Yeˬlaˬmiˇ 23:6 - Akha

⁶ Aˬ yawꞈ sahˬ paˬ pyeuꞈ laˇ ngeh, Yuˇdaˆ tsawˇ haˬ deuˬ guˆ kʼaˇ maˬ za-ehˇ, Iˇsaˬleˬlaˆ tsawˇ haˬ deuˬ kʼawꞈ nui saˇ oꞈ tehꞈ-a. Aˬ yawꞈ-ahˇ, ‘Nga maꞈ-ahˇ ka kʼoꞈ-eu Sahˬpaˬ Miˬyehˇ’ lehˇ kuˇ tehꞈ-a.”

Yeˬlaˬmiˇ 23:6 ပူးပေါင်းရင်းမြစ်များ

1 Sahˬpaˬ 4:25

Aˬ yawꞈ kʼaˇ dehꞈ kʼoeˇ keuˆ ni, Yuˇdaˆ miˇ kʼahˬ hawˇ-eu Iˇsaˬleˬlaˆ miˇ kʼahˬ laꞈ kʼoeˇ, Daˬ meuˬ-ahˇ neh Beˬlaˇsheˬba meuˬ-ahˇ keuˆ ni kʼaˇ jawˇ-eu tsawˇ haˬ dawˬ tawˆ luꞈ, yawˬ ha-euˬ aˬ gaꞈ yaˇ kmˇ hawˇ-eu siˬ guˬ guˬ yaˇ baw baw-ehˇ, saˇ lehˆ ni dehꞈ dzaˬ-euˬ meh.

Jaceuq 45:5

Nawˬ-euˬ kaˆ myaˬ taˆ dui dui-awˇ, muiˇ-eu deuˬ-euˬ nui ma-ahˇ beuˆ tsoˆ-eu laꞈ kʼoeˇ, aˬ cawˬ tsawˇ jeuˬ deuˬ nawˬ-euˬ aˬ kuiˇ dawˬ peh ya coˬ lah tehꞈ-a.

Doˆ-iˇ 9:26

Uˬ yehˇ aˇ siˬ maˬ ga le-euˬ pehˇ tsahˇ-aˬ, Iˇsaˬleˬlaˆ tsawˇ haˬ deuˬ jawˇ-eu Goˬsheˬ miˇ tsaˬ tiˬ tsahˇ jaˆ-eu tehꞈ meh.

Iˇsaˬyaˇ 2:4

Miˇ kʼahˬ tsawˇ jeuˬ yaw kaˬ-ahˇ aˬ yawꞈ yaˇ kʼaˬ daˇ-awˇ, miˇ tsaˬ zaˬ-ahˇ aˬ yawꞈ laˆ tsaˬ laˆ tsahˇ nehˬ tehꞈ-a. Guiˇ deuˆ-eu mi cehˇ-ahˇ aˬ yawꞈ maꞈ nyoˬ tsehˬ tehˆ pyeuꞈ-awˇ, guiˇ deuˆ-eu gahˬ-ahˇ yehˬ kʼoꞈ tehˆ pyeuꞈ tehꞈ-a. Tsawˇ jeuˬ tiˬ jeuˬ tiˇ jeuˬ guiˇ maˬ paˇ deuˆ-ehˇ, guiˇ deuˆ-eu gaˇ kawˆ maˬ mehˬ maˬ sawˇ ni byehˇ tehꞈ-a.

Iˇsaˬyaˇ 32:1

Haw yawˬ. Yaw tsaˬ yaw dawˇ laꞈ kʼoeˇ uˆ lahˇ-eu sahˬ paˬ tiˬ gʼaˬ doˆ le tehꞈ-a. miˇ kʼahˬ-ahˇ haw-eu pyaˆ-eu aˬ yuiꞈ aˬ tsu deuˬ kʼawꞈ, yaw sui yaw dawˇ laꞈ kʼoeˇ haw pyaˆ tehꞈ-a.

