Uˬ duˬ 26:30 - Akha

³⁰ Gawˬ jawˬ gawˬ duˇ kʼoeˇ taˆ jaˆ-eu naw maꞈ-euˬ uˬ duˬ tahˬ-eu jawˇ duˬ-ahˇ ngaˇ laˆ cawˆ-awˇ, yaw saw jeˬ doꞈ-awˇ damˬ-eu lawˇ duˬ kʼawꞈ ngaˇ laˆ pyaˆ ma. Shiˇ taˬ-euˬ naw maꞈ-euˬ gʼawˇ mawˇ deuˬ-ahˇ, coˬ dzeh taˬ-euˬ tahˬ pahˬ aˬ ma mawˇ kawˇ deuˬ kʼoeˇ taˆ gahˬ daˆ-awˇ, naw maꞈ-ahˇ ngaˇ nui daˆ daˆ dui dui ma.

Uˬ duˬ 26:30 ပူးပေါင်းရင်းမြစ်များ

Aˇ dahˬ 19:13

Aˬ jeˬ miˇ neh ehˇ naˇ, jawˇ duˬ heu tsahˇ-ahˇ nga nyaꞈ laˆ cawˆ-eu lehˇ gʼeh-eu ma. Heu gaˇ jawˇ luꞈ-eu tsawˇ haˬ heu deuˬ huiˬ dui dui-eu iˬ baˇ mˇ luꞈ-eu gaˇ kawˆ, Sahˬpaˬ Miˬyehˇ ya gaˬ-euˬ miˇ neh, meuˬ heu meuˬ-ahˇ laˆ cawˆ-eu gʼaˇ duˬ nga nyaꞈ-ahˇ pyehˬ leꞈ-euˬ meh.”

1 Sahˬpaˬ 13:2

Miˬyehˇ gʼaˇ duˬ ngehˬ dah-eu kʼoeˇ gʼaˬ, Sahˬpaˬ Miˬyehˇ neh kʼaˇ kʼehˇ-euˬ loꞈ-ehˇ lawˇ duˬ-ahˇ yaˬ kʼehˇ yaˬ-awˇ ehˇ-eu, “Lawˇ duˬ-oˇ, Lawˇ duˬ-oˇ, Sahˬpaˬ Miˬyehˇ heu loꞈ-ehˇ ehˇ-eu meh. Yawˇshiˆ lehˇ myahˇ-euˬ aˬ li tiˬ li Daˬbiˇ-euˬ nymˇ jiˇ laꞈ kʼoeˇ dehꞈ le tehꞈ-a. Aˬ cawˬ tsawˇ jeuˬ-euˬ lawˇ duˬ-ahˇ gaˇ mˇ-eu piˇ ma geuꞈ-awˇ nawˬ-euˬ kʼoeˇ taˆ lawˇ-eu shehˇ-eu jeˬ mˇ luꞈ-eu tsawˇ haˬ kʼoeˇ deuˬ-ahˇ, nawˬ-euˬ kʼoeˇ taˆ aˬ yawꞈ sehꞈ daˆ-awˇ, tsawˇ haˬ-euˬ shaˬ yoeˬ kʼawꞈ nawˬ-euˬ kʼoeˇ taˆ aˬ yawꞈ dzah puiˆ tehꞈ-a.”

1 Sahˬpaˬ 13:32

Sahˬpaˬ Miˬyehˇ neh aˬ yawꞈ-ahˇ kʼehˇ-awˇ bi ehˇ-euˬ loꞈ-ehˇ, Beˬdeˬlaˇ meuˬ-ahˇ jaˆ-eu lawˇ duˬ hawˇ-eu, Saˬmaˬliˆ miˇ kʼahˬ doe ni jaˆ-eu uˬ duˬ tahˬ-eu jawˇ duˬ deuˬ-ahˇ taꞈ leˇ-awˇ, aˬ yawꞈ neh kʼaˇ ehˇ taˬ yaꞈ-euˬ loꞈ-ehˇ aˬ diˇ aˬ maˇ pyeuꞈ laˇ tehꞈ-a.”

