Yawˇlaˆ 3:17 - Akha

¹⁷ “Kʼoeˇ ngeh jawˇ, Iˇsaˬleˬlaˆ-oˇ, SahˬpaˬMiˬyehˇ lehˇ kuˇ-eu ngaˇ, nawˬ-euˬ Miˬyehˇ pyeuꞈ-eu ma lehˇ, nawˇ siˬ duˬ mawˇ duˬ laˇ tehꞈ-a. Muiˬ-eu shawˇ-eu ngaˬ-euˬ gawˬjawˬ, Ziˇoˬ-euˬ kʼoeˇ taˆ ngaˇ jawˇ ma. Yeˬluˇsaˬlehˬ meuˬ shawˇ laˇ-awˇ, aˬ cawˬ neh bi deuˆ gʼaˬ-eu jeˬ, tiˬ jawˇ-iˬ maˬ paˇ keuˆ le meh.

Yawˇlaˆ 3:17 ပူးပေါင်းရင်းမြစ်များ

Yawˇbaˆ 15:19

Aˬ yawꞈ maꞈ miˇ kʼahˬ laꞈ kʼoeˇ aˬ cawˬ tsawˇ jeuˬ tiˬ gʼaˬ-iˬ maˬ jawˇ-ehˇ, aˬ yawꞈ maꞈ-ahˇ Miˬyehˇ-ahˇ sheuˬ gʼawˬ nehˬ-eu tiˬ gʼaˬ-iˬ maˬ jawˇ-a.

Jaceuq 76:2

Aˬ yawꞈ-euˬ nymˇ Yeˬluˇsaˬlehˬ meuˬ-ahˇ jaˆ-awˇ, Ziˇoˬ gawˬ jawˬ kʼoeˇ taˆ aˬ yawꞈ jawˇ-eu meh.

Jaceuq 9:11

Ziˇoˬmeuˬ-ahˇ uˆlahˇ luꞈ-eu, SahˬpaˬMiˬyehˇ-ahˇja ceuˬ-awˬ. Aˬyawˬneh mˇ-euˬ gaˇkawˆdeuˬ, tsawˇjeuˬdawˬtawˆ-ahˇdzawˇnehˬ-awˬ.

Doˆ-iˇ 16:12

“Iˇsaˬleˬlaˆ tsawˇ haˬ deuˬ nui ma cawˆ-eu laꞈ kʼoeˇ toˇ luꞈ-eu teˇ saˇ-ahˇ ngaˇ ya gaˬ-euˬ ma. Aˬ yawꞈ maꞈ dzaˬ-eu gʼaˇ duˬ shaˬ jiˇ-ahˇ, uˬ ciꞈ uˬ taw paw zahˇ moˬ zahˇ shehˬ shehˬ ngeh yamˬ-ahˇ maˬ ehˇ, aˬ yawꞈ maꞈ loˬ-eu kaˬ muˇ deuˬ-ahˇ uˬ shawˬ paw maˬ ehˇ, aˬ yawꞈ maꞈ za tehꞈ-a lehˇ ehˇ nehˬ-awˬ. Ngaˇ-aˬ, aˬ yawꞈ maꞈ-euˬ Miˬyehˇ, Sahˬpaˬ Miˬyehˇ pyeuꞈ-eu gaˇ kawˆ aˬ yawꞈ maꞈ ya siˬ tehꞈ-a.”

Iˇsaˬyaˇ 11:9

Iˬ ma laˆ shaˆ iˇ cuꞈ byah-eu loꞈ-ehˇ, Sahˬpaˬ Miˬyehˇ-ahˇ siˬ nya-eu jeˬ, miˇ tsaˬ kʼoeˇ taˆ byah-eu miˇ neh, Miˬyehˇ-euˬ muiˬ-eu shawˇ-eu Ziˇoˬ gawˬ jawˬ-ahˇ, lehˬ laˇ ca laˇ duˬ maˬ jaˆ-a.

