeh nawˬ neh ka kʼoꞈ nehˬ laꞈ-euˬ Iˇsaˬleˬlaˆ tsawˇ jeuˬ-ahˇ duˇ-eu tsawˇ jeuˬ tiˬ jeuˬ-iˬ, miˇ tsaˬ kʼoeˇ taˆ maˬ jawˇ-a. Nawˬ neh aˬ yawꞈ maꞈ gʼaˇ duˬ mˇ-euˬ, huiˬ dui dui-eu gaˇ deuˬ hawˇ-eu, zahˬ leˇ paˬ-ehˇ gʼeh-eu gaˇ deuˬ baˬ da neh, miˇ tsaˬ kʼoeˇ taˆ nawˬ-euˬ tsawˇ myahˇ doˆ luꞈ meh. Nawˬ-euˬ tsawˇ jeuˬ bi pyeuꞈ laˇ-eu gʼaˇ duˬ, Iˇjiˇtuˆ miˇ kʼahˬ laꞈ kʼoeˇ nawˬ neh ka kʼoꞈ doˆ laꞈ-euˬ tsawˇ haˬ deuˬ mehˬ hu paw laˇ luꞈ ngeh, aˬ cawˬ tsawˇ jeuˬ hawˇ-eu aˬ yawꞈ maꞈ-euˬ miˬyehˇ deuˬ-ahˇ nawˇ teh dzeh-euˬ meh.

Doˆ-iˇ 3:20

Ehˇ kʼawꞈ, baoˬ zmˬ-awˇ, guˆ laˇ paˬ-ehˇ gʼeh-eu jeˬ mˇ-eu laꞈ kʼoeˇ, Iˇjiˇtuˆ miˇ kʼahˬ-ahˇ ngaˇ kʼehˬ nehˬ ma. Kʼoeˇ ngeh, aˬ yawꞈ naw maꞈ-ahˇ pyehˬ nehˬ laꞈ tehꞈ-a.

Dawˬmehˬ 11:3

Aˬ yawꞈ neh mˇ-euˬ zahˬ leˇ paˬ-ehˇ gʼeh-eu jeˬ-ahˇ kʼawꞈ, naw maꞈ ya mawˇ-euˬ meh. Iˇjiˇtuˆ sahˬpaˬ hawˇ-eu aˬ yawꞈ-euˬ miˇ kʼahˬ kʼahˬ lah ni kʼoeˇ taˆ mˇ nehˬ-euˬ jeˬ-ahˇ kʼawꞈ, naw maꞈ ya mawˇ-euˬ meh.

Iˇsaˬyaˇ 63:12

Aˬ yawꞈ-euˬ baoˬ zmˬ-awˇ Moˇseˬ-ahˇ gʼoe-eu laꞈ kʼoeˇ, mˬ maˬ maˬ byaˆ zaˇ ziˇ aˬ yawꞈ tsawˇ myahˇ doˆ ni, aˬ yawꞈ maꞈ-euˬ mehˬ shi laˆ shaˆ iˇ cuꞈ dehˬ paˆ doˆ-euˬ, Sahˬpaˬ Miˬyehˇ aˬ gaˇ jawˇ ta.