2 Sahˬpaˬ 23:16

Kʼoeˇ naˇ, kʼoeˇ-euˬ jawˬ jawˬ-ehˇ Yawˇshiˆ haw gʼeh ngeh, lmˬ bymˇ jaˆ gaˇ ya mawˇ-awˇ, tsawˇ haˬ-euˬ shaˬ yoeˬ duˬ doˆ-awˇ, lawˇ duˬ kʼoeˇ taˆ dzah puiˆ nehˬ-euˬ meh. Aˇ hu ba, bawˬ-iˬ gʼeh-awˇ lawˇ duˬ kʼoeˇ-euˬ dawˬ peh sahˬ paˬ Yeˬyawˇbamˬ yawꞈ luꞈ ngeh, Miˬyehˇ gʼaˇ duˬ ngehˬ dah-eu deuˬ neh ehˇ taˬ-euˬ dawˬ byah laˇ ni lawˇ duˬ kʼoeˇ hmˬ-ahˇ aˬ yawꞈ kʼoeˇ loꞈ-ehˇ laˆ cawˆ nehˬ-euˬ jeˬ pyeuꞈ-eu meh. Sahˬpaˬ Yawˇshiˆ jawˬ jawˬ-ehˇ paˇ haw gʼeh ngeh, kʼoeˇ loꞈ-ehˇ ehˇ taˬ yaꞈ-euˬ Miˬyehˇ gʼaˇ duˬ ngehˬ dah-eu gʼaˬ-euˬ lmˬ bymˇ-ahˇ paˇ mawˇ-euˬ meh.

2 Sahˬpaˬ 23:20

Lawˇ duˬ kʼoeˇ deuˬ-ahˇ gaˇ kʼaˇ mˇ luꞈ-eu lawˇ ciꞈ zaˬ-euˬ piˇ ma deuˬ-ahˇ, lawˇ duˬ kʼoeˇ deuˬ kʼoeˇ taˆ aˬ yawꞈ sehꞈ-awˇ, lawˇ duˬ aˬ yawꞈ hmˬ yawꞈ kʼoeˇ taˆ, tsawˇ haˬ shaˬ yoeˬ dzah puiˆ-euˬ meh. Kʼoeˇ naˇ, Yeˬluˇsaˬlehˬ meuˬ-ahˇ aˬ yawꞈ gʼoꞈ leˇ-euˬ meh.

2 Sahˬpaˬ 23:8

Yuˇdaˆ miˇ kʼahˬ doe ni jaˆ-eu meuˬ deuˬ-ahˇ jawˇ-eu piˇ ma deuˬ-ahˇ, Yeˬluˇsaˬlehˬ meuˬ-ahˇ aˬ yawꞈ sheuˬ uiˬ-awˇ, aˬ yawꞈ maꞈ neh lawˇ-eu shehˇ-eu jeˬ kʼaˇ mˇ-euˬ lawˇ duˬ dawˬ tawˆ luꞈ laˆ cawˆ jiˇ-euˬ meh. Yeˬluˇsaˬlehˬ meuˬ-ahˇ uˇ leˇ-eu lahˇ kʼehˬ kʼehˬ ma-euˬ aˇ caˇ paw dzeˇ paˆ-ahˇ lahˇ kʼehˬ tiˬ kʼehˬ jaˆ-eu meh. Lahˇ kʼehˬ kʼoeˇ kʼehˬ-aˬ, meuˬ-ahˇ uˆ lahˇ-eu gʼaˬ pyeuꞈ-eu Yawˇshuˆ neh gawˬ taˬ-euˬ meh. Kʼoeˇ-euˬ dawˬ peh jaˆ-eu ciꞈ myehꞈ nehꞈ deuˬ-ahˇ lawˇ-eu lawˇ duˬ kʼoeˇ deuˬ-ahˇ kʼawꞈ, aˬ yawꞈ laˆ cawˆ-euˬ meh. Piˇ ma kʼoeˇ deuˬ-ahˇ, Uˬ duˬ tahˬ nymˇ nymˇ ma laꞈ kʼoeˇ aˬ yawꞈ gaˇ maˬ bi mˇ-a.

2 Laˬsaˬbaˬ 23:17

Kʼoeˇ naˇ, aˬ yawꞈ maꞈ dawˬ tawˆ luꞈ Baˬlaˇ miˬyehˇ-euˬ uˬ duˬ tahˬ nymˇ-ahˇ iˇ-awˇ deh pyaˆ-euˬ meh. Kʼoeˇ gaˇ jaˆ-eu lawˇ duˬ deuˬ hawˇ-eu tahˬ pahˬ aˬ ma mawˇ kawˇ deuˬ deh pyaˆ deh shaˆ jiˇ-awˇ, Baˬlaˇ miˬyehˇ-euˬ piˇ ma Maˬtaˬ-ahˇ lawˇ duˬ kʼoeˇ deuˬ-euˬ mehˬ shi sehꞈ-euˬ meh.