Iˇsaˬyaˇ 12:6

Ziˇoˬ meuˬ-ahˇ kʼaˇ jawˇ-eu deuˬ, laˬ kʼaˬ tiˬ cehˇ guˇ-awˇ caˇ-awˬ. Iˇsaˬleˬlaˆ Miˬyehˇ huiˬ dui mahˇ dui dui-awˇ, aˬ yawꞈ-euˬ tsawˇ haˬ deuˬ nehˬ-ehˇ jawˇ meh.”

Iˇsaˬyaˇ 35:8

“Muiˬ-eu shawˇ-eu gaˇ jawˬ” lehˇ kuˇ-eu gaˇ jawˬ tiˬ kahˇ, kʼoeˇ gaˇ dahˇ laˇ tehꞈ-a. Iˬ baˇ zaˬ deuˬ gaˇ jawˬ kʼoeˇ kahˇ maˬ cah-ehˇ, dawˇ ga deuˬ kʼoeˇ gaˇ gaˇ bahˬ maˬ bahˬ-a.

Iˇsaˬyaˇ 4:3

Miˬyehˇ neh bi dzeuˇ-iˇ-awˇ, Yeˬluˇsaˬlehˬ meuˬ-ahˇ kʼaˇ jawˇ yaꞈ-euˬ yawˬ gʼaˬ na luꞈ-ahˇ, yaw muiˬ yaw shawˇ tsawˇ haˬ lehˇ aˬ cawˬ kuˇ tehꞈ-a.

Iˇsaˬyaˇ 46:13

Gʼaˬ leˇ-eu aˇ nah kʼoeˇ ngaˇ bi peh le luꞈ ma. Gaˇ mahˇ maˬ paˇ kaˬ meh. Ngaˇ gʼaˬ leˇ-eu aˇ nah maˬ paˇ nyi naˬ nya meh. Yeˬluˇsaˬlehˬ meuˬ-ahˇ ngaˇ ka kʼoꞈ-awˇ, Iˇsaˬleˬlaˆ-ahˇ kʼoeˇ gaˇ ciˬ huiˬ nehˬ ma.”

Iˇsaˬyaˇ 52:1

Yeˬluˇsaˬlehˬ meuˬ-oˇ, noeˬ laˇ-awˬ. Beuˇ laˇ-awˬ. Gʼaˬ ziꞈ dah ni paˇ ahˇ laˇ-awˬ. Miˬyehˇ-euˬ muiˬ-eu shawˇ-eu meuˬ-oˇ, yaw shehꞈ kʼahˬ sehˇ dm-awˬ. Lawˇ ciꞈ zaˬ deuˬ meuˬ lahˇ laꞈ kʼoeˇ maˬ paˇ ya uˇ laˇ meh.

Iˇsaˬyaˇ 56:7

ngaˬ-euˬ muiˬ-eu shawˇ-eu gawˬ jawˬ-ahˇ sheuˬ daˆ-awˇ, ngaˬ-euˬ guiˬ lahˬ shaˇ nymˇ laꞈ kʼoeˇ, aˬ yawꞈ maꞈ-ahˇ ngaˇ laˬ kʼaˬ bi cehˇ ma. Aˬ yawꞈ maꞈ neh lawˇ-euˬ shehˇ-euˬ jeˬ-ahˇ, ngaˬ-euˬ lawˇ duˬ kʼoeˇ taˆ ngaˇ ha geuꞈ ma. Ngaˬ-euˬ Uˬ duˬ tahˬ nymˇ nymˇ ma heu-ahˇ, tsawˇ jeuˬ dawˬ tawˆ luꞈ-euˬ uˬ duˬ tahˬ nymˇ lehˇ myahˇ tehꞈ-a.”