Iˇsaˬyaˇ 32:18

Miˬyehˇ-euˬ tsawˇ haˬ deuˬ kʼahˬ lahˇ kʼaˇ maˬ za-ehˇ, nui saˇ oꞈ-eu nymˇ jiˇ laꞈ kʼoeˇ ya jawˇ tehꞈ-a.

Iˇsaˬyaˇ 33:22

Sahˬpaˬ Miˬyehˇ aˬ dui kʼoeˇ taˆ uˆ lahˇ-eu meh. Sahˬpaˬ Miˬyehˇ aˬ dui-ahˇ zahˇ dawˬ kʼoꞈ dawˬ biꞈ laꞈ-awˇ, Sahˬpaˬ Miˬyehˇ aˬ dui-euˬ sahˬ paˬ meh. Aˬ dui-ahˇ aˬ yawꞈ ka kʼoꞈ laꞈ-eu meh.

Iˇsaˬyaˇ 33:5

Yaw goˇ-ahˇ jawˇ-eu Sahˬpaˬ Miˬyehˇ-ahˇ, ciˬ huiˬ ciˬ mahˇ tehꞈ-a. Yeˬluˇsaˬlehˬ meuˬ laꞈ kʼoeˇ yaw tsaˬ yaw dawˇ jeˬ, aˬ yawꞈ bi byah laˇ tehꞈ-a.

Iˇsaˬyaˇ 35:9

Aˇ laˬ jaˬ shiˇ deuˬ kʼoeˇ gaˇ maˬ jawˇ-ehˇ, haiˬ-eu jeˬ zaˬ kʼoeˇ gaˇ maˬ cah tsehˆ-a. Sahˬpaˬ Miˬyehˇ neh ka kʼoꞈ nehˬ-euˬ tsawˇ haˬ deuˬ, iˇ kahˇ gʼoꞈ leˇ-eu gaˇ ma meh.

Iˇsaˬyaˇ 42:6

“Sahˬpaˬ Miˬyehˇ pyeuꞈ-eu ngaˇ nawˬ-ahˇ kuˇ-awˇ, miˇ tsaˬ kʼoeˇ taˆ yaw tsaˬ yaw dawˇ jeˬ jaˆ laˇ ni, nawˬ-ahˇ baoˬ biꞈ taˬ gʼaˬ-euˬ ma. Nawˬ-ahˇ gʼoe-eu laꞈ kʼoeˇ tsawˇ jeuˬ dawˬ tawˆ luꞈ-ahˇ, ngaˇ saˇ jaˇ dzaˬ taꞈ ma. Nawˬ-ahˇ gʼoe-awˇ tsawˇ jeuˬ dawˬ tawˆ luꞈ-euˬ kʼoeˇ taˆ, ngaˇ yaw shehꞈ bi bya ma.

Iˇsaˬyaˇ 45:17

Ehˇ kʼawꞈ, Iˇsaˬleˬlaˆ-ahˇ Sahˬpaˬ Miˬyehˇ ka kʼoꞈ-awˇ, mˬ maˬ maˬ byaˆ zaˇ ziˇ gʼaˬ leˇ-eu gʼaˬ pyeuꞈ-awˇ, shaꞈ dawˇ-eu jeˬ maˬ keuˆ le-ehˇ daˬ maˬ ga-a.’

Iˇsaˬyaˇ 54:17

Ehˇ kʼawꞈ, nawˬ-ahˇ laˆ tahˬ laˆ naˇ nya-eu, guiˇ deuˆ-eu keu ka maˬ jaˆ-a. Nawˬ-ahˇ yaˇ kʼaˬ kʼaˇ ja laˇ-eu tsawˇ haˬ deuˬ-ahˇ, nawˇ ja gʼaˬ nya tehꞈ-a. Ngaˬ-euˬ zaˬ kʼaˆ deuˬ-ahˇ ngaˇ haw piˇ-awˇ, gʼaˬ leˇ-eu tsawˇ haˬ bi pyeuꞈ ma” lehˇ Sahˬpaˬ Miˬyehˇ ehˇ-eu meh.