2 Laˬsaˬbaˬ 31:1

Bawˬ-iˬ gʼeh gʼaˬ ngeh, Iˇsaˬleˬlaˆ tsawˇ haˬ dawˬ tawˆ luꞈ Yuˇdaˆ miˇ kʼahˬ laꞈ kʼoeˇ jaˆ-eu meuˬ yawˬ meuˬ na luꞈ-ahˇ iˇ doe-awˇ, kʼaˬ lo kʼawˇ zeuˇ tahˬ pahˬ aˬ ma mawˇ kawˇ deuˬ deh paˆ dzeh-awˇ, Aˬsheˇlaˬ miˬyehˇ ma-euˬ tahˬ pahˬ aˬ ma mawˇ kawˇ deuˬ tuˇ coˬ-awˇ, lawˇ duˬ deuˬ hawˇ-eu lawˇ ciꞈ zaˬ deuˬ uˬ duˬ tahˬ-eu jawˇ duˬ deuˬ-ahˇ laˆ cawˆ jiˇ-euˬ meh. Yuˇdaˆ miˇ kʼahˬ doe ni kʼoeˇ loꞈ-ehˇ jahˇ gʼaˬ ngeh, Beˬyaˬmiˬ miˇ kʼahˬ, Eˇpaˬleˬ miˇ kʼahˬ hawˇ-eu, Maˬnaˇseˬ miˇ kʼahˬ doe ni aˬ yawꞈ maꞈ kʼoeˇ loꞈ-ehˇ jahˇ-iˇ-awˇ, yawˬ ha-euˬ meuˬ-ahˇ gʼoꞈ-iˇ jiˇ-euˬ meh.

Jaceuq 106:40

Kʼoeˇ miˇ neh, aˬ yawꞈ-euˬ tsawˇ haˬ deuˬ-ahˇ Sahˬpaˬ Miˬyehˇ nui ma pehˇ-awˇ, aˬ yawꞈ maꞈ-ahˇ nui daˆ daˆ-euˬ meh.

Jaceuq 89:38

Ehˇ kʼawꞈ nawˬ neh tseˇ doˆ-euˬ sahˬ paˬ-ahˇ nawˇ nui ma pehˇ-eu meh. Aˬ yawꞈ-ahˇ nawˇ byehˇ dzeh nehˬ-euˬ meh.

Iˇsaˬyaˇ 27:9

Lawˇ ciꞈ zaˬ-euˬ lawˇ duˬ kʼaˬ lo kʼoeˇ deuˬ, lu boeˬ kʼaˬ lo loꞈ-ehˇ deh meuˇ jiˇ-awˇ, yaw saw jeˬ doꞈ damˬ-euˬ lawˇ duˬ hawˇ-eu, Aˬsheˇlaˬ miˬ yehˇ ma-euˬ tahˬ pahˬ aˬ ma mawˇ kawˇ, tiˬ hmˬ kʼaˇ dzeˇ kʼoeˇ keuˆ ni, Iˇsaˬleˬlaˆ tsawˇ jeuˬ-ahˇ iˬ baˇ maˬ pyehˬ nehˬ-a.

Yeˬlaˬmiˇ 14:19

Sahˬpaˬ Miˬyehˇ nawˇ Yuˇdaˆ tsawˇ haˬ-ahˇ, byehˇ tsehˆ tsehˆ nehˬ laꞈ-euˬ ma loˇ. Ziˇoˬ meuˬ-ahˇ nawˇ maˬ haw nahˇ te loˇ. Nga maꞈ jaˆ gʼaˬ maˬ yaˇ taˬ nya gaˇ keuˆ, aˬ jeˬ miˇ neh nawˇ laˆ naˇ nehˬ laꞈ te. Nui saˇ oꞈ-eu jeˬ-ahˇ nga maꞈ poˆ kʼawꞈ, yaw muiˬ tiˬ jeˬ-iˬ maˬ baw-a. Naˇ gawˇ taˬ leˇ gaˇ nga maꞈ noeˬ tmˬ kʼawꞈ, guˆ-eu gaˆ-eu jeˬ paˇ keuˆ le-euˬ meh.