Yeˬlaˬmiˇ 31:23

Iˇsaˬleˬlaˆ tsawˇ jeuˬ-euˬ Miˬyehˇ pyeuꞈ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ ehˇ-eu meh. “Tsawˇ jeuˬ heu jeuˬ-ahˇ aˬ yawꞈ maꞈ-euˬ miˇ kʼahˬ laꞈ kʼoeˇ ngaˇ sheuˬ kʼoꞈ gʼeh nehˬ-awˇ paˇ bi jawˇ ngeh, Yuˇdaˆ miˇ kʼahˬ hawˇ-eu kʼoeˇ gaˇ jaˆ-eu meuˬ deuˬ laꞈ kʼoeˇ, aˬ yawꞈ maꞈ heu loꞈ-ehˇ paˇ ya ehˇ tehꞈ-a. ‘Yaw tsaˬ yaw dawˇ jeˬ jawˇ-eu jawˇ duˬ-oˇ, muiˬ-eu shawˇ-eu gawˬ jawˬ-oˇ Sahˬpaˬ Miˬyehˇ nawˬ-ahˇ guiˬ lahˬ biꞈ luꞈ-uˇ’ lehˇ ya ehˇ tehꞈ-a.

Yeˬlaˬmiˇ 31:40

Lmˬ bymˇ jaˆ-awˇ yaw jawꞈ yaw laꞈ biˬ dzeh duˬ pyeuꞈ-eu deh kʼawꞈ kʼawꞈ lah-ehˇ maˬ ehˇ, Giˇdaˬloˬ lawˇ gawˆ kʼoeˇ taˆ paw dzeˇ, nahˇ ma doˆ kʼehˬ paw Mahˬ-euˬ lahˇ kʼehˬ-ahˇ keuˆ ni jaˆ-eu deh ga ga lah-ehˇ maˬ ehˇ, ngaˬ-euˬ gʼaˇ duˬ muiˬ-eu shawˇ-eu pehˇ tsahˇ pyeuꞈ laˇ tehꞈ-a. Meuˬ heu meuˬ-ahˇ tiˬ jawˇ-iˬ maˬ paˇ bi byaˆ-iˇ-ehˇ, tiˬ jawˇ-iˬ maˬ paˇ bi laˆ cawˆ ma.”

Yeˬsaˬgeˬlaˇ 20:40

Ngaˬ-euˬ muiˬ-eu shawˇ-eu gawˬ jawˬ pyeuꞈ-eu Iˇsaˬleˬlaˆ gawˬ jawˬ yaw goˇ kʼoeˇ taˆ, naw maꞈ Iˇsaˬleˬlaˆ tsawˇ haˬ dawˬ tawˆ luꞈ ngaˬ-ahˇ uˬ duˬ tahˬ tehꞈ-a. Naw maꞈ-ahˇ ngaˇ nui kʼahˇ shiˇ-awˇ, naw maꞈ-euˬ lawˇ-eu shehˇ-eu jeˬ, damˬ-eu jeˬ hawˇ-eu, muiˬ-eu shawˇ-eu laꞈ sawˬ deuˬ-ahˇ ngaˇ ha geuꞈ ma.

Yeˬsaˬgeˬlaˇ 37:6

Naw maꞈ-ahˇ shaˬ guˬ shaˬ caˆ hawˇ-eu shaˬ jiˇ bi dawꞈ laˇ-awˇ, baˆ kʼoˆ bi tsoꞈ gʼoeˬ laˇ ma. Naw maꞈ-ahˇ ngaˇ saꞈ paˇ baw ahˇ nehˬ-awˇ bi dehꞈ laˇ ma. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu naw maꞈ ya siˬ duˬ tehꞈ-a lehˇ ehˇ nehˬ-awˬ.”

Yeˬsaˬgeˬlaˇ 43:12

Uˬ duˬ tahˬ nymˇ nymˇ ma-ahˇ taꞈ-eu zahˇ dawˬ kʼoꞈ dawˬ-aˬ, heu loꞈ-ehˇ meh. Uˬ duˬ tahˬ nymˇ nymˇ ma jawˬ jawˬ-ehˇ jaˆ-eu gawˬ jawˬ uˬ du miˇ tsaˬ dawˬ tawˆ luꞈ, muiˬ-eu shawˇ-eu pehˇ tsahˇ meh.”

