Yeˬlaˬmiˇ 24:9 - Akha

⁹ Guˆ dui dui laˇ paˬ-ehˇ gʼeh-eu shaˬ-eu zahˬ-eu jeˬ aˬ yawꞈ maꞈ kʼoeˇ taˆ ngaˇ bi keuˆ le-eu miˇ neh, miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ guˆ-iˇ tehꞈ-a. Aˬ yawꞈ maꞈ-ahˇ aˬ cawˬ ja bu ja doeˇ-awˇ, kʼaˇ ehˇ mawꞈ-eu jeˬ ehˇ niˇ gʼa-eu uˬ taꞈ, ngaˬ neh aˬ yawꞈ maꞈ-ahˇ kʼaˇ teh byaˆ-euˬ jawˇ duˬ laꞈ kʼoeˇ, aˬ cawˬ yaˬ kʼehˇ yaˬ ngeh, aˬ yawꞈ maꞈ-euˬ tsawˇ myahˇ-ahˇ dawˬ daˬ daˬ-awˇ yaˬ tehꞈ-a.

Yeˬlaˬmiˇ 24:9 ပူးပေါင်းရင်းမြစ်များ

1 Sahˬpaˬ 9:7

ngaˬ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ-ahˇ, ngaˬ neh biꞈ taˬ-euˬ miˇ kʼahˬ laꞈ kʼoeˇ maˬ paˇ bi jawˇ ma. Ngaˬ-ahˇ uˬ duˬ tahˬ-eu jawˇ duˬ bi pyeuꞈ-eu gʼaˇ duˬ, ngaˬ neh bi muiˬ bi shawˇ laˇ-euˬ Uˬ duˬ tahˬ nymˇ nymˇ ma heu nymˇ-ahˇ kʼawꞈ, ngaˇ byehˇ dzeh yaꞈ ma. Yawˬ gaˇ na luꞈ jawˇ-eu tsawˇ haˬ deuˬ Iˇsaˬleˬlaˆ tsawˇ haˬ-ahˇ yehˬ bawˬ-ehˇ ehˇ niˇ gʼa-awˇ, yaw zeu maˬ baw ni ja bu ja doeˇ tehꞈ-a.

2 Laˬsaˬbaˬ 7:20

ngaˬ neh naw maꞈ-ahˇ biꞈ taˬ-euˬ miˇ kʼahˬ heu kʼahˬ laꞈ kʼoeˇ neh naw maꞈ-ahˇ ngaˇ teh dzeh-awˇ, ngaˬ-ahˇ uˬ duˬ tahˬ-eu jawˇ duˬ bi pyeuꞈ-eu gʼaˇ duˬ ngaˬ neh mˇ shawˇ taˬ-euˬ Uˬ duˬ tahˬ nymˇ nymˇ ma heu nymˇ-ahˇ ngaˇ byehˇ dzeh ma. Uˬ duˬ tahˬ nymˇ nymˇ ma heu nymˇ-ahˇ tsawˇ jeuˬ dawˬ tawˆ luꞈ ja bu ja doeˇ-awˇ, kʼaˇ jahˇ mawꞈ-eu jahˇ tehꞈ-a.

Jaceuq 69:11

Noeˬ shaˬ-eu deuˬ dm-eu guˬ daˇ pehˇ zeuˇ mehˬ tsoeˬ ngaˇ dm ngeh, aˬ yawꞈ maꞈ ngaˬ-ahˇ uiˇ-eu meh.

Iˇsaˬyaˇ 43:28

Ngaˬ-euˬ muiˬ-eu shawˇ-eu jawˇ duˬ kʼoeˇ tsahˇ, naw maꞈ-euˬ sahˬ paˬ sahˬ ma neh laˆ jawꞈ-euˬ meh. Kʼoeˇ baˬ da neh Iˇsaˬleˬlaˆ-ahˇ ngaˇ, luˬ-iˇ seˇ-iˇ-eu jeˬ bi keuˆ le-awˇ, aˬ cawˬ yehˬ bawˬ sehˇ lu-ehˇ gʼeh-eu jeˬ, ngaˬ-euˬ tsawˇ jeuˬ kʼoeˇ taˆ ngaˇ bi keuˆ le-euˬ ma.”