Yeˬlaˬmiˇ 16:18

Shiˇ taˬ-euˬ tsawˇ haˬ loꞈ-ehˇ saꞈ maˬ gʼawˇ nya-eu tahˬ pahˬ aˬ ma mawˇ kawˇ deuˬ neh ngaˬ-euˬ miˇ kʼahˬ-ahˇ aˬ yawꞈ maꞈ laˆ jawꞈ-awˇ, maˬ ngeuˇ-eu miˬ yehˇ deuˬ hehˇ byah leꞈ taˬ-euˬ miˇ neh, aˬ yawꞈ maꞈ neh mˇ-euˬ iˬ baˇ aˇ poeˬ aˬ yawꞈ maꞈ-ahˇ ngaˇ nyiˬ bymˇ paˇ kʼehˬ poˆ nehˬ ma.”

Yeˬsaˬgeˬlaˇ 16:39

Ngaˇ nawˬ-ahˇ aˬ yawꞈ maꞈ-euˬ aˬ laꞈ laꞈ kʼoeˇ a nehˬ-awˇ, nawˬ neh meh maˬ laˇ geuꞈ-euˬ jawˇ duˬ deuˬ hawˇ-eu tahˬ pahˬ aˬ ma mawˇ kawˇ-ahˇ uˬ duˬ tahˬ-euˬ jawˇ duˬ deuˬ-ahˇ, aˬ yawꞈ maꞈ laˆ cawˆ tehꞈ-a. Nawˇ dm luꞈ-eu mehˬ tsoeˬ hawˇ-eu nawˇ geuꞈ luꞈ-eu myawˬ guˇ deuˬ aˬ yawꞈ maꞈ lehˆ doˆ jiˇ-awˇ, neˇ myawˆ ni bi jawˇ yaꞈ tehꞈ-a.

Yeˬsaˬgeˬlaˇ 43:7

“Tsawˇ haˬ zaˬ-oˇ, ngaˬ-euˬ nuiˇ mahˬ heu gaˇ jaˆ-eu ma. Heu gaˇ Iˇsaˬleˬlaˆ tsawˇ haˬ nehˬ-ehˇ ngaˇ jawˇ-awˇ, aˬ yawꞈ maꞈ-ahˇ mˬ maˬ maˬ byaˆ zaˇ ziˇ uˆ lahˇ ma. Iˇsaˬleˬlaˆ tsawˇ haˬ deuˬ maˬ kaˬ, aˬ yawꞈ maꞈ-euˬ sahˬ paˬ deuˬ maˬ kaˬ, miˬ yehˇ nui deuˬ-ahˇ uˬ duˬ tahˬ-eu laꞈ kʼoeˇ maˬ ehˇ, jawˇ duˬ heu tsahˇ-ahˇ sahˬ paˬ deuˬ-euˬ mawˇ kawˇ ka tuˇ-eu laꞈ kʼoeˇ maˬ ehˇ, ngaˬ-euˬ tsawˇ myahˇ-ahˇ laˆ cawˆ-eu jeˬ tiˬ jawˇ-iˬ maˬ paˇ mˇ-aˇ.

Yeˬsaˬgeˬlaˇ 6:13

Tahˬ pahˬ aˬ ma mawˇ kawˇ dawˬ peh hawˇ-eu lawˇ duˬ tiˬ jawˬ maˬ ehˇ, gawˬ duˇ yaw goˇ deuˬ-euˬ uˬ du doe ni maˬ ehˇ, gawˬ jawˬ uˬ duˬ yawˬ gaˇ na luꞈ maˬ ehˇ, naˇ shmˇ kʼaˇ muiˬ-eu aˇ bawˇ yawˬ bawˇ na luꞈ maˬ ehˇ, tsuiꞈ kaˆ bawˇ ma kʼaˇ jaˆ-eu uˬ moˆ maˬ ehˇ, aˬ yawꞈ maꞈ neh tahˬ pahˬ aˬ ma mawˇ kawˇ-ahˇ kʼaˇ lawˇ kʼaˇ shehˇ-euˬ jawˇ duˬ doe ni maˬ ehˇ, tsawˇ shiˇ ga byah tehꞈ-a. Kʼoeˇ ngeh jawˇ, ngaˇ Sahˬpaˬ Miˬyehˇ pyeuꞈ-eu gaˇ kawˆ, yawˬ gʼaˬ na luꞈ ya siˬ duˬ tehꞈ-a.