Yeˬsaˬgeˬlaˇ 44:9

“Baˆ kʼoˆ mehˬ dzaˬ maˬ yehˬ-euˬ aˬ cawˬ tsawˇ jeuˬ hawˇ-eu, ngaˬ-euˬ ehˇ dawˬ maˬ naˇ haˬ-eu tsawˇ haˬ tiˬ gʼaˬ-iˬ ngaˬ-euˬ Uˬ duˬ tahˬ nymˇ nymˇ ma-ahˇ maˬ ya uˇ laˇ-a. Iˇsaˬleˬlaˆ tsawˇ haˬ deuˬ nehˬ-ehˇ jawˇ luꞈ-eu aˬ cawˬ tsawˇ jeuˬ deuˬ kʼawꞈ, tiˬ gʼaˬ-iˬ maˬ ya uˇ laˇ-a lehˇ, Dawˬ tawˆ kʼoeˇ taˆ uˆ lahˇ-eu Sahˬpaˬ Miˬyehˇ pyeuꞈ-eu ngaˇ ehˇ-eu ma.”

Yeˬsaˬgeˬlaˇ 48:35

Meuˬ meuˬ lahˇ tiˬ jawˬ oeˬ heˇ ngaˬ yaˇ lmˇ byah-eu meh. Aˬ kaˇ naˇ, meuˬ kʼoeˇ meuˬ-euˬ tsawˇ myahˇ-aˬ, “ Sahˬpaˬ Miˬyehˇ heu gaˇ jawˇ meh” lehˇ ya kuˇ paˇ tehꞈ-a.

Daˬyeˬlaˇ 11:45

Iˬ ma laˆ shaˆ hawˇ-eu Uˬ duˬ tahˬ nymˇ nymˇ ma tsoˆ taˬ-euˬ gawˬ jawˬ yaw kaˬ-ahˇ, sahˬ paˬ-euˬ sehˬ gʼawˆ gʼawˆ ma deuˬ aˬ yawꞈ gʼawˆ tehꞈ-a. Ehˇ kʼawꞈ, aˬ yawꞈ-ahˇ ngehˬ gʼeh nehˬ-eu gʼaˬ maˬ jawˇ-ehˇ pyeuꞈ-iˇ-awˇ, ya shiˇ tehꞈ-a.”

Daˬyeˬlaˇ 9:16

Nga maꞈ lehˬ-iˇ-euˬ miˇ-a. Dzeuˇ laˇ ngeh, nga maꞈ-ahˇ nawˇ haw piˇ nehˬ laꞈ-euˬ meh. Kʼoeˇ miˇ neh, Yeˬluˇsaˬlehˬ meuˬ-ahˇ nui ma taˬ pehˇ nehˬ laꞈ. Kʼoeˇ-aˬ, nawˬ-euˬ meuˬ meh. Nawˬ-euˬ muiˬ-eu shawˇ-eu gawˬ jawˬ meh. Nga maꞈ-euˬ iˬ baˇ hawˇ-eu nga maꞈ-euˬ aˬ poeˬ aˬ bawˇ deuˬ neh mˇ-euˬ yaw lehˬ jeˬ baˬ da neh, dawˬ peh jaˆ-eu miˇ kʼahˬ deuˬ-ahˇ jawˇ-eu tsawˇ haˬ deuˬ, Yeˬluˇsaˬlehˬ meuˬ hawˇ-eu nawˬ-euˬ tsawˇ haˬ deuˬ-ahˇ ja bu luꞈ meh.

Yawˇlaˆ 2:27

Kʼoeˇ ngeh jawˇ Iˇsaˬleˬlaˆ-oˇ, naw maꞈ-euˬ gʼahˇceh ngaˇjawˇ-awˇ, Sahˬpaˬ Miˬyehˇ pyeuꞈ-eu ngaˇ-aˬ, naw maꞈ-euˬ Miˬyehˇ pyeuꞈ-awˇ, miˬyehˇ nui gʼaˬ maˬ jawˇ-a lehˇ, naw maꞈ-ahˇ siˬ duˬ leˇ tehꞈ-a. Aˬ cawˬ ja bu ja doeˇ-eu jeˬ, ngaˬ-euˬ tsawˇ haˬ heu deuˬ kʼoeˇ taˆ, tiˬ jawˇ-iˬ maˬ paˇ keuˆ le meh.

