Uˬ duˬ 16:16 - Akha

¹⁶ Iˇsaˬleˬlaˆ tsawˇ haˬ deuˬ-euˬ maˬ muiˬ maˬ shawˇ-eu jeˬ hawˇ-eu iˬ baˇ baˬ da neh, kʼoeˇ loꞈ-ehˇ jahˇ-awˇ, Muiˬ dui Shawˇ dui dui-eu Jawˇ duˬ shawˇ-eu zahˇ aˬ yawꞈ ya jahˇ meh. Sehˬ gʼawˆ gʼaˇ duˬ kʼawꞈ, aˬ yawꞈ kʼoeˇ loꞈ-ehˇ ya jahˇ meh. Aˬ jeˬ miˇ neh ehˇ naˇ, kʼoeˇ-aˬ, maˬ shawˇ-eu pu-euˬ gʼahˇ ceh jaˆ-eu miˇ neh meh.

Uˬ duˬ 16:16 ပူးပေါင်းရင်းမြစ်များ

Doˆ-iˇ 30:10

Iˬ baˇ ya buˬ-iˇ ni, tiˬ kʼoꞈ tiˬ poˆ sehꞈ-awˇ lawˇ-euˬ jeˬ zaˬ-eu shiˬ yuˇ-awˇ, lawˇ duˬ kʼoeˇ hmˬ-euˬ uˬ coeˇ oeˬ kahˬ-ahˇ toeˬ lehꞈ-eu laꞈ kʼoeˇ, lawˇ duˬ shawˇ-eu zahˇ Aˬloˬ ya mˇ meh. Mehˬ hu paw dehꞈ daˆ leꞈ-eu aˇ yamˬ laꞈ kʼoeˇ, yawˬ kʼoꞈ na luꞈ kʼoeˇ loꞈ-ehˇ ya mˇ meh. Lawˇ duˬ heu hmˬ-aˬ, maˇ maˇ ni shawˇ jehˆ ni gʼeh-awˇ, Sahˬpaˬ Miˬyehˇ pyeuꞈ-eu ngaˬ-ahˇ damˬ nehˬ taˬ-euˬ lawˇ duˬ ya bi pyeuꞈ meh.”

Uˬ duˬ 16:17

Shawˇ-eu zahˇ jahˇ-eu gʼaˇ duˬ, Muiˬ dui Shawˇ dui dui-eu Jawˇ duˬ-ahˇ Aˬloˬ uˇ leˇ-awˇ doˆ le ngeh keuˆ ni, Sehˬ gʼawˆ laꞈ kʼoeˇ tsawˇ haˬ tiˬ gʼaˬ-iˬ maˬ ya jawˇ-a. Aˬ yawꞈ-euˬ gʼawˇ mawˇ gʼaˇ duˬ maˬ ehˇ, aˬ yawꞈ-euˬ miˬ sawˇ zaˬ deuˬ gʼaˇ duˬ maˬ ehˇ, tsawˇ haˬ aˇ maꞈ aˇ muˇ dawˬ tawˆ luꞈ-euˬ gʼaˇ duˬ maˬ ehˇ, aˬ yawꞈ zahˇ jahˇ gʼaˬ ngeh,

Uˬ duˬ 16:18

lawˇ duˬ shawˇ-eu gʼaˇ duˬ maˬ ehˇ, miˬ dzaˬ dzah puiˆ-awˇ lawˇ-eu jeˬ lawˇ-eu gʼaˇ duˬ maˬ ehˇ, lawˇ duˬ jaˆ gaˇ aˬ yawꞈ ya iˇ meh. Mawˇ neˇ-euˬ shiˬ hawˇ-eu ciꞈ myehꞈ-euˬ shiˬ yuˇ-awˇ, lawˇ duˬ-euˬ laꞈ coeˇ deuˬ-ahˇ tsoꞈ-eu uˬ coeˇ deuˬ-ahˇ aˬ yawꞈ ya lehꞈ meh.

