Yeˬlaˬmiˇ 15:6 - Akha

⁶ Naw maꞈ ngaˬ-ahˇ byehˇ dzeh-euˬ meh. Naw maꞈ ngaˬ-ahˇ naˇ kʼah ciˬ pyawˇ nehˬ laꞈ-euˬ meh. Kʼoeˇ baˬ da neh ngaˇ nui ma pehˇ-eu maˬ dzahˬ tehˬ coeˇ-ehˇ, ngaˬ-euˬ aˬ laꞈ cawˬ doˆ leꞈ-awˇ, naw maꞈ-ahˇ baꞈ deh leꞈ-euˬ ma.

Yeˬlaˬmiˇ 15:6 ပူးပေါင်းရင်းမြစ်များ

Iˇsaˬyaˇ 1:4

Iˬ baˇ huiˬ-eu tsawˇ jeuˬ law hawˇ nga. Iˬ baˇ neh bi ciˬ tehˬ sehꞈ law hawˇ nga. Yaw haiˬ-euˬ zaˬ pyeuꞈ-awˇ, yaw bahˬ je poˆ-eu nga. Sahˬpaˬ Miˬyehˇ-ahˇ aˬ yawꞈ maꞈ byehˇ dzeh-awˇ, Iˇsaˬleˬlaˆ-euˬ Muiˬ-eu shawˇ-eu gʼaˬ-ahˇ byehˇ dzeh-euˬ nga. Maˇ maˇ ni byehˇ tsehˆ tsehˆ-euˬ nga.

Iˇsaˬyaˇ 28:13

Kʼoeˇ miˇ neh naw maꞈ-ahˇ Sahˬpaˬ Miˬyehˇ, heu jeˬ mˇ, kʼoeˇ jeˬ mˇ lehˇ, zahˇ sahˇ kʼoꞈ heu, zahˇ sahˇ kʼoꞈ kʼoeˇ lehˇ, tiˬ tiˆ saˇ-i tiˬ tiˆ mehˬ-eu lehˇ gʼeh-eu meh. Naw maꞈ kuiˇ toꞈ aˬ yawꞈ toꞈ yawꞈ sahˬ tiꞈ tiꞈ-awˇ, laˆ tahˬ laˆ naˇ gʼaˬ-awˇ lahˇ ju-ahˇ paꞈ leˇ-eu uˬ taꞈ, aˬ cawˬ neh bi nyehꞈ gʼeh tehꞈ-a.

Iˇsaˬyaˇ 31:3

Iˇjiˇtuˆ tsawˇ haˬ kʼawꞈ tsawˇ haˬ zaˬ meh. Miˬyehˇ maˬ ngeuˇ-a. Aˬ yawꞈ maꞈ-euˬ mahˬ deuˬ kʼawꞈ shiˬ shaˬ jiˇ meh. Maˬ shiˇ nya-eu yaw sahˇ maˬ ngeuˇ-a. Sahˬpaˬ Miˬyehˇ aˬ laꞈ cawˬ doˆ laꞈ ngeh, aˬ cawˬ-ahˇ caw ba nehˬ-eu miˇ kʼahˬ dawˬ teˇ teˇ-awˇ, aˬ cawˬ-ahˇ gʼoe-eu miˇ kʼahˬ coˬ-iˇ-eu miˇ neh, nyiˬ kʼahˬ tiˬ gaˇ luˬ-iˇ seˇ-iˇ tehꞈ-a.

Yeˬlaˬmiˇ 1:16

Ngaˬ-euˬ tsawˇ jeuˬ iˬ baˇ mˇ-euˬ miˇ neh ngaˇ kʼehˬ nehˬ ma. Aˬ yawꞈ maꞈ ngaˬ-ahˇ byehˇ dzeh-awˇ, tahˬ pahˬ aˬ ma mawˇ kawˇ tehˆ-awˇ lawˇ-eu shehˇ-eu laꞈ kʼoeˇ uˬ duˬ tahˬ-euˬ meh.

Yeˬlaˬmiˇ 13:14

Kʼoeˇ naˇ, ciˬ cuˇ tiˬ siˬ tiˇ siˬ biˬ paˆ-eu loꞈ-ehˇ, zaˬ huiˬ zaˬ nyiˇ maˬ tsehˇ ni aˬ yawꞈ maꞈ-ahˇ ngaˇ jahˇ nehˬ ma. Aˬ yawꞈ maꞈ-ahˇ ngaˇ sehꞈ ngeh, gʼawˬ shaˬ gaˬ-eu jeˬ neh laˆ tsoeˬ le kʼawꞈ, maˬ laˆ tsoeˬ nya-aˇ.”