Yawˇlaˆ 3:21

Shiˬ laˆ yoeˇ-euˬ tsawˇ haˬ deuˬ-ahˇ, maˬ bi dzeuˇ-iˇ ni kʼehˬ nehˬ ma. Sahˬpaˬ Miˬyehˇ pyeuꞈ-eu ngaˇ-aˬ, Ziˇoˬ gawˬ jawˬ kʼoeˇ taˆ jawˇ ma.”

Miˇkaˬ 4:7

Aˬ yawꞈ maꞈ-aˬ, aˬ kuiˇ kuiˇ tawˆ bi dawˆ-awˇ, iˇ kahˇ-ahˇ gʼawˬ mahˇ kaˬ gaˇ jawˇ luꞈ meh. Ehˇ kʼawꞈ, dzeˇ yaꞈ-euˬ deuˬ-ahˇ ngaˇ yaw shuiꞈ shuiꞈ-ehˇ aˇ dahˬ paˇ beh nehˬ-awˇ, huiˬ-eu tsawˇ jeuˬ paˇ bi pyeuꞈ laˇ ma. Kʼoeˇ ngeh neh naˇ, Ziˇoˬ gawˬ jawˬ-ahˇ neh aˬ yawꞈ maꞈ-ahˇ ngaˇ mˬ maˬ maˬ byaˆ zaˇ ziˇ uˆ lahˇ ma.”

Naˬhmˬ 1:15

Gawˬ jawˬ uˬ du oe ka luꞈ-eu, laˬ kʼaˬ cehˇ-eu dawˬ tsaꞈ le-euˬ, dawˬ dzawˇ mˇ-eu gʼaˬ-ahˇ haw yawˬ. Gʼaˬ leˇ-euˬ gaˇ kawˆ dzawˇ-eu lehˇ, aˬ yawꞈ oe ka luꞈ gaˇ haw yawˬ. Yuˇdaˆ miˇ kʼahˬ-oˇ, bawˬ-iˬ gʼeh-awˬ. Naw maꞈ saˇ jaˇ dzaˬ taˬ-euˬ jeˬ, Miˬyehˇ-ahˇ paˇ mˇ kʼoꞈ nehˬ-awˬ. Naw maꞈ-ahˇ muiˇ-eu haiˬ-eu deuˬ, naw maꞈ-ahˇ guiˇ maˬ deuˆ nya ni, laˆ piˬ laˆ byoˆ jiˇ nehˬ-euˬ meh.

Zaˬkaˬliˇ 8:3

Ngaˬ-euˬ muiˬ-eu shawˇ-eu meuˬ pyeuꞈ-eu Yeˬluˇsaˬlehˬ meuˬ-ahˇ ngaˇ gʼoꞈ jawˇ le ma. Meuˬ kʼoeˇ-ahˇ saˇ jaˇ ziꞈ-eu meuˬ lehˇ aˬ cawˬ kuˇ-awˇ, Baoˬ huiˬ-eu Sahˬpaˬ Miˬyehˇ-euˬ gawˬ jawˬ-ahˇ muiˬ-eu shawˇ-eu gawˬ jawˬ lehˇ kuˇ tehꞈ-a.

Panmaeq 21:27

Ehˇ kʼawꞈ, maˬ muiˬ maˬ shawˇ-eu jeˬ tiˬ jeˬ-iˬ meuˬ kʼoeˇ meuˬ laꞈ kʼoeˇ maˬ ya hehˇ ahˇ gʼeh-a. Shaꞈ dawˇ-eu jeˬ mˇ-eu tsawˇ haˬ hawˇ-eu jaˬ myawꞈ myawꞈ-eu tsawˇ haˬ deuˬ kʼawꞈ, maˬ ya uˇ leˇ-a. Yawˇzaˬ-euˬ dehꞈ-eu saꞈ laˇ sahˬ boꞈ laꞈ kʼoeˇ tsawˇ myahˇ ahˇ-eu tsawˇ haˬ deuˬ tehꞈ-ehˇ kʼoeˇ gaˇ ya uˇ leˇ-eu meh.