Panmaeq 5:13 - Akha

¹³ Kʼoeˇ naˇ, mˬ kʼoeˇ taˆ, miˇ tsaˬ kʼoeˇ taˆ hawˇ-eu, miˇ oˆ kʼahˬ hawˇ-eu iˬ ma laˆ shaˆ-ahˇ kʼaˇ dehꞈ kʼaˇ jawˇ-eu jeˬ pyeuꞈ-eu, boeˬ boeˬ luˆ luˆ laꞈ kʼoeˇ kʼaˇ dehꞈ kʼaˇ jawˇ-eu deuˬ dawˬ tawˆ luꞈ-euˬ teˇ saˇ ngaˇ ya gaˬ-euˬ ma. Aˬ yawꞈ maꞈ heu loꞈ-ehˇ caˇ luꞈ-eu meh. “Nuiˇ mahˬ-ahˇ nuiˇ-eu gʼaˬ hawˇ-eu Yawˇ zaˬ-ahˇ, yaw shehꞈ kʼahˬsehˇ hawˇ-eu baoˬ, mˬ mˬ maˬ byaˆ zaˇ zi jaˆ luꞈ-uˇ”

Yawshawr Yaerbof Dawqma Sarjax Yawshuif Jaceuq-eu Hawr-eu Dawqdaq

¹³ Khoernar-aq, ngar, mq-euq khoertav hawr-eu mirtsaq-euq khoertav, mirtsaq-euq dawqdan hawr-eu iqmalavshav-euq lafkhoer, khardaef kharjawr-eu jeq, heulof-aer aer-eu gar yagaq-euq ma, “Jaceuq-eu jeq hawr-eu taqhuiq taqmanr-eu jeq, Yawshaef khanqsaer hawr-eu baoq dawqtawvluf, Li-eu maqbawni, nuirmanq-anr nuirluf-eu ghaq-anr hawr-eu Yawrzaq-anr of luf-ur.”

Panmaeq 5:13 ပူးပေါင်းရင်းမြစ်များ

1 Laˬsaˬbaˬ 29:11

Baoˬ maˬ ehˇ, yaw shehꞈ kʼahˬ sehˇ maˬ ehˇ, huiˬ dui mahˇ dui dui-eu jeˬ maˬ ehˇ, gʼaˬ leˇ-eu jeˬ maˬ ehˇ, zahˬ dui dui leˇ paˬ-ehˇ gʼeh-eu jeˬ maˬ ehˇ, dawˬ tawˆ luꞈ nawˬ-euˬ laꞈ kʼoeˇ byah luꞈ meh. Mˬ hawˇ-eu miˇ kʼoeˇ taˆ kʼaˇ jaˆ-eu yawˬ jeˬ na luꞈ nawˬ-euˬ pyeuꞈ-awˇ, dawˬ tawˆ kʼoeˇ taˆ uˆ lahˇ-eu huiˬ dzehˬ-eu sahˬ paˬ nawˇ meh.

Iˇsaˬyaˇ 24:14

Buˬ-iˇ-euˬ tsawˇ haˬ deuˬ, laˬ kʼaˬ cehˇ-eu caˇ dawˬ caˇ tehꞈ-a. Nahˇ ma ga kʼehˬ paw jawˇ-eu deuˬ Sahˬpaˬ Miˬyehˇ huiˬ-eu mahˇ-eu gaˇ kawˆ ja tehꞈ-a.

Iˇsaˬyaˇ 42:10

Sahˬpaˬ Miˬyehˇ-ahˇ caˇ dawˬ yaw shuiꞈ caˇ-awˇ ja ceuˬ-awˬ. Miˇ tsaˬ dawˬ tawˆ aˬ yawꞈ-ahˇ caˇ-awˇ ja ceuˬ-awˬ. Iˬ ma laˆ shaˆ kʼoeˇ taˆ cah-eu tsawˇ haˬ dawˬ tawˆ, laˆ shaˆ laꞈ kʼoeˇ kʼaˇ uˇ-eu jeˬ dawˬ tawˆ, aˬ yawꞈ-ahˇ ja ceuˬ-awˬ. Gaˇ mahˇ-ahˇ jaˆ-eu miˇ kʼahˬ deuˬ hawˇ-eu, kʼoeˇ gaˇ kʼaˇ jawˇ kʼaˇ deuˬ aˬ yawꞈ-ahˇ ja ceuˬ-awˬ.