Iˇsaˬyaˇ 7:14

Toˆ-ehˇ jeˬ maˇ-iˬ, Sahˬpaˬ Miˬyehˇ aˬ yawꞈ-euˬ mawˇ do, nawˬ-euˬ kʼoeˇ taˆ bi siˬ bi mawˇ-eu jeˬ bi keuˆ le tehꞈ-a. Shawˇ jehˆ ni gʼeh-eu zaˬ miˬ zaˬ zaˬ guˬ tiˬ gʼaˬ aˬ nyiˇ pi leˇ-awˇ, aˬ li tiˬ li ciˬ-awˇ, Eˇmaˬnoeˬlaˇ, lehˇ myahˇ nehˬ tehꞈ-a.

Iˇsaˬyaˇ 9:6

Aˬ dui gʼaˇ duˬ aˬ li tiˬ li dehꞈ le-euˬ meh. Aˬ dui-ahˇ aˬ li tiˬ li biꞈ laꞈ-euˬ meh. Aˬ dui kʼoeˇ taˆ aˬ yawꞈ uˆ lahˇ tehꞈ-a. Aˬ yawꞈ-ahˇ heu loꞈ-ehˇ kuˇ tehꞈ-a. “Zahˬ dui dui leˇ paˬ-ehˇ gʼeh-eu nui noeˬ nui duˇ biꞈ-eu gʼaˬ, Baoˬ huiˬ-eu Miˬyehˇ, Mˬ maˬ maˬ byaˆ zaˇ ziˇ dehꞈ-eu Aˬ da, Nui saˇ bi oꞈ-eu Sahˬ paˬ” lehˇ kuˇ tehꞈ-a.

Yeˬlaˬmiˇ 29:11

Ngaˬ neh naw maꞈ gʼaˇ duˬ gaˇ kawˆ kawˆ taˬ-euˬ jeˬ-ahˇ, ngaˇ tehꞈ-ehˇ siˬ nya-eu ma. Naw maꞈ-ahˇ maˬ bi shaˬ maˬ bi zahˬ ni, bi dehꞈ dzaˬ laˇ-eu gʼaˇ duˬ maˬ ehˇ, naw maꞈ noeˬ tmˬ kʼaˇ za-eu aˇ nah aˇ yamˬ bi keuˆ le-eu gʼaˇ duˬ maˬ ehˇ, ngaˬ neh gaˇ kawˆ kawˆ taˬ-euˬ ngaˇ tiˬ gʼaˬ tehꞈ-ehˇ siˬ nya -eu ma.

Yeˬlaˬmiˇ 30:10

“Ngaˬ-euˬ tsawˇ haˬ deuˬ-oˇ, taˬ guˆ. Iˇsaˬleˬlaˆ tsawˇ haˬ deuˬ-oˇ, nui ma taˬ baˬ. Naw maꞈ-ahˇ nyehꞈ daˆ gʼeh-awˇ bi jawˇ-euˬ, gaˇ mahˇ kaˬ gaˇ jaˆ-eu miˇ kʼahˬ kʼoeˇ kʼahˬ laꞈ kʼoeˇ, naw maꞈ-ahˇ ngaˇ ka kʼoꞈ doˆ ma. Naw maꞈ iˇ kahˇ gʼoꞈ keuˆ laˇ-awˇ, nui saˇ oꞈ-eu laꞈ kʼoeˇ ya dehꞈ tehꞈ-a. naw maꞈ kʼahˬ lahˇ kʼaˇ maˬ za-ehˇ, noeˬ guˆ kʼaˇ maˬ za ni ya dehꞈ tehꞈ-a.