Yeˬlaˬmiˇ 2:13

Aˬ jeˬ miˇ neh ehˇ naˇ ngaˬ-euˬ tsawˇ jeuˬ, iˬ baˇ nyiˬ jeˬ mˇ taˬ-euˬ meh. Dehꞈ-eu saꞈ laˇ iˇ cuꞈ lawˇ kʼawꞈ pyeuꞈ-eu ngaˬ-ahˇ, aˬ yawꞈ maꞈ byehˇ dzeh-awˇ, iˇ cuꞈ maˬ dahˬ ziꞈ nya-eu lah duˬ gawˬ-euˬ meh.

Yeˬlaˬmiˇ 2:17

Iˇsaˬleˬlaˆ-oˇ, gaˇ kawˆ heu nawˬ-euˬ uˬ duˬ-ahˇ daˇ laˇ ni, nawˇ yawˬ haˇ yawˬ ha mˇ-euˬ meh. Nawˬ-ahˇ ngaˇ sheuˬ gʼeh nehˬ luꞈ ngeh, nawˬ-euˬ Miˬyehˇ pyeuꞈ-eu ngaˇ Sahˬpaˬ Miˬyehˇ-ahˇ, nawˇ byehˇ dzeh yaꞈ-euˬ meh.

Yeˬlaˬmiˇ 2:19

Nawˬ-euˬ yaw lehˬ nawˬ-ahˇ kʼehˬ-awˇ, nawˇ saˇ jaˇ puiˬ-euˬ jeˬ nawˬ-ahˇ laˆ shaˬ tehꞈ-a. Nawˬ-euˬ Miˬyehˇ pyeuꞈ-eu Sahˬpaˬ Miˬyehˇ-ahˇ byehˇ dzeh-awˇ, ngaˬ-ahˇ saˇ jaˇ maˬ ziꞈ ni dehꞈ-eu jeˬ, aˇ naˆ ni lehˬ-awˇ noeˬ shaˬ paˬ-ehˇ gʼeh nga lehˇ, nawˬ-ahˇ siˬ duˬ laˇ tehꞈ-a lehˇ, Baoˬ huiˬ-eu Sahˬpaˬ Miˬyehˇ pyeuꞈ-eu, Dawˬ tawˆ kʼoeˇ taˆ uˆ lahˇ-eu ngaˇ heu loꞈ-ehˇ ehˇ-eu ma.”

Yeˬlaˬmiˇ 20:9

Ehˇ kʼawꞈ, Sahˬpaˬ Miˬyehˇ-ahˇ ngehˇ byoˆ-awˇ, aˬ yawꞈ tsawˇ myahˇ uˬ moˆ dawˬ dzawˇ maˬ paˇ mˇ ma ehˇ ngeh, nawˬ-euˬ dawˬ kawˬ ngaˬ-euˬ nui ma laꞈ kʼoeˇ, miˬ dzaˬ doꞈ gaˇ duˇ nya. Ngaˇ kʼaˇ dzahˬ tehˬ coeˇ-eu jahˬ kʼawꞈ, maˬ dzahˬ tehˬ gʼaˬ coeˇ nya.

Yeˬlaˬmiˇ 44:22

Iˬ nah naw maꞈ-euˬ miˇ kʼahˬ cawˆ-iˇ-awˇ, tsawˇ haˬ tiˬ gʼaˬ-iˬ maˬ jawˇ-ehˇ, guˆ dui dui laˇ paˬ-ehˇ pyeuꞈ-iˇ taˬ-euˬ miˇ neh, aˬ cawˬ yaˬ kʼehˇ yaˬ ngeh tsawˇ myahˇ kuˇ duˬ pyeuꞈ-iˇ-euˬ maˬ ngeuˇ-a loˇ. Naw maꞈ neh mˇ-euˬ yaw haiˬ jeˬ hawˇ-eu maˬ muiˬ maˬ jaˬ-eu jeˬ-ahˇ, Sahˬpaˬ Miˬyehˇ maˬ oˇ coeˇ laˇ-euˬ miˇ neh, kʼoeˇ loꞈ-ehˇ bi keuˆ le-euˬ maˬ ngeuˇ nga loˇ.

Yeˬlaˬmiˇ 6:11

Sahˬpaˬ Miˬyehˇ nawˇ aˬ yawꞈ maꞈ-ahˇ nui ma pehˇ-eu jeˬ, ngaˬ-euˬ nui ma miˬ dzaˬ doꞈ-eu loꞈ-ehˇ, ngaˬ-ahˇ maˬ dzahˬ tehˬ coeˇ nya.” Sahˬpaˬ Miˬyehˇ ngaˬ-ahˇ ehˇ-eu, “Meuˬ-euˬ lehˆ kawˆ doe ni gʼa-eu zaˬ deuˬ hawˇ-eu, zaˬ guˬ deuˬ uiˬ leˇ bymˇ leˇ taˬ-euˬ gaˇ, ngaˬ-euˬ nui pehˇ shehˆ daˆ nehˬ-awˬ. Miˬ zaˬ yo zaˬ dawˬ tawˆ bi nyehꞈ byoˆ gʼeh jiˇ-awˇ, mawˬ dui dui-eu deuˬ kʼawꞈ maˬ dzeˇ yaꞈ ni pyeuꞈ-iˇ tehꞈ-a.