Iˇsaˬyaˇ 65:15

Ngaˬ neh tseˇ doˆ-euˬ deuˬ yaˬ kʼehˇ yaˬ ngeh, naw maꞈ-euˬ tsawˇ myahˇ zmˬ tehꞈ-a. Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ, shiˇ-eu jeˬ-ahˇ naw maꞈ kʼoeˇ taˆ bi keuˆ le ma. Ehˇ kʼawꞈ, ngaˬ-euˬ ehˇ dawˬ naˇ haˬ geuꞈ-eu deuˬ-ahˇ, tsawˇ myahˇ yaw shuiꞈ myahˇ paˇ nehˬ ma.

Yeˬlaˬmiˇ 15:4

Maˬnaˇseˬ-euˬ aˬ li Heˬsaˬgiˇ gʼaˬ Yuˇdaˆ miˇ kʼahˬ-ahˇ uˆ lahˇ ngeh, Yeˬluˇsaˬlehˬ meuˬ-ahˇ aˬ yawꞈ neh mˇ yaꞈ-eu jeˬ baˬ da neh, miˇ tsaˬ kʼoeˇ taˆ jawˇ-eu tsawˇ haˬ dawˬ tawˆ luꞈ guˆ-iˇ ni, aˬ yawꞈ maꞈ-ahˇ ngaˇ jahˇ nehˬ ma.”

Yeˬlaˬmiˇ 19:8

Kʼaˇ iˇ kʼaˇ laˇ tsehˆ-eu deuˬ tsawˬ guˆ-iˇ-awˇ zahˬ leˇ paˬ-ehˇ, meuˬ heu meuˬ kʼoeˇ taˆ guˆ dui dui laˇ paˬ-ehˇ gʼeh-eu luˬ-iˇ seˇ-iˇ-eu jeˬ ngaˇ bi keuˆ le ma.

Yeˬlaˬmiˇ 25:18

Yeˬluˇsaˬlehˬ meuˬ hawˇ-eu Yuˇdaˆ miˇ kʼahˬ laꞈ kʼoeˇ jaˆ-eu meuˬ deuˬ dawˬ tawˆ luꞈ, aˬ yawꞈ maꞈ-euˬ sahˬ paˬ hawˇ-eu sahˬ paˬ sahˬ ma kʼaˇ geuꞈ luꞈ-eu deuˬ dawˬ tawˆ luꞈ nehˬ-ehˇ tiˬ kawˆ loꞈ-ehˇ, kʼmˬ maˬ kʼoeˇ kʼmˬ ya ciˬ dawˇ-euˬ meh. Meuˬ kʼoeˇ deuˬ dawˬ tawˆ luꞈ, kʼaˇ shuiꞈ deh yaˇ bawˇ tsahˬ bawˇ dahˇ loꞈ-ehˇ pyeuꞈ-iˇ-awˇ, tsawˬ guˆ-iˇ paˬ-ehˇ jaˆ ni maˬ ehˇ, nymˬ-mˇ aˬ yawꞈ maꞈ yaˬ kʼehˇ yaˬ ngeh ehˇ-eu loꞈ-ehˇ, aˬ cawˬ yaˬ kʼehˇ yaˬ ngeh, aˬ yawꞈ maꞈ-euˬ tsawˇ myahˇ zmˬ-awˇ yaˬ kʼehˇ yaˬ ni maˬ ehˇ, aˬ yawꞈ maꞈ kʼmˬ maˬ kʼoeˇ kʼmˬ ya ciˬ dawˇ-euˬ jeˬ pyeuꞈ-eu meh.

Yeˬlaˬmiˇ 26:6

Naw maꞈ kʼoeˇ loꞈ-ehˇ maˬ naˇ haˬ ni jawˇ te lehˇ ngeuˇ naˇ, Shiˇloˬ meuˬ-ahˇ jahˇ nehˬ-euˬ loꞈ-ehˇ, Uˬ duˬ tahˬ nymˇ nymˇ ma heu nymˇ-ahˇ ngaˇ jahˇ nehˬ-awˇ, miˇ tsaˬ tsawˇ jeuˬ dawˬ tawˆ luꞈ yaˬ kʼehˇ kʼaˇ yaˬ ngeh, meuˬ heu meuˬ-euˬ tsawˇ myahˇ-ahˇ dawˬ daˬ daˬ-awˇ yaˬ gaˇ keuˆ tehꞈ-a.”