Yeˬlaˬmiˇ 31:23

Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ jeuˬ heu jeuˬ-ahˇ aˬ yawꞈ maꞈ-euˬ miˇ kʼahˬ laꞈ kʼoeˇ ngaˇ sheuˬ kʼoꞈ gʼeh nehˬ-awˇ paˇ bi jawˇ ngeh, Yuˇdaˆ miˇ kʼahˬ hawˇ-eu kʼoeˇ gaˇ jaˆ-eu meuˬ deuˬ laꞈ kʼoeˇ, aˬ yawꞈ maꞈ heu loꞈ-ehˇ paˇ ya ehˇ tehꞈ-a. ‘Yaw tsaˬ yaw dawˇ jeˬ jawˇ-eu jawˇ duˬ-oˇ, muiˬ-eu shawˇ-eu gawˬ jawˬ-oˇ Sahˬpaˬ Miˬyehˇ nawˬ-ahˇ guiˬ lahˬ biꞈ luꞈ-uˇ’ lehˇ ya ehˇ tehꞈ-a.

Yeˬlaˬmiˇ 32:37

Ngaˇ nui ma pehˇ-eu laꞈ kʼoeˇ aˬ cawˬ miˇ kʼahˬ doe ni bi jawˇ byaˆ taˬ-euˬ ngaˬ-euˬ tsawˇ haˬ heu deuˬ-ahˇ paˇ sheuˬ uiˬ-awˇ, jawˇ duˬ heu tsahˇ-ahˇ paˇ sheuˬ kʼoꞈ keuˆ nehˬ-awˇ, nui saˇ oꞈ-eu laꞈ kʼoeˇ bi dehꞈ ma.

Yeˬlaˬmiˇ 33:15

Aˇ nah aˇ yamˬ kʼoeˇ keuˆ laˇ ngeh, Daˬbiˇ-euˬ zaˬ deuˬ uˆ deuˬ laꞈ kʼoeˇ, yaw tsaˬ yaw dawˇ tsawˇ haˬ tiˬ gʼaˬ-ahˇ sahˬ paˬ bi geuꞈ-eu gʼaˇ duˬ ngaˇ tseˇ doˆ ma. Sahˬpaˬ kʼoeˇ gʼaˬ-aˬ, miˇ kʼahˬ kʼahˬ lah ni kʼoeˇ taˆ yaw tsaˬ yaw dawˇ jeˬ mˇ tehꞈ-a.

Yeˬlaˬmiˇ 33:16

Yuˇdaˆ miˇ kʼahˬ hawˇ-eu Yeˬluˇsaˬlehˬ meuˬ laꞈ kʼoeˇ jawˇ-eu tsawˇ haˬ deuˬ-ahˇ ka kʼoꞈ nehˬ-awˇ, nui saˇ oꞈ-eu laꞈ kʼoeˇ ya dehꞈ tehꞈ-a. Yeˬluˇsaˬlehˬ meuˬ-euˬ tsawˇ myahˇ-ahˇ, ‘Sahˬpaˬ Miˬyehˇ aˬ dui-ahˇ ka kʼoꞈ-eu gʼaˬ meh’ lehˇ ya kuˇ tehꞈ-a.

Yeˬsaˬgeˬlaˇ 21:27

Yaw cawˆ tehꞈ meh. Yaw cawˆ tehꞈ meh. Meuˬ heu meuˬ-ahˇ ngaˇ laˆ cawˆ ma. Ehˇ kʼawꞈ, meuˬ heu meuˬ-ahˇ bi laˆ cawˆ-eu lehˇ ngaˬ neh tseˇ doˆ-euˬ gʼaˬ maˬ oe keuˆ kʼoeˇ keuˆ ni, kʼoeˇ loꞈ-ehˇ maˬ jahˇ te siˬ. Kʼoeˇ gʼaˬ-ahˇ meuˬ heu meuˬ biꞈ tsehˆ nehˬ ma.