Uˬ duˬ 23:27

Ba la shiꞈ siˬ tiˬ siˬ tseˇ nah tiˬ nah-aˬ, tiˬ kʼoꞈ tiˬ poˆ Iˇsaˬleˬlaˆ tsawˇ haˬ deuˬ-euˬ iˬ baˇ sha dzeh-eu zahˇ jahˇ-eu aˇ nah pyeuꞈ-eu meh. Aˇ nah kʼoeˇ nah-ahˇ, tiˬ jeˬ-iˬ maˬ dzaˬ-ehˇ jawˇ-awˇ, Sahˬpaˬ Miˬyehˇ-ahˇ uˬ duˬ tahˬ-eu gʼaˇ duˬ uiˬ leˇ-awˇ, dzaˬ dzaˬ dawˇ dawˇ lawˇ-eu jeˬ Sahˬpaˬ Miˬyehˇ-ahˇ ya lawˇ meh.

Uˬ duˬ 8:15

Mawˇ neˇ kʼoeˇ mawˇ-ahˇ Moˇseˬ sehꞈ-euˬ meh. Lawˇ duˬ a nehˬ-eu gʼaˇ duˬ, mawˇ neˇ kʼoeˇ mawˇ-euˬ shiˬ ui cuiˆ yuˇ-awˇ, aˬ yawꞈ-euˬ laꞈ noeˇ kʼoeˇ gaˇ cawˬ duiˆ-awˇ, lawˇ duˬ-euˬ laꞈ coeˇ-ahˇ tsoꞈ doˆ-eu uˬ coeˇ deuˬ-ahˇ lehꞈ-euˬ meh. Dzehˬ laˇ-euˬ shiˬ deuˬ yuˇ-awˇ, lawˇ duˬ-euˬ dawˬ pehˬ-ahˇ shehˆ-euˬ meh. Kʼoeˇ loꞈ-ehˇ jahˇ-awˇ, lawˇ duˬ kʼoeˇ a nehˬ-awˇ bi muiˬ bi shawˇ laˇ-euˬ meh.

Bawˇtsahˬ 17:11

Kʼoeˇ ngeh, Sahˬpaˬ Miˬyehˇ neh dawˬ kʼaˇ biꞈ nehˬ-euˬ loꞈ-ehˇ Moˇseˬ mˇ-euˬ meh.

Bawˇtsahˬ 28:15

Aˬ yawꞈ nah yawꞈ lawˇ luꞈ-eu aˬ gaꞈ dzaˇ uiˇ hawˇ-eu nui jeˬ uˬ taꞈ, iˬ baˇ shawˇ-eu lawˇ-eu jeˬ gʼaˇ duˬ ciꞈ myehꞈ ciꞈ buˬ tiˬ mawˇ ya lawˇ meh.

Yoˇhaˬ 14:3

Ngaˇ jawˇ zaˇ laˆ saˆ leˇ gʼaˬ ngeh, naw maꞈ-ahˇ paˇ sheuˬ laˬ le-awˇ, ngaˬ nehˬ-ehˇ bi jawˇ laˇ ma.

HeˬByehˇ 2:17

Ehˇ mawꞈ-eu dawˬ tsuiꞈ-aˬ, tsawˇ haˬ zaˬ-ahˇ Miˬyehˇ iˬ baˇ pyehˬ nehˬ nya ni, saˇ jaˇ ziꞈ-awˇ gʼawˬ shaˬ gaˬ-eu nui ma ahˇ-eu Miˬyehˇ-euˬ gaˇ mˇ-eu Piˇma Yaw huiˬ gʼaˬ geuꞈ-eu gʼaˇ duˬ, yawˬ jeˬ na luꞈ laꞈ kʼoeˇ aˬ yawꞈ-euˬ mehˇ nmˇ pyeuꞈ-eu tsawˇ haˬ zaˬ deuˬ loꞈ-ehˇ maˇ maˇ ni tsawˇ haˬ zaˬ ya pyeuꞈ tsehˆ-euˬ meh.