Yeˬlaˬmiˇ 29:18

Guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ aˬ yawꞈ maꞈ-ahˇ ngaˇ ciˬ tehˬ nehˬ-awˇ miˇ tsaˬ kʼoeˇ taˆ kʼaˇ jawˇ-eu tsawˇ jeuˬ dawˬ tawˆ luꞈ, kʼoeˇ gaˇ ya mawˇ ngeh guˆ dui dui-iˇ tehꞈ-a. Aˬ yawꞈ maꞈ-ahˇ ngaˬ neh teh byaˆ-awˇ kʼaˇ bi jawˇ-euˬ jawˇ duˬ-ahˇ, aˬ yawꞈ maꞈ kʼoeˇ taˆ keuˆ le-euˬ jeˬ-ahˇ ya mawˇ ngeh, aˬ cawˬ laˇ baˇ-iˇ tehꞈ-a. Aˬ cawˬ aˬ yawꞈ maꞈ-ahˇ ja bu ja doeˇ-awˇ, yaˬ kʼehˇ yaˬ ngeh aˬ yawꞈ maꞈ-euˬ tsawˇ myahˇ kuˇ-awˇ yaˬ tehꞈ-a.

Yeˬlaˬmiˇ 29:22

Yeˬluˇsaˬlehˬ meuˬ-ahˇ neh Baˬbuˇloˬ miˇ kʼahˬ-ahˇ bi nyehꞈ daˆ gʼeh -euˬ tsawˇ haˬ deuˬ, aˬ cawˬ-ahˇ yaˬ kʼehˇ yaˬ ngeh, Baˬbuˇloˬ sahˬ paˬ neh yaw dehꞈ-ehˇ bi tehˬ ba-euˬ Zeˬdaˬkiˇ hawˇ-eu Aˬkaˆ aˬ nyaꞈ loꞈ-ehˇ, Sahˬpaˬ Miˬyehˇ nawˬ-ahˇ jahˇ nehˬ luꞈ-uˇ lehˇ ehˇ-awˇ yaˬ tehꞈ-a.

Yeˬlaˬmiˇ 34:17

Kʼoeˇ miˇ neh, naw maꞈ ngaˬ-euˬ ehˇ dawˬ maˬ naˇ haˬ nga lehˇ, Sahˬpaˬ Miˬyehˇ pyeuꞈ-eu ngaˇ ehˇ-eu ma. Naw maꞈ-euˬ tsawˇ jeuˬ pyeuꞈ-eu Iˇsaˬleˬlaˆ tsawˇ haˬ deuˬ-ahˇ naw maꞈ maˬ pyehˬ nehˬ-a. Muiˬ tehꞈ-a. Ngaˇ naw maꞈ-ahˇ pyehˬ-awˇ, naw maꞈ-euˬ nui noeˬ bi dehꞈ ma. Ngaˇ naw maꞈ-ahˇ pyehˬ nehˬ-awˇ, guiˇ deuˆ-eu jeˬ, naˇ-eu gawˇ-eu jeˬ hawˇ-eu, mehꞈ-eu shuꞈ-eu jeˬ laꞈ kʼoeˇ bi shiˇ jiˇ ma. Ngaˬ neh naw maꞈ-ahˇ jahˇ nehˬ-euˬ jeˬ-ahˇ tsawˇ jeuˬ yawˬ jeuˬ na luꞈ tsawˬ guˆ-iˇ ngeh keuˆ ni ngaˇ mˇ ma.