Yeˬsaˬgeˬlaˇ 28:26

Aˬ yawꞈ maꞈ kʼoeˇ gaˇ, guˆ-eu gaˆ-eu jeˬ-ahˇ kʼahˬ lahˇ kʼaˇ maˬ za ni ya dehꞈ tehꞈ-a. Aˬ yawꞈ maꞈ nymˇ tsoˆ ziꞈ-awˇ, aˬ gaꞈ yaˇ kmˇ mˇ tehꞈ-a. Aˬ yawꞈ maꞈ-ahˇ yehˬ bawˬ sehˇ lu-ehˇ jahˇ-eu, aˬ yawꞈ maꞈ-euˬ dawˬ peh kʼaˇ jawˇ-eu tsawˇ haˬ deuˬ-ahˇ ngaˇ kʼehˬ nehˬ kʼaˆ nehˬ ma. Iˇsaˬleˬlaˆ tsawˇ haˬ deuˬ nui saˇ oꞈ-awˇ ya dehꞈ ya jawˇ tehꞈ-a. Kʼoeˇ ngeh jawˇ, ngaˇ-aˬ, aˬ yawꞈ maꞈ-euˬ Miˬyehˇ pyeuꞈ-eu Sahˬpaˬ Miˬyehˇ ngaˇ lehˇ, aˬ yawꞈ maꞈ-ahˇ siˬ duˬ leˇ tehꞈ-a.

Yeˬsaˬgeˬlaˇ 38:14

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ ngaˬ-ahˇ kʼehˇ-awˇ, Gawˇgaˆ jawˇ gaˇ heu loꞈ-ehˇ bi ehˇ-iˇ laꞈ-euˬ meh. “Nymˬ-mˇ, ngaˬ-euˬ tsawˇ haˬ deuˬ guˆ kʼaˇ maˬ za-ehˇ, nui saˇ oꞈ-eu laꞈ kʼoeˇ dehꞈ luꞈ-eu nawˬ-ahˇ maˬ mawˇ laˇ nya loˇ.

Yeˬsaˬgeˬlaˇ 48:35

Meuˬ meuˬ lahˇ tiˬ jawˬ oeˬ heˇ ngaˬ yaˇ lmˇ byah-eu meh. Aˬ kaˇ naˇ, meuˬ kʼoeˇ meuˬ-euˬ tsawˇ myahˇ-aˬ, “ Sahˬpaˬ Miˬyehˇ heu gaˇ jawˇ meh” lehˇ ya kuˇ paˇ tehꞈ-a.

Daˬyeˬlaˇ 9:24

“Shiꞈ tseˇ kʼoꞈ, shiꞈ poˆ lehˇ ehˇ-euˬ-aˬ, nawˬ-euˬ tsawˇ jeuˬ hawˇ-eu naw maꞈ-euˬ muiˬ-eu shawˇ-eu meuˬ-ahˇ iˬ baˇ hawˇ-eu yaw haiˬ jeˬ laꞈ kʼoeˇ ka kʼoꞈ nehˬ-eu gʼaˇ duˬ, Miˬyehˇ neh dza taˬ-euˬ aˇ yamˬ-ahˇ ehˇ-eu meh. Yaw sahˇ laꞈ kʼoeˇ kʼaˇ ya siˬ kʼaˇ ya mawˇ-euˬ loꞈ-ehˇ aˬ diˇ aˬ maˇ keuˆ le-awˇ, muiˬ-eu shawˇ-eu Uˬ duˬ tahˬ nymˇ nymˇ ma paˇ ya a nehˬ-eu aˇ nah bi keuˆ le-eu gʼaˇ duˬ, iˬ baˇ mˇ-eu jeˬ aˇ saˬ bi saˬ le-awˇ, mˬ maˬ maˬ byaˆ zaˇ ziˇ ziꞈ-eu yaw tsaˬ yaw dawˇ jeˬ ziꞈ dah ni bi jaˆ le tehꞈ-a.