Yeˬlaˬmiˇ 6:12

Aˬ yawꞈ maꞈ-euˬ nymˇ deuˬ aˬ cawˬ-ahˇ ya biꞈ-awˇ, deh yaˇ hawˇ-eu miˬ zaˬ ya a nehˬ gaˇ keuˆ ni, miˇ kʼahˬ heu kʼahˬ-ahˇ ngaˇ kʼehˬ ma.

Yeˬlaˬmiˇ 6:19

Miˇ tsaˬ tahˬ kʼawˇ-oˇ naˬ bawˇ ciˬ kʼmˇ-awˬ. Tsawˇ haˬ heu deuˬ ngaˬ-euˬ dawˬ-ahˇ maˬ naˇ haˬ-ehˇ, ngaˬ-euˬ zahˇ dawˬ kʼoꞈ dawˬ-ahˇ byehˇ dzeh-euˬ miˇ neh, oꞈ-eu geuˇ-eu loꞈ-ehˇ aˬ yawꞈ maꞈ-ahˇ kʼehˬ-awˇ, luˬ-iˇ seˇ-iˇ-eu jeˬ bi keuˆ le ma.

Yeˬlaˬmiˇ 7:16

Sahˬpaˬ Miˬyehˇ heu loꞈ-ehˇ ehˇ-eu meh. “Yeˬlaˬmiˇ-oˇ, tsawˇ haˬ heu deuˬ gʼaˇ duˬ guiˬ lahˬ taˬ shaˇ. Aˬ yawꞈ maꞈ-euˬ dah zaˇ ngoeˇ ngoeˇ-ehˇ guiˬ lahˬ taˬ shaˇ. Nawˇ aˬ yawꞈ maꞈ gʼaˇ duˬ tsawˇ kaˬ geuꞈ laˇ gaˇ ngaˇ maˬ naˇ haˬ.

Yeˬlaˬmiˇ 7:24

Ehˇ kʼawꞈ, aˬ yawꞈ maꞈ naˬ bawˇ maˬ gaˬ leˇ-ehˇ, aˬ yawꞈ maꞈ-euˬ gʼahˇ-eu nui ma hawˇ-eu haiˬ-eu nui ma laꞈ kʼoeˇ kʼaˇ noeˬ doˆ laˇ-euˬ jeˬ mˇ-awˇ, muiˬ laˇ jaˬ laˇ-eu jeˬ maˬ jaˆ-eu uˬ taꞈ, tiˬ jawˇ saˇ-i tiˬ jawˇ doeˇ dzehˬ laˇ-euˬ meh.

Yeˬlaˬmiˇ 8:5

Toˆ-ehˇ ngeuˇ naˇ aˬ jeˬ miˇ neh naw maꞈ mehˬ shiˬ ciˬ pyawˇ-awˇ doˆ-iˇ-euˬ, maˬ gʼoꞈ kʼoꞈ laˇ ni iˇ byoˆ te. Naw maꞈ tahˬ pahˬ aˬ ma mawˇ kawˇ maˬ byehˇ coeˇ-ehˇ, ngaˇ jawˇ gaˇ maˬ gʼoꞈ poˆ laˇ-a.

Yeˬlaˬmiˇ 8:9

Zaˬ siˬ tsawˇ gahˇ ahˇ-eu deuˬ ya shaꞈ dawˇ tehꞈ-a. Baw gʼaꞈ-ahˇ teuˆ lahˇ-euˬ loꞈ-ehˇ ya shaˬ tehꞈ-a. Ngaˬ-euˬ zahˇ dawˬ kʼoꞈ dawˬ-ahˇ byehˇ dzeh gʼaˬ-euˬ-aˬ, zaˬ siˬ tsawˇ gahˇ aˬ geu jeˬ paˇ ahˇ nmˇ.

Yeˬsaˬgeˬlaˇ 14:9

“Miˬyehˇ gʼaˇ duˬ ngehˬ dah-eu gʼaˬ mehˇ shuiˇ bi shuiˇ-awˇ maˬ tsaˬ-eu jeˬ ehˇ kʼoꞈ nehˬ naˇ, mehˇ shuiˇ shuiˇ-euˬ gʼaˬ-aˬ, Sahˬpaˬ Miˬyehˇ pyeuꞈ-eu ngaˇ ma. Iˇsaˬleˬlaˆ tsawˇ jeuˬ laꞈ kʼoeˇ aˬ yawꞈ-ahˇ paˬ tseuˆ tseuˆ dzeh ma.