Yeˬlaˬmiˇ 42:18

“Iˇsaˬleˬlaˆ-euˬ Miˬyehˇ pyeuꞈ-eu Sahˬpaˬ Miˬyehˇ heu loꞈ-ehˇ ehˇ-eu meh. ‘Ngaˇ nui ma pehˇ dui dui-eu jeˬ Yeˬluˇsaˬlehˬ meuˬ kʼoeˇ taˆ tahˬ daˆ nehˬ-euˬ loꞈ-ehˇ, naw maꞈ Iˇjiˇtuˆ miˇ kʼahˬ-ahˇ iˇ naˇ, naw maꞈ kʼoeˇ taˆ kʼawꞈ paˇ tahˬ daˆ nehˬ ma. Guˆ dui dui laˇ paˬ-ehˇ gʼeh-eu jeˬ naw maꞈ kʼoeˇ taˆ keuˆ le tehꞈ-a. Aˬ cawˬ naw maꞈ-ahˇ yahˬ caˆ neh juiꞈ-awˇ, naw maꞈ-euˬ tsawˇ myahˇ -ahˇ kuˇ kuˇ-ehˇ yaˬ kʼehˇ yaˬ tehꞈ-a. Jawˇ duˬ heu tsahˇ-ahˇ naw maꞈ maˬ paˇ ya gʼoꞈ mawˇ haw laˇ-aˇ’ lehˇ ehˇ-eu meh.”

Yeˬlaˬmiˇ 44:12

Baˬbuˇloˬ miˇ kʼahˬ-ahˇ maˬ bi nyehꞈ daˆ gʼeh ni dzeˇ yaꞈ-euˬ, Iˇjiˇtuˆ miˇ kʼahˬ-ahˇ jawˇ-iˇ ma lehˇ noeˬ tsehˆ taˬ-euˬ Yuˇdaˆ tsawˇ haˬ kʼoeˇ deuˬ dawˬ tawˆ luꞈ, ya luˬ ya seˇ-iˇ jiˇ tehꞈ-a. Aˬ yawꞈ maꞈ huiˬ zaˬ nyiˇ zaˬ dawˬ tawˆ luꞈ, Iˇjiˇtuˆ miˇ kʼahˬ laꞈ kʼoeˇ, guiˇ deuˆ-eu baˬ da neh maˬ ngeuˇ naˇ, mehꞈ-eu shuꞈ-eu baˬ da neh ya shiˇ jiˇ tehꞈ-a. Aˬ yawꞈ maꞈ kʼoeˇ taˆ guˆ dui dui laˇ paˬ-ehˇ gʼeh-eu jeˬ keuˆ le tehꞈ-a. Aˬ cawˬ tsawˇ jeuˬ aˬ yawꞈ maꞈ-ahˇ ja bu ja doeˇ-awˇ, aˬ yawꞈ maꞈ-euˬ tsawˇ myahˇ-ahˇ gʼoe gʼoe-ehˇ yaˬ kʼehˇ yaˬ tehꞈ-a.

Yeˬlaˬmiˇ 44:13

Yeˬluˇsaˬlehˬ meuˬ-ahˇ jawˇ-eu tsawˇ haˬ deuˬ-ahˇ ngaˬ neh kʼehˬ nehˬ gʼaˬ-euˬ loꞈ-ehˇ, Iˇjiˇtuˆ miˇ kʼahˬ laꞈ kʼoeˇ jawˇ-eu tsawˇ haˬ deuˬ-ahˇ kʼawꞈ, guiˇ deuˆ-eu jeˬ, mehꞈ-eu shuꞈ-eu jeˬ hawˇ-eu, naˇ-eu gawˇ-eu jeˬ laꞈ kʼoeˇ ngaˇ kʼehˬ nehˬ ma.

Yeˬlaˬmiˇ 44:22

Iˬ nah naw maꞈ-euˬ miˇ kʼahˬ cawˆ-iˇ-awˇ, tsawˇ haˬ tiˬ gʼaˬ-iˬ maˬ jawˇ-ehˇ, guˆ dui dui laˇ paˬ-ehˇ pyeuꞈ-iˇ taˬ-euˬ miˇ neh, aˬ cawˬ yaˬ kʼehˇ yaˬ ngeh tsawˇ myahˇ kuˇ duˬ pyeuꞈ-iˇ-euˬ maˬ ngeuˇ-a loˇ. Naw maꞈ neh mˇ-euˬ yaw haiˬ jeˬ hawˇ-eu maˬ muiˬ maˬ jaˬ-eu jeˬ-ahˇ, Sahˬpaˬ Miˬyehˇ maˬ oˇ coeˇ laˇ-euˬ miˇ neh, kʼoeˇ loꞈ-ehˇ bi keuˆ le-euˬ maˬ ngeuˇ nga loˇ.