Daˬyeˬlaˇ 9:7

Sahˬpaˬ Miˬyehˇ-oˇ, nawˇ-aˬ, aˬ myah luꞈ yaw tsaˬ yaw dawˇ jeˬ tehꞈ-ehˇ mˇ-eu meh. Ehˇ kʼawꞈ, nga maꞈ-aˬ, yawˬ ha-euˬ myaˆ pyawˬ naˇ mehˇ cawˆ-eu jeˬ tehꞈ-ehˇ mˇ-euˬ ma. Yuˇdaˆ miˇ kʼahˬ-ahˇ jawˇ-eu deuˬ maˬ ehˇ, Yeˬluˇsaˬlehˬ meuˬ-ahˇ jawˇ-eu deuˬ maˬ ehˇ, dawˬ peh gaˇ mahˇ jaˆ-eu miˇ kʼahˬ deuˬ-ahˇ nawˬ neh teh byaˆ-awˇ bi jawˇ-euˬ Iˇsaˬleˬlaˆ tsawˇ haˬ dawˬ tawˆ luꞈ maˬ ehˇ, nawˬ-ahˇ saˇ jaˇ maˬ ziꞈ-eu miˇ neh, aˬ yawꞈ maꞈ kʼoeˇ taˆ shaꞈ dawˇ-eu jeˬ keuˆ le taˬ-euˬ meh.

Hawˇseˬ 1:11

Yuˇdaˆ tsawˇ haˬ hawˇ-eu Iˇsaˬleˬlaˆ tsawˇ haˬ paˇ tsaˬ paˇ dzoeˇ leˇ-awˇ, nyiˬ muˇ luꞈ-ahˇ uˆ lahˇ-eu aˬ yuiꞈ aˬ tsu tiˬ gʼaˬ tehꞈ-ehˇ paˇ tseˇ doˆ-awˇ, aˬ yawꞈ maꞈ-euˬ miˇ kʼahˬ laꞈ kʼoeˇ tiˬ poˆ paˇ dehꞈ doˆ dzaˬ laˇ-awˇ, baw le za le tehꞈ-a. Yeˬzaˬleˬlaˇ-euˬ aˇ nah kʼoeˇ nah-aˬ, huiˬ dui dui-eu aˇ nah pyeuꞈ tehꞈ-a.

Hawˇseˬ 1:7

Ehˇ kʼawꞈ, Yuˇdaˆ miˇ kʼahˬ zaˬ deuˬ-ahˇ ngaˬ-euˬ nui gaˬ bi mawˇ ma. Aˬ yawꞈ maꞈ-euˬ Miˬyehˇ pyeuꞈ-eu ngaˇ Sahˬpaˬ Miˬyehˇ, aˬ yawꞈ maꞈ-ahˇ ka kʼoꞈ nehˬ ma. Ehˇ kʼawꞈ, guiˇ deuˆ-awˇ ka kʼoꞈ nehˬ-eu lehˇ gʼeh-eu maˬ ngeuˇ, mi cehˇ neh maˬ ehˇ, kaˆ neh maˬ ehˇ, kaˆ myaˬ neh maˬ ehˇ, mahˬ neh maˬ ehˇ, mahˬ dziˬ-eu yehˇ deuˬ neh maˬ ehˇ, aˬ yawꞈ maꞈ-ahˇ ka kʼoꞈ-eu lehˇ gʼeh-eu maˬ ngeuˇ.”