Yeˬsaˬgeˬlaˇ 25:7

Naw maꞈ kʼoeˇ loꞈ-ehˇ jahˇ-euˬ miˇ neh, naw maꞈ-ahˇ aˬ cawˬ tsawˇ jeuˬ-euˬ aˬ laꞈ laꞈ kʼoeˇ a nehˬ-awˇ, tahˇ joe bi joe-awˇ, myawˬ gahˬ bi yuˇ geuꞈ jiˇ ma. Tsawˇ jeuˬ byoˆ le-awˇ, miˇ kʼahˬ byoˆ-iˇ ngeh keuˆ ni, naw maꞈ-ahˇ ngaˇ laˆ cawˆ nehˬ ma. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu naw maꞈ ya siˬ duˬ tehꞈ-a.”

Yeˬsaˬgeˬlaˇ 35:3

Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ heu loꞈ-ehˇ ehˇ-eu meh lehˇ ehˇ nehˬ-awˬ. Eˬdoˬ gawˬ jawˬ deuˬ-oˇ, nawˬ-ahˇ ngaˇ muiˇ-eu ma. Nawˬ-ahˇ ngaˇ laˆ cawˆ-awˇ, ciˬ cuˇ ni bi jaˆ ma.

Hawˇseˬ 11:7

Ngaˬ-ahˇ byehˇ-awˇ cehˆ-eu gʼaˇ duˬ, ngaˬ-euˬ tsawˇ haˬ zeuˆ pyawˇ-euˬ meh. Kʼaˆ baꞈ kah dui dui-eu miˇ neh, aˬ yawꞈ maꞈ guˇ guˇ-ehˇ ngoeˇ kʼawꞈ, baꞈ ka nehˬ-eu gʼaˬ maˬ jawˇ-aˇ.

Hawˇseˬ 13:14

Shiˇ-eu jeˬ-euˬ miˇ kʼahˬ laꞈ kʼoeˇ, aˬ yawꞈ maꞈ-ahˇ ngaˇ maˬ ka kʼoꞈ. Shiˇ-eu baoˬ-euˬ uˬ moˆ shaˬ gaˇ, aˬ yawꞈ maꞈ-ahˇ ngaˇ maˬ ka kʼoꞈ, Shiˇ-eu jeˬ-oˇ nawˬ-euˬ shaˆ shiˇ, yawꞈ maꞈ kʼoeˇ taˆ bi keuˆ le-awˬ. Shiˇ-eu miˇ kʼahˬ-euˬ yaw cawˆ jeˬ, aˬ yawꞈ maꞈ-ahˇ tahˬ daˆ nehˬ-awˬ. Tsawˇ haˬ heu deuˬ-euˬ kʼoeˇ taˆ ngaˇ, gʼawˬ shaˬ gaˬ-eu maˬ paˇ ahˇ ma.

Hawˇseˬ 4:16

Mawˇ neˇ mawˇ kʼaˇ yaw gahˇ loꞈ-ehˇ, Iˇsaˬleˬlaˆ nui ma gʼahˇ meh. Muiˬ dui dui-eu gaˆ dzaˬ duˬ-ahˇ, gaˆ dzaˬ luꞈ-eu yawˇ zaˬ loꞈ-ehˇ, Sahˬpaˬ Miˬyehˇ aˬ yawꞈ maꞈ-ahˇ, bi dzaˬ bi dawˇ nya tehꞈ-a loˇ.

Zeˬpaˬniˇ 1:4

Yuˇdaˆ miˇ kʼahˬ-ahˇ laˆ cawˆ-awˇ, Yeˬluˇsaˬlehˬ-ahˇ kʼaˇ jawˇ-eu, tsawˇ haˬ deuˬ-ahˇ kʼehˬ-eu gʼaˇ duˬ, ngaˬ-euˬ aˬ laꞈ ngaˇ cawˬ doˆ ma. Maˬ byoˆ maˬ laˆ ni dzeˇ luꞈ-eu, Baˬlaˇ-ahˇ uˬ duˬ tahˬ-eu jeˬ, ngaˇ laˆ luˬ laˆ seˇ byoˆ jiˇ-awˇ, aˬ yawꞈ-euˬ piˇ ma kʼoeˇ deuˬ-euˬ, tsawˇ myahˇ maˬ paˇ ya gaˬ haw-aˇ.

Zaˬkaˬliˇ 7:11

“Ehˇ kʼawꞈ, ngaˬ-euˬ tsawˇ haˬ deuˬ nui ma gʼahˇ-awˇ, maˬ naˇ haˬ geuꞈ-ehˇ, naˬ bawˇ dehˬ tsoeˬ taˬ-euˬ meh.