Maꞈtehˬ 6:13

Iˬ baˇ muˇ juˇ mehˬ nah, taˬ bi iˇ laꞈ, Yaw haiˬ laꞈ kʼoeˇ, bi dzeuˇ-iˇ laꞈ.’

Luˇkaꞈ 2:14

“Mˬ taˆ yaw goˇ jawˇ-eu Miˬyehˇ, baoˬ yaw shehꞈ kʼahˬ sehˇ huiˬ luꞈ-uˇ. Miˇ tsaˬ tsawˇ haˬ zaˬ deuˬ laꞈ kʼoeˇ, aˬ yawꞈ nui kʼahˇ shiˇ-eu deuˬ-ahˇ, nui saˇ za-eu jeˬ oꞈ luꞈ-uˇ.”

Yoˇhaˬ 1:29

Yawˬ nah yawˬ, Yeˬsuˇ oe luꞈ gaˇ Yoˇhaˬ mawˇ-awˇ ehˇ-eu, “Miˇ tsaˬ zaˬ-euˬ iˬ baˇ-ahˇ pi dzeh le-euˬ Miˬyehˇ-euˬ yawˇ zaˬ-ahˇ haw sheˇ.

Lormav 11:36

Kʼaˇ jawˇ kʼaˇ jaˆ-eu jeˬ dawˬ tawˆ luꞈ aˬ yawꞈ neh beh taˬ-euˬ meh. Dawˬ tawˆ luꞈ aˬ yawꞈ baˬ da neh jaˆ luꞈ jawˇ luꞈ-awˇ, aˬ yawꞈ-euˬ gʼaˇ duˬ jaˆ luꞈ jawˇ luꞈ-eu tehꞈ meh. Mˬ maˬ maˬ byaˆ zaˇ ziˇ Miˬyehˇ-ahˇ ciˬ huiˬ ciˬ mahˇ kaˇ-euˇ. Aˬ miˬ.

Lormav 16:27

Yeˬsuˇ Ka li laꞈ kʼoeˇ Miˬyehˇ-ahˇ mˬ maˬ maˬ byaˆ zaˇ ziˇ ja ceuˬ kaˇ-euˇ. Aˬ yawꞈ tiˬ gʼaˬ tehꞈ-ehˇ zaˬ siˬ tsawˇ gahˇ dawˬ tawˆ luꞈ ahˇ-awˇ, yaw shehꞈ kʼahˬ sehˇ huiˬ dui dui-eu meh. Aˬ miˬ.

Lormav 9:5

Aˬ yawꞈ maꞈ-aˬ, tsawˇ myahˇ doˆ dui dui-eu Heˬbyehˇ tsawˇ haˬ aˬ poeˬ aˬ bawˇ kʼoeˇ deuˬ o neh jeuˬ le o le-euˬ tsawˇ haˬ deuˬ meh. Yeˬsuˇ Ka li kʼawꞈ, tsuiꞈ taꞈ gaˇ neh sawˇ leꞈ naˇ, aˬ yawꞈ maꞈ-euˬ tsawˇ jeuˬ pyeuꞈ-eu meh. Dawˬ tawˆ kʼoeˇ taˆ uˆ lahˇ-eu Miˬyehˇ-ahˇ mˬ maˬ maˬ byaˆ zaˇ ziˇ ja ceuˬ luꞈ-uˇ. Aˬ miˬ.

Eˇpeˇsu 3:21

Miˬyehˇ-ahˇ, Ka li zaˬ aˇ muˇ laꞈ kʼoeˇ maˬ ehˇ, Yeˬsuˇ ka li laꞈ kʼoeˇ maˬ ehˇ, mˬ maˬ maˬ byaˆ zaˇ ziˇ aˬ myah luꞈ yaw shehꞈ kʼahˬ sehˇ huiˬ luꞈ-uˇ. Aˬ miˬ.

Piˇliˇpiˆ 2:10

Mˬ miˇ hawˇ-eu miˇ oˆ keuˆ ni, pawˬ tsuiꞈ dawˬ tawˆ pawˬ dmˬ dmˬ-awˇ, Yeˬsuˇ tsawˇ myahˇ ciˬ huiˬ tehꞈ-a.