Hawˇseˬ 2:18

Aˇ yamˬ kʼoeˇ yamˬ keuˆ laˇ ngeh jawˇ, ngaˬ-euˬ tsawˇ haˬ heu deuˬ kʼoeˇ taˆ, maˬ coeˬ maˬ ciˆ nehˬ-eu gʼaˇ duˬ, bawˇ tsahˬ jeˬ zaˬ dawˬ tawˆ hawˇ-eu, kʼoeˇ taˆ zaw-eu aˇ jiˇ maˬ ehˇ, miˇ tsa joe-eu deuˬ-ahˇ maˬ ehˇ, ngaˇ saˇ jaˇ dzaˬ taꞈ-eu lehˇ ma. Miˇ kʼahˬ heu kʼahˬ laꞈ kʼoeˇ jaˆ-eu, guiˇ deuˆ-eu keu ka dawˬ tawˆ luꞈ, mi cehˇ hawˇ-eu kaˆ dawˬ tawˆ luꞈ, ngaˇ laˆ piˬ laˆ byoˆ nehˬ jiˇ-awˇ, ngaˬ-euˬ tsawˇ haˬ heu deuˬ dawˬ tawˆ, nui saˇ oꞈ-awˇ ya dehꞈ tehꞈ-a.

Aaˇbaˬdiˇ 1:17

“Ehˇ kʼawꞈ, Ziˇoˬ gawˬ jawˬ kʼoeˇ taˆ, tiˬ paˆ na deuˬ ya cehˆ buˬ-awˇ, gawˬ jawˬ kʼoeˇ jawˬ muiˬ-eu shawˇ-eu, jawˇ duˬ tiˬ tsahˇ pyeuꞈ laˇ tehꞈ-a. Yaˬkoˆ-euˬ zaˬ deuˬ uˆ deuˬ-aˬ, aˬ yawꞈ maꞈ-ahˇ oꞈ-eu miˇ kʼahˬ, aˬ yawꞈ maꞈ paˇ za kʼoꞈ tehꞈ-a.

Aaˇbaˬdiˇ 1:21

Guiˇ deuˆ gʼaˬ-euˬ tsawˇ haˬ pyeuꞈ-eu, Yeˬluˇsaˬlehˬ tsawˇ haˬ deuˬ-aˬ, Eˬdoˬ miˇ kʼahˬ-ahˇ deuˆ gʼaˬ-awˇ, miˇ kʼahˬ kʼoeˇ-ahˇ uˆ lahˇ tehꞈ-a. Kʼoeˇ ngeh, Sahˬpaˬ Miˬyehˇ aˬ yawꞈ, aˬ yawꞈ-euˬ tsawˇ haˬ deuˬ kʼoeˇ taˆ, sahˬ paˬ geuꞈ-awˇ uˆ lahˇ tehꞈ-a.”

Zeˬpaˬniˇ 3:13

Dzeˇ-eu Iˇsaˬleˬlaˆ tsawˇ haˬ, aˬ cawˬ-ahˇ yaw doeˇ maˬ jahˇ-ehˇ, jaˬ myawꞈ mehˇ shuiˇ maˬ mˇ miˇ neh, aˬ yawꞈ maꞈ baw le za le-awˇ, guˆ kʼaˇ maˬ za ni dehꞈ tehꞈ-a.”

Zaˬkaˬliˇ 10:6

Yuˇdaˆ nymˇ jiˇ gʼaˬ bi kʼaˆ-awˇ, Yoˇsehˆ nymˇ jiˇ ngaˇ ka kʼoꞈ ma. Aˬ yawꞈ maꞈ-ahˇ gʼawˬ shaˬ gaˬ-awˇ, iˇ kahˇ sheuˬ kʼoꞈ keuˆ jiˇ nehˬ ma. Ngaˬ neh maˬ byehˇ dzeh-euˬ loꞈ-ehˇ, aˬ yawꞈ maꞈ paˇ bi dehꞈ poˆ ma. Sahˬpaˬ Miˬyehˇ pyeuꞈ-eu ngaˇ-aˬ, aˬ yawꞈ maꞈ-euˬ Miˬyehˇ ngeuˇ ma. Aˬ yawꞈ maꞈ neh shaˇ-euˬ shaˇ dawˬ, maˬ byehˇ ni ngaˇ naˇ haˬ nehˬ ma.