Hawˇseˬ 10:2

Nui ma yaw gʼoꞈ ahˇ-eu aˇ poeˬ, nymˬ-mˇ paˇ ya daˬ poˆ tehꞈ-a. Aˬ yawꞈ maꞈ-euˬ lawˇ duˬ kʼoeˇ deuˬ, Miˬyehˇ laˆ kʼehˬ laˆ kʼoeˆ nehˬ-awˇ, muiˬ-eu shawˇ-eu kʼawˇ zeuˇ kʼoeˇ deuˬ, laˆ piˬ laˆ byoˆ jiˇ nehˬ tehꞈ-a.

Uˬ duˬ 20:23

Kʼoeˇ gaˇ jawˇ-eu tsawˇ haˬ deuˬ-euˬ zahˇ sahˇ kʼoꞈ-ahˇ naw maꞈ taˬ caw teh. Miˇ kʼahˬ kʼoeˇ kʼahˬ-ahˇ naw maꞈ uˇ leˇ nya ni, lawˇ ciꞈ zaˬ kʼoeˇ deuˬ-ahˇ ngaˇ teh dzeh-eu lehˇ gʼeh-eu ma. Aˬ yawꞈ maꞈ maˬ muiˬ maˬ jaˬ-eu jeˬ tehꞈ-ehˇ mˇ-eu miˇ neh, aˬ yawꞈ maꞈ-ahˇ ngaˇ nui ma byuˇ laˇ taˬ-euˬ ma.

Uˬ duˬ 26:11

Muiˬ-eu shawˇ-eu Sehˬ gʼawˆ laꞈ kʼoeˇ, naw maꞈ nehˬ-ehˇ ngaˇ jawˇ-awˇ, naw maꞈ-ahˇ ngaˇ maˬ byehˇ dzeh.

Uˬ duˬ 26:15

Ngaˬ-euˬ zahˇ dawˬ kʼoꞈ dawˬ deuˬ-ahˇ maˬ naˇ haˬ geuꞈ ni, ngaˬ nehˬ-ehˇ dzaˬ taˬ-euˬ saˇ jaˇ-ahˇ naw maꞈ puiˬ naˇ,

Aˬmoˆ 6:8

Dawˬ tawˆ kʼoeˇ taˆ uˆ lahˇ-eu Baoˬ huiˬ-eu Sahˬpaˬ Miˬyehˇ heu loꞈ-ehˇ maˇ jawˆ ni ehˇ taˬ-euˬ meh. “Iˇsaˬleˬlaˆ tsawˇ haˬ nui ma huiˬ gaˇ mahˇ gaˇ ngaˇ maˬ haw nahˇ nya. Aˬ yawꞈ maꞈ dehꞈ byawˬ-eu gʼaˇ duˬ laˆ saˆ muiˬ taˬ-euˬ nymˇ nymˇ ma deuˬ-ahˇ ngaˇ maˬ haw nahˇ nya. Aˬ yawꞈ maꞈ-euˬ meuˬ meuˬ ma hawˇ-eu kʼoeˇ gaˇ kʼaˇ jaˆ-eu yawˬ jeˬ na luꞈ, muiˇ-eu deuˬ-euˬ aˬ laꞈ laꞈ kʼoeˇ ngaˇ a nehˬ ma.”

Aˬmoˆ 7:9

Iˇtsaˆ-euˬ zaˬ deuˬ uˆ deuˬ uˬ duˬ tahˬ-eu jawˇ duˬ ya cawˆ-iˇ tehꞈ-a. Iˇsaˬleˬlaˆ tsawˇ jeuˬ-euˬ muiˬ-eu shawˇ-eu jawˇ duˬ deuˬ ya luˬ ya seˇ-iˇ jiˇ tehꞈ-a. Sahˬpaˬ Yeˬyawˇbamˬ-euˬ nymˇ jiˇ sahˬ paˬ geuꞈ-awˇ uˆ lahˇ-eu aˇ yamˬ aˇ saˬ saˬ tehꞈ-a.”

Dawˬmehˬ 32:19

“Sahˬpaˬ Miˬyehˇ kʼoeˇ gaˇ mawˇ ngeh, nui ma pehˇ dui dui -eu laꞈ kʼoeˇ, yawꞈ-euˬ aˬ buˇ aˬ li deuˬ-ahˇ, myaˆ maˬ haw cawˬ ni byehˇ-euˬ meh.