Gawˇlawˇsehˇ 1:23

Naw maꞈ jah-eu jeˬ laꞈ kʼoeˇ ziꞈ dah ni ya dehꞈ daˆ gʼeh-awˇ, Laˬ kʼaˬ cehˇ-eu Guiˬ lahˬ dawˬ ya gaˬ ngeh za taˬ-euˬ noeˬ tmˬ-eu jeˬ poˆ poˆ laˆ laˆ-ehˇ maˬ ya bi gʼeh-a. Ngaˇ Pawˇluˆ zaˬ kʼaˆ geuꞈ luꞈ-eu heu-aˬ, miˇ tsaˬ kʼoeˇ taˆ kʼaˇ jawˇ-eu tsawˇ haˬ yawˬ gʼaˬ na luꞈ-ahˇ mehˬ nehˬ-euˬ Laˬ kʼaˬ cehˇ-eu Guiˬ lahˬ dawˬ heu-euˬ gʼaˇ duˬ ma.

1 Tiˆmoˇseˬ 4:16

Yawˬ ha-euˬ gʼawˇ mawˇ gaˇ kawˆ maˬ ehˇ, yawˬ ha mehˬ-eu tsoˆ-eu jeˬ gaˇ kawˆ maˬ ehˇ, yaw muiˬ-ehˇ yahˇ-awˬ. Gaˇ heu deuˬ-ahˇ maˬ byehˇ ni mˇ daˆ leꞈ-awˬ. Aˬ jeˬ miˇ neh ehˇ naˇ, nawˇ kʼoeˇ loꞈ-ehˇ mˇ-eu kʼoeˇ-aˬ, nawˬ-euˬ gʼawˇ mawˇ-ahˇ maˬ ehˇ, nawˬ neh mehˬ nehˬ tsoˆ nehˬ-euˬ tsawˇ haˬ deuˬ-ahˇ maˬ ehˇ, ka kʼoꞈ-eu jeˬ pyeuꞈ-eu meh.

1 Beˬtuˆluˆ 4:11

Mˬ maˬ maˬ byaˆ zaˇ ziˇ yaw shehꞈ kʼahˬ sehˇ hawˇ-eu baoˬ ahˇ-eu gʼaˬ pyeuꞈ-eu Miˬyehˇ-ahˇ, yawˬ jeˬ na luꞈ laꞈ kʼoeˇ Yeˬsuˇ Ka li-ahˇgʼoe-awˇ aˬ cawˬ ja ceuˬ ni, dawˬ mehˬ mehˬ-eu tsawˇ haˬ deuˬ Miˬyehˇ dawˬ kawˬ mehˬ-awˇ, aˬ cawˬ-ahˇ caw ba-eu tsawˇ haˬ deuˬ kʼawꞈ, Miˬyehˇ neh biꞈ-euˬ baoˬ-ahˇ gʼoe-awˇ caw ba-awˬ. Aˬ miˬ

1 Beˬtuˆluˆ 5:11

Uˆ lahˇ-eu baoˬ, Miˬyehˇ-ahˇ mˬ maˬ maˬ byaˆ zaˇ ziˇ jaˆ luꞈ-uˇ. Aˬ miˬ.

Panmaeq 1:6

Kʼoeˇ uˬ taꞈ, aˬ yawꞈ-euˬ Aˬda Miˬyehˇ-euˬ gaˇ bi mˇ-eu gʼaˇ duˬ, aˬ dui-ahˇ piˇ ma-euˬ miˇ kʼahˬ tiˬ kʼahˬ bi pyeuꞈ laˇ-euˬ meh. Yaw shehꞈ kʼahˬ sehˇ hawˇ-eu baoˬ, mˬ maˬ maˬ byaˆ zaˇ ziˇ Yeˬsuˇ Ka li-ahˇ jaˆ luꞈ-uˇ. Aˬ miˬ.

Panmaeq 13:8

Bi sehꞈ-euˬ Yawˇzaˬ-euˬ dehꞈ-eu saꞈ laˇ sahˬ boꞈ laꞈ kʼoeˇ, miˇ tsaˬ tahˬ kʼawˇ maˬ beh mi naˆ-ehˇ tsawˇ myahˇ bi boꞈ ahˇ taˬ-euˬ tsawˇ haˬ deuˬ maˬ ngeuˇ naˇ, miˇ tsaˬ kʼoeˇ taˆ kʼaˇ jawˇ-eu tsawˇ haˬ dawˬ tawˆ luꞈ jeˬ zaˬ yaw haiˬ kʼoeˇ mawˇ-ahˇ uˬ duˬ tahˬ tehꞈ-a.