Yeˬsaˬgeˬlaˇ 23:46

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh. “Aˬ yawꞈ nyaꞈ-ahˇ bi laˆ guˆ-awˇ tahˇ joe bi joe-eu tsawˇ haˬ tiˬ muˇ sheuˬ leꞈ-awˬ.

Yeˬsaˬgeˬlaˇ 25:3

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ heu loꞈ-ehˇ ehˇ gaˇ naˇ haˬ-awˬ lehˇ, aˬ yawꞈ maꞈ-ahˇ ehˇ nehˬ-awˬ. Ngaˬ-euˬ uˬ duˬ tahˬ nymˇ nymˇ ma jawꞈ-iˇ-euˬ gaˇ maˬ ehˇ, Iˇsaˬleˬlaˆ miˇ kʼahˬ cawˆ-iˇ-awˇ ciˬ cuˇ ni jaˆ gaˇ maˬ ehˇ, Yuˇdaˆ tsawˇ haˬ deuˬ aˬ cawˬ miˇ kʼahˬ-ahˇ bi nyehꞈ byoˆ gʼeh gaˇ maˬ ehˇ, naw maꞈ mawˇ ngeh laˬ kʼaˬ cehˇ-euˬ meh.

Yeˬsaˬgeˬlaˇ 26:2

“Tsawˇ haˬ zaˬ-oˇ, Duˇlu meuˬ-ahˇ jawˇ-eu tsawˇ haˬ deuˬ laˬ kʼaˬ cehˇ-awˇ, heu loꞈ-ehˇ guˇ luꞈ meh. ‘Yeˬluˇsaˬlehˬ meuˬ pyaˆ-iˇ gʼaˬ meh. Aˬ yawꞈ jeˬ gaꞈ jeˬ ka maˬ paˇ gʼeh nya ehˇ, aˬ dui tehꞈ-ehˇ nui kʼahˇ tiˬ shiˇ ya gaꞈ ya ka-eu ngaˇ’ lehˇ guˇ luꞈ meh.

Yeˬsaˬgeˬlaˇ 5:8

Kʼoeˇ miˇ neh, ngaˇ nawˬ-ahˇ muiˇ-eu ma lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma. Tsawˇ jeuˬ dawˬ tawˆ luꞈ mehˬ shi, nawˬ-ahˇ ngaˇ yaˇ kʼaˬ daˇ ma.

Dawˬmehˬ 28:25

“Nawˬ-ahˇ muiˇ-eu deuˬ nawˬ-ahˇ gʼaˬ leˇ ni Sahˬpaˬ Miˬyehˇ jahˇ tehꞈ-a. Naw maꞈ dawˬ tawˆ luꞈ tiˬ paw dzeˇ neh tehꞈ-ehˇ iˇ-awˇ aˬ yawꞈ maꞈ-ahˇ guiˇ deuˆ-iˇ kʼawꞈ, teu paw heu paw ehˇ tsaˬ maˬ siˬ ni ya cehˆ byaˆ-awˇ, naw maꞈ kʼoeˇ taˆ keuˆ le teuˇ le-eu jeˬ-ahˇ ya mawˇ ngeh, miˇ tsaˬ kʼoeˇ taˆ jawˇ-eu tsawˇ haˬ dawˬ tawˆ luꞈ tsawˬ guˆ-iˇ dui dui tehꞈ-a.

Dawˬmehˬ 28:37

Sahˬpaˬ Miˬyehˇ neh naw maꞈ-ahˇ bi cehˆ byaˆ-euˬ miˇ kʼahˬ-ahˇ jawˇ-eu tsawˇ haˬ deuˬ, naw maꞈ kʼoeˇ taˆ kʼoeˇ loꞈ-ehˇ keuˆ le-euˬ gaˇ ya mawˇ ngeh, tsawˬ guˆ-iˇ dui dui tehꞈ-a. Naw maꞈ gaˇ kawˆ aˬ yawꞈ maꞈ ja uiˇ niˇ gʼa-awˇ, naw maꞈ-ahˇ ja bu ja doeˇ tehꞈ-a.