Zaˬkaˬliˇ 3:10

Aˇ nah kʼoeˇ nah keuˆ le ngeh, naw maꞈ yawˬ gʼaˬ na luꞈ, yawˬ ha dawˬ peh jawˇ-eu tsawˇ haˬ deuˬ-ahˇ, yawˬ ha-euˬ aˬ gaꞈ baw duˆ uˬ moˆ hawˇ-eu siˬ guˬ maˇ sheuˇ aˇ bawˇ uˬ moˆ kuˇ uiˬ-awˇ, nui ma saˇ lehˆ ni ya dehꞈ tehꞈ- a.”

Lormav 3:22

Aˬ yawꞈ maꞈ Yeˬsuˇ Ka li-ahˇ jah-eu baˬ da neh Miˬyehˇ-ahˇ tsaˬ leˇ tsahˇ leˇ-eu tsawˇ haˬ bi pyeuꞈ laˇ-euˬ meh. Ka li-ahˇ kʼaˇ jah-eu tsawˇ haˬ dawˬ tawˆ luꞈ-ahˇ, tsawˇ jeuˬ maˬ tseˇ paˆ ni, Miˬyehˇ kʼoeˇ loꞈ-ehˇ jahˇ nehˬ-euˬ meh.

1 Gawˇliˬtu 1:30

Ehˇ kʼawꞈ, naw maꞈ-ahˇ-aˬ, Yeˬsuˇ Ka li-ahˇ bi tsoꞈ taꞈ-eu gʼaˇ duˬ Miˬyehˇ mˇ-awˇ, Ka li-aˬ aˬ dui-euˬ zaˬ siˬ tsawˇ gahˇ pyeuꞈ ni Miˬyehˇ jahˇ-euˬ meh. Ka li baˬ da neh Miˬyehˇ-ahˇ aˬ dui tsaˬ leˇ tsahˇ leˇ-awˇ, Miˬyehˇ-euˬ muiˬ-eu shawˇ-eu tsawˇ haˬ pyeuꞈ laˇ-awˇ, iˬ baˇ-ahˇ buˬ-iˇ law-iˇ gʼaˬ-euˬ ma.

2 Gawˇliˬtu 5:21

Ka li-aˬ, iˬ baˇ tiˬ pawꞈ-iˬ maˬ ahˇ-a. Ehˇ kʼawꞈ, Ka li laꞈ kʼoeˇ Miˬyehˇ-euˬ yaw tsaˬ yaw dawˇ jeˬ-ahˇ aˬ dui za nya ni, aˬ dui-euˬ gʼaˇ duˬ Miˬyehˇ neh Ka li-ahˇ iˬ baˇ bi pyeuꞈ-iˇ-euˬ meh.

Piˇliˇpiˆ 3:9

A yawꞈ laꞈ kʼoeˇ tiˬ byah tiˬ loꞈ ya jawˇ ni, ngaˇ kʼoeˇ loꞈ-ehˇ sawˇ-euˬ ma. Zahˇ dawˬ kʼoꞈ dawˬ-ahˇ mˇ byah-eu baˬ da neh za nya meh lehˇ sawˇ taˬ-euˬ ngaˬ neh mˇ za-euˬ Miˬyehˇ-ahˇ tsaˬ leˇ tsahˇ leˇ-eu kʼoeˇ hmˬ tiˬ pawꞈ-iˬ maˬ paˇ ahˇ ma. Nymˬ-mˇ ngaˇ za taˬ-euˬ Miˬyehˇ-ahˇ tsaˬ leˇ tsahˇ leˇ-eu heu-aˬ, ngaˇ Ka li-ahˇ jah-eu baˬ da neh za taˬ-euˬ ma. Heu-aˬ, jah-eu kʼoeˇ taˆ Miˬyehˇ neh biꞈ nehˬ laꞈ-euˬ Miˬyehˇ-ahˇ tsaˬ leˇ tsahˇ leˇ-eu jeˬ pyeuꞈ-eu meh.