Panmaeq 5:1

Dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu gʼaˬ-euˬ aˇ maˇ laꞈ-ahˇ, sahˬ boꞈ paˇ yoˆ tiˬ yoˆ tuˆ tehˬ taˬ-euˬ gaˇ ngaˇ ya mawˇ-euˬ ma. Nyiˬ pyawˬ luꞈ sahˬ boꞈ boꞈ byah taˬ-awˇ, jmˬ shiꞈ tsahˇ diˬ taˬ-euˬ meh.

Panmaeq 5:12

Aˬ yawꞈ maꞈ teˇ saˇ yaw kʼaˆ-ehˇ guˇ-awˇ heu loꞈ-ehˇ caˇ-eu meh. “Sehꞈ gaˇ ya daˬ-euˬ Yawˇzaˬ-aˬ, baoˬ hawˇ-eu pyuˇ shuiˇ myawˬ gahˬ, zaˬ siˬ tsawˇ gahˇ hawˇ-eu gʼaˬ, taˬ huiˬ taˬ mahˇ nehˬ-eu jeˬ, yaw shehꞈkʼahˬsehˇ huiˬ-eu jeˬ, ja ceuˬ nehˬ-eu jeˬ, heu deuˬ-ahˇ za geuˇ-eu meh.

Panmaeq 5:3

Ehˇ kʼawꞈ, mˬ kʼoeˇ taˆ maˬ ehˇ, miˇ tsaˬ kʼoeˇ taˆ maˬ ehˇ, miˇ oˆ kʼahˬ-ahˇ maˬ ehˇ, sahˬ boꞈ paˇ yoˆ kʼoeˇ-ahˇ pah haw nya-eu tiˬ gʼaˬ-iˬ maˬ jawˇ-a.

Panmaeq 5:6

Kʼoeˇ naˇ, jeˬ zaˬ kʼoeˇ oeˬ mawˇ hawˇ-eu aˬ yuiꞈ aˬ tsu kʼoeˇ deuˬ tiˬ jawˬ jawˇ luꞈ-eu gʼahˇ ceh jaˆ-eu dzoeˬ dzaˬ nuiˇ mahˬ kʼoeˇ taˆ, Yawˇzaˬ yawꞈ luꞈ gaˇ ya mawˇ-euˬ ma. Yawˇzaˬ kʼoeˇ-aˬ, bi sehꞈ-euˬ gaˇ duˇ-eu meh. Uˬ coeˇ shiꞈ coeˇ tsoꞈ-awˇ, myaˆ nuiˆ shiꞈ nuiˆ tsoꞈ-eu meh. Kʼoeˇ-aˬ, miˇ tsaˬ doe ni pyehˬ taˬ-euˬ Miˬyehˇ-euˬ yaw sahˇ shiꞈ sahˇ pyeuꞈ-eu meh.

Panmaeq 5:9

Aˬ yawꞈ maꞈ caˇ dawˬ yaw shuiꞈ heu loꞈ-ehˇ caˇ-eu meh. “Sehꞈ-eu jeˬ-ahˇ nawˇ ya daˬ-awˇ, gʼawˇ mawˇ lawˇ dah nehˬ-eu laꞈ kʼoeˇ, miˇ tsaˬ tsawˇ jeuˬ tsawˇ ca dawˬ tawˆ, Miˬyehˇ jawˇ gaˇ gʼoꞈ keuˆ laˇ ni, nawˇ sheuˬ kʼoꞈ ha nehˬ-euˬ miˇ neh, sahˬ boꞈ paˇ yoˆ-ahˇ nawˇ yuˇ-awˇ, jmˬ diˬ taˬ-euˬ ngawˬ paˆ nya ni, nawˇ mˇ geuˇ-eu gʼaˬ pyeuꞈ-eu meh.

Panmaeq 6:16

Gawˬ jawˬ hawˇ-eu lo guˇ deuˬ-ahˇ aˬ yawꞈ maꞈ guˇ guˇ-ehˇ ehˇ-eu, “Nga maꞈ kʼoeˇ taˆ byaˆ tehˬ le-awˇ, dzoeˬ dzaˬ nuiˇ mahˬ kʼoeˇ taˆ nuiˇ luꞈ-eu gʼaˬ-euˬ myaˆ nuiˆ hawˇ-eu, Yawˇzaˬ-euˬ nui ma pehˇ-eu jeˬ-ahˇ maˬ bi mawˇ ni dehˬ kaˬ nehˬ laꞈ